1 (יחוח)Yahweh hais lus tuaj rau Hananis tus tub Yahus, yog hais tawm tsam Npa‑asas tias,

2 kuv muab koj tsa sawv hauv cov hmoov av los ua thawj kav kuv cov tibneeg Ixayees, tiamsis koj taug nraim Yelaunpau‑as tus hneev taw ua txhaum thiab tau coj kuv cov tibneeg Ixayees ua txhaum, mas lawv tej kev txhaum ua rau kuv chim kawg.

3 Vim li no kuv yuav muab Npa‑asas thiab nws caj ces ntxuav kom tu noob nrho ua rau koj caj ces ib yam nkaus li Nenpas tus tub Yelaunpau‑as caj ces.

4 Npa‑asas caj ces tus twg tuag rau hauv moos dev yuav noj, tus twg

tuag tom hav nroj liaj dav saum nruab ntug yuav noj.

5 Lwm yam haujlwm uas Npa‑asas ua thiab txhua yam uas nws ua thiab nws lub hwjchim mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

6 Npa‑asas tuag mus nrog nws tej poj koob yawm txwv nyob, lawv muab nws faus rau hauv lub moos Thilaxas. Ces nws tus tub Elas sawv nws chaw ua vajntxwv kav.

7 Thiab (יחוח)Yahweh hais lus tuaj rau Hananis tus tub Yahus uas yog xibhwb cev (יחוח)Yahweh lus, yog hais txog Npa‑asas thiab nws caj ces, rau qhov txhua yam uas nws ua mas (יחוח)Yahweh pom tias phem. Nws tes haujlwm zoo ib yam li Yelaunpau‑as caj ces tes haujlwm, thiab vim nws tau muab Yelaunpau‑as caj ces ua puam tsuaj tag, mas ua rau (יחוח)Yahweh chim kawg.

​

Elas Ua Vajntxwv Kav Ixayees

8 Xyoo nees nkaum rau uas Axas ua vaj ntxwv kav Yahdah mas Npa‑asas tus tub Elas sawv kav Ixayees, nws nyob hauv lub moos Thilaxas kav tau ob xyoos.

9 Xilis uas yog vajntxwv ib tug thawj rog kav cov tsheb ua rog ib nrab tau ntaus tswvyim ntxeev siab rau Elas.  Mas Elas nyob hauv lub moos Thilaxas haus cawv hauv Alaxas lub tsev qaug heev. Alaxas yog tus uas kav vajntxwv lub vaj lub tsev hauv Thilaxas.

10 Ces Xilis txawm tuaj muab vajntxwv tua tuag, rau xyoo nees nkaum xya uas Axas ua vajntxwv kav cov Yahdah. Ces Xilis txawm sawv Elas chaw ua vajntxwv kav.

11 Thaum Xilis pib ua vaj ntxwv kav, thaum nws mus nyob saum lub zwm txwv mas nws muab Npa‑asas caj ces tua tag huvsi, nws tsis tseg Npa‑asas ib tug kwvtij lossis ib tug kwv luag ciaj sia li.

12 Xilis muab Npa‑asas caj ces ua puam tsuaj tag huvsi raws li tej lus uas (יחוח)Yahweh tau txib Yahus uas ua xibhwb cev (יחוח)Yahweh lus hais txog Npa‑asas lawd.

13 Vim yog tim tej kev txhaum uas Npa‑asas tau ua thiab nws tus tub Elas tau ua, thiab nkawv tau coj cov Ixayees ua txhaum, thiab tim nkawv tej dab mlom uas ua rau (יחוח)Yahweh uas yog cov Ixayees Tus Tswv chim kawg.

14 Lwm yam haujlwm uas Elas ua thiab txhua yam uas nws ua mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

​

Xilis Ua Vajntxwv Kav Ixayees

15 Xyoo nees nkaum xya uas Axas ua vaj ntxwv kav Yahdah mas Xilis ua vajntxwv kav tau xya hnub hauv lub moos Thilaxas. Mas thaum ntawd Ixayees cov tub rog tab tom vij ntaus lub moos Kinpethoos uas yog cov Filixatees ib lub moos.

16 Mas cov tub rog hauv lub yeej ntawd hnov xov tias, Xilis tau ntxeev siab thiab muab vajntxwv Elas tua lawm. Ces cov Ixayees sawvdaws thiaj tsa Oolis uas ua thawj kav tub rog sawv ua vajntxwv kav cov Ixayees hnub ntawd rau hauv lub yeej.

