Daviv Suav Cov Ixayees Thiab Cov Yahdah

(1 Vaj Keeb Kwm 21:1-27)

1 (יחוח)Yahweh chim rau cov Ixa-yees dua ib zaug, nws thiaj tshoov Daviv lub siab kom tawm tsam lawv hais tias, cia li mus suav cov Ixayees thiab cov Yahdah.

2 Vajntxwv thiaj hais rau Yahas thiab cov thawj uas kav cov tub rog tias, cia li mus suav thoob plaws txhua xeem Ixayees txij ntua lub moos Daj mus txog lub moos Npe‑awsenpas, kom kuv thiaj paub tias muaj tibneeg npaum li cas.

3 Ces Yahas hais rau vajntxwv tias, thov (יחוח)Yahweh uas yog koj Tus Tswv pub kom cov pejxeem huaj vam coob ib puas npaug ntxiv rau cov uas muaj lawd, thiab thov kom vajntxwv uas yog kuv tus tswv lub qhov muag tau pom ntag. Tiamsis ua cas vajntxwv uas yog kuv tus tswv yuav xav ua li no?  

4 Tiamsis vajntxwv tej lus kov yeej Yahas thiab cov thawj kav cov tub rog tej lus. Yahas thiab cov thawj kav tub rog thiaj tawm ntawm vajntxwv xub ntiag mus suav cov Ixayees.  

5 Lawv hla tus dej Yaladees mus thiab tsuam chaw nyob ntawm lub moos Alau‑aws sab nrad uas nyob hauv nruab nrab tiaj thiab mus thoob plaws Nkas tebchaws mus txog ntua lub moos Yaxaws.

6 Lawv mus txog Kile‑as tebchaws thiab mus txog lub moos Thathis Hausis.  Lawv mus txog lub moos Daj Ya‑as thiab tig mus txog lub moos Xaidoos.

7 Lawv mus txog lub nroog Thailab uas muaj ntsa loog ruaj khov thiab mus txog cov Hivais thiab cov Khana‑as txhua lub moos. Thiab lawv mus rau nram Nekes hauv Yahdah teb chaws mus rau lub moos Npe‑awsenpas.

8 Lawv mus tau cuaj lub hlis thiab nees nkaum hnub thiaj mus thoob plaws lub tebchaws lawm, lawv li rov los rau hauv lub nroog Yeluxalees.

9 Yahas thiaj qhia rau vajntxwv paub tias cov pejxeem uas nws mus suav ntawd muaj npaum li cas. Hauv Ixayees tebchaws huvsi muaj 800,000 tus txivneej uas muaj siab tuab ua tau tub rog thiab hauv Yahdah tebchaws muaj 500,000 leej.

10 Thaum suav cov pejxeem tag lawd Daviv kuj ntxhov siab. Daviv thiaj hais rau (יחוח)Yahweh tias, qhov uas kuv ua li no yog kuv tau ua txhaum loj kawg. Au (יחוח)Yahweh, nimno thov koj daws kuv uas yog koj tus tub qhe lub txim no tseg, rau qhov kuv tau ua yam uas ruam tshaj plaws.

11 Tagkis tom qab thaum Daviv sawv tsees, (יחוח)Yahweh hais lus tuaj rau Nkas uas ua xibhwb cev (יחוח)Yahweh lus thiab yog Daviv tus xibhwb uas hais lus pom tom hauv ntej hais tias,

12 cia li mus hais rau Daviv tias, (יחוח)Yahweh hais li no tias, kuv muab peb yam rau koj xaiv, saib koj yeem cia kuv ua yam twg rau koj.

13 Kas thiaj mus cuag Daviv thiab hais tej lus no rau nws tias, yuav cia lub tebchaws raug kev tshaib plab peb xyoos lov? Lossis yuav cia koj yuav khiav tshawj chim peb lub hlis lov? Lossis yuav cia mob kis los raug lub tebchaws peb hnub lov? Nimno koj cia li xav thiab txiav txim siab saib yuav cia kuv mus teb li cas rau (יחוח)Yahweh uas txib kuv tuaj.

