1 Lawv mus hais rau Yahas tias, saib maj, vajntxwv quaj thiab quaj ntsuag Axaloos.

2V im li no hnub ntawd kev kov yeej thiaj ntxeev ua kev quaj ntsuag rau cov pej xeem sawvdaws, rau qhov hnub ntawd lawv hnov tias, vajntxwv quaj lwj siab rau nws tus tub.

3 Hnub ntawd cov tub rog nyiag kev nkag los rau hauv lub moos yam nkaus li cov tub rog uas khiav rog thiab txaj muag kawg.  

4 Vajntxwv muab ntaub kauv nws lub ntsej muag thiab quaj nrov nrov hais tias, Au kuv tus tub Axaloos, Au Axaloos es, kuv tus tub, kuv tus tub es.  

5 Yahas txawm los rau hauv vajntxwv tsev thiab hais tias, vajntxwv, hnub no koj ua rau koj cov tub teg tub taws sawvdaws uas cawm koj txojsia thiab cawm koj tej tub tej ntxhais thiab koj tej pojniam thiab tej hluas nkauj txojsia raug kev txaj muag,

6 rau qhov koj hlub cov uas ntxub koj thiab koj ntxub cov uas hlub koj.  Hnub no koj tau ua rau sawvdaws pom tseeb tias koj saib cov thawj rog thiab cov tub teg tub taws tsis muaj txiaj muaj ntsig. Kuv paub tias yog hnub no Axaloos ciaj sia nyob es peb tuag tag huvsi lawm, koj yuav zoo siab.   

7 Vim li no koj cia li sawv tsees mus hais ib lo lus tshav ntuj rau koj cov tub teg tub taws, rau qhov kuv tuav (יחוח)Yahweh lub npe twv hais tias, yog koj tsis mus hais mas hmo no yuav tsis tshuav ib tug txivneej twg nrog koj nyob kiag li.  Mas qhov no yuav phem rau koj heev dua li tej xwm txheej phem huvsi uas tau los raug koj txij thaum koj yau los txog niaj hnub nimno.

8 Vajntxwv thiaj sawv tsees mus nyob ntawm rooj loog.  Muaj tibneeg hais rau cov tub rog tias, saib maj, vajntxwv zaum ntawm rooj loog. Cov tub rog sawvdaws thiaj mus rau ntawm vajntxwv.

​

Daviv Rov Los Rau Hauv Yeluxalees

Cov Ixayees nyias khiav mus rau nyias vaj nyias tsev tag lawm.

9 Cov pejxeem sawvdaws sib cav thoob plaws hauv txhua xeem Ixayees hais tias, vajntxwv tso peb dim hauv peb cov yeeb ncuab txhais tes thiab cawm peb dim hauv cov Filixatees txhais tes lawm. Nimno nws khiav Axaloos tawm hauv lub tebchaws mus lawm.

10 Los Axaloos uas peb tsa ua vaj ntxwv kav peb kuj tuag hauv tshav rog lawm. Ua cas nej tsis hais abtsi txog qhov uas yuav coj vajntxwv rov los li?

11 Vajntxwv Daviv xa xov mus hais rau Xadaus thiab Anpiyathas uas ua pov thawj hais tias, neb cia li hais rau Yahdah cov kev txwj laug tias, ua cas nej yuav ua pab tom qab kawg uas coj vajntxwv rov los rau hauv lub vaj lub tsev? Cov Ixayees sawvdaws tej lus twb tuaj txog vajntxwv hauv nws lub chaw nyob lawm.

12 Nej yog kuv cov kwvtij txheeb, nrog kuv koom nqaij koom txha. Ua cas nej yuav ua pab tom qab kawg uas coj vajntxwv rov los?

13 Thiab hais rau Amaxas tias, koj tsis yog nrog kuv koom nqaij koom txha lov? Yog koj tsis tau nyob Yahas chaw ua thawj kav kuv cov tub rog mas thov ()Yahweh rau txim rau kuv nyhav dua.

14 Amaxas kuj rub tau cov tibneeg Yahdah sawvdaws lub siab koom kiag rau Daviv. Lawv thiaj tso tibneeg mus hais rau vajntxwv tias, thov koj thiab koj cov tub teg tub taws sawvdaws rov los.

