Axaloos Tuag

1 Daviv txawm txheeb cov tibneeg uas nrog nws mus thiab tsa kom muaj thawj kav ib txhiab leej thiab kav ib puas leej.

2 Daviv xa nws cov tub rog tawm mus ua peb pab, Yahas kav ib pab, Anpisais uas yog Xeluyah tus tub kav ib pab thiab Ithais uas yog tibneeg Nkas kav ib pab. Vajntxwv hais rau nws cov tub rog tias, kuv yuav nrog nej mus thiab.

3 Tiamsis lawv hais tias, koj tsis txhob mus. Yog peb raug ntiab khiav, los yeeb ncuab yeej tsis quav ntsej peb. Txawm yog peb tuag ib nrab lawm los lawv yeej yuav tsis quav ntsej peb.  Tiamsis koj muaj nqis npaum li peb kaum txhiab leej. Koj nyob hauv lub moos xa tibneeg tuaj pab peb xwb mas zoo dua.

4 Vajntxwv hais rau lawv tias, nej pom zoo li cas kuv yuav ua raws li ntawd.

Vaj ntxwv thiaj sawv ntsug ntawm rooj loog ib sab saib thaum cov tub rog sawvdaws tawm tuaj mus ua tej pab, ib puas leej thiab ib txhiab leej.

5 Vajntxwv hais rau Yahas thiab Anpisais thiab Ithais tias, saib rau kuv es tsis txhob ua nyhav rau tus tub hluas Axaloos ntawd. Thaum vajntxwv hais txog Axaloos li no rau cov thawj rog sawvdaws, mas cov tub rog sawvdaws kuj puav leej hnov.

6 Cov tub rog txawm tawm mus ua rog rau cov Ixayees, lawv sib ntaus sib tua rau hauv hav zoov Efa‑is.

7 Cov Ixayees kuj swb Daviv cov tub rog, mas hnub ntawd muaj tibneeg raug tua tuag coob kawg, tuag nees nkaum txhiab leej rau qhov ntawd.  

8 Kev ua rog nthuav dav mus thoob plaws lub tebchaws ntawd.  Hnub ntawd hav zoov noj tibneeg coob dua hniav ntaj noj.

9 Mas Axaloos cia li ntsib nthav Daviv cov tub rog. Axaloos caij rawv luj txwv, mas thaum luj txwv dhia mus rau hauv tus qab ntoo qheb uas ntxhov ntxhov, Axaloos lub taubhau txawm khuam nkaus rau hauv tus ceg ntoo ceev ceev li. Thaum tus luj txwv uas nws caij dhia dhau lawm, nws txawm dai vias ib nta ntoo.  

10 Muaj ib tug yawg los pom ces txawm mus hais rau Yahas tias, kuv pom Axaloos dai saum ib tug ntoo qheb.

11 Yahas hais rau tus uas hais rau nws ntawd tias, ua li cas no? Koj pom nws lawm lov? Ua cas koj tsis muab nws tua pov tseg rau qhov ntawd? Kuv yuav zoo siab muab kaum lub npib nyiaj thiab ib txoj siv tawv rau koj.

12 Tiamsis tus yawg ntawd teb Yahas tias, txawm yog kuv txhais tes tau puag ib txhiab lub npib nyiaj los kuv yuav tsis cev tes tawm tsam vajntxwv tus tub, rau qhov peb lub qhov ntsej tau hnov tej uas vajntxwv hais rau koj thiab Anpisais thiab Ithais lawm hais tias, nej saib rau kuv es tsom kwm tus tub hluas Axaloos ntawd.

13 Yog kuv tsis mloog lus es txov nws txojsia lawm, yeej tsis muaj abtsi yuav npog tau ntawm vajntxwv, ces koj yuav tsis quav ntsej pab kuv.

14 Yahas txawm hais tias, kuv yuav tsis nkim sijhawm rau koj li no. Yahas txawm coj peb rab hmuv mus nkaug raug Axaloos lub plawv rau thaum nws tseem ciaj dai saum tus ntoo qheb.

15 Kaum tus tub rog hluas uas nqa Yahas tej cuab yeej ua rog vij nkaus Axaloos thiab muab nws tua kiag.

16 Yahas txawm tshuab raj kub yaj, mas cov tub rog thiaj rov qab tsis caum cov Ixayees lawm, vim yog Yahas tswj lawv cia.   

17 Lawv muab Axaloos lub cev tuag pov rau hauv ib lub qhov loj hauv hav zoov, thiab tib ib pawg pob zeb loj loj rau saud. Cov Ixayees sawvdaws nyias taus nyias khiav rov mus tsev tag lawm.

