Anpisas Tu Daviv

1 Thaum vajntxwv Daviv hnub nyoog nchav thiab laus heev lawd, txawm yog lawv muab pam los vov nws, los kuj tsis sov nws li.

2 Yog li no nws cov tub teg tub taws thiaj hais rau Daviv tias, vajntxwv, cia li nrhiav ib tug hluas nkauj dawb huv los rau koj uas yog peb tus tswv. Cia nws ua haujlwm rau koj thiab tu koj. Cia nws pw hauv koj lub xubntiag, xwv thiaj li sov vajntxwv uas yog peb tus tswv.

3 Lawv txawm mus nrhiav ib tug hluas nkauj uas zoo nkauj heev thoob plaws Ixayees tebchaws, mas nrhiav tau Anpisas uas yog tibneeg Sunees thiab coj nws los cuag vajntxwv.

4 Tus hluas nkauj ntawd zoo nkauj heev, nws tu vajntxwv thiab ua haujlwm rau vajntxwv, tiamsis vajntxwv tsis tau deev nws.

​

Adauniyah Xav Sawv Ua Vajntxwv

5 Adauniyah uas yog Hakis tus tub txeeb ua loj hais tias, kuv yuav ua vajntxwv. Nws npaj tau tsheb ua rog thiab tub rog caij nees thiab muaj tub teg tub taws tsib caug leej khiav ua nws ntej.

6 Nws txiv yeej tsis tau tav nws ib los hais tias, ua cas koj ua li ub li no? Nws yog ib tug zoo nraug heev thiab yog Axaloos tus kwv ntag.

7 Adauniyah sablaj rau Yahas uas yog Xeluyah tus tub thiab rau Anpiyathas uas ua pov thawj. Nkawv kuj koom nrog Adauniyah thiab pab nws.

8 Tiamsis tus pov thawj Xadaus thiab Npenayah uas yog Yahyadas tus tub thiab Nathas uas ua xibhwb cev (יחוח)Yahweh lus thiab Sime‑is thiab Le‑is thiab Daviv cov tub rog siab loj siab tuab tsis koom nrog Adauniyah.

9 Adauniyah muab yaj muab nyuj thiab tej tsiaj rog rog tua xyeem rau ntawm lub pob zeb Xaufeles uas nyob ze lub qhov dej Eelaukees. Mas nws hu nws cov kwvtij sawvdaws, uas yog vajntxwv cov tub thiab cov tibneeg Yahdah uas ua vajntxwv cov tub teg tub taws huvsi tuaj.

10 Tiamsis nws tsis hu Nathas uas ua xibhwb cev (יחוח)Yahweh lus thiab Npenayah thiab cov tub rog siab loj siab tuab thiab nws tus kwv Xalaumoos tuaj.

11 Ces Nathas txawm hais rau Npasenpas uas yog Xalaumoos niam tias, koj tsis paub tsis tau hnov lov? Hakis tus tub Adauniyah twb sawv ua vajntxwv kav lawm thiab Daviv uas yog peb tus tswv kuj tsis paub kiag li.

12 Vim li no thov cia kuv hais ib lo lus rau koj xwv koj thiaj cawm tau koj txojsia thiab koj tus tub Xalaumoos txojsia.

13 Koj cia li mus cuag vaj ntxwv Daviv tamsim no thiab hais rau nws tias, vajntxwv uas yog kuv tus tswv, koj twb cog lus twv rau kuv uas yog koj tus nkauj qhe hais tias, thaum dua koj lawd kuv tus tub Xalaumoos yuav nyob koj chaw kav thiab yuav nyob saum koj lub zwm txwv los tsis yog? Ua cas Adauniyah twb ua vajntxwv lawm?

14 Thaum koj tseem tab tom hais rau vajntxwv ntawd, kuv yuav raws qab los thiab pab hais ib yam li ntawd.

15 Ces Npasenpas txawm mus cuag vajntxwv hauv nws lub txaj pw. Vajntxwv laus heev lawm thiab Anpisas uas yog tibneeg Sunees tab tom tu vajntxwv.

16 Npasenpas khoov ntshis pe vajntxwv mas vajntxwv hais rau nws tias, koj xav yuav abtsi?

17 Nws hais rau vajntxwv tias, kuv tus tswv, koj twb tuav (יחוח)Yahweh uas yog koj Tus Tswv lub npe cog lus twv rau kuv uas yog koj tus nkauj qhe tias, thaum dua koj lawd kuv tus tub Xalaumoos yuav nyob koj chaw ua vajntxwv thiab nyob saum koj lub zwm txwv.

18 Tiamsis nimno Adauniyah twb ua vaj ntxwv lawm, mas vajntxwv uas yog kuv tus tswv, koj twb tsis paub li.  

19 Nws twb muab nyuj thiab tej tsiaj rog rog thiab tej yaj ntau kawg li tua xyeem, thiab hu vajntxwv tej tub sawvdaws thiab Anpiyathas uas ua pov thawj thiab Yahas uas ua thawj kav cov tub rog tuaj. Tiamsis nws tsis hu koj tus tub qhe Xalaumoos.

