Ahaj Thiab Nanpaus Lub Vaj Txiv Hmab

1 Los rau tom qab no Nanpaus uas yog tibneeg Yile‑ees muaj ib lub vaj txiv hmab nyob hauv lub moos Yile‑ees npuas vajntxwv Ahaj uas kav Xamalis lub tsev.

2 Mas Ahaj hais rau Nanpaus tias, muab koj lub vaj txiv hmab rau kuv, kuv thiaj tau ua vaj zaub, vim yog nyob ze kuv lub tsev.  Kuv yuav muab dua ib lub vaj txiv hmab uas zoo dua pauv koj lub vaj no, lossis yog koj pom zoo kuv yuav muab nyiaj yuav kom txaus lub vaj no tus nqi.

3 Tiamsis Nanpaus hais rau Ahaj tias, thov (יחוח)Yahweh tav kuv tsis txhob muab kuv tej poj koob yawm txwv qub txeeg qub teg rau koj.

4 Ahaj thiaj rov los tsev nyuaj siab thiab chim ua ntsej muag dub nciab rau tej lus uas Nanpaus uas yog tibneeg Yile‑ees hais rau nws, vim Nanpaus tau hais tias, kuv yuav tsis muab kuv tej poj koob yawm txwv qub txeeg qub teg rau koj. Ces nws txawm pw rau saum txaj fee plhu kiag tsis yeem noj mov li.

5 Mas nws tus pojniam Yexenpees los nug nws tias, ua cas koj yuav nyuaj siab ua luaj tsis kam noj mov li?  

6 Ahaj teb nws tias, vim yog kuv hais rau Nanpaus uas yog tibneeg Yile‑ees tias, muab koj lub vaj txiv hmab muag rau kuv, lossis yog koj pom zoo kuv yuav muab dua ib lub vaj txiv hmab pauv rau koj.  Tiamsis nws teb tias, kuv yuav tsis muab kuv lub vaj txiv hmab rau koj li.

7 Ces nws tus pojniam Yexenpees hais rau nws tias, koj yog tus uas kav cov Ixayees los sav.  Cia li sawv tsees los noj mov thiab zoo siab hlo.  Kuv yuav muab Nanpaus uas yog tibneeg Yile‑ees lub vaj txiv hmab rau koj.

8 Nws txawm sau tsab ntawv ua Ahaj lub npe txam Ahaj lub txwm xa mus rau cov kev txwj laug thiab cov uas ua hlob uas nrog Nanpaus nyob tib lub moos.

9 Yexenpees sau hauv ntawv hais tias, cia li tshaj tawm kom yoo mov thiab tsa Nanpaus nyob saum lub rooj siab hauv nruab nrab cov pejxeem,

10 thiab kom ob tug tibneeg phem los nyob ncaj ntawm nws xub ntiag, thiab kom nkawv nkaug nws hais tias, nws tau cem foom

(יחוח)Yahweh thiab vajntxwv. Ces muab nws coj tawm mus thiab xuas pob zeb muab nws ntaus kom tuag.

11 Ces cov tibneeg hauv lub moos uas Nanpaus nyob ntawd, cov kev txwj laug thiab cov uas ua hlob txawm ua raws li Yexenpees hais mus rau lawv raws li tsab ntawv uas nws sau mus rau lawv.

12 Lawv thiaj tshaj tawm kom yoo mov thiab tsa Nanpaus nyob saum lub rooj siab hauv nruab nrab cov pejxeem.

13 Ces ob tug tibneeg phem ntawd txawm tuaj nyob ncaj ntawm Nanpaus xub ntiag, ces ob tug tibneeg phem ntawd txawm nkaug Nanpaus tab meeg cov pejxeem tias, Nanpaus tau cem foom (יחוח)Yahweh thiab vajntxwv. Ces lawv txawm coj Nanpaus tawm mus rau sab nraum lub moos thiab xuas pob zeb ntaus nws tuag.