18 Thaum Axaloos tseem ua neej nyob nws txhos ib tug ncej ua chaw nco txog nws rau hauv lub Hav Vajntxwv, vim nws hais tias, kuv tsis muaj tub uas yuav tuav kuv lub npe mus li. Nws thiaj hu tus ncej ntawd raws li nws lub npe, luag thiaj hu tias tus ncej Axaloos los txog niaj hnub nimno.  

19 Xadaus tus tub Ahima‑as hais tias, cia kuv khiav coj xov mus hais rau vajntxwv paub tias (יחוח)Yahweh cawm nws dim hauv nws cov yeeb ncuab txhais tes lawm.   

20 Yahas hais rau nws tias, hnub no koj tsis txhob coj xov mus.  Koj coj xov mus dua rau lwm hnub kuj tau, tiamsis hnub no koj tsis txhob coj xov mus, rau qhov vajntxwv tus tub tuag lawm.

21 Yahas hais rau ib tug tibneeg Khuj tias, koj cia li coj xov mus hais rau vajntxwv raws li koj qhov muag pom.  Tus tibneeg Khuj ntawd kuj nyo hau pe Yahas thiab khiav mus.

22 Xadaus tus tub Ahima‑as txawm rov hais rau Yahas tias, txawm li cas kuj xij, thov cia kuv khiav raws tus tibneeg Khuj ntawd mus. Yahas hais tias, metub, koj yuav khiav mus ua abtsi, rau qhov koj yuav tsis tau nqi zog xa tsab xov no?

23 Nws hais tias, txawm li cas los xij, kuv

yuav khiav mus.  Yahas hais rau nws tias, mus los maj.  Ces Ahima‑as txawm khiav taug txoj kev nram tiaj mus, huas tau tus tibneeg Khuj ntej mus.

24 Thaum ntawd Daviv zaum ntawm ob txheej rooj loog ntu nruab nrab. Muaj ib tug faj xwm nce mus rau saum lub ntsa loog mus sawv txheej sab saum lub rooj loog.  Thaum nws tsa muag saib pom ib tug yawg khiav tib leeg los.

25 Tus faj xwm qw hais rau vajntxwv paub. Vajntxwv hais tias, yog tib leeg los xwb, yeej yog coj xov zoo los.  Tus yawg ntawd khiav los ze zuj zus.

26 Tus faj xwm pom dua ib tug khiav los thiab. Tus faj xwm qw rau tus uas zov rooj loog tias, saib nawj, muaj dua ib tug khiav tib leeg los thiab. Vajntxwv hais tias, yog nws coj xov zoo los thiab.

27 Tus faj xwm hais tias, kuv saib mas tus uas khiav ua ntej khiav zoo yam nkaus li Xadaus tus tub Ahima‑as. Vajntxwv hais tias, nws yog tibneeg zoo. Nws coj xov zoo los.  

28 Ces Ahima‑as qw rau vajntxwv tias, zoo lauj! Nws txawm khoov ntshis ua lub plhu ti nkaus av pe hais tias, qhuas (יחוח)Yahweh uas yog koj Tus Tswv uas tau muab cov tibneeg ntxeev siab uas tawm tsam kuv tus tswv cob rau hauv vajntxwv txhais tes lawm.  

29 Vajntxwv hais tias, tus tub hluas Axaloos nyob zoo lov? Ahima‑as teb tias, thaum Yahas txib kuv uas yog koj tus tub qhe los no, kuv pom muaj tibneeg coob vij vog uas tsis paub tias xyov yog abtsi.

30 Vajntxwv hais tias, cia li los sawv ntawm no. Nws txawm mus sawv ntsug twj ywm.

31 Ua ciav tus tibneeg Khuj ntawd txawm khiav los txog.  Nws hais tias, muaj xov zoo hais rau vajntxwv uas yog kuv tus tswv, rau qhov hnub no (יחוח)Yahweh cawm koj dim hauv cov tibneeg sawvdaws uas sawv tawm tsam koj txhais tes lawm.  

32 Vajntxwv nug tus tibneeg Khuj tias, tus tub hluas Axaloos nyob zoo lov?

Tus tibneeg Khuj teb tias, thov cia vajntxwv tej yeeb ncuab thiab txhua tus uas sawv tawm tsam vajntxwv uas yog kuv tus tswv zoo li tus tub hluas ntawd.  

33 Vajntxwv nyuaj siab heev kawg, nws nce mus rau ib chav tsev uas nyob txheej saum lub rooj loog thiab quaj quaj. Thaum nws nce mus nws hais tias, Au kuv tus tub Axaloos, kuv tus tub, kuv tus tub Axaloos es, kuv xav tuag this koj.  Au Axaloos, kuv tus tub, kuv tus tub es.