Daviv Tej Lus Uas Hais Thaum Kawg

1 No yog Daviv tej lus uas hais thaum kawg, no yog tej lus uas Yisais tus tub Daviv tau hais, yog tus uas raug muab tsa ua tus hlob, yog tus uas Yakhauj Tus Tswv (יחוח)Yahweh hliv roj tsa, yog tus uas phim tej nkauj uas hu tau zoo kawg rau cov Ixayees.

2 (יחוח)Yahweh tus Ntsuj Plig Dawb Huv kom kuv hais, nws tej lus nyob ntawm kuv tus nplaig.

3 Ixayees Tus Tswv twb hais lawm, Ixayees Txhib Zeb twb hais rau kuv tias, thaum leejtwg kav tibneeg ncaj, yog qhov uas nws paub ntshai (יחוח)Yahweh ua rau nws txawj kav,

4 mas nws ci rau lawv zoo yam nkaus li qhov kaj thaum sawv ntxov, zoo yam li lub hnub ci rau sawv ntxov tsis muaj huab, thiab yam li nag ua rau nroj tsuag tuaj ntsuab xiab saum npoo av.

5 Kuv caj ces nyob ruaj rau hauv (יחוח)Yahweh los tsis yog? Rau qhov (יחוח)Yahweh cog lus ib txhiab ib txhis rau kuv, thiab cog lus txhua yam muaj kab muaj ke ruaj khov.  Nws yuav tsis ua rau qhov uas kuv dim kom tiav lov, thiab tsis pub kuv tau txhua yam uas kuv lub siab xav lov?

6 Tiamsis cov uas tsis hwm (יחוח)Yahweh yuav zoo yam nkaus li tej pos uas muab xyeeb pov tseg, lawv yuav xuas tes khaws los khaws tsis tau.

7 Tus uas kov tej ntawd yuav xuas cuab yeej hlau lossis xuas tus ko hmuv thiab yuav muab hluavtaws hlawv kub nyhiab tag rau qhov ntawd.

​

Daviv Cov Tub Rog

(1 Vaj Keeb Kwm 11:10-41)

8 No yog Daviv cov tub rog tej npe. Yauses Npasenpes uas yog cum Thamaunis, yog tus thawj hauv pab peb tug tub rog. Nws xuas hmuv mus ua ib zaug rog rau yim pua leej mas muab lawv tua tag huvsi.

9 Peb tug tub rog ntawd, tus ob yog Daudaus tus tub Ele‑axas uas yog Ahau‑as cum. Nws nrog Daviv nyob rau thaum uas lawv twv cov Filixatees uas sau zog tuaj ua ke, yuav ua rog qhov ntawd, mas cov Ixayees kuj thim rov qab.

10 Ces Ele‑axas sawv ntawm nws lub chaw tua cov Filixatees mus txog thaum nws txhais tes loog tag lo rau nws rab ntaj.  Hnub ntawd (יחוח)Yahweh ua kom kov yeej kiag. Cov tub rog kuj rov tuaj rau ntawm nws, tsuas yog tuaj daws tej qhov txhia chaw ntawm cov tibneeg uas muab tua tau lawm xwb.

11 Tus peb yog Samas uas yog Akes nyob hauv Halas tus tub. Cov Filixatees sau zog tuaj ua ke rau ntawm Lehis uas yog ib thaj teb uas muaj taum liab puv nkaus. Cov tub rog kuj thim khiav cov Filixatees lawm.

12 Tiamsis Samas sawv khov kho hauv nruab nrab thaj teb ntawd zov rawv thaj teb ntawd thiab tua cov Filixatees. Mas (יחוח)Yahweh ua kom kov yeej kiag.

13 Thaum lub caij sau qoob muaj peb leeg hauv peb caug tus thawj rog nqis mus cuag Daviv hauv lub qhov tsua Adulas rau thaum cov Filixatees ib pab ua yeej hauv lub hav Lefa‑is.

14 Thaum ntawd Daviv nyob hauv lub chaw ruaj khov thiab cov Filixatees ib pab tub rog kuj nyob zov rawv hauv lub moos Npelehees.

15 Mas Daviv txawm hais seev yees tias, kheev muaj ib tug mus nqa tau cov dej hauv lub qhov dej uas nyob ntawm ib sab rooj loog Npelehees los rau kuv haus.

