Eliyah Rov Mus Ntsib Ahaj

1 Tau ntau hnub tom qab (יחוח)Yahweh hais lus tuaj rau Eliyah rau xyoo uas peb tias, cia li mus tshwm plaws rau Ahaj pom koj, mas kuv yuav tso nag los rau hauv lub tebchaws.

2 Eliyah kuj mus yuav tshwm rau Ahaj pom.  Tej kev tshaib nqhis ntawd nyhav kawg rau hauv Xamalis tebchaws.

3 Ahaj txawm hu Obadyah uas yog tus thawj saib vajntxwv tsev tuaj cuag nws. Obadyah hwm (יחוח)Yahweh heev.

4 Thaum Yexenpees tua (יחוח)Yahweh cov xibhwb cev lus, Obadyah coj ib puas tus xibhwb mus zais rau hauv tej qhov tsua mas ib lub qhov tsua, nws tso tsib caug leej nyob rau hauv, thiab muab ncuav muab dej yug lawv.  

5 Ahaj hais rau Obadyah tias, cia li mus rau txhua lub qhov dej txhawv thiab txhua lub hav thoob plaws lub tebchaws. Tej zaum wb yuav nrhiav tau zaub los cawm tej nees, tej luj txwv txojsia thiab tej tsiaj thiaj tsis tuag.

6 Yog li ntawd nkawv thiaj li muab lub tebchaws faib rau nkawv mus nrhiav. Ahaj thiaj mus dua ib txojkev, Obadyah mus dua ib txojkev.

7 Thaum Obadyah tab tom taug kev mus, ua ciav Eliyah tuaj ntsib nws. Obadyah cim tau nws ces txawm khwb nkaus pe nws hais tias, kuv Tus Tswv Eliyah, yog koj tiag lov?

8 Eliyah teb tias, yog kuv ntag.  Koj cia li mus hais rau koj tus tswv tias, Eliyah nyob ntawm no.

9 Obadyah hais tias, kuv ua txhaum abtsi es koj yuav muab kuv uas yog koj tus tub qhe rau hauv Ahaj txhais tes rau nws tua pov tseg?

10 Muaj (יחוח)Yahweh uas yog koj Tus Tswv muaj txojsia nyob pom, tsis muaj ib haiv neeg lossis ib lub tebchaws twg uas kuv tus tswv tsis txib tibneeg mus nrhiav koj hauv li. Thiab thaum haiv neeg twg lossis lub teb chaws twg hais tias, Eliyah tsis nyob ntawm no, mas Ahaj yuav kom haiv neeg ntawd lossis lub tebchaws ntawd cog lus twv tias lawv tsis dag nws.

11 Nimno koj tseem hais tias, cia li mus hais rau koj tus tswv tias, Eliyah nyob ntawm no.

12 Ces thaum kuv tawm ntawm koj mus lawd, (יחוח)Yahweh Tus Ntsuj Plig Dawb Huv yuav coj koj mus rau qhov twg kuv tsis paub. Yog li ntawd, thaum kuv mus hais rau Ahaj es nws tuaj nrhiav tsis tau koj, ces nws yuav muab kuv tua pov tseg xwb, txawm yog kuv uas yog koj tus tub qhe tau hwm (יחוח)Yahweh txij thaum hluas los kuj xij.

13 Tsis muaj leejtwg hais rau koj uas yog kuv Tus Tswv paub tias kuv tau ua abtsi rau thaum Yexenpees tua (יחוח)Yahweh cov xibhwb uas cev lus lov? Kuv muab (יחוח)Yahweh cov xibhwb ntawd ib puas leej zais rau hauv tej qhov tsua mas ib lub qhov tsua kuv tso tsib caug leej nyob rau hauv, thiab muab ncuav muab dej yug lawv.   

14 Nimno koj hais tias, cia li mus hais rau koj tus tswv tias, Eliyah nyob ntawm no, ces vajntxwv yuav muab kuv tua pov tseg.  

15 Mas Eliyah hais tias, (יחוח)Yahweh uas muaj hwjchim loj kawg nkaus uas kuv ua koom tu muaj txojsia nyob pom, hnub no kuv yeej yuav tshwm plaws rau Ahaj pom.  

