Ahaj Ntaus Yeej Cov Alas

1 Cov Alas tus vajntxwv Npeehadas sau nws cov tub rog huvsi tuaj ua ke. Muaj peb caug ob tug vajntxwv nrog nws mus thiab nws muaj nees thiab tsheb ua rog.  Nws mus vij lub nroog Xamalis thiab ua rog rau lub nroog ntawd.

2 Nws tso tej tub tshaj xo mus rau hauv cov Ixayees tus vajntxwv Ahaj lub nroog, mus hais rau vajntxwv tias, Npee-hadas hais li no tias,

3 koj tej nyiaj tej kub yog kuv li, koj tej pojniam thiab koj tej menyuam uas zoo kawg yog kuv li.

4 Cov Ixayees tus vajntxwv teb tias, vajntxwv uas yog kuv tus tswv, yeej yog li uas koj hais ntag, kuv yeej yog koj li, tej uas kuv muaj yeej yog koj li.   

5 Cov uas tshaj xo rov qab tuaj hais tias, Npeehadas hais li no tias, kuv twb xa xov rau koj tias koj cia li xa nyiaj, xa kub, xa koj pojniam menyuam tuaj rau kuv.

6 Mas tagkis kwvlam lub sijhawm no, kuv yuav xa kuv cov tub teg tub taws tuaj cuag koj.  Lawv yuav tuaj xawb koj vaj koj tsev thiab xawb koj tej nom tswv tej vaj tse, mas tej uas koj nyiam lawv yuav txeeb coj huvsi mus.

7 Ces Ixayees tus vajntxwv txawm hu cov kev txwj laug hauv lub tebchaws tuaj mas hais tias, sim saib, tus yawg ntawd nrhiav kev tuaj thab plaub rau peb.  Nws tso tibneeg tuaj yuav muab kuv tej pojniam menyuam thiab kuv tej nyiaj tej kub los kuv tsis tawv nyom nws li.

8 Mas cov kev txwj laug thiab cov pejxeem sawvdaws hais rau vajntxwv tias, tsis txhob mloog nws tsis txhob yeem li.

9 Nws thiaj hais rau Npeehadas cov tub tshaj xo tias, nej cia li hais rau vajntxwv uas yog kuv tus tswv tias, txhua yam uas thawj zaug nws kom kuv uas yog nws tus tub qhe muab rau nws ntawd mas kuv muab tau rau nws, tiamsis tej lus uas nws hais zaum tom qab no mas kuv ua tsis tau. Mas cov tub tshaj xo rov mus hais rau Npeehadas li ntawd.

10 Mas Npeehadas xa xov rov tuaj dua hais tias, yog cov hmoov av hauv Xamalis no txaus cov tibneeg uas nrog kuv tuaj ib leeg tsuab ib taus tes, mas thov cia tej dab ntuj dab teb rau txim rau kuv nyhav dua.

11 Mas cov Ixayees tus vajntxwv teb mus tias, cia li hais rau Npeehadas tias, tus uas tseem tab tom muab cuab yeej ua rog hnav tsis txhob khav theeb yam li tus uas twb ua rog tiav es muab cuab yeej ua rog hle lawm.

12 Npeehadas hnov tej lus no rau thaum nws tab tom nrog cov vajntxwv haus cawv txiv hmab ua ke hauv lawv lub tsev ntaub, nws txawm txhib nws cov tub rog tias, cia li npaj kom txhij.  Mas lawv thiaj npaj txhij zog yuav ntaus lub nroog ntag.

13 Muaj ib tug xibhwb cev (יחוח)Yahweh lus tuaj cuag cov Ixayees tus vajntxwv Ahaj thiab hais tias, (יחוח)Yahweh hais li no tias, koj pom cov tub rog coob li no los tsis pom? Saib maj, hnub no kuv yuav muab lawv rau hauv koj txhais tes, koj thiaj yuav paub tias kuv yog (יחוח)Yahweh.

14 Mas Ahaj hais tias, leejtwg yuav mus ntaus? Tus xibhwb hais tias, (יחוח)Yahweh hais li no tias, cov thawj uas kav hauv txhua lub xeev cov tub rog hluas yuav mus ntaus ua ntej.  Ahaj hais tias, tog twg yuav nqis tes ua ntej? Tus xibhwb teb tias, koj tog yuav nqis tes ua ntej.

