Ahithaufees Tej Lus Kov Tsis Yeej Husais Tej Lus

1 Thiab Ahithaufees hais rau Axaloos tias, thov cia kuv xaiv kaum ob txhiab tus tub rog es hmo no kuv sawv kev mus caum Daviv.

2 Kuv yuav mus caum cuag rau thaum nws txog siav heev thiab poob siab ua rau nws ntshai ras zom zaws, cov tibneeg uas nrog nws ua ke sawvdaws yuav khiav tag.

Kuv yuav tua kiag vajntxwv tib leeg xwb,

3 thiab kuv yuav coj cov pejxeem sawvdaws rov los rau koj.  Thaum uas tua tau tib tug uas koj xav tua xwb, ces kuj tau cov pejxeem sawvdaws rov los lawm, thiab cov pejxeem sawvdaws yuav nyob kaj siab lug.

4 Cov lus no haum Axaloos thiab Ixayees cov kev txwj laug sawvdaws lub siab.

5 Axaloos thiaj hais tias, cia li hu Husais uas yog Akhis cum los. Peb yuav mloog saib nws hais li cas.

6 Thaum Husais los cuag Axaloos, Axaloos hais rau nws tias, Ahithaufees hais li no lawm.  Tsim nyog ua raws li nws qhia los tsis tsim nyog ua? Yog tsis tsim nyog ua, koj cia li hais.

7 Husais hais rau Axaloos tias, tej uas Ahithaufees hais zaum no tsis zoo.

8 Husais hais ntxiv tias, koj yeej paub tias koj txiv thiab nws cov tibneeg yog tub rog siab tuab. Lawv tab tom npau taws heev yam li tus maum dais tom hav zoov uas luag coj cov menyuam mus lawm. Dua li ntawd koj txiv yog tus uas txawj ua rog heev thiab hmo ntuj nws yuav tsis nrog nws cov tub rog pw ua ke.

9 Sim saib, tamsim no nws mus nkaum rau hauv lub qhov lossis nyob dua rau ib qho lawm. Thaum koj cov tub rog mus ntaus rog thawj zaug es qee leej raug tuag, leej twg hnov los yuav hais tias, Axaloos cov tub rog raug tua tuag.

10 Ces txawm yog cov tub rog uas siab tuab thiab lub siab zoo yam nkaus li tus tsov ntxhuav los yuav ntshai siab yaj tag, vim cov Ixayees sawvdaws yeej paub tias koj txiv yog tus uas muaj zog heev thiab nws cov tub rog kuj siab tuab.

11 Kuv cov lus qhia koj yog li no, koj sau cov Ixayees sawvdaws txij ntua lub moos Daj mus txog lub moos Npe‑awsenpas kom muaj tub rog coob yam nkaus li tej xuab zeb ntawm ntug hiavtxwv mas koj ua tus uas kav cov tub rog mus ntag.

12 Mas peb ntsib nws qhov twg kuj xij, peb yuav nias ntho nws yam nkaus tej lwg los rau hauv av. Mas Daviv thiab nws cov tibneeg yuav tsis tshuav ib tug li.

13 Yog nws thim mus rau hauv lub moos twg, cov Ixayees sawv daws yuav coj hlua mus rub lub moos ntawd rau hauv hav dej, ua kom tsis tshuav ib lub qe zeb nyob ntawm lub chaw kiag li.

14 Axaloos thiab cov Ixayees sawvdaws hais tias, tej lus uas Husais uas yog Akhis cum qhia zoo dua tej lus uas Ahithaufees qhia.

(יחוח)Yahweh twb npaj tseg ua kom tej lus zoo uas Ahithaufees qhia kov tsis yeej xwv (יחוח)Yahweh thiaj coj tau tej xwm txheej phem los raug Axaloos.

15 Husais txawm hais rau Xadaus thiab Anpiyathas uas ua pov thawj tias, Ahithaufees tau qhia li ub li no rau Axaloos thiab Ixayees cov kev txwj laug, thiab kuv qhia li ub li no.