16 Obadyah thiaj mus cuag Ahaj thiab qhia nws paub. Ces Ahaj txawm mus ntsib Eliyah.  

17 Thaum Ahaj pom dheev Eliyah, Ahaj hais rau nws tias, no yog koj, tus uas ua ceeblaj rau cov Ixayees lov?

18 Mas Eliyah teb tias, tsis yog kuv ua kev ceeblaj rau cov Ixayees, yog koj ua ntag thiab koj txiv tsev neeg ua, rau qhov nej tau tso

(יחוח)Yahweh tej lus cob qhia tseg mus raws kua tej dab Npa‑as.

19 Vim li no koj cia li xa xov thiab sau cov Ixayees sawvdaws tuaj ua ke cuag kuv rau saum lub roob Khamees, thiab hu plaub puas tsib caug tus txiv neeb uas teev dab Npa‑as thiab plaub puas tus txiv neeb uas teev dab Aselas tuaj, yog cov uas nrog Yexenpees koom rooj noj haus ua ke.

​

Sib Twv Saum Lub Roob Khamees

20 Ahaj txawm xa xov mus thoob plaws cov Ixayees sawvdaws thiab sau zog cov txiv neeb tuaj ua ke rau saum lub roob Khamees.

21 Eliyah txawm txav los ze rau ntawm cov pejxeem sawvdaws thiab hais tias, nej tseem yuav ua siab ywj fab ywj fwj rau ob tog mus ntev li cas? Yog (יחוח)Yahweh yog Tus Tswv, cia li raws nws qab mus. Yog dab Npa‑as yog Tus Tswv, cia li raws nws qab mus. Cov pejxeem tsis teb nws ib los li.

22 Ces Eliyah txawm hais rau cov pejxeem tias, kuv mas tshuav kuv tib leeg yog (יחוח)Yahweh tus xibhwb cev lus xwb.  Tiamsis Npa‑as cov txiv neeb muaj plaub puas tsib caug leej.

23 Thov muab ob tug txiv nyuj rau peb.  Cia lawv xaiv ib tug rau lawv, muab txiav ua tej ywb yav thiab muab tso rau saum cub tawg, tiamsis tsis txhob rauv taws.  Thiab kuv yuav npaj dua ib tug txiv nyuj tso rau saum cub tawg thiab tsis rauv taws.

24 Nej cia li hu nej tus dab lub npe thov mas kuv yuav hu (יחוח)Yahweh lub npe thov. Saib tus twg tso hluavtaws los teb mas tus ntawd thiaj yog (יחוח)Yahweh tiag. Cov pejxeem sawvdaws teb tias, ua li uas hais kod zoo lawm.

25 Eliyah hais rau dab Npa‑as cov txiv neeb tias, nej cia li xaiv ib tug txiv nyuj rau nej thiab npaj ua ntej, rau qhov nej muaj coob leej.  Nej cia li thov hu nej tus dab lub npe, tiamsis tsis txhob rauv taws.

26 Lawv txawm coj tus txiv nyuj uas muab rau lawv los thiab npaj thiab hu dab Npa‑as lub npe thaum sawv ntxov mus txog tav su thov hais tias, Au Npa‑as, thov teb peb lauj! Tiamsis tsis muaj ib lub suab tsis muaj leejtwg teb kiag li.  Lawv dhia ua nchia taw puag ncig lub thaj uas lawv ua ntawd.

27 Thaum tav su Eliyah hais twm lawv tias, hu nrov nrov maj, rau qhov nws yog ib tug timtswv. Tej zaum nws lub siab yuj mus rau lwm qhov lawm lossis nws mus tom hav nroj lossis mus kev deb lawm, lossis tej zaum nws tseem tsaug zog thiab nej yuav tau tsa nws sawv.

28 Lawv kuj qw nrov nrov, thiab muab ntaj muab hmuv los suam lawv lub cev raws li lawv kevcai ua ntshav los liab pes vog lawv ib ce.

29 Thaum dhau tav su lawd, lawv qw vwm loj vwm leg mus txog lub sijhawm uas teem cia ua kevcai hlawv xyeem los tsis muaj ib lub suab, tsis muaj leejtwg teb, tsis muaj leejtwg quav ntsej li.

30 Ces Eliyah txawm hais rau cov pejxeem sawvdaws tias, cia li txav los ze kuv. Cov pejxeem sawvdaws kuj txav los ze nws. Mas nws kho (יחוח)Yahweh lub thaj uas raug muab rhuav pob tag lawd.

