Asnoos Thiab Thamas

1 Daviv tus tub Axaloos muaj ib tug muam zoo nkauj hu ua Thamas. Nyob nyob Daviv tus tub Asnoos txawm nyiam nws.

2 Vim yog nws tus muam Thamas no mas Asnoos thiaj lwj lwj siab ua mob kiag, rau qhov uas nws tsis tau deev dua hluas nraug li mas Asnoos yeej xav tias ua tsis tau li cas rau nws.

3 Ces Asnoos muaj ib tug phooj ywg hu ua Yahnadas, yog Daviv tus tijlaug Sime‑as tus tub.  Yahnadas yog ib tug tibneeg ntse.

4 Nws txawm hais rau Asnoos tias, vajntxwv tus tub es, ua cas koj niaj tag kis nyob ua nyuaj siab ntsuav xwb?  Koj puas kam qhia rau kuv paub? Asnoos teb nws tias, kuv nyiam Thamas uas yog kuv tus tijlaug Axaloos tus muam.

5 Yahnadas txawm hais rau nws tias, koj mus pw saum koj lub txaj ua txuj mob, mas thaum koj txiv tuaj saib koj, cia li hais rau nws tias, thov txib kuv tus muam tuaj muab mov rau kuv noj, kom nws tuaj ua mov ntawm kuv xub ntiag xwv kuv thiaj li pom thiab tau noj ntawm nws txhais tes ntag.  

6 Asnoos txawm pw ua txuj mob. Thaum vajntxwv tuaj saib, Asnoos txawm hais rau vajntxwv tias, thov txib kuv tus muam Thamas tuaj ua ob peb lub ncuav ntawm kuv xub ntiag xwv kuv thiaj li tau noj ntawm nws txhais tes.

7 Daviv thiaj txib tibneeg mus hais rau Thamas hauv tsev tias, cia li mus ntawm koj tus nus Asnoos tsev, mus ua mov rau nws noj.

8 Thamas thiaj mus rau ntawm nws tus nus Asnoos tsev uas Asnoos pw ntawd. Nws kuj muab hmoov mog los zuaj ua ncuav ntawm Asnoos xub ntiag thiab muab ci.

9 Nws rho lub tais ci ncuav los nchuav txawb rau ntawm Asnoos xub ntiag. Tiamsis Asnoos tsis kam noj. Asnoos hais tias, kom lwm tus tawm mus tso. Txhua tus thiaj tawm mus lawm.  

10 Asnoos txawm hais rau Thamas tias, cia li coj cov ncuav los rau hauv txaj kom kuv thiaj noj ntawm koj txhais tes.  Thamas kuj coj cov ncuav uas nws ua ntawd mus rau hauv lub txaj muab rau nws tus nus Asnoos.  

11 Ces thaum nws coj cov ncuav los ze yuav muab rau Asnoos noj, Asnoos txawm ntsiab nkaus nws cia hais tias, kuv tus me muam, koj cia li los nrog kuv pw.

12 Nws teb Asnoos tias, kuv tus nus, tsis tau li, tsis txhob yuam kuv li.  Tej kev zoo li no yeej tsis tsim nyog ua hauv cov Ixayees.  Tsis txhob ua tej kev phem kev qias li no kiag li.

13 Thiab kuv los kuv yuav muab txojkev txaj muag no coj mus zais rau qhov twg? Thiab koj los koj yuav ua zoo li tus niag tibneeg ruam hauv cov Ixayees. Vim li no, thov koj hais rau vajntxwv tso.  Vajntxwv yuav tsis txwv es tsis pub kuv rau koj.  

14 Tiamsis Asnoos tsis mloog nws hais li. Asnoos muaj zog heev dua nws thiaj muab nws yuam tau pw lawm.

15 Dhau ntawd Asnoos txawm ntxub nws kawg li. Mas txoj kev ntxub no loj dua qhov uas thaum nws nyiam. Ces Asnoos txawm hais rau nws tias, cia li sawv khiav mus.  

16 Tiamsis Thamas hais rau nws tias, tsis txhob ua li. Qhov uas koj muab kuv ntiab tawm no tseem txhaum loj dua li uas koj tau ua rau kuv lawd. Tiamsis Asnoos tsis mloog nws hais li.

17 Nws cia li hu tus hluas uas tu nws hais tias, cia li muab tus pojniam no ntiab kom tawm dhau ntawm kuv lub xub ntiag mus, es muab qhov rooj kaw muab xauv rau. 

18 Thamas hnav lub tsho ntev muaj tes, yam li vajntxwv tej ntxhais uas tsis tau deev dua hluas nraug ib txwm hnav. Tus tub teg tub taws ntawd txawm muab Thamas ntiab tawm mus thiab muab qhov rooj xauv rau.  

