1 VAJNTXWV 17

Eliyah Thiab Ntuj Qhuav

1 Eliyah uas yog tibneeg Thinpis nyob hauv lub moos Thinpis hauv Kile‑as tebchaws hais rau Ahaj tias, muaj cov Ixayees Tus Tswv uas kuv ua koom tu muaj txojsia nyob pom, ob peb xyoos tom ntej no yeej yuav tsis muaj lwg tsis muaj nag los li tsuas yog kuv hais kom muaj ces thiaj muaj xwb.

2 Ces (יחוח)Yahweh hais lus tuaj rau Eliyah tias,

3 cia li tawm ntawm no mus rau sab hnub tuaj, mus nraim cev rau ntawm ntug dej Khelis uas nyob ntawm tus dej Yaladees sab hnub tuaj.

4 Koj yuav haus tus dej ntawd thiab kuv twb hais kom cov uab lag tuaj yug koj qhov ntawd lawm.

5 Ces Eliyah txawm mus thiab ua raws li (יחוח)Yahweh hais. Nws mus nyob ntawm ntug dej Khelis uas nyob ntawm tus dej Yaladees sab hnub tuaj.

6 Ces thaum sawv ntxov thiab thaum tsaus ntuj uab lag txawm kwv ncuav thiab nqaij tuaj rau nws noj, thiab nws haus tus dej ntawd.

7 Ces tsis ntev tus dej ntawd txawm qhuav vim yog nag tsis los rau hauv lub tebchaws li.

​

Eliyah Thiab Tus Poj Ntsuam Hauv Xalefas

8 Mas (יחוח)Yahweh hais lus tuaj rau Eliyah tias,

9 cia li sawv tsees mus rau lub moos Xalefas uas zwm rau lub moos Xaidoos thiab nyob qhov ntawd. Kuv twb hais kom ib tug poj ntsuam uas nyob qhov ntawd yug koj lawm.

10 Nws txawm sawv tsees mus rau lub moos Xalefas.  Thaum nws mus txog ntawm rooj loog ua ciav ib tug poj ntsuam tab tom khaws taws.  Nws txawm hais rau tus pojniam ntawd tias, thov koj nqa ib khob dej tuaj rau kuv, kuv thiaj li tau haus.

11 Thaum tus pojniam ntawd yuav mus nqa dej tuaj, nws txawm hu tus pojniam ntawd tias, thov coj ib qho ncuav hauv txhais tes tuaj rau kuv thiab.

12 us pojniam ntawd teb tias, muaj (יחוח)Yahweh uas yog koj Tus Tswv muaj txojsia nyob pom, kuv tsis muaj cov ncuav uas cub lawm, tsuas muaj ib taus tes hmoov hauv lub tais thiab mentsis roj hauv lub lam hwj xwb. Nimno kuv tab tom khaws mentsis taws no coj mus npaj rau kuv thiab kuv tus tub wb noj tag es yuav tuag.

13 Eliyah txawm hais rau nws tias, koj tsis txhob ntshai, cia li mus ua raws li koj hais. Tiamsis koj cia li ua ib lub nyuag ncuav me me coj tuaj rau kuv tso, mam li ua rau koj thiab koj tus tub.

14 Rau qhov (יחוח)Yahweh uas yog cov Ixayees Tus Tswv hais li no tias, cov hmoov hauv lub tais yuav tsis tag, cov roj hauv lub lam hwj yuav tsis tu mus txog hnub uas (יחוח)Yahweh tso nag los rau hauv lub tebchaws.

15 Tus pojniam ntawd txawm mus ua raws li Eliyah hais. Mas Eliyah thiab tus pojniam ntawd thiab nws tsev neeg kuj noj tau ntau hnub.

16 Cov hmoov hauv lub tais kuj tsis tag, cov roj hauv lub lam hwj kuj tsis tu, raws li (יחוח)Yahweh tej lus uas nws hais rau Eliyah.  

17 Dhau ntawd los tus pojniam uas yog tswv tsev ntawd tus tub txawm mob mas mob nyhav heev tsis muaj sia lawm.

18 Nws txawm hais rau Eliyah tias, Au (יחוח)Yahweh tus tibneeg, kuv thab txog koj abtsi? Koj tuaj rau ntawm kuv ua kom nco txog kuv tej kev txhaum es ua rau kuv tus tub tuag.  

19 Eliyah hais rau nws tias, muab koj tus tub los rau kuv. Nws txawm muab tus tub ntawd hauv tus pojniam xub ntiag puag nkaus nce mus rau txheej tsev sab sauv, hauv lub txaj uas nws nyob, thiab muab tso pw rau saum nws lub txaj.

20 Eliyah thov hu (יחוח)Yahweh hais tias, Au (יחוח)Yahweh uas yog kuv Tus Tswv koj coj tej xwm txheej phem los raug tus poj ntsuam uas kuv nrog nws nyob no es muab nws tus tub tua pov tseg lov?

21 Ces nws txawm pw tsuam tus menyuam ntawd peb zaug, thiab quaj thov (יחוח)Yahweh tias, Au (יחוח)Yahweh uas yog kuv Tus Tswv, thov tus menyuam no tus ntsuj plig rov los rau hauv nws.

22 (יחוח)Yahweh mloog Eliyah tej lus thov, mas tus menyuam tus ntsug plig thiaj rov los rau hauv nws, nws thiaj rov ciaj sia.

23 Ces Eliyah txawm puag tus menyuam nqis txheej sauv los rau hauv lub tsev thiab muab tus menyuam rau leej niam.  Eliyah hais tias, saib nawb, koj tus tub tseem muaj txojsia nyob.

24 Tus pojniam ntawd hais rau Eliyah tias, nimno kuv paub tseeb tias koj yog (יחוח)Yahweh tus tibneeg, thiab (יחוח)Yahweh tej lus uas nyob hauv koj lub qhov ncauj muaj tseeb.