Daviv Thiab Xinpas

1 Thaum Daviv mus dhau lub ncov roob mentsis lawd, Xinpas uas yog Mefinpause tus tub qhe txawm tuaj cuag Daviv, muaj ib nkawg nees luav nog eeb thiab thauj ob puas lub ncuav thiab ib puas tauv txiv hmab qhuav thiab ib puas tauv txiv ntoo caij ntuj so thiab ib hnab tawv cawv txiv hmab.

2 Vajntxwv hais rau Xinpas tias, koj coj tej no tuaj ua abtsi? Xinpas teb tias, nkawm nees luav no muab rau koj tsev neeg caij, cov ncuav thiab cov txiv ntoo caij ntuj so muab rau koj cov tibneeg noj, thiab cov cawv txiv hmab muab rau cov uas tsaug leeg hauv tebchaws moj sab qhua haus.

3 Vajntxwv hais rau nws tias, koj tus tswv Sha-ul tus xeeb ntxwv nyob qhov twg? Xinpas hais rau vajntxwv tias, nws nyob hauv Yeluxalees, rau qhov nws hais tias, hnub no cov Ixayees yuav muab kuv yawg lub tebchaws rov rau kuv kav.

4 Vajntxwv txawm hais rau Xinpas tias, nimno Mefinpause li ib puas tsav yam poob ua koj li.  Xinpas hais tias, kuv pe koj ua koj tsuag.  Vajntxwv uas yog kuv tus tswv, thov koj hlub kuv mus ib txhis.

​

Daviv Thiab Sime‑is

5 Thaum vajntxwv Daviv mus txog ntawm lub moos Npahulis, muaj ib tug yawg yog Sha-ul cuab tibneeg hu ua Sime‑is yog Kelas tus tub tawm tuaj cem foom taug kev tsis tu li,

6 thiab laim pob zeb tuaj rau Daviv thiab Daviv cov tub teg tub taws sawvdaws. Daviv cov tibneeg thiab cov tub rog siab loj siab tuab sawvdaws kuj nyob ntawm nws sab xis thiab sab laug.

7 Sime‑is cem hais tias, niag tibneeg noj nyoos, niag tibneeg lim hiam, cia li khiav mus, cia li khiav mus los maj!

8 (יחוח)Yahweh pauj Sha-ul tsev neeg tej ntshav rau koj. Koj sawv nws chaw kav tiamsis (יחוח)Yahweh muab lub tebchaws rau koj tus tub Axaloos kav.  Saib maj, kev puam tsuaj los raug koj lawm, vim koj yog tibneeg noj nyoos.

9 Anpisais uas yog Xeluyah tus tub txawm hais rau vajntxwv tias, ua cas yuav cia tus dev tuag no cem foom vajntxwv uas yog kuv tus tswv? Thov cia kuv mus muab nws lub taub hau txiav pov tseg.

10 Tiamsis vajntxwv hais tias, Xeluyah ob tug tub es, kuv thab txog neb abtsi? Yog tus ntawd cem foom vim (יחוח)Yahweh hais rau nws tias, cia li cem foom Daviv, mas leejtwg yuav kav hais rau nws tias, ua cas koj ua li no?

11 Daviv hais rau Anpisais thiab nws cov tub teg tub taws sawvdaws tias, sim xav saib, kuv tus tub ntag los tseem nrhiav txov kuv txojsia, tus tibneeg Npeeyamees no yim huab yuav ua li ntawd thiab. Cia nws nyob nws, cia nws cem foom nws, vim yog (יחוח)Yahweh hais rau nws lawm.

12 Tej zaum (יחוח)Yahweh yuav tsa muag saib kuv txojkev txom nyem nyuaj siab thiab (יחוח)Yahweh yuav ua qhov zoo pauj qhov uas hnub no nws cem foom kuv.

13 Ces Daviv thiab nws cov tibneeg pheej taug kev mus, tiamsis Sime‑is mus raws qaum kev cem foom thiab laim pob zeb w hmoov av rau lawv.  

14 Vajntxwv thiab cov tibneeg uas nrog nws sawvdaws mus txog tus dej Yaladees txog siav kawg, thiaj li so qhov ntawd kom los siav.

​

Axaloos Los Rau Hauv Yeluxalees

15 Axaloos thiab cov pejxeem sawvdaws uas yog cov Ixayees kuj los txog hauv lub nroog Yeluxalees, Ahithaufees kuj nrog lawv los thiab.

16 Thaum Daviv tus kwv luag Husais uas yog Akhis cum tuaj cuag Axaloos, Husais hais rau Axaloos tias, thov kom vajntxwv muaj txojsia loj siav ntev, thov cia vajntxwv muaj txojsia loj siav ntev.

17 Axaloos hais rau Husais tias, no yog koj ua zoo rau koj tus kwv luag lov? Ua cas tsis nrog koj tus kwv luag mus?

18 Husais hais rau Axaloos tias, tsis yog li ntawd. (יחוח)Yahweh thiab cov pejxeem no thiab cov Ixayees sawvdaws xaiv tus twg, kuv yuav tuaj tus ntawd tog thiab kuv yuav nrog tus ntawd nyob.

19 Dua ib qho, tsim nyog kuv ua haujlwm rau tus twg? Tsis yog nws tus tub lov? Kuv twb ua haujlwm rau koj txiv li cas lawm, kuv yuav ua haujlwm rau koj ib yam li ntawd.

20 Axaloos hais rau Ahithaufees tias, thov koj qhia saib peb yuav ua li cas thiaj zoo.

21 Ahithaufees hais rau Axaloos tias, cia li mus nrog koj txiv cov hluas nkauj uas nws tseg cia zov tsev pw.  Cov Ixayees sawvdaws yuav hnov tias koj muab koj tus kheej ua yam uas koj txiv ntxub kawg li mas cov tibneeg uas tuaj koj tog txhais tes yuav muaj zog heev.

22 Lawv thiaj nthuav tsev ntaub rau saum txheej tsev las tshav, mas Axaloos mus nrog nws txiv cov hluas nkauj pw tab meeg cov Ixayees sawvdaws.

23 Lub sijhawm ntawd lawv saib Ahithaufees tej lus tseem ceeb zoo yam nkaus li (יחוח)Yahweh hais ntag. Txawm yog Daviv thiab Axaloos los kuj saib hlob Ahithaufees txhua lo lus taw qhia.