Yahas Npaj Kev Rau Axaloos Rov Los

1 Xeluyah tus tub Yahas pom tias vajntxwv nco Axaloos heev ua dai siab dhuam.

2 Yahas txawm tso tibneeg mus rau lub moos Thekhau‑as es coj ib tug pojniam ntse ntsuav los mas hais rau nws tias, koj ua txuj ua li tus uas quaj tej tuag thiab hnav lub tsho uas nco tuag.  Tsis txhob pleev roj tsw qab, ua txuj ua yam li tus pojniam uas twb quaj tej tuag tau ntau hnub lawd,

3 mas mus cuag vajntxwv, mus hais li no rau nws.  Mas Yahas qhia lus rau tus pojniam ntawd.

4 Thaum tus pojniam hauv Thekhau‑as tuaj cuag vajntxwv, nws txawm khwb ti nkaus av pe vajntxwv mas hais tias, Au vajntxwv, thov pab kuv.

5 Vajntxwv hais rau nws tias, koj muaj teeb meem abtsi? Nws teb tias, kuv yog ib tug niag poj ntsuam, kuv tus txiv tuag lawm.

6 Kuv uas yog koj tus nkauj qhe muaj ob tug tub sib ceg tom teb. Tsis muaj leejtwg pab cheem nkawv mas ib tug thiaj muab ib tug ntaus tuag lawm.

7 Mas cov kwvtij sawvdaws tuaj nrhiav cai rau kuv uas yog koj tus nkauj qhe hais tias, muab tus uas tua nws tus tijlaug rau peb, kom peb thiaj muab nws tua tau pov tseg ua pauj qhov uas nws tua nws tijlaug ntawd. Mas lawv yuav muab tus uas yuav saws qub txeeg qub teg tua thiab. Zoo yam nkaus li lawv yuav tua kuv lub ncaig taws uas tseem tshuav tsis pub kuv txiv muaj npe muaj keeb nyob ntiajteb no li lawm.

8 Vajntxwv thiaj hais rau tus pojniam ntawd tias, cia li rov mus tsev, kuv yeej yuav hais kom luag tu koj tshaj plaub.

9 Mas tus pojniam Thekhau‑as hais rau vajntxwv tias, vajntxwv uas yog kuv tus tswv, cia lub txim poob rau saum kuv thiab kuv txiv caj ces. Tiamsis vaj ntxwv thiab vajntxwv lub zwm txwv tsis txhob raug txim.  

10 Vajntxwv hais tias, yog muaj leejtwg hais li cas rau koj, cia li coj tus ntawd tuaj cuag kuv, mas tus ntawd yuav tsis kov koj dua li lawm.

11 Tus pojniam ntawd txawm hais tias, thov vajntxwv tuav (יחוח)Yahweh uas yog koj Tus Tswv lub npe cog lus twv tias koj yuav tsis cia kom tus yawg uas muaj cai rau txim rau kuv tus tub ntawd muab kuv tus tub tua. Rau qhov yog nws muab kuv tus tub no tua mas nws lub txim tseem yuav loj dua li kuv tus tub no lub thiab. Vajntxwv hais tias, (יחוח)Yahweh muaj txojsia nyob pom, koj tus tub yuav tsis poob ib txoj plaubhau rau hauv av li.

12 Mas tus pojniam ntawd hais tias, vaj ntxwv, thov cia kuv uas yog koj tus nkauj qhe hais ib lo lus rau vajntxwv uas yog kuv tus tswv. Vajntxwv hais tias, hais maj.

13 Tus poj niam thiaj hais tias, ua li cas koj npaj ua li no rau ()Yahweh haiv neeg? Qhov uas hais li no mas kuj yog koj hais koj qhov txhaum, rau qhov koj tsis coj tus uas koj muab ntiab khiav rov los rau hauv koj tsev.

14 Mas peb sawvdaws yuav tuag tag yam nkaus li cov dej uas nchuav rau hauv pem teb yawm tsis tau rov los. (יחוח)Yahweh tsis txov txojsia, tiam sis (יחוח)Yahweh nrhiav kev rau tus uas raug muab ntiab khiav lawd tsis txhob raug muab pov tseg.

15 Qhov uas kuv tuaj hais tej no rau vajntxwv uas yog kuv tus tswv, vim yog cov pejxeem hem kuv ntshai. Mas kuv uas yog koj tus nkauj qhe xav tias, kuv yuav mus hais vajntxwv, tej zaum vajntxwv yuav ua raws li vajntxwv tus tub qhe lo lus thov.

16 Nyaj vajntxwv yuav mloog thiab cawm kuv uas yog vajntxwv tus tub qhe dim ntawm tus uas npaj siab muab kuv thiab kuv tus tub rhuav tshem kom tsis tau tej qub txeeg qub teg uas (יחוח)Yahweh pub.  