31 Eliyah nqa kaum ob lub pob zeb los npaum li Yakhauj cov tub li xeem, yog tus uas (יחוח)Yahweh hais lus tuaj rau nws tias, koj npe yuav hu ua Ixayees,

32 thiab nws muab cov pob zeb ntawd los teeb ua lub thaj rau (יחוח)Yahweh lub npe. Nws khawb ib tug kwj vij lub thaj txaus ntim ob xe‑as noob qoob.

33 Nws muab taws tso tib zoo thiab muab tus txiv nyuj txiav ua tej ywb yav thiab muab tso rau saum cov taws. Nws hais tias, cia li ntaus dej ntim rau plaub lub hub thiab muab hliv ywg rau saum tej uas yuav hlawv xyeem thiab saum cov taws.  

34 Nws hais tias, cia li rov qab ywg zaum ob. Lawv kuj ywg zaum ob.  Nws hais tias, cia li ywg zaum peb. Lawv kuj ywg zaum peb.  

35 Mas dej ntws nto puag ncig lub thaj thiab puv nkaus tus kwj.

36 Thaum txog lub sijhawm uas teem cia ua kevcai hlawv xyeem, Eliyah uas cev (יחוח)Yahweh lus txav los ze thiab hais tias, Au (יחוח)Yahweh uas yog Anplaham, Ixaj thiab Ixayees Tus Tswv, hnub no thov qhia sawvdaws paub tias koj yog Tus Tswv uas muaj hwjchim loj kawg nkaus hauv cov Ixayees thiab paub tias kuv yog koj tus tub qhe thiab kuv ua tej no huvsi raws li koj tej lus.

37 Thov teb kuv, Au (יחוח)Yahweh, thov teb kuv, xwv cov tibneeg no thiaj paub tias (יחוח)Yahweh yog Tus Tswv uas muaj hwjchim loj kawg nkaus thiab koj ua kom lawv lub siab tig rov los.

38 Ces (יחוח)Yahweh tso hluavtaws poob los kub tej uas muab ua kevcai hlawv xyeem thiab kub cov taws thiab tej pob zeb thiab tej hmoov av thiab ua cov dej hauv tus kwj qhuav tag.

39 Thaum cov tib neeg sawvdaws pom tej ntawd, lawv kuj khwb nkaus pe thiab hais tias, (יחוח)Yahweh nws yog Tus Tswv, (יחוח)Yahweh nws yog Tus Tswv tiag.

40 Thiab Eliyah hais rau lawv tias, cia li ntes dab Npa‑as cov txiv neeb, tsis txhob cia ib tug khiav dim li.  Mas lawv ntes cov ntawd los, mas Eliyah coj cov ntawd mus rau nram tus dej Khisoos thiab muab tua rau qhov ntawd.

(יחוח)Yahweh Tso Nag Los

41 Eliyah hais rau Ahaj tias, koj cia li mus noj mus haus, rau qhov twb hnov lub suab uas yuav muaj nag hlob hlob los lawm.

42 Ahaj thiaj mus noj haus. Ces Eliyah txawm nce mus rau saum lub ncov roob Khamees.  Nws khoov ntshis rau hauv av lub plhu ti nkaus ob lub hauv caug.

43 Thiab nws hais rau nws tus tub qhe tias, cia li sawv tsees saib mus rau nram hiavtxwv. Nws thiaj sawv tsees mus saib thiab hais tias, tsis muaj abtsi li. Eliyah hais tias, cia li rov mus saib dua xya zaus.  

44 Thaum txog zaum xya, tus tub qhe hais tias, saib nawj, muaj ib qho huab me me dav li lub xib teg tawm hauv hiavtxwv tuaj. Mas Eliyah hais tias, koj cia li mus hais rau Ahaj tias, koj cia li npaj tsheb nees es rov mus tsev

tsam ces nag los tav koj kev.

45 Ib pliag ntshis xwb lub ntuj txawm tsaus ntais muaj huab thiab cua mas nag los hlob heev. Ahaj caij tsheb nees rov qab mus rau lub moos Yile‑ees.

46 (יחוח)Yahweh txhais tes los rau saum Eliyah, nws thiaj qaws kiag tsho rau ntawm duav thiab khiav huas Ahaj ntej xub mus txog ntawm rooj loog Yile‑ees.

​