Anpiyas Ua Vajntxwv Kav Yahdah

(2 Vaj Keeb Kwm 13:1-14:1)

1 Xyoo kaum yim uas Nenpas tus tub Yelaunpau‑as ua vajntxwv kav mas Anpiyah pib kav Yahdah tebchaws.

2 Nws nyob hauv Yeluxalees kav tau peb xyoos. Nws niam npe hu ua Ma‑akhas uas yog Anpisaloos tus ntxhais.

3 Anpiyah ua txhua yam kev txhaum ib yam li nws txiv tau ua. Nws lub siab tsis ncaj tsis dawb huv rau (יחוח)Yahweh uas yog nws Tus Tswv, tsis thooj li Daviv uas yog nws yawg koob lub siab.

4 Txawm li cas los xij, yog saib rau Daviv mas (יחוח)Yahweh uas yog nws Tus Tswv thiaj li pub ib lub teeb rau Anpiyah kom ci rau hauv Yeluxalees, nws thiaj tsa Anpiyah ib tug tub sawv nws chaw ua vajntxwv thiab tsom kwm Yeluxalees nyob ruaj,

5 vim yog Daviv ua tej uas (יחוח)Yahweh pom tias zoo thiab tag nws sim neej nws tsis tseg ib yam uas (יחוח)Yahweh hais rau nws es nws yuav tsis ua li, tsuas yog qhov uas nws ua rau Uliyah uas yog tibneeg Hithais xwb.

6 Lehaunpau‑as caj ces thiab Yelaunpau‑as sib ua rog tsis tu mus tag Anpiyah sim neej.

7 Lwm yam haujlwm uas Anpiyah ua thiab txhua yam uas nws ua mas twb muab sau cia rau hauv phau ntawv uas hais txog cov Yahdah tej vajntxwv li keeb kwm lawm. Anpiyah thiab Yelaunpau‑as kuj sib ua rog.  

8 Anpiyah tuag mus nrog nws tej poj koob yawm txwv nyob.  Lawv muab nws faus rau hauv Daviv lub nroog, mas nws tus tub Axas sawv nws chaw ua vajntxwv kav.

​

Axas Ua Vajntxwv Kav Yahdah

(2 Vaj Keeb Kwm 15:16-16:14)

9 Xyoo nees nkaum uas Yelaunpau‑as ua vajntxwv kav Ixayees tebchaws mas Axas pib ua vajntxwv kav Yahdah tebchaws.

10 Nws nyob hauv Yeluxalees kav tau plaub caug ib xyoos. Nws niam npe hu ua Ma‑akhas uas yog Anpisaloos tus ntxhais.

11 Axas ua tej uas (יחוח)Yahweh pom tias zoo ib yam li nws yawg suab Daviv tau ua.

12 Nws muab cov txiv neej muag cev ntawm tsev dab ntxuav pov tseg kom ploj hauv lub tebchaws mus thiab rhuav tshem tej dab mlom uas thaum ub nws tej poj koob yawm txwv tau ua cia lawm huvsi pov tseg.

13 Thiab nws muab nws pog Ma‑akhas hle tsis pub nyob lub rooj poj vaj ntxwv lawm, vim yog nws tau ua ib tug dab mlom qias vuab tsuab los teev tus dab Aselas. Thiab Axas muab nws pog tus dab mlom ntawd ntov pov tseg coj mus hlawv rau ntawm lub hav Khiloos,

14 tiamsis tsis tau rhuav tshem tej chaw siab teev dab. Txawm li ntawd los nws lub siab yeej xib rau (יחוח)Yahweh mus tag nws sim neej uas ua vajntxwv.  

15 Nws muab tej nyiaj tej kub tej twj siv uas nws thiab nws txiv tau yeem lus xyeem rau (יחוח)Yahweh lawd coj los cia rau hauv (יחוח)Yahweh lub tuam tsev.

16 Axas thiab Npa‑asas uas ua vajntxwv kav Ixayees tebchaws sib ua rog mus tag nkawv sim neej li.  

17 Cov Ixayees tus vajntxwv Npa‑asas mus ua rog rau cov Yahdah. Nws ua lub moos Lamas los tav kev kom tsis pub ib tug nkag mus cuag tau cov Yahdah tus vajntxwv Axas thiab tsis pub ib tug tawm los tau.

18 Ces Axas txawm muab tej nyiaj tej kub uas tseem tshuav hauv (יחוח)Yahweh lub tuam tsev thiab tej nyiaj tej kub uas tseem tshuav hauv vajntxwv lub tsev rau nws cov tub teg tub taws, mas txib lawv coj mus cuag cov Alas tus vajntxwv Npeehadas uas nyob hauv lub nroog Damaxakas. Nws yog Thalimoos tus tub, yog Hexi‑oos tus xeeb ntxwv.