14 Ces lawv txawm xa xov rau Yexenpees hais tias, Nanpaus raug xuas pob zeb ntaus, nws tuag lawm.

15 Thaum Yexenpees hnov tias Nanpaus raug xuas pob zeb ntaus thiab tuag lawm, Yexenpees txawm hais rau Ahaj tias, cia li sawv tsees mus txeeb kiag Nanpaus uas yog tibneeg Yile‑ees lub vaj txiv hmab uas tsis kheev muab muag rau koj, rau qhov Nanpaus tsis nyob nws tuag lawm.

16 Thaum Ahaj hnov tias Nanpaus tuag lawm, Ahaj txawm sawv tsees mus rau hauv Nanpaus uas yog tibneeg Yile‑ees lub vaj txiv hmab es mus txeeb kiag ua nws tug.

17 (יחוח)Yahweh txawm hais lus tuaj rau Eliyah uas yog tibneeg Thinpis tias,

18 koj cia li sawv tsees mus ntsib Ixayees tus vajntxwv Ahaj uas kav hauv lub nroog Xamalis.  Saib maj, nws nyob hauv Nanpaus lub vaj txiv hmab uas nws txeeb kiag yuav ua nws tug.

19 Koj hais rau nws tias, (יחוח)Yahweh hais li no tias, koj tau tua tibneeg thiab tseem txeeb kiag lub vaj los ua koj tug thiab lov? Thiab koj cia li hais rau nws tias, (יחוח)Yahweh hais li no tias, lub chaw uas dev yaim Nanpaus cov ntshav, dev kuj yuav yaim koj cov ntshav qhov ntawd thiab.

20 Ahaj txawm hais rau Eliyah tias, kuv tus yeeb ncuab es, koj ntsib tau kuv lawm lov? Eliyah teb tias, kuv ntsib koj lawm, rau qhov koj muab koj tus kheej muag mus ua tej uas (יחוח)Yahweh pom tias phem kawg.

21 Saib nawb, kuv yuav coj xwm txheej phem los raug koj, thiab kuv yuav rhuav tshem koj pov tseg huvsi thiab yuav muab Ahaj cov txivneej txhua tus tua tag nrho nws tej qhev thiab nws tej tibneeg ua kom tu noob nrho hauv cov Ixayees mus.

22 Thiab kuv yuav ua kom koj caj ces zoo ib yam li Nenpas tus tub Yelaunpau‑as caj ces thiab ib yam li Ahiyah tus tub Npa‑asas caj ces, rau qhov koj zes ua rau kuv chim thiab koj tau coj cov Ixayees ua txhaum muaj txim.

23 Thiab (יחוח)Yahweh hais txog Yexenpees hais tias, dev yuav noj Yexenpees rau hauv Yile‑ees.

24 Ahaj cov tibneeg tus uas tuag rau hauv lub nroog mas dev yuav noj, tus uas tuag rau sab nraud mas liaj dav saum nruab ntug yuav noj.

25 Tsis muaj leejtwg muab nws tus kheej muag mus ua tej uas (יחוח)Yahweh pom tias phem kawg yam li Ahaj uas nws tus pojniam Yexenpees txhob nws ua.

26 Ahaj ua tej uas qias vuab tsuab kawg li, rau qhov uas raws ncuj nciav tej dab mlom ib yam li cov Amaulais uas (יחוח)Yahweh muab laim ploj ntais ntawm cov Ixayees xub ntiag lawm.

27 Thaum Ahaj hnov tej lus ntawd, nws txawm dua rhe nws lub tsho muab khaub seev tsaj los hnav, thiab yoo mov thiab hnav khaub seev tsaj mus pw, thiab mus mus los los dai hau vias. 

28 Thiab (יחוח)Yahweh hais lus tuaj rau Eliyah uas yog tibneeg Thinpis tias,

29 koj twb pom Ahaj txo nws lub hwjchim rau ntawm kuv xub ntiag lawm lov? Vim nws twb txo nws lub hwjchim ntawm kuv xub ntiag lawm, kuv yuav tsis tso xwm txheej phem los rau nws sim neej, tiamsis kuv yuav tso xwm txheej phem los raug nws caj ces rau thaum nws tus tub sim neej.