20 Vajntxwv uas yog kuv tus tswv, nimno cov Ixayees saib ntsoov koj saib koj yuav hais rau lawv tias thaum dua koj lawd leejtwg yuav nyob saum kuv tus tswv lub zwm txwv.

21 Yog koj tsis ua li ntawd yuav zoo li no. Thaum koj mus nrog koj tej poj koob yawm txwv nyob lawd, kuv thiab kuv tus tub Xalaumoos wb yuav poob rau hauv qhov txhaum.

22 Thaum nws tseem tab tom hais rau vajntxwv ntawd, Nathas uas ua xibhwb cev (יחוח)Yahweh lus txawm nkag los.

23 Lawv hais rau vajntxwv tias, xibhwb Nathas uas cev (יחוח)Yahweh lus nyob no. Thaum Nathas los rau ntawm vajntxwv lub xub ntiag, nws txawm khoov ntshis ua lub plhu ti nkaus av pe vajntxwv.

24 Nathas hais tias, vajntxwv uas yog kuv tus tswv, koj tau hais tias, thaum dua koj lawd Adauniyah yuav nyob koj chaw kav thiab nyob saum koj lub zwm txwv lov?

25 Hnub no nws twb mus muab nyuj thiab tej tsiaj rog rog thiab tej yaj ntau kawg tua xyeem, thiab hu vajntxwv tej tub sawvdaws thiab Yahas uas ua thawj kav cov tub rog thiab Anpiyathas uas ua pov thawj tuaj.  Lawv tab tom noj haus rau ntawm nws lub xub ntiag thiab hais tias, thov kom vajntxwv Adauniyah muaj txojsia loj siav ntev.  

26 Tiamsis nws twb tsis hu kuv uas yog koj tus tub qhe thiab tus pov thawj Xadaus thiab Npenayah uas yog Yahyadas tus tub thiab koj tus tub qhe Xalaumoos.

27 Tej no yog vajntxwv uas yog kuv tus tswv kom ua lov, es koj tsis hais rau koj cov tub teg tub taws paub tias thaum dua koj lawd leejtwg yuav nyob saum koj lub zwm txwv lov?

​

Tsa Xalaumoos Ua Vajntxwv

28 Vajntxwv Daviv txawm hais tias, cia li hu Npasenpas los cuag kuv.  Npasenpas thiaj los cuag vajntxwv thiab sawv rau ntawm vaj ntxwv xub ntiag.

29 Ces vajntxwv cog lus twv tias, muaj (יחוח)Yahweh uas muaj txojsia nyob pom, yog tus uas cawm kuv txojsia dim hauv txhua txojkev txom nyem ceeblaj,

30 kuv twb tuav (יחוח)Yahweh uas yog cov Ixayees Tus Tswv lub npe cog lus twv rau koj tias, thaum dua kuv lawd koj tus tub Xalaumoos yuav ua vajntxwv kav thiab yuav nyob kuv chaw saum kuv lub zwm txwv.  Mas kuv yuav ua li ntawd rau hnub no ntag.

31 Ces Npasenpas txawm khoov ntshis ua lub plhu ti nkaus av pe vajntxwv thiab hais tias, thov vajntxwv Daviv uas yog kuv tus tswv muaj txojsia nyob mus ib txhis.

32 Vajntxwv Daviv hais tias, cia li hu tus pov thawj Xadaus thiab Nathas uas cev (יחוח)Yahweh lus thiab Npenayah uas yog Yahyadas tus tub tuaj cuag kuv.  Lawv txawm tuaj cuag vajntxwv.

33 Mas vajntxwv hais rau lawv tias, cia li coj kuv cov tub teg tub taws mus thiab muab kuv tus luj txwv rau Xalaumoos caij thiab coj nws mus rau lub qhov dej Kihoos.

34 Cia tus pov thawj Xadaus thiab Nathas uas yog xibhwb cev (יחוח)Yahweh lus hliv roj ywg tsa nws qhov ntawd ua vajntxwv kav cov Ixayees, thiab tshuab raj kub yaj qw hais tias, thov kom vajntxwv Xalaumoos muaj txojsia loj siav ntev.

35 Ces nej mam nrog nws nce los mas nws yuav nyob saum kuv lub zwm txwv, rau qhov nws yuav nyob kuv chaw ua vajntxwv.  Kuv twb tsa nws ua tus uas kav cov Ixayees thiab cov Yahdah huvsi lawm.

36 Ces Yahyadas tus tub Npenayah teb vajntxwv tias, Amees! Vajntxwv uas yog kuv tus tswv, thov (יחוח)Yahweh uas yog koj Tus Tswv pab kom muaj raws li ntawd.