15 Vajntxwv thiaj li rov los rau ntawm tus dej Yaladees. Cov Yahdah thiaj mus tos vajntxwv ntawm lub moos Kilakas yuav coj vajntxwv hla tus dej Yaladees.  

16 Sime‑is uas yog Kelas tus tub yog xeem Npeeyamees nyob hauv lub moos Npahulis, maj nroos tuaj nrog cov Yahdah tos vajntxwv Daviv.

17 Xeem Npeeyamees muaj ib txhiab leej nrog nws tuaj. Thiab Xinpas uas yog Sha-ul tsev neeg tus tub qhe thiab nws kaum tsib tug tub thiab nws nees nkaum tus tub qhe kuj maj nroos tuaj tos vajntxwv ntawm ntug dej Yaladees.

18 Lawv hla tus dej mus coj vajntxwv tsev neeg hla dej los thiab ua txhua yam raws li vajntxwv lub siab xav. Kelas tus tub Sime‑is khwb nkaus pe vajntxwv rau thaum vajntxwv yuav hla tus dej Yaladees,

19 thiab nws hais rau vajntxwv tias, vajntxwv uas yog kuv tus tswv, thov koj zam kuv lub txim thiab tsis txhob nco txog tej kev txhaum uas kuv uas yog koj tus tub qhe tau ua rau hnub uas koj khiav tawm hauv Yeluxalees lawm. Thov vajntxwv tsis txhob cim rau hauv lub siab.

20 Kuv uas yog koj tus tub qhe yeej paub tias kuv ua txhaum lawm.  Vim li no hnub no kuv thiaj ua Yahxej tej caj ces thawj pab uas tuaj tos vajntxwv uas yog kuv tus tswv.

21 Anpisais uas yog Xeluyah tus tub txawm teb tias, tsis tsim nyog muab Sime‑is tua pov tseg lov, vim nws tau tsawm foom tus uas ()Yahweh tsa cia lawd?

22 Tiamsis Daviv hais tias, Xeluyah ob tug tub es, kuv thab txog neb abtsi es hnub no neb yuav tuaj tawm tsam kuv? Hnub no tsim nyog muab leejtwg tua pov tseg lov? Hnub no kuv tsis paub tias kuv yog vajntxwv kav cov Ixa-yees lov?

23 Vajntxwv thiaj hais rau Sime‑is tias, koj yuav tsis tuag. Thiab vajntxwv cog lus twv tseg rau nws.

24 Mefinpause uas yog Sha-ul tus xeeb ntxwv kuj tuaj tos vajntxwv. Nws tsis tau tu nws txhais kotaw, tsis ntsis nws cov hwj txwv, thiab tsis tau ntxhua nws tej ris tsho txij hnub uas vajntxwv tawm khiav mus lawd los txog hnub uas vajntxwv rov los zoo.

25 Thaum Mefinpause tawm hauv Yeluxalees mus tos vajntxwv, vajntxwv nug nws tias, Mefinpause, ua cas koj tsis nrog kuv mus?

26 Nws teb tias, vajntxwv uas yog kuv tus tswv es, kuv tus tub qhe dag kuv. Kuv hais kom nws nog eeb rau ib tug nees luav rau kuv caij nrog koj mus, rau qhov kuv tuag taw.

27 Nws muab kuv uas yog koj tus tub qhe hais dag rau vajntxwv uas yog kuv tus tswv. Tiamsis kuv tus vajntxwv zoo yam li (יחוח)Yahweh tus tubtxib saum ntuj. Koj cia li ua raws li koj pom zoo rau kuv.

28 Kuv txiv tsev neeg tsuas yog cov uas tsim nyog raug tua tuag rau ntawm vajntxwv uas yog kuv tus tswv lub xub ntiag. Tiamsis koj tseem tsa kuv uas yog koj tus tub qhe nrog cov uas nrog koj koom rooj noj rooj haus ua ke. Kuv tseem muaj cai thov abtsi ntawm vajntxwv?

29 Vajntxwv hais rau nws tias, tsis txog koj hais abtsi ntxiv lawm. Kuv txiav txim siab lawm tias yuav muab tej teb faib rau Xinpas neb ob leeg.  

