2 XAMUYEES 15

Axaloos Fav Xeeb Rau Daviv

1 Los rau tom qab no Axaloos yuav tau ib lub tsheb ua rog thiab nees thiab muaj tub teg tub taws tsib caug leej ua nws ntej.

2 Axaloos pheej sawv ntxov mus sawv rau ntawm ntug kev ntawm rooj loog. Yog leejtwg muaj plaub yuav hais kom vajntxwv tu, Axaloos kuj hu tus ntawd hais tias, koj tuaj lub moos twg tuaj? Thaum tus ntawd teb tias nws yog xeem ub xeem no hauv cov Ixayees,

3 mas Axaloos txawm hais rau nws tias, tej lus uas koj tuaj thov kuj zoo thiab raug cai, tiamsis vajntxwv tsis tau tsa leejtwg ua tus uas mloog koj tej lus.

4 Thiab Axaloos hais ntxiv tias, kheev lam yog kuv tau ua tus tu plaub hauv lub tebchaws no. Mas thaum leejtwg muaj plaub muaj ntug tau tuaj cuag kuv mas kuv yuav tu ncaj ncees rau tus ntawd.

5 Thaum leejtwg tuaj ze yuav pe nws, nws cev tes kiag mus ntsiab tus ntawd cia thiab nwj.

6 Axaloos ua li no rau txhua tus Ixayees uas tuaj thov vajntxwv tu plaub.  Axaloos ua li no kom cov Ixayees qaug siab rau nws.

7 Thaum dhau plaub xyoos lawd, Axaloos hais rau vajntxwv tias, thov koj tso kev cia kuv mus rau hauv lub moos Henploos mus pauj tej uas kuv tau fiv cia rau (יחוח)Yahweh lawd.  

8 Kuv uas yog koj tus tub qhe twb cog lus fiv rau thaum kuv nyob hauv lub moos Kesus hauv Alas tebchaws lawm tias, yog (יחוח)Yahweh coj kuv los txog lub nroog Yeluxalees, kuv yuav mus pe hawm (יחוח)Yahweh rau hauv lub moos Henploos.

9 Vajntxwv teb nws tias, cia li mus zoo. Ces nws txawm sawv tsees mus rau lub moos Henploos.

10 Tiamsis Axaloos tso tibneeg xa xov twjywm mus thoob plaws txhua xeem Ixayees hais tias, thaum twg nej hnov lub suab raj kub yaj, nej cia li qw hais tias, Axaloos ua vajntxwv hauv lub moos Henploos.

11 Muaj ob puas tus txivneej nrog Axaloos tawm hauv lub nroog Yeluxalees mus, yog cov uas Axaloos caw mus, lawv mus dawb dawb do do xwb tsis paub abtsi li.

12 Thaum Axaloos tua tsiaj xyeem ntawd, nws kuj txib tibneeg mus hu Ahithaufees uas yog tibneeg Kilaus thiab yog Daviv tus tub sablaj tuaj hauv nws lub moos Kilaus tuaj. Qhov uas tuav tswvyim phem yuav ntxeev siab ntawd loj zuj zus thiab cov tibneeg uas nrog Axaloos koom kuj coob zuj zus tuaj.

13 Muaj ib tug tuaj cuag Daviv hais rau nws tias, cov Ixayees twb qaug siab raws Axaloos qab lawm.

14 Ces Daviv txawm hais rau nws cov tub teg tub taws sawvdaws uas nrog nws nyob hauv lub nroog Yeluxalees tias, cia li sawv tsees, peb cia li khiav mus.  Tsis ua li ntawd ces peb yuav khiav tsis dim Axaloos.  Peb cia li maj nroos mus sai sai tsam ces nws caum cuag peb thiab ua phem rau peb thiab xuas hniav ntaj hniav riam ntaus lub nroog no.

15 Vajntxwv cov tub teg tub taws hais rau nws tias, vajntxwv txiav txim siab ua li cas, peb uas yog koj cov tub qhe kuj npaj txhij yuav ua li ntawd.

16 Ces vajntxwv thiab nws tsev neeg sawvdaws ua ke tawm khiav mus, tseg kaum tus hluas nkauj uas vajntxwv kav cia zov lub vaj lub tsev.

17 Vajntxwv tawm mus thiab cov tibneeg sawvdaws raws nws qab mus.  Lawv mus nres ntawm lub tsev uas kawg nkaus ntawm ntug nroog.  

18 Daviv cov tub teg tub taws hla ua nws ntej mus. Thiab cov Khelethis thiab cov Pelethis sawvdaws thiab cov tibneeg Nkas rau pua leej uas nrog Daviv ua ke hauv lub moos Nkas los kuj hla ua vajntxwv ntej mus.

19 Vajntxwv hais rau Ithais uas yog tibneeg Nkas tias, ua cas koj nrog peb mus? Koj cia li rov qab mus thiab nrog vajntxwv nyob, rau qhov koj yog lwm haiv neeg thiab yog ib tug uas poob tebchaws.