16 Mas peb tug tub rog ntawd thiaj txeem plaws hauv cov Filixatees lub yeej mus ntaus tau dej hauv lub qhov dej ntawm Npelehees ib sab rooj loog coj los pub rau Daviv. Tiamsis Daviv tsis kam haus cov dej ntawd, nws muab hliv xyeem rau (יחוח)Yahweh,

1 7thiab hais tias, Au (יחוח)Yahweh, thov tsis txhob cia kuv ua li no.  Kuv yuav haus cov tibneeg uas sev nyog txojsia mus ntawd cov ntshav lov? Ua li no nws thiaj tsis kam haus. Tej no yog tej uas peb tug tub rog ntawd ua.

18 Yahas tus kwv Anpisais uas yog Xeluyah tus tub ua peb caug leej ntawd tus thawj.  Nws xuas hmuv ua rog rau peb puas leej mas muab lawv tua tag huvsi mas thiaj tau koob meej ib yam li peb leeg ntawd.

19 Nws yog tus uas muaj koob meej ntau dua peb caug leej ntawd. Nws ua tus thawj uas kav peb caug leej tiamsis tsis suav nws rau hauv peb leeg ntawd.

20 Yahyadas tus tub Npenayah yog ib tug siab loj siab tuab hauv lub moos Khaxe‑ees, nws ua tej qhov hauj lwm loj. Nws tau tua Mau‑as cov tub rog ob tug uas muaj zog kawg li. Thiab nws tau nqis rau hauv lub qhov mas tua tau ib tug tsov ntxhuav rau hnub uas los los daus.  

21 Thiab nws tau tua ib tug tibneeg Iziv, yog ib tug uas zoo nraug kawg.  Tus Iziv ntawd tuav rawv ib rab hmuv, tiamsis Npenayah coj tus pas nrig mus rau ntawm tus Iziv xwb, ces txeeb tau tus Iziv rab hmuv ntawm nws tes muab nws rab hmuv rov nkaug tus Iziv tuag.  

22 Yahyadas tus tub Npenayah tau ua tej hauj lwm no thiab tau koob meej ib yam nkaus li peb tug tub rog ntawd.  

23 Nws muaj koob meej hauv peb caug leej ntawd, tiamsis tsis suav nws rau hauv peb tug tub rog ntawd.  Daviv kuj tsa nws ua tus thawj kav pab tub rog uas zov vajntxwv.

24 Peb caug leej ntawd tej npe yog li no, Yahas tus kwv Axahees, Daudaus tus tub Eehanas uas nyob hauv Npelehees,

25 Samas hauv lub moos Falaus, Elikhas hauv lub moos Falaus,

26 Helexis uas yog Patis cum, Ikhes tus tub Ilas hauv lub moos Thekhau‑as,

27 Anpiyexaws hauv lub moos Anathaus, Menpunais uas yog Husas cum,

28 Xamoos hauv cum Ahau‑as, Mahalais hauv lub moos Nethaufas,

29 Npa‑anas tus tub Heles hauv lub moos Nethaufas, Linpais tus tub Ithais hauv lub moos Kinpe‑as hauv Npeeyamees tebchaws,

30 Npenayah hauv lub moos Pilathoos, Hidais uas nyob ntawm tus dej Kasas,

31 Anpis Yanpoos uas yog Anpas cum, Amaves hauv lub moos Npahulis,

32 Eliyanpas hauv lub moos Sa‑anpoos, Yasees cov tub, Yahnathas,

33 Samas hauv lub moos Halas, Salas tus tub Ahiyas hauv lub moos Halas,

34 Ahanpais tus tub Elifeles hauv lub moos Ma‑akhas, Ahithaufees tus tub Elias hauv lub moos Kilaus,

35 Helaus hauv lub moos Khamees, Palais hauv lub moos Anpas,

36 Nathas tus tub Ikas hauv lub moos Xaunpas, Npanis xeem Nkas,

37 Xeleb uas yog tibneeg Asmoos, Nahalais hauv lub moos Npe‑awlaus uas kwv Xeluyah tus tub Yahas tej cuab yeej ua rog,

38 Ilas uas yog Ithalas cum, Kales hauv cum Ithalas,

39 thiab Uliyah uas yog tibneeg Hithais. Huvsi muaj peb caug xya leej.