15 Ahaj thiaj li txhij tau cov thawj uas kav hauv txhua lub xeev cov tub rog hluas muaj ob puas peb caug ob leeg, thiab tom qab txhij tag nrho cov Ixayees cov tub rog huvsi tau xya txhiab leej.

16 Lawv tawm mus rau thaum tav su mas Npeehadas thiab peb caug ob tug vajntxwv uas pab nws tab tom haus cawv qaug rau hauv tej tsev ntaub.

17 Cov thawj hauv txhua lub xeev cov tub rog hluas xub ua ntej mus. Npeehadas kuj xa ib co mus tshuaj saib mas lawv rov qab los hais rau nws tias, muaj tibneeg tawm hauv Xamalis tuaj lawm.  

18 Nws hais tias, yog lawv tuaj dawb tuaj huv kuj muab lawv ntes ciaj cia. Yog lawv tuaj ua rog kuj muab lawv ntes ciaj cia thiab.

19 Mas cov thawj hauv txhua lub xeev cov tub rog thiaj li tawm hauv lub nroog mus, thiab cov tub rog sawvdaws kuj tawm raws qab mus.

20 Ib leeg tua ib tug yeeb ncuab ces cov Alas txawm thim khiav mas cov Ixayees caum lawv mus.  Cov Alas tus vajntxwv Npeehadas txawm caij nees nrog cov tub rog caij nees khiav mus lawm.

21 Cov Ixayees tus vajntxwv tawm mus ntaus yeej cov nees thiab cov tsheb ua rog thiab tua tau cov Alas tuag coob kawg li.

22 Mas tus xibhwb cev (יחוח)Yahweh lus thiaj tuaj cuag cov Ixayees tus vajntxwv thiab hais rau nws tias, cia li rov qab mus tsev mus npaj zog thiab ntaus tswvyim zoo zoo saib yuav ua li cas, rau qhov lwm xyoo thaum txog lub caij ntuj nag, vajntxwv Alas yuav rov qab tuaj ntaus nej dua thiab.

23 Alas cov tub teg tub taws hais rau vajntxwv tias, cov Ixayees tej timtswv yog tej timtswv nruab roob lawv thiaj muaj zog dua peb. Cia peb mus ntaus lawv rau nram tiaj mas peb yuav muaj zog heev dua lawv.

24 Koj cia li ua li no, muab cov vajntxwv hle huvsi es tsa cov thawj rog nyob lawv chaw.

25 Koj cia li sau tub rog kom tau npaum li qub, thiab sau nees thiab tsheb ua rog ntxiv rau cov uas poob tag lawm, mas peb yuav mus ntaus lawv rau nram tiaj mas peb thiaj yuav muaj zog heev dua lawv. Npeehadas kuj mloog lawv lus thiab ua raws li lawv hais ntawd.

26 Thaum txog lub caij ntuj nag, Npeehadas thiaj li txhij cov Alas ua tub rog nce mus rau lub moos Afes yuav ua rog rau cov Ixayees.

27 Mas cov Ixayees kuj raug sau ua tub rog thiab npaj mov noj mus ua rog rau cov Alas. Cov Ixayees ua yeej nyob yam li ob pab nyuag tshis tsawg tsawg ncaj ntawm cov Alas xub ntiag, tiamsis cov Alas mas nyob puv nkaus tej nras tiaj ntawd.

28 (יחוח)Yahweh ib tug tibneeg tuaj hais rau cov Ixayees tus vajntxwv tias, ()Yahweh hais li no tias, cov Alas hais tias (יחוח)Yahweh yog timtswv nruab roob xwb nws tsis yog timtswv nruab tiaj.  Vim li no kuv yuav muab pab tibneeg coob coob ntawd rau hauv koj txhais tes, mas koj yuav paub tias kuv yog (יחוח)Yahweh.

29 Mas lawv ob tog ua yeej nyob sib ncaj tau xya hnub, mas hnub uas xya thiaj li ua rog. Cov Ixayees tua cov Alas uas ua tub rog mus kotaw tuag 100,000 leej rau hnub ntawd.

30 Cov uas tshuav kuj khiav mus rau hauv lub moos Afes, mas lub ntsa loog ntawd kuj pob los tais lawv tuag nees nkaum xya txhiab leej thiab. Npeehadas kuj khiav mus thiab nws khiav mus nyob hauv ib chav tsev hauv lub plawv moos ntawd.