30 Mefinpause hais rau vajntxwv tias, cia Xinpas yuav huvsi mus, vim vajntxwv uas yog kuv tus tswv twb rov los txog tsev tso siab plhuav lawm.  

31 Npaxilais uas yog tibneeg Kile‑as kuj tuaj ntawm lub moos Laukelis nrog vajntxwv mus txog tus dej Yaladees thiab xa vajntxwv hla tus dej Yaladees mus.

32 Npaxilais laus heev lawm, hnub nyoog muaj yim caum xyoo.  Nws tau coj zaub mov tuaj pub rau vajntxwv rau thaum vajntxwv nyob ntawm lub moos Mahana‑is, rau qhov nws nplua nuj heev.  

33 Vajntxwv hais rau Npaxilais tias, cia li nrog kuv hla mus, kuv yuav yug koj, nrog kuv nyob hauv lub nroog Yeluxalees.  

34 Tiamsis Npaxilais hais rau vajntxwv tias, kuv yuav nyob pes tsawg xyoo ntxiv thiab, es kuv yuav nrog vajntxwv mus nyob hauv lub nroog Yeluxalees?  

35 Hnub no kuv hnub nyoog muaj yim caum xyoo lawm.  Kuv tseem yuav paub qhov twg haum siab qhov twg tsis haum siab lov?  Kuv uas yog koj tus tub qhe tseem yuav txawj sim noj saib yam twg qab yam twg tsis qab thiab lov? Kuv tseem yuav mloog tej tub tej ntxhais hu nkauj tau thiab lov? Ua cas tseem yuav cia kuv ua nra tsav ntxiv rau vajntxwv uas yog kuv tus tswv thiab?

36 Kuv uas yog koj tus tub qhe yuav xa koj hla dej Yaladees mus me ntsis xwb. Ua cas vajntxwv yuav pub tej tshav ntuj npaum li no diam pauj rau kuv?

37 Thov cia kuv uas yog koj tus tub qhe rov qab mus es tuag rau hauv kuv lub moos ze kuv niam kuv txiv lub qhov ntxa. Tus no yog Khihas uas yog koj tus tub qhe, thov cia nws nrog vajntxwv uas yog kuv tus tswv mus, koj pub rau nws raws li koj pom zoo.

38 Vajntxwv teb tias, Khihas yuav nrog kuv mus, kuv yuav pub rau nws raws li koj pom zoo.  Thiab txhua yam uas koj xav kom kuv ua rau koj, kuv yuav ua raws li ntawd.

39 Ces cov tibneeg sawvdaws txawm hla tus dej Yaladees mus, vajntxwv kuj hla mus thiab. Vajntxwv nwj Npaxilais thiab foom koob hmoov rau nws, ces Npaxilais txawm rov qab mus nws vaj nws tsev lawm.

40 Vajntxwv taug kev mus rau ntawm lub moos Kilakas, Khihas kuj nrog nws mus thiab. Cov Yahdah huvsi thiab cov Ixayees ib nrab coj vajntxwv hla los.

41 Ces cov Ixayees sawvdaws tuaj cuag vajntxwv thiab hais rau nws tias, ua cas peb cov kwvtij Yahdah nyiag koj mus lawm thiab coj vajntxwv thiab nws tsev neeg thiab Daviv cov tub rog sawvdaws hla tus dej Yaladees los lawm?

42 Cov Yahdah thiaj teb cov Ixayees tias, rau qhov vajntxwv yog peb cov kwvtij txheeb. Nej yuav chim txog qhov no ua abtsi? Peb puas tau noj vajntxwv ib yam abtsi li lossis nws puas tau pub tshav ntuj abtsi rau peb li?

43 Cov Ixayees teb cov Yahdah tias, peb muaj feem kaum npaug rau hauv vajntxwv, peb muaj feem ntau dua nej rau hauv Daviv. Ua cas nej saib tsis taus peb li no? Peb yog cov uas xub hais txog qhov uas coj peb tus vajntxwv rov los los tsis yog? Tiamsis cov Yahdah tej lus muaj ceem heev dua cov Ixayees tej lus.