Senpas Ntxeev Siab

1 Txawm cia li muaj ib tug tibneeg phem tsis zoo, npe hu ua Senpas uas yog Npilis uas yog xeem Npeeyamees tus tub. Nws tshuab raj kub yaj thiab hais tias, peb tsis muaj feem hauv Daviv. Peb tsis muaj qub txeeg qub teg hauv Yisais tus tub. Cov Ixayees sawvdaws nyias rov qab mus rau hauv nyias lub tsev ntaub lawm.

2 Ua li no mas cov tibneeg Ixayees sawvdaws tawm ntawm Daviv mus raws Senpas uas yog Npilis tus tub. Tiamsis cov Yahdah raws nraim lawv tus vajntxwv ntawm tus dej Yaladees mus txog lub nroog Yeluxalees.

3 Daviv kuj los txog nws lub tsev hauv Yeluxalees mas vajntxwv coj kaum tus hluas nkauj uas nws muab tseg cia zov nws lub tsev mus kaw cia rau hauv ib lub tsev, tso tub rog zov huvsi. Nws pub rau noj rau haus tiamsis nws tsis mus nrog pw li.  Cov pojniam ntawd raug muab kaw nyob yam nkaus li tej poj ntsuam mus txog hnub tuag li.  

4 Vajntxwv txawm hais rau Amaxas tias, cia li hu cov tibneeg Yahdah kom tuaj txhij rau hauv peb hnub no, thiab koj los tuaj thiab.

5 Mas Amaxas mus hu cov Yahdah, tiamsis nws ua qeeb qeeb twb dhau lub sijhawm uas teem cia lawm.

6 Daviv thiaj hais rau Anpisais tias, nimno Npilis tus tub Senpas yuav ua phem rau peb heev dua li Axaloos ua. Cia li coj kuv cov tub teg tub taws mus caum nws, tsam ces nws mus nyob rau hauv tej moos uas muaj ntsa loog lawm ces nws yuav khiav dim peb mus.

7 Yahas cov tibneeg thiab cov Khelethis thiab cov Pelethis thiab cov tub rog uas muaj zog huvsi nrog Anpisais mus. Lawv tawm hauv Yeluxalees caum Npilis tus tub Senpas.

8 Thaum lawv nyob ntawm lub pob tsuas loj uas nyob ntawm Kinpe‑oos mas Amaxas tuaj ntsib lawv. Yahas hnav cev tsoos tub rog uas sia txoj siv tawv ris hnab ntaj thiab rab ntaj rau ntawm duav. Thaum Yahas tuaj ze zog, nws rab ntaj txawm cia li hlauv kiag.

9 Yahas txawm hais rau Amaxas tias, tijlaug nyob zoo lov? Yahas txawm xuas txhais tes xis ntsiab nkaus Amaxas hwj txwv yuav nwj.  

10 Tiamsis Amaxas tsis nco pom rab ntaj hauv Yahas txhais tes. Yahas txawm xuas ntaj nkaug Amaxas plab mas nyhuv hlauv kiag rau hauv av. Twb tsis txog nkaug zaum ob ces nws twb tuag lawm. Yahas thiab nws tus kwv Anpi-sais thiaj caum Npilis tus tub Senpas mus.

11 Yahas ib tug tub rog los sawv ze ntawm Amaxas mas hais tias, leejtwg pom zoo rau Yahas, leejtwg tuaj Daviv tog, cia li nrog Yahas mus.

12 Amaxas lub cev tuag xyab luas tsau ntshav tsawv hauv txojkev. Tus tub rog ntawd pom tias cov tibneeg sawvdaws tuaj nres rau qhov ntawd. Nws kuj coj Ama-xas lub cev tuag ntawm txojkev mus pov tseg rau tom teb thiab muab khaub ncaws los npog rau.

13 Thaum uas muab Amaxas lub cev tuag coj ntawm txojkev mus pov tseg lawm mas cov tibneeg sawvdaws kuj nrog Yahas mus caum Npilis tus tub Senpas.

14 Senpas hla cov xeem Ixayees sawvdaws mus txog lub moos Anpees hauv Npe Ma‑akhas, mas Npilis cum kuj tuaj ua ke nrog nws mus.

15 Cov tibneeg uas nrog Yahas kuj tuaj vij nws hauv lub moos Anpees hauv Npe Ma‑akhas. Lawv tsub av rau sab ntsa loog nraud mus nto plaws saum ntsa loog. Lawv tab tom tsoo tej ntsa loog kom pob.

16 Ces txawm muaj ib tug poj niam ntse ntsuav qw hauv moos tuaj hais tias, thov mloog, thov mloog. Hais kom Yahas tuaj ntawm no, kuv yuav nrog nws hais lus.

17 Yahas thiaj li txav ze zog mas tus pojniam ntawd hais tias, koj yog Yahas lov? Yahas teb tias, yog kawg. Tus pojniam ntawd txawm hais tias, thov koj mloog kuv uas yog koj tus nkauj qhe tej lus. Yahas teb tias, kuv tab tom mloog los maj. 18 Tus pojniam thiaj hais tias, yav thaum ub lawv tau hais tias, cia lawv mus sablaj rau ntawm Anpees, ces lawv thiaj hais haum qhov ntawd.

19 Kuv yog ib tug uas nyiam kev thaj yeeb thiab kev ncaj ncees rau hauv cov Ixayees.  Koj xav ua rau ib lub moos uas zoo li leej niam hauv cov Ixayees puam tsuaj.  Ua li cas koj yuav muab ()Yahweh qub txeeg qub teg nqos tag huvsi?

20 Yahas teb tias, qhov uas kuv yuav nqos lossis ua rau puam tsuaj mas thov kom nyob deb ntawm kuv, nyob deb ntawm kuv nawb!

21 Qhov no tsis muaj tseeb. Muaj ib tug yawg nyob pem toj siab Efa‑is tebchaws, yog Npilis tus tub Senpas, nws tau tsa nws txhais tes sawv twv rau vajntxwv Daviv. Cia li muab kiag nws tib leeg rau kuv mas kuv yuav thim tub rog rov qab ntawm lub moos no. Tus pojniam txawm hais rau Yahas tias, kuv yuav muab tus yawg ntawd lub taubhau laim saum ntsa loog tuaj rau koj.

22 Tus pojniam ntawd mus hais nws tej tswvyim rau cov pejxeem sawvdaws. Mas lawv txawm txiav Npilis tus tub Senpas lub taubhau muab laim rau Yahas. Yahas thiaj tshuab raj kub yaj ces lawv txawm tawm ntawm lub moos ntawd nyias mus rau nyias vaj nyias tsev lawm. Yahas kuj rov qab mus cuag vajntxwv hauv lub nroog Yeluxalees.

​

Daviv Cov Nom Tswv

23 Yahas yog tus uas kav tag nrho Ixayees cov tub rog sawvdaws, thiab Yahyadas tus tub Npenayah yog tus uas kav cov Khelethis thiab cov Pelethis.

24 Adaulas yog tus uas saib cov uas raug quab yuam ua haujlwm. Ahilus tus tub Yahsafas yog tus uas sau ntawv keeb kwm.

25 Sevas yog tus tub sau ntawv.  Xadaus thiab Anpiyasthas ua pov thawj.

26 Ilas uas yog Ya‑is cum kuj ua Daviv tus pov thawj.