31 Mas nws cov tub teg tub taws hais rau nws tias, peb hnov tias Ixayees tej vajntxwv yog cov uas muaj lub siab zam txim. Cia peb muab khaub seev tsaj los sia thiab muab ib co hlua los rig peb taubhau ces peb tawm mus cuag cov Ixayees tus vajntxwv, tej zaum nws yuav tseg koj txojsia cia.  

32 Lawv thiaj muab khaub seev tsaj los sia thiab muab hlua rig taubhau mas mus cuag cov Ixayees tus vajntxwv thiab hais tias, Npeehadas uas yog koj tus tub qhe hais tias, thov tseg kuv txojsia cia. Mas vajntxwv teb tias, nws tseem ciaj sia thiab lov? Nws yog kuv kwv kuv tij.

33 Cov tibneeg ntawd tab tom tos ntsoov saib Ahaj yuav teb li cas ces lawv txawm khaws vajntxwv cov lus ntawd mas teb nplawg ntia tias, yog li uas koj hais tiag, Npeehadas yeej yog koj kwvtij. Mas vaj ntxwv hais tias, mus coj nws tuaj. Ces Npeehadas txawm tawm tuaj cuag Ahaj, ces Ahaj txawm kom Npeehadas nce mus rau hauv nws lub tsheb ua rog.

34 Ces Npeehadas hais rau Ahaj tias, tej moos uas kuv txiv txeeb tau ntawm koj txiv los ntawd kuv muab thim rov qab rau koj.  Koj yuav ua tsev kiab tsev khw rau hauv lub nroog Damaxakas kuj tau ib yam li kuv txiv tau ua rau hauv lub nroog Xamalis.  Mas Ahaj hais tias, yog koj cog lus tseg li no, kuv yuav tso koj dim. Ahaj thiaj nrog Npeehadas sib cog lus thiab muab nws tso mus.

35 (יחוח)Yahweh hais rau ib tug xibhwb cev (יחוח)Yahweh lus kom nws hais rau tib pab xibhwb ntawd ib tug hais tias, thov koj ntaus kuv ib teg.  Tiamsis tus yawg ntawd tsis kam ntaus nws.  

36 Ces nws txawm hais rau tus yawg ntawd tias, vim koj tsis mloog (יחוח)Yahweh tej lus mas thaum koj ncaim ntawm kuv mus lawd, ib tug tsov ntxhuav yuav tom koj tuag. Thaum nws ncaim ntawm tus xibhwb ntawd mus lawd, ib tug tsov ntxhuav txawm los muab nws tom tuag lawm.

37 Mas tus xibhwb ntawd nrhiav tau dua ib tug yawg ces nws hais tias, thov koj ntaus kuv ib teg. Tus yawg ntawd txawm muab tus xibhwb ntawd ntaus dhoog ib qho.

38 Tus xibhwb cev (יחוח)Yahweh lus thiaj mus lawm, nws mus tos vajntxwv ntawm ntug kev. Nws muab ntaub qhwv nws lub qhov muag tsis muaj leejtwg paub nws lawm.

39 Thaum vajntxwv taug kev los, nws txawm qw rau vajntxwv tias, kuv uas yog koj tus tub qhe mus rau hauv tshav rog mas muaj ib tug tub rog tig rov los coj ib tug txivneej los rau kuv thiab hais rau kuv tias, zov tus yawg no cia zoo zoo. Yog nws dim tau li cas mus lawd mas yuav muab koj txojsia pauv nws txoj lossis koj yuav tau them ib talas nyiaj.

40 Ces thaum kuv tseem tab kaum rau qhov ub qhov no, nws txawm ploj lawm. Cov Ixayees tus vajntxwv txawm hais rau nws tias, koj yuav raug txim yam nkaus li ntawd ntag. Rau qhov koj twb hais li ntawd lawm.

41 Ces tus xibhwb txawm daws kiag daim ntaub uas npog nws qhov muag, ces cov Ixayees tus vajntxwv thiaj cim tau tias nws yog ib tug xibhwb cev (יחוח)Yahweh lus.

42 Ces tus xibhwb thiaj hais rau nws tias, (יחוח)Yahweh hais li no tias, vim koj tau tso tus yawg uas nyob hauv koj txhais tes mus lawm, yog tus uas kuv tu kom muab ua puam tsuaj, mas koj txojsia yuav pauv nws txojsia, thiab koj cov tibneeg yuav tuag theej nws cov tibneeg.

43 Mas cov Ixayees tus vajntxwv mus rau hauv nws lub vaj lub tsev hauv Xamalis nyuaj siab kawg thiab chim ua ntsej muag dub nciab.