20 Nag koj nyuam qhuav tuaj txog xwb, hnub no kuv yuav ua rau koj nrog peb mus mus los los lov, rau qhov kuv tsis paub tias yuav mus rau qhov twg? Cia li rov qab mus thiab coj koj cov kwvtij mus thiab. Thov (יחוח)Yahweh ua nws txojkev hlub uas ruaj khov thiab nws txojkev ncaj uas tso siab tau tshwm los rau koj.

21 Tiamsis Ithais teb vajntxwv tias, muaj (יחוח)Yahweh uas muaj txojsia nyob pom, thiab muaj kuv tus vajntxwv uas muaj txojsia nyob pom, vajntxwv uas yog kuv tus tswv yuav nyob qhov twg, txawm yog yuav tuag yuav ciaj, los kuv uas yog koj tus tub qhe yuav nyob qhov ntawd thiab.

22 Daviv thiaj hais rau Ithais tias, cia li hla mus. Ithais uas yog tibneeg Nkas thiaj li mus nrog nws cov tibneeg sawvdaws thiab lawv cov menyuam sawvdaws ua ke.

23 Thaum cov tibneeg sawvdaws tab tom hla mus, cov tibneeg hauv lub teb chaws sawv daws quaj nrov nrov. Vajntxwv hla lub hav Khiloos thiab cov tibneeg sawvdaws mus rau tom tebchaws moj sab qhua.

24 Xadaus thiab cov Levis sawvdaws kwv (יחוח)Yahweh lub phij xab sib cog lus tuaj thiab.  Lawv muab (יחוח)Yahweh lub phij xab txo mus txog thaum cov tibneeg sawvdaws tawm hauv lub nroog tag.

25 Ces vajntxwv txawm hais rau Xadaus tias, cia li kwv (יחוח)Yahweh lub phij xab rov mus rau hauv lub nroog. Yog (יחוח)Yahweh txaus siab rau kuv, nws yuav coj kuv rov qab los thiab pub kuv pom lub phij xab thiab (יחוח)Yahweh lub chaw nyob.

26 Tiamsis yog (יחוח)Yahweh hais tias, kuv tsis txaus siab rau koj, saib maj, kuv nyob ntawm no, cia (יחוח)Yahweh ua rau kuv raws li nws pom zoo.

27 Thiab vajntxwv hais rau tus pov thawj Xadaus tias, koj yog tus uas pom tom hauv ntej lov? Koj thiab Anpiyathas thiab neb ob tug tub cia li rov qab mus zoo rau hauv lub nroog, yog koj tus tub Ahima‑as thiab Anpiyathas tus tub Yahnathas.

28 Kuv yuav nyob ntawm lub chaw hla dej mus rau tebchaws moj sab qhua tos txog thaum koj xa xov tuaj rau kuv paub.

29 Ces Xadaus thiab Anpiyathas thiaj kwv (יחוח)Yahweh lub phij xab rov qab mus cia rau hauv lub nroog Yeluxalees thiab nkawv nyob rau hauv.

30 Daviv nce taug txojkev mus rau saum lub roob txiv Aulib, nws quaj laug laws mus, muaj ntaub kauv taubhau tsis muaj khau rau. Cov tibneeg uas nrog nws ua ke sawvdaws kuj muab ntaub kauv taubhau taug kev quaj laug laws mus.

31 Muaj tibneeg hais rau Daviv tias, Ahithaufees nrog Axaloos cov tibneeg ntxeev siab ua ib nqag lawm thiab. Mas Daviv hais tias, Au (יחוח)Yahweh, thov koj ua kom Ahithaufees tej lus sablaj tsis muaj tseeb tsis tau qabhau.

32 Thaum Daviv tuaj txog lub ncov roob uas pe (יחוח)Yahweh mas Husais uas yog Akhis cum txawm tuaj cuag nws, lub tsho ntuag tag thiab muaj hmoov av saum nws lub taubhau.

33 Daviv hais rau nws tias, yog koj nrog kuv mus, koj yuav ua nra rau kuv xwb.  

34 Tiamsis yog koj rov qab mus rau hauv lub nroog thiab hais rau Axaloos tias, Au vaj ntxwv, kuv yuav ua koj qhev. Yav tom ntej kuv ua koj txiv qhev li cas, kuv yuav ua koj qhev li ntawd. Ces koj yuav pab kuv ua rau Ahithaufees tej lus sablaj swb kiag.  

35 Xadaus thiab Anpiyathas uas ua pov thawj kuj nrog koj nyob qhov ntawd. Txhua yam uas koj hnov hauv vajntxwv lub tsev, koj cia li hais rau Xadaus thiab Anpiyathas paub.

36 Nkawv tej tub kuj nyob qhov ntawd thiab, yog Xadaus tus tub Ahima‑as thiab Anpiyathas tus tub Yahnathas. Txhua yam uas koj hnov, cia li txib lawv tuaj hais rau kuv paub.  

37 Ces Daviv tus kwvluag Husais txawm rov los rau hauv lub nroog rau thaum Axaloos tab tom los rau hauv lub nroog Yeluxalees thiab.