16 Yog li ntawd cia li maj tso tibneeg mus hais rau Daviv hais tias, hmo no nws tsis txhob so ntawm lub chaw uas hla dej mus rau tebchaws moj sab qhua, cia li hla kiag mus tsam ces vajntxwv thiab nws cov tibneeg sawvdaws yuav raug muab nqos kiag huvsi.

17 Yahnathas thiab Ahima‑as tab tom tos ntawm lub qhov dej Eelaukees.  Muaj ib tug nkauj qhe pheej mus qhia rau nkawv, ces nkawv thiaj mus hais rau Daviv, rau qhov nkawv tsis kav mus rau hauv lub nroog rau leej twg pom.  

18 Tiamsis muaj ib tug tub hluas pom nkawv ces txawm mus hais rau Axaloos. Nkawv thiaj maj nroos khiav mus txog ib tug yawg lub tsev hauv lub moos Npahulis.  Yawg ntawd muaj ib lub qhov dej nyob ntawm tog tsev, nkawv txawm nqis mus nyob hauv lub qhov ntawd.

19 Tus yawg ntawd tus pojniam txawm muab ntaub los npog lub ncauj qhov thiab muab qoob los ziab rau saud tsis muaj leejtwg paub li.

20 Thaum Axaloos cov tub teg tub taws tuaj txog ntawm tus pojniam ntawd lub tsev, lawv txawm nug tias, Ahima‑as thiab Yahnathas nyob qhov twg? Tus pojniam ntawd teb tias, nkawv hla dej mus dhau lawm. Thaum lawv nrhiav tsis pom nkawv, lawv txawm rov mus rau hauv lub nroog Yeluxalees.

21 Thaum cov tibneeg ntawd rov mus lawd, nkawv li tawm hauv lub qhov los thiab mus qhia rau vajntxwv Daviv. Nkawv hais rau Daviv tias, cia li sawv tsees maj nroos hla tus dej mus, vim yog Ahithaufees twb qhia li ub li no txog koj lawm.

22 Daviv thiab nws cov tibneeg sawvdaws txawm sawv tsees hla tus dej Yaladees mus. Thaum kaj ntug ces tsis tshuav ib tug uas tsis tau hla tus dej Yaladees li.

23 Thaum Ahithaufees pom tias lawv tsis ua raws li tej lus uas nws qhia, nws txawm nog eeb caij nees luav mus rau nws lub tsev uas nyob hauv nws lub moos lawm.  Thaum nws tu nws lub cuab txhij lawm, nws txawm mus dai caj pas tuag, lawv thiaj muab nws faus rau hauv nws txiv lub qhov ntxa.

24 Daviv txawm mus txog lub moos Mahana‑is. Ces Axaloos thiab cov txivneej Ixayees sawvdaws txawm hla tus dej Yaladees mus.

25 Axaloos twb tsa Amaxas ua thawj rog nyob Yahas chaw lawm. Amaxas yog ib tug Ixayees hu ua Ithalas tus tub. Ithalas yuav Anpikas uas yog Nahas tus ntxhais thiab yog Xeluyah uas yog Yahas niam tus niam hluas.

26 Cov Ixayees thiab Axaloos ua yeej nyob hauv Kile‑as tebchaws.

27 Thaum Daviv tuaj txog ntawm lub moos Mahana‑is, mas Saunpis uas yog Nahas tus tub uas yog tibneeg hauv lub moos Lanpas hauv Asmoos tebchaws, thiab Makhis uas yog Ami‑ees hauv lub moos Laudenpas tus tub, thiab Npaxilais uas yog tibneeg Kile‑as nyob hauv lub moos Laukelis,

28 lawv coj tej txaj pw tej phaj, tej lauj kaub av, thiab tej mog, tej qeb, tej hmoov, tej qeb kib, tej taum lag, taum pauv,

29 thiab zib ntab thiab kua mis nyeem thiab tej yaj thiab tej thooj mis nyuj nkoog khov tuaj pub rau Daviv thiab nws cov tibneeg noj. Lawv hais tias, cov tibneeg ntawd tshaib thiab tsaug leeg heev thiab nqhis dej rau hauv tebchaws moj sab qhua.