37 (יחוח)Yahweh nrog nraim vajntxwv uas yog kuv tus tswv nyob li cas, kuj thov kom nws nrog nraim Xalaumoos ib yam li ntawd, thiab thov pub kom nws lub zwm txwv loj dua li vajntxwv Daviv uas yog kuv tus tswv lub.  

38 Ces tus pov thawj Xadaus thiab Nathas uas cev (יחוח)Yahweh lus thiab Yahyadas tus tub Npenayah thiab cov Khelethis thiab cov Pelethis txawm nqis mus muab Xalaumoos caij vajntxwv Daviv tus luj txwv thiab coj nws mus rau lub qhov dej Kihoos.

39 Mas tus pov thawj Xadaus coj lub khob kub nyuj uas ntim roj aulib hauv (יחוח)Yahweh lub tsev ntaub mus hliv ywg tsa Xalaumoos. Lawv tshuab raj kub yaj thiab ib tsoom pejxeem sawvdaws hais tias, thov kom vajntxwv Xalaumoos muaj txojsia loj siav ntev.

40 Cov pejxeem sawv daws nrog nws nce mus tshuab raj qw zoo siab xyiv fab ua av ntseeg nkaws.

41 Thaum Adauniyah thiab cov uas nws hu tuaj koom sawvdaws noj mov tag lawv hnov lub suab ntawd. Thaum Yahas hnov lub suab raj kub yaj nws txawm hais tias, lub suab nrov ntsoog qees hauv lub nroog yog abtsi ne?

42 Thaum nws tab tom hais lus ntawd, Yahnathas uas yog pov thawj Anpiyathas tus tub tuaj txog.  Mas Adauniyah hais tias, cia li los, koj yog tibneeg zoo, koj yeej coj xov zoo tuaj.

43 Yahnathas teb Adauniyah tias, tsis yog li ntawd, rau qhov vajntxwv Daviv uas yog peb tus tswv twb tsa Xalaumoos ua vajntxwv lawm.

44 Vajntxwv txib tus pov thawj Xadaus thiab Nathas uas cev (יחוח)Yahweh lus thiab Yahyadas tus tub Npenayah thiab cov Khele-this thiab cov Pelethib nrog Xalaumoos mus thiab lawv muab Xalaumoos caij vajntxwv tus luj txwv.

45 Thiab tus pov thawj Xadaus thiab Nathas uas ua xibhwb cev (יחוח)Yahweh lus twb hliv roj tsa nws ua vajntxwv ntawm lub qhov dej Kihoos lawm. Lawv nce qhov ntawd rov los muaj kev zoo siab xyiv fab, lub nroog thiaj muaj suab nrov ntsoog qees, yog lub suab uas nej hnov.

46 Xalaumoos tau nyob saum vajntxwv lub zwm txwv lawm.  

47 Tsis tag li ntawd, vajntxwv cov tub teg tub taws kuj mus foom koob hmoov rau vajntxwv Daviv uas yog peb tus tswv hais tias, thov koj Tus Tswv ua kom Xalaumoos lub npe nrov nto moo lug heev dua li koj lub, thiab ua kom Xalaumoos lub zwm txwv loj dua koj lub. Ces vajntxwv txawm nyo hau pe (יחוח)Yahweh saum nws lub txaj.

48 Thiab vajntxwv hais tias, qhuas (יחוח)Yahweh uas yog cov Ixayees Tus Tswv, uas tau pub kuv cov tub ki ib tug los nyob saum kuv lub zwm txwv rau hnub no, rau kuv lub qhov muag tau pom lawm.

49 Ces cov uas Adauniyah hu tuaj koom sawv daws kuj ntshai sawv pes tsees nyias mus nyias tag lawm.

50 Mas Adauniyah ntshai Xalaumoos heev, nws txawm sawv tsees mus tuav nkaus tej kub ntawm lub thaj xyeem.

51 Muaj tibneeg mus hais rau Xalaumoos tias, saib maj, Adauniyah ntshai vajntxwv Xalaumoos kawg.  Nws mus tuav rawv tej kub ntawm lub thaj xyeem hais tias, thov vajntxwv Xalaumoos cog lus twv rau kuv ua ntej hais tias, nws yuav tsis xuas ntaj tua kuv uas yog nws tus tub qhe.

52 Xalaumoos hais tias, yog nws ua tau tibneeg zoo, nws ib txoj plaubhau yuav tsis poob rau hauv av li, tiamsis yog pom tias nws muaj qhov phem mas nws yuav tuag xwb.

53 Vajntxwv Xalaumoos txawm tso tibneeg mus coj nws nqis ntawm lub thaj los.  Mas nws thiaj los pe vajntxwv Xalaumoos. Xalaumoos hais rau nws tias, cia li rov qab mus tsev.