Eliyah Khiav Mus Rau Lub Roob Haules

1 Ahaj txawm piav txhua yam uas Eliyah ua thiab qhov uas nws xuas ntaj tua cov txiv neeb huvsi rau Yexenpees paub.

2 Ces Yexenpees txawm tso ib tug xa xov mus hais rau Eliyah tias, yog tagkis lub sijhawm no kuv tsis ua rau koj txojsia zoo ib yam li cov uas tu siav ntawd, kuj cia tej dab rau txim rau kuv thiab rau nyhav dua.  

3 Ces Eliyah ntshai heev thiab sawv tsees khiav kom dim txojsia.  Nws mus txog rau lub moos Npe‑awsenpas hauv Yahdah tebchaws thiab tseg nws tus tub qhe nyob qhov ntawd.  

4 Tiamsis nws tib leeg khiav mus ib hnub ke hauv tebchaws moj sab qhua thiab mus zaum hauv ib tsob nyuag qab ntoo ntxhov thiab thov (יחוח)Yahweh cia nws tuag, hais tias, txaus kuv lawm lauj! Au (יחוח)Yahweh, nimno thov koj rho kuv txojsia mus, rau qhov kuv zoo tsis tshaj li kuv tej poj koob yawm txwv.  

5 Ces nws txawm pw tsaug zog rau hauv tsob qab ntoo ntawd, ces txawm muaj ib tug tubtxib saum ntuj los kov nws thiab hais rau nws tias, cia li sawv tsees los noj mov.  

6 Eliyah tsa muag saib ua ciav pom muaj ib lub ncuav ci saum tej pob zeb uas kub lug thiab muaj ib lub nyuag hub dej txawb ncaj ntawm nws taubhau. Nws txawm noj thiab haus ces rov qab pw.

7 (יחוח)Yahweh tus tubtxib saum ntuj kuj rov los dua zaum ob kov nws thiab hais tias, cia li sawv tsees los noj mov, koj thiaj li muaj zog taug txojkev uas koj mus.

8 Nws txawm sawv tsees los noj thiab haus tag mas cov mov ntawd pub nws muaj zog mus tau plaub caug hnub plaub caug hmo li txog (יחוח)Yahweh lub roob Haules.

9 Nws mus txog ib lub qhov tsua ces txawm mus so ib hmos rau hauv.  Mas (יחוח)Yahweh hais lus tuaj rau nws, thiab hais rau nws tias, Eliyah, koj ua abtsi ntawm no?

10 Eliyah hais tias, kuv kub siab lug rau (יחוח)Yahweh uas muaj hwj chim loj kawg nkaus, vim cov Ixayees muab koj tej lus cog tseg tso tseg thiab rhuav tej thaj uas xyeem rau koj pov tseg thiab xuas ntaj tua koj cov xibhwb cev lus. Tsuas tshuav kuv tib leeg xwb los lawv tseem nrhiav txov kuv txojsia thiab.

11 Mas (יחוח)Yahweh hais tias, cia li tawm mus sawv saum lub roob tab meeg (יחוח)Yahweh xub ntiag, vim (יחוח)Yahweh yuav hla los mus. Mas cua ntsawj hlob hlob thiab muaj zog heev ua rau tej roob tawg pleb zom zaws thiab tej pob zeb dhia dawb vog rau ntawm (יחוח)Yahweh xu bntiag, tiamsis (יחוח)Yahweh tsis nyob hauv tej cua ntawd. Dhau tej cua ntawd lawm, av txawm qeeg ua zog koog, tiamsis (יחוח)Yahweh kuj tsis nyob hauv cov av qeeg ua zog koog ntawd thiab. 

12 Dhau av qeeg ua zog koog lawm, kuj muaj hluavtaws, tiamsis (יחוח)Yahweh tsis nyob hauv cov hluavtaws ntawd. Dhau cov hluav taws ntawd lawm muaj ib lub suab hais yau yau tuaj.

13 Thaum Eliyah hnov lawd, nws txawm muab nws lub tsho ntev kauv nws lub ntsej muag tawm mus sawv ntawm roob tsuas, ces txawm muaj ib lub suab hais tuaj rau nws tias, Eliyah, koj ua abtsi ntawm no?

14 Nws teb tias, kuv kub siab lug rau (יחוח)Yahweh uas muaj hwjchim loj kawg nkaus, vim cov Ixayees muab koj tej lus cog tseg tso tseg thiab rhuav tej thaj uas xyeem rau koj pov tseg thiab xuas ntaj tua koj cov xibhwb cev lus.  Tsuas tshuav kuv tib leeg xwb los lawv tseem nrhiav txov kuv txojsia thiab.  

15 Mas (יחוח)Yahweh hais rau nws tias, cia li rov qab taug koj txojkev mus rau hauv tebchaws moj sab qhua ntawm Damaxakas.  Thaum koj mus txog lawd, koj cia li hliv roj tsa Haxa‑ees ua vajntxwv kav Alas tebchaws.  

16 Thiab koj yuav hliv roj tsa Yahus uas yog Nisis tus tub ua vajntxwv kav Ixayees tebchaws. Thiab tsa Elisas uas yog Safas tus tub uas yog tibneeg hauv lub moos Anpees Mehaulas ua xibhwb cev (יחוח)Yahweh lus nyob koj chaw.

17 Mas tus uas dim Haxa‑ees rab ntaj, Yahus yuav muab tua.  Tus uas dim

Yahus rab ntaj, Elisas yuav muab tua.

18 Tiam sis kuv yuav tseg xya txhiab leej hauv cov Ixayees cia, yog txhua lub hauv caug uas tsis tau pe dab Npa‑as thiab txhua lub qhov ncauj uas tsis tau nwj tus dab mlom ntawd.

​

Hu Elisas

19 Eliyah txawm tawm qhov ntawd mus.  Nws mus ntsib Elisas uas yog Safas tus tub tab tom laij teb, muaj kaum ib nkawg nyuj laij ua nws ntej, nws laij nkawm uas kaum ob. Eliyah txawm hla los mus thiab muab nws lub tsho ntev coj mus khwb nkaus rau Elisas.  

20 Elisas txawm tso plhuav nkawm nyuj ntawd tseg khiav raws Eliyah qab thiab hais tias, thov cia kuv mus nwj thiab fim ncaim kuv niam kuv txiv tso kuv li nrog koj mus. Eliyah hais rau nws tias, cia li mus.  Kuv twb ua abtsi rau koj lawm?  

21 Ces Elisas txawm tso qhov uas nws raws Eliyah qab ntawd rov los. Nws muab nws nkawm nyuj tua, muab rab quab los rauv hau nqaij nyuj pub rau tej tibneeg noj. Ces nws txawm sawv tsees raws Eliyah qab mus thiab tu Eliyah.