Daviv Txoj Nkauj Kov Yeej

(Ntawv Nkauj 18:1-50)

1 Hnub uas (יחוח)Yahweh cawm Daviv dim hauv nws cov yeeb ncuab txhais tes huvsi thiab dim hauv Sha-ul txhais tes lawm, Daviv thiaj hu txoj nkauj no rau

(יחוח)Yahweh.

2 Nws hais tias, (יחוח)Yahweh yog kuv txhib zeb, yog kuv lub chaw ruaj khov, yog tus uas tso kuv dim,

3 yog kuv Tus Tswv, yog txhib zeb uas kuv los nraim cev, yog kuv daim phiaj hlau, yog txwm kub uas cawm kuv dim, yog kuv lub chaw ruaj khov, yog kuv lub chaw nraim cev, thiab yog kuv tus cawmseej. Koj cawm kuv dim tej tibneeg lim hiam ntais ntuj.

4 Kuv hu rau (יחוח)Yahweh tus uas tsim nyog qhuas, mas kuv thiaj dim hauv cov yeeb ncuab los.

5 Tej nthwv dej uas yog kev tuag vij nkaus kuv, txojkev puam tsuaj nyab kiag kuv,

6 kuv mag txoj hlua uas cuab hauv tub tuag teb lawm, rooj ntxiab uas yog kev tuag nyob ntawm kuv xub ntiag.

7 Thaum kuv raug kev txom nyem, kuv thov hu (יחוח)Yahweh, kuv thov kuv Tus Tswv.  Nws nyob hauv nws lub tuam tsev hnov kuv lub suab, kuv tej lus thov nrov mus txog nws qhov ntsej.

8 Lub ntiaj teb ntseeg nkaws ua zog koog, tej lag zeb uas tiag lub ntuj kuj co nplawg ntia thiab ua zog kais, vim yog (יחוח)Yahweh chim.

9 Pa taws tawm hauv (יחוח)Yahweh qhov ntswg los, thiab tej nplaim taws kub ceev tawm ntawm nws qhov ncauj los, thee kuj cig plaws tawm los.

10 Nws qhib rooj ntug nqis los, ntuj tsaus nti hauv nws qab kotaw.

11 Nws caij ib tug Khelunpees thiab ya mus ya los, pom nws caij kooj tis cua los.

12 Nws muab qhov tsaus ntuj los vij puag ncig nws, cov huab tsaus tsaus vim yog muaj dej ua lub kaus roos nws.  

13 Tej thee ci ua nplaim tawm hauv qhov kaj uas nyob ntawm nws xub ntiag los.

14 (יחוח)Yahweh ua xob nrov ntseeg nkaws saum ntuj, yog tus uas loj dua ntais ua suab nrov.

15 Nws tua nws rab xub ua rau lawv khiav tag, nws tso xob laim ua rau lawv tawg ua sab ua sua mus.

16 Mas thiaj li pom hiav txwv ti nkaus qab thu, thiab pom tag nrho tej taw uas tiag lub ntiajteb no, rau thaum (יחוח)Yahweh cem thiab tshuab tej pa tawm hauv nws qhov ntswg los.

17 (יחוח)Yahweh cev tes saum ntuj tuaj ntsiab nkaus kuv, nws rub kuv tawm hauv cov dej tob tob.

18 Nws cawm kuv dim kuv cov yeeb ncuab uas muaj zog thiab dim cov tibneeg uas ntxub kuv, rau qhov lawv muaj zog loj dua kuv.

19 Hnub uas kuv raug kev txom nyem ceeblaj mas lawv cia li tuaj tawm tsam kuv, tiamsis (יחוח)Yahweh ua kuv lub chaw tiag taw.

20 Nws coj kuv tawm mus nyob hauv lub chaw dav, nws tso kuv dim, vim nws zoo siab xyiv fab rau kuv.  

21 (יחוח)Yahweh pub hmoov zoo rau kuv raws li kuv txojkev ncaj ncees. (יחוח)Yahweh pauj rau kuv raws li kuv txhais tes dawb huv.

22 Kuv taug nraim (יחוח)Yahweh txojkev thiab kuv tsis tau ua qhov phem es tso kuv Tus Tswv tseg.

23 Rau qhov nws tej kevcai huvsi nyob ntawm kuv xub ntiag thiab kuv tsis tau tig ntawm nws tej kab ke kiag li.

24 Kuv tsis muaj ib qho chaw thuam rau ntawm nws xub ntiag, thiab kuv tswj hwm kuv tus kheej tsis ua txhaum.

25 Vim li no, (יחוח)Yahweh thiaj pauj rau kuv raws li kuv txojkev ncaj ncees, thiab raws li nws pom kuv txojkev dawb huv.  