17 Oolis thiaj tawm ntawm Kinpethoos mus thiab cov Ixayees sawvdaws kuj nrog nws mus vij ntaus lub moos Thilaxas.

18 Thaum Xilis pom tias Oolis lawv txeeb tau lub moos lawm ces nws txawm nkag rau hauv lub chaw ruaj khov hauv nruab nrab vajntxwv lub tsev, ces nws txawm muab vajntxwv lub tsev ntawd hlawv, nws kub nyhiab tuag rau hauv lawm.

19 Qhov uas nws tuag li ntawd yog vim tej kev txhaum uas nws ua, yog nws ua tej uas (יחוח)Yahweh pom tias phem thiab nws taug nraim Yelaunpau‑as tus hneev taw ua txhaum thiab coj cov Ixayees ua txhaum.

20 Lwm yam haujlwm uas Xilis ua thiab qhov uas nws ntaus tswvyim ntxeev siab twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

​

Oolis Ua Vajntxwv Kav Ixayees

21 Ces cov Ixayees txawm faib kiag ua ob pab, ib pab tuaj Kinas tus tub Thinis tog yuav tsa nws ua vajntxwv, ib pab tuaj Oolis tog.

22 Tiamsis cov uas tuaj Oolis tog tua yeej cov uas tuaj Kinas tus tub Thinis tog mas Thinis thiaj tuag lawm ces Oolis thiaj sawv kiag ua vajntxwv.

23 Xyoo peb caug ib uas Axas ua vajntxwv kav Yahdah mas Oolis pib ua vajntxwv kav Ixayees, nws kav tau kaum ob xyoos. Nws nyob hauv lub moos Thilaxas kav tau rau xyoo.

24 Nws yuav lub roob Xamalis ob talas nyiaj ntawm Semaws, thiab nws ua ntsa loog ruaj khov rau saum lub roob ntawd thiab muab ua ib lub nroog tis npe hu ua Xamalis raws li lub roob ntawd tus tswv Semaws lub npe.

25 Oolis tau ua tej uas (יחוח)Yahweh pom tias phem kawg li, nws ua phem heev dua tej vajntxwv uas nyob ua nws ntej.  

26 Rau qhov nws taug nraim Nenpas tus tub Yelaunpau‑as tus hneev taw ua txhaum thiab coj cov Ixayees ua txhaum, yog lawv ua tej dab mlom thiaj ua rau (יחוח)Yahweh uas yog cov Ixayees Tus Tswv chim kawg.

27 Lwm yam haujlwm uas nws ua thiab tus peevxwm uas nws ua tau mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.  

28 Oolis tuag mus nrog nws tej poj koob yawm txwv nyob. Lawv muab nws faus rau hauv lub nroog Xamalis, nws tus tub Ahaj sawv ua vajntxwv nyob nws chaw.

 

Ahaj Ua Vajntxwv Kav Ixayees 

29 Xyoo peb caug yim uas Axas ua vajntxwv kav Yahdah mas Oolis tus tub Ahaj pib ua vajntxwv kav Ixayees, nws nyob hauv lub nroog Xamalis kav tau nees nkaum ob xyoos.

30 Oolis tus tub Ahaj kuj ua tej uas (יחוח)Yahweh pom tias phem heev dua li lwm tus vajntxwv uas nyob ua nws ntej thiab.

31 Qhov uas Ahaj ua txhaum ib yam li Nenpas tus tub Yelaunpau‑as tseem yog qhov me xwb, qhov txhaum loj dua li ntawd yog nws mus yuav cov Xaidoos tus vajntxwv Enpa‑as tus ntxhais Yexenpees thiab mus pe teev dab Npa‑as.

32 Nws ua ib lub thaj xyeem rau Npa‑as rau hauv lub tsev uas nws ua teev dab Npa‑as rau hauv lub nroog Xamalis.

33 Thiab Ahaj ua ib tug ncej dab Aselas. Ahaj ua tej kev phem kev txhaum ua rau (יחוח)Yahweh uas yog cov Ixayees Tus Tswv chim kawg, nws ua heev dua tej vajntxwv uas kav Ixayees nyob ua nws ntej ua.

34 Lub sijhawm uas nws ua vajntxwv ntawd, Hi‑ees uas yog tibneeg Npe‑ees rov ua lub moos Yelikhaus dua. Thaum nws ua tej taw tiag lub moos ntawd, nws tus tub hlob Anpilas thiaj tuag. Thaum nws ua tej rooj loog nws tus tub ntxawg Xekus thiaj tuag, raws li tej lus uas (יחוח)Yahweh txib Noos tus tub Yahshua hais lawd.