14 Mas Daviv hais rau Nkas tias, kuv ntxhov siab heev, thov cia kuv poob rau hauv (יחוח)Yahweh txhais tes, rau qhov nws txojkev hlub loj kawg li, tiamsis thov tsis txhob cia kuv poob rau hauv tibneeg txhais tes.

15 Yog li ntawd (יחוח)Yahweh thiaj tso mob kis los raug Ixayees tebchaws txij tagkis ntawd mus tag lub sijhawm teem cia. Mas cov tibneeg uas tuag txij ntua lub moos Daj mus txog lub moos Npe‑awsenpas muaj xya caum txhiab leej.

16 Thaum tus tubtxib saum ntuj tsa tes kiag rau saum lub nroog Yeluxalees yuav ua kom puam tsuaj, (יחוח)Yahweh hloov dua siab tsis tso tej mob kis ntawd lawm. Nws thiaj hais rau tus tubtxib saum ntuj uas tab tom ua kom cov pejxeem puam tsuaj tias, txaus lawm, cia li nkaum koj txhais tes tamsim no. Mas (יחוח)Yahweh tus tubtxib saum ntuj sawv ntsug ntawm Alaunas uas yog tibneeg Yenpus lub tshav ntaus qoob.

17 Thaum Daviv pom tus tubtxib saum ntuj uas tab tom tua cov pejxeem, nws hais rau (יחוח)Yahweh tias, kuv yog tus uas tau ua txhaum muaj txim thiab ua phem kawg li lawm.  Tiamsis pab yaj no lawv tau ua abtsi? Thov koj tsa koj txhais tes tawm tsam kuv thiab kuv tsev neeg xwb.  

18 Hnub ntawd Nkas tuaj cuag Daviv thiab hais rau nws tias, cia li nce mus tib ib lub thaj xyeem rau (יחוח)Yahweh rau ntawm Alaunas uas yog tibneeg Yenpus lub tshav ntaus qoob.  

19 Daviv thiaj li nce mus raws li Nkas tej lus uas (יחוח)Yahweh hais.

20 Thaum Alaunas tsa muag saib mus nws pom vajntxwv thiab nws cov tub teg tub taws tab tom nce tuaj rau ntawm nws.  Alaunas thiaj tawm mus khoov ntshis pe vajntxwv ua lub plhu ti nkaus av.   

21 Alaunas hais tias, vajntxwv, ua cas koj uas yog kuv tus tswv yuav tuaj rau ntawm kuv uas yog koj tus tub qhe? Daviv teb tias, kuv tuaj yuav koj lub tshav ntaus qoob coj los ua lub thaj xyeem rau (יחוח)Yahweh xwv thiaj li tav tau tej mob phem no kom ploj ntawm cov pejxeem mus.

22 Alaunas hais rau Daviv tias, vajntxwv, thov koj uas yog kuv tus tswv cia li muab tej uas koj pom zoo los xyeem rau (יחוח)Yahweh.  Ntawm no muaj nyuj siv hlawv xyeem, muaj tej thob faus luam qoob thiab tej quab nyuj ua taws rauv.  

23 Au vajntxwv, tej no huvsi kuv muab pub rau koj.  Thiab Alaunas hais rau vajntxwv tias, thov (יחוח)Yahweh uas yog koj Tus Tswv txais yuav koj.  

24 Tiamsis vajntxwv hais rau Alaunas tias, ua tsis tau li ntawd, kuv yuav xuas nyiaj yuav ntawm koj. Kuv yuav muab tej uas kuv tsis tau them nqi ua kevcai hlawv xyeem rau kuv Txiv (יחוח)Yahweh tsis tau li.  Daviv thiaj yuav lub tshav ntaus qoob thiab nyuj ua tsib caug sekhees nyiaj.

25 Daviv thiaj ua ib lub thaj xyeem rau (יחוח)Yahweh qhov ntawd thiab ua kevcai hlawv xyeem thiab ua kevcai xyeem sib raug zoo. (יחוח)Yahweh mloog tej lus uas Daviv thov pab lub tebchaws ntawd ces tej mob phem txawm ploj hauv cov Ixayees lawm.