26 (יחוח)Yahweh, koj ua ncaj rau tus uas xib rau koj, koj ua koj txojkev zoo kawg nkaus tshwm rau tus uas tsis muaj chaw thuam li.  

27 Koj ua koj txojkev dawb huv tshwm rau tus uas ua dawb huv, koj ua txojkev nkhaus tshwm rau tus uas siab nkhaus.

28 Koj tso cov tibneeg uas txo hwjchim dim, tiamsis koj tsom ntsoov ua rau cov uas khav theeb poob qis.

29 Au (יחוח)Yahweh, koj yog kuv lub teeb, (יחוח)Yahweh ua rau kuv qhov tsaus ntuj pom kev.

30 Yog koj pab, kuv yeej ntaus tau ib pab tub rog, yog kuv Tus Tswv pab, kuv thiaj dhia hla tau ntsa loog.

31 Tus Tswv no mas nws txojkev zoo kawg nkaus, (יחוח)Yahweh lo lus cog tseg yeej muaj tseeb. Nws yog daim phiaj hlau thaiv txhua tus uas tuaj cawm siav rau hauv nws.

32 Leejtwg yog Tus Tswv, tsuas yog (יחוח)Yahweh xwb? Leejtwg ua txhib zeb, tsuas yog peb Txiv (יחוח)Yahweh xwb?

33 (יחוח)Yahweh yog kuv lub chaw nraim cev uas ruaj khov, thiab ua rau txojkev uas kuv taug tso siab plhuav.

34 Nws ua rau kuv txhais kotaw zoo yam nkaus li kotaw maum mos lwj, thiab nws tso kuv nyob tso siab plhuav saum tej roob siab.

35 Nws cob kuv txhais tes kom txawj ua rog, kuv txhais npab thiaj rub tau hneev nti tooj liab.

36 Koj pub daim phiaj hlau uas cawm dim rau kuv, thiab koj nqis los pab ua rau kuv loj hlob tuaj.

37 Koj pub kuv taug txojkev dav thiab kuv txhais taw tsis plam.

38 Kuv caum kuv cov yeeb ncuab thiab ua kom lawv puam tsuaj, kuv tsis thim rov qab mus txog thaum lawv puam tsuaj tag.

39 Kuv rhuav tshem lawv, kuv ntaus lawv ntsoog tag lawv thiaj sawv tsis taus, lawv ntog rau ntawm kuv kotaw.  

40 Koj muab zog sia ntawm kuv duav mus ua rog.  Koj ua rau kuv cov yeeb ncuab ntog khwb tag nrho ntawm kuv xub ntiag.  

41 Koj ua rau kuv cov yeeb ncuab thim khiav tig nrob qaum rau kuv, thiab cov uas ntxub kuv mas kuv ua kom puam tsuaj tag.

42 Lawv tsa muag saib los tsis muaj leejtwg cawm tau lawv dim, lawv hu thov

(יחוח)Yahweh, tiamsis nws tsis teb lawv.

43 Kuv muab lawv tsoo mos nyoos yam li hmoov av, kuv muab lawv tsoo tawg tsuj yam li tej av nplaum ntawm ntug kev.

44 Koj cawm kuv dim qhov uas nrog tej tibneeg sib txeeb. Koj tuav rawv kuv ua ib tsoom tebchaws tus thawj, tej tibneeg uas kuv tsis tau paub dua los kuj zwm rau kuv.

45 Lwm haiv neeg kuj tuaj pe khwb nkaus rau ntawm kuv. Thaum lawv tau hnov txog kuv, lawv kuj mloog kuv lus.

46 Lwm haiv neeg poob siab tag, thiab tawm hauv lawv lub chaw ruaj khov ua ib ce tshee nyho los.

47 (יחוח)Yahweh yeej muaj txojsia nyob. Cia li qhuas kuv txhib zeb. Cia li txhawb nqa kuv Tus Tswv uas yog txhib zeb uas cawm kuv dim,

48 yog (יחוח)Yahweh uas pab kuv ua pauj thiab coj tej tibneeg nyob rau hauv kuv qab kev tswjhwm,

49 thiab cawm kuv dim ntawm kuv cov yeeb ncuab. Koj yog tus uas tsa kuv sawv siab dua cov uas tawm tsam kuv.  Koj twb tso kuv dim ntawm cov tibneeg lim hiam ntais ntuj lawm.

50 Au (יחוח)Yahweh, vim li no kuv thiaj qhuas ntxhias koj rau hauv ib tsoom tebchaws sawvdaws thiab hu nkauj qhuas koj lub npe.

51 (יחוח)Yahweh pub kev kov yeej loj rau nws tus vajntxwv, nws ua nws txojkev hlub ruaj khov tshwm rau tus uas nws hliv roj tsa cia lawd, yog Daviv thiab nws caj ces mus ib txhis.