Ua Pauj Rau Cov Kinpe‑oos

1 Thaum uas Daviv ua vajntxwv mas muaj kev tshaib plab tau peb xyoos, xyoo tag xyoo tuaj los kuj tshaib. Ces Daviv txawm kub siab lug nrhiav (יחוח)Yahweh. Mas (יחוח)Yahweh hais tias, lub txim uas tua tibneeg poob rau saum Sha-ul thiab Sha-ul caj ces, rau qhov nws muab cov Kinpe‑oos tua pov tseg.

2 Vajntxwv thiaj hu cov Kinpe‑oos tuaj hais rau lawv.  Cov Kinpe‑oos ntawd tsis yog tibneeg Ixayees, lawv yog cov Amaulais uas tseem tshuav noob nyob.  Txawm yog cov Ixayees tau cog lus twv hais tias yuav tseg lawv txojsia cia, los Sha-ul pheej nrhiav kev muab lawv tua pov tseg, vim yog nws mob siab cov Ixayees thiab cov Yahdah.

3 Daviv hais rau cov Kinpe‑oos tias, kuv yuav ua abtsi pab nej?  Kuv yuav ua li cas thiaj ntxuav tau tej kev txhaum no tseg, nej thiaj foom koob hmoov rau (יחוח)Yahweh qub txeeg qub teg?  

4 Cov Kinpe‑oos hais rau nws tias, qhov uas Sha-ul thiab nws caj ces ua rau peb ntawd, mas tsis yog nyiaj thiab kub yuav ntxuav tau, thiab tsis yog peb yuav muab cov Ixayees ib tug twg tua pov tseg. Vajntxwv thiaj hais tias, ces nej xav kom kuv ua abtsi pab nej?

5 Lawv hais rau vajntxwv tias, tus yawg uas muab peb tua pov tseg thiab ntaus tswvyim yuav muab peb ua kom puam tsuaj xwv thiaj ua rau peb tsis muaj chaw nyob hauv Ixayees tebchaws,

6 mas thov muab tus ntawd xya leej tub rau peb es peb yuav coj mus dai caj pas tuag tab meeg (יחוח)Yahweh xub ntiag rau ntawm Kinpe‑as uas yog Sha-ul lub moos, yog tus uas (יחוח)Yahweh xaiv tsa. Mas vajntxwv hais tias, kuv yuav muab lawv cob rau nej.

7 Vajntxwv tseg Mefinpause uas yog Yahnathas tus tub txoj sia, yog Sha-ul tus xeeb ntxwv, vim yog Sha-ul tus tub Yahnathas thiab Daviv tau tuav (יחוח)Yahweh lub npe cog lus twv cia lawm.  

8 Mas vajntxwv muab Aiyag tus ntxhais Lixapas ob tug tub uas yug rau Sha-ul, uas npe hu ua Amaunis thiab Mefinpause, thiab muab Sha-ul tus ntxhais Melas tsib tug tub uas nws yug rau Npaxilais tus tub Adi‑ees uas yog tibneeg hauv Mehaulas.

9 Vajntxwv muab cov tibneeg no rau hauv cov Kinpe‑oos txhais tes. Lawv txawm muab cov no dai caj pas saum lub roob tab meeg (יחוח)Yahweh xub ntiag, mas xya leej ntawd raug muab tua kiag ua ke rau thawj hnub uas lawv pib hlais qoob loo, rau thaum lawv pib hlais qeb.

10 Mas Aiyag tus ntxhais Lixapas muab khaub seev tsaj pua saum lub pob zeb rau nws nyob txij thaum pib hlais qoob loo mus txog thaum dej nag poob los ntub cov cev tuag ntawd. Nruab hnub nws tsis kheev noog saum nruab ntug los thos lawv, hmo ntuj nws tsis kheev tsiaj qus los kov.

11 Thaum muaj tibneeg mus hais rau Daviv tias, Aiyag tus ntxhais Lixapas uas yog Sha-ul tus hluas nkauj tau ua li ntawd lawm.

12 Daviv kuj mus coj Sha-ul thiab Sha-ul tus tub Yahnathas cov pob txha ntawm cov tib neeg hauv Yanpes Kile‑as los. Cov tibneeg hauv Yanpes Kile‑as ntawd twb nyiag cov pob txha ntawd hauv lub tshav puam hauv lub moos Npesas uas cov Filixatees muab khuam cia rau hnub uas cov Filixatees tua Sha-ul saum lub roob Kinpau‑as lawm.  

13 Mas vajntxwv coj Sha-ul thiab Sha-ul tus tub Yahnathas cov pob txha los, thiab lawv khaws cov tibneeg uas muab dai caj pas tuag ntawd cov pob txha.

14 Mas lawv muab Sha-ul thiab Sha-ul tus tub Yahnathas cov pob txha faus rau hauv Sha-ul leej txiv Khij lub qhov ntxa ntawm Xelas hauv Npeeyamees teb chaws. Lawv kuj ua txhua yam uas vajntxwv hais kom lawv ua. Dhau ntawd (יחוח)Yahweh kuj mloog tej lus uas lawv thov (יחוח)Yahweh pab lub tebchaws ntawd.

​

Ua Rog Rau Cov Filixatees

(1 Vaj Keeb Kwm 20:4-8)

15 Cov Filixatees ua rog rau cov Ixayees dua ib zaug.  Daviv kuj nrog nws cov tub teg tub taws nqis mus ua rog rau cov Filixatees, ces Daviv txawm txog txog siav.

16 Inpinpenaus yog cov tibneeg loj loj siab siab cov noob. Nws coj ib rab hmuv tooj liab nyhav peb puas sekhees thiab ris ib rab ntaj tshiab ntawm duav, xav tias nws yuav tua Daviv.

17 Tiamsis Xeluyah tus tub Anpisais los pab Daviv thiab ntaus tus Filixatees ntawd, muab nws tua pov tseg.  Mas Daviv cov tibneeg thov hais tias, koj tsis txhob nrog peb tawm mus ua rog dua li lawm tsam ces cov Ixayees lub teeb tuag.

18 Dhau ntawd rov qab ua rog rau cov Filixatees ntawm lub moos Kaus. Zaum ntawd Xinpekhais uas yog Husas cum tua tau Xas uas yog cov tibneeg loj loj siab siab cov noob.

19 Thiab rov qab ua rog rau cov Filixatees ntawm lub moos Kaus. Ya‑ales Aulekis tus tub Eehanas uas yog tibneeg Npelehees tua tau Kaulias uas yog tibneeg Nkas. Nws rab hmuv tus ko luaj li rab nqos ntos ntaub.

20 Thiab rov qab ua rog ntawm lub moos Nkas, yog lub moos uas muaj ib tug txivneej loj kawg li, muaj rau tus ntiv tes thiab rau tus ntiv taw, huvsi muaj nees nkaum plaub tug ntiv tes ntiv taw.  Nws yog cov tibneeg loj loj siab siab cov noob.

21 Thaum nws twv ntxhias cov Ixayees mas Daviv tus tijlaug Sime‑is tus tub Yahnathas kuj muab nws tua kiag.  

22 Plaub tug no yog cov tibneeg loj loj siab siab hauv lub moos Nkas cov noob. Lawv tuag tag rau Daviv tes thiab tuag rau Daviv cov tub teg tub taws tes.