19 Lawv hais tias, thov koj nrog kuv cog lus sib raug zoo ib yam li kuv txiv thiab koj txiv tau ua los lawd. Kuv xa cov nyiaj thiab kub no tuaj ua tshav ntuj pub rau koj es thov koj mus rhuav tej lus uas nrog Ixayees tus vajntxwv Npa‑asas cog lus sib raug zoo lawd tseg, xwv nws thiaj thim tub rog ntawm kuv mus.

20 Ces Npeehadas kuj mloog vajntxwv Axas hais. Nws txawm tso thawj rog mus ntaus cov Ixayees tej moos, thiab lawv ntaus yeej lub moos Iyoos, Daj thiab Anpees Npe-Ma‑akhas thiab tag nrho ib cheeb tsam Khinelaus thiab tag nrho Nathalis tebchaws.

21 Thaum Npa‑asas hnov tej xwm ntawd nws txawm tseg tsis ua lub moos Lamas, nws mus nyob rau hauv lub moos Thilaxas.

22 Ces vajntxwv Axas txawm tshaj tawm rau cov Yahdah sawvdaws tsis tseg ib tug li mas lawv mus muab tej pob zeb thiab tej ntoo uas Npa‑asas ua lub moos Lamas ntawd coj mus. Vajntxwv Axas siv tej ntawd ua lub moos Kenpas hauv Npeeyamees teb chaws thiab lub moos Mixapas.

23 Lwm yam haujlwm uas vajntxwv Axas ua, thiab nws lub hwjchim huvsi thiab txhua yam uas nws ua thiab tej moos uas nws ua lawd mas twb muab sau cia rau hauv phau ntawv uas hais txog cov Yahdah tej vajntxwv li keeb kwm lawm. Thaum nws laus lawd nws txawm mob txhais kotaw.

24 Axas tuag mus nrog nws tej poj koob yawm txwv nyob. Lawv muab nws faus rau hauv nws yawg suab Daviv lub nroog, mas nws tus tub Yahsafas sawv nws chaw ua vajntxwv kav.

​

Nadas Ua Vajntxwv Kav Ixayees

25 Xyoos ob uas Axas ua vajntxwv kav Yahdah mas Yelaunpau‑as tus tub Nadas pib ua vajntxwv kav Ixayees, nws kav Ixayees tau ob xyoos.

26 Nadas ua tej uas (יחוח)Yahweh pom tias phem thiab nws taug nws txiv tus hneev taw ua txhaum thiab coj cov Ixayees ua txhaum.

27 Ahiyah tus tub Npa‑asas uas yog xeem Ixakhas ntaus tswvyim txo Nadas.

Mas Npa‑asas muab vajntxwv tua ntawm Kinpethoos uas yog cov Filixatees lub moos rau thaum Nadas thiab cov Ixayees tab tom vij ntaus lub moos Kinpethoos.

28 Ua li no mas xyoo peb uas Axas ua vajntxwv kav Yahdah, Npa‑asas thiaj tua tau Nadas thiab sawv nws chaw ua vajntxwv kav cov Ixayees.

29 Thaum nws tau ua vajntxwv nws muab Yelaunpau‑as caj ces tua tag huvsi tsis tseg ib tug dim ciaj li.  Nws muab ua puam tsuaj tag huvsi raws li tej lus uas (יחוח)Yahweh tau kom nws tus tub qhe Ahiyah uas nyob hauv lub moos Silaus hais cia lawd.  

30 Vim yog tim tej kev txhaum uas Yelaunpau‑as tau ua thiab nws tau coj cov Ixayees ua txhaum thiab tim qhov uas nws ua rau (יחוח)Yahweh uas yog cov Ixayees Tus Tswv chim kawg.  

31 Lwm yam haujlwm uas Nadas ua thiab txhua yam uas nws ua mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

32 Axas thiab Npa‑asas uas ua Ixayees tus vajntxwv yeej ua rog mus tag nkawv sim neej.

​

Npa‑asas Ua Vajntxwv Kav Ixayees 

33 Xyoo peb uas Axas ua vajntxwv kav Yahdah mas Ahiyah tus tub Npa‑asas pib ua vajntxwv kav cov Ixayees sawvdaws, nws nyob hauv lub moos Thilaxas kav tau nees nkaum plaub xyoos.

34 Nws ua tej uas (יחוח)Yahweh pom tias phem thiab taug nraim Yelaunpau‑as tus hneev taw ua txhaum thiab coj cov Ixayees ua txhaum.