17 Mas koj tus nkauj qhe xav tias, vajntxwv uas yog kuv tus tswv tej lus yuav ua rau kuv lub siab tus, rau qhov vajntxwv uas yog kuv tus tswv mas zoo yam nkaus li (יחוח)Yahweh tus tubtxib saum ntuj, uas paub qhov phem qhov zoo. Thov (יחוח)Yahweh uas yog koj Tus Tswv nrog koj nyob.

18 Ces vajntxwv txawm teb tus pojniam ntawd tias, tej uas kuv yuav nug koj no koj tsis txhob zais nawv.  Tus pojniam ntawd hais tias, thov vajntxwv uas yog kuv tus tswv hais maj.

19 Vajntxwv txawm hais tias, koj tej no huvsi Yahas txhais tes txuam hauv los tsis txuam? Tus pojniam teb tias, Au vajntxwv uas yog kuv tus tswv, koj muaj txojsia nyob pom, tsis muaj leejtwg lug dhau vajntxwv tej lus rau sab xis los sab laug kiag li.  Twb yog koj tus tub qhe Yahas kom kuv thov li no ntag.  Nws yog tus uas qhia kuv uas yog koj tus nkauj qhe hais tej lus no.   

20 Yahas ua li no xwv thiaj li ntxeev tau tej xwm txheej no.  Tiamsis kuv tus tswv muaj tswvyim cuag nkaus li (יחוח)Yahweh tus tub txib saum ntuj li tswvyim uas paub txhua yam hauv ntiajteb no.

21 Vajntxwv hais rau Yahas tias, kuv kheev ua raws li no. Cia li mus coj tus tub hluas Axaloos rov los.

22 Yahas kuj khoov ntshis rau hauv pem teb pe thiab foom koob hmoov rau vajntxwv. Yahas hais tias, vajntxwv uas yog kuv tus tswv, hnub no kuv uas yog koj tus tub qhe paub tias koj txaus siab rau kuv rau qhov uas koj pub raws li koj tus tub qhe lo lus thov.

23 Yahas thiaj sawv tsees mus rau Kesus tebchaws mus coj Axaloos rov qab los rau hauv Yeluxalees.

24 Mas vajntxwv hais tias, kom nws nyob hauv nws lub tsev xwb, tsis txhob kheev nws los cuag kuv.  Axaloos kuj mus nyob hauv nws lub tsev, tawm tsis tau mus cuag vajntxwv li.

25 Tag nrho hauv cov Ixayees, tsis muaj ib tug twg uas luag yuav qhuas tias zoo nraug li Axaloos. Txij ntua ntawm xib taws mus thoob plaws saum tiaj taubhau, nws tsis muaj ib qho phem li.

26 Txhua xyoo thaum xyoo laus tag, nws txiav ib zaug plaubhau vim nws cov plaubhau nyhav hwv lawm thiaj muab txiav.  Thaum muab txiav lawd, nws muab luj mas nyhav ob puas sekhees raws li tej vajntxwv rab teev.

27 Axaloos yug tau peb tug tub thiab ib tug ntxhais hu ua Thamas, yog ib tug ntxhais zoo nkauj heev.

28 Axaloos nyob tau ob xyoos txwm nkaus hauv lub nroog Yeluxalees tsis tau cuag vajntxwv ib zaug li.

29 Ces Axaloos txawm tso tibneeg mus hu Yahas tuaj xav txib Yahas mus cuag vajntxwv, tiamsis Yahas tsis kam tuaj. Nws rov tso dua tibneeg mus hu

zaum ob los Yahas tsis kam tuaj.

30 Axaloos txawm hais rau nws cov tub teg tub taws tias, Yahas daim teb nyob npuas kuv daim, nws cov qeb tseem nyob hauv teb.  Nej cia li mus muab hlawv.  Axaloos cov tub teg tub taws txawm mus hlawv daim teb ntawd.

31 Yahas thiaj sawv tsees tuaj cuag Axaloos hauv nws lub tsev mas hais rau nws tias, ua li cas koj cov tub teg tub taws muab kuv daim teb hlawv.

32 Axaloos teb Yahas tias, kuv twb xa xov kom koj tuaj ntawm no es kuv yuav txib koj mus cuag vajntxwv mus nug hais tias, kom kuv los ntawm Kesus los ua abtsi? Kuv nyob kuv tim Kesus kuj zoo dua.  Thov cia kuv mus cuag vajntxwv nimno. Yog tias kuv muaj txim kuj cia nws muab kuv tua pov tseg.

33 Yahas thiaj mus cuag vajntxwv thiab hais tej no rau nws. Vajntxwv thiaj hu Axaloos tuaj. Axaloos thiaj tuaj cuag vajntxwv khoov ntshis ua lub plhu ti nkaus rau hauv av pe ntawm vajntxwv xub ntiag, mas vajntxwv thiaj nwj Axaloos.