19 Thamas muab tshauv tsuab rau saum nws taubhau thiab muab nws lub tsho ntev uas nws hnav dua rhe. Nws muab tes puab taubhau quaj taug kev mus.

20 Nws tus nus Axaloos txawm hais rau nws tias, koj tus nus Asnoos mos koj lov? Nimno ua twj ywm mog kuv tus me muam.  Nws yog koj tus nus.  Tsis txhob ntxhov siab rau qhov no. Thamas txawm nyob ua lwj siab ntsuav rau hauv nws tus nus Axaloos lub tsev.   

21 Thaum vajntxwv Daviv paub txog tej no huvsi nws chim heev.

22 Tiamsis Axaloos tsis hais ib los li cas rau Asnoos li, txawm yog zoo thiab phem los xij, rau qhov Axaloos ntxub Asnoos kawg, vim qhov uas yuam nws tus muam Thamas.

​

Axaloos Ua Pauj Thiab Khiav

23 Tau ob xyoo tom qab, Axaloos ntiav zog txiav plaub yaj ntawm Npa‑as Haxaus uas nyob ze Efa‑is, mas Axaloos hu vajntxwv cov tub sawvdaws mus rau qhov ntawd.  

24 Axaloos mus hais rau vajntxwv tias, kuv uas yog koj tus tub qhe ntiav zog txiav plaub yaj mas thov vajntxwv thiab nws cov tub teg tub taws nrog kuv mus thiab.

25 Tiamsis vajntxwv hais rau Axaloos tias, tub, tsis txhob ua li ntawd, peb tsis txhob mus huvsi tsam ces peb ua nra nyhav rau koj. Axaloos taij taij vajntxwv los nws tsis kam mus.  

Vajntxwv cia li foom koob hmoov rau nws xwb.

26 Axaloos thiaj thov hais tias, yog koj tsis mus los thov tso kuv tus kwv Asnoos nrog peb mus. Vajntxwv hais rau nws tias, ua li cas nws yuav tau nrog koj mus?  

27 Tiamsis Axaloos taij taij txog thaum vaj ntxwv kheev Asnoos thiab vajntxwv cov tub sawvdaws nrog nws mus.  

28 Mas Axaloos hais rau nws cov tub teg tub taws tias, tos saib ntsoov thaum twg Asnoos haus cawv zoo siab heev mas thaum kuv hais kom nej ntaus Asnoos ces nej cia li muab nws tua kiag. Tsis txhob ntshai li, yog kuv hais kom nej ua. Cia li ua siab loj siab tuab.   

29 Mas Axaloos cov tub teg tub taws kuj ua rau Asnoos raws li Axaloos hais kom lawv ua. Mas vajntxwv cov tub sawvdaws cia li sawv pes tsees nyias caij nyias tus luj txwv khiav.

30 Mas thaum cov tub ntawd tseem taug kev, Daviv hnov xov tias, Axaloos twb muab vaj ntxwv cov tub tua tuag tag huvsi tsis tshuav ib tug li.

31 Vajntxwv sawv tsees muab lub tsho dua rhe pw nthi hauv pem teb. Cov tub teg tub taws uas nyob ze Daviv sawvdaws kuj muab tsho dua rhe.

32 Tiamsis Daviv tus tijlaug Sime‑as tus tub Yahnadas hais tias, koj tsis txhob xav tias lawv tua koj cov tub tag huvsi lawm, tsuas yog Asnoos tib leeg tuag xwb. Qhov uas Axaloos hais kom ua li no nws twb npaj thaum Asnoos yuam nws tus muam Thamas los lawm. 

33 Mas vajntxwv tsis txhob tu siab tsis txhob ntxhov siab, tsis txhob xav tias vajntxwv cov tub tuag tag huvsi lawm, tsuas yog Asnoos tib leeg tuag xwb.

34 Ces Axaloos txawm khiav lawm. Tus hluas uas fajxwm zov lub moos tsa muag saib mas pom tibneeg coob coob tab tom tuaj taug txojkev Haulana‑is ntawm ib sab roob los.

35 Yahnadas thiaj hais rau vajntxwv tias, saib maj, vajntxwv cov tub kuj los lawm.

Yeej muaj tseeb li uas kuv uas yog koj tus tub qhe hais rau koj lawm.

36 Thaum nws hais lus xaus nkaus vajntxwv cov tub los txog tsa suab hlo quaj. Vajntxwv thiab nws cov tub teg tub taws sawvdaws kuj quaj lwj siab kawg.

37 Axaloos khiav mus cuag Amihus tus tub Thamais uas ua vajntxwv hauv Kesus teb chaws.  Daviv kuj niaj hnub quaj nws tus tub.

38 Axaloos kuj khiav mus rau Kesus tebchaws mus nyob hauv tau peb xyoos.

39 Vajntxwv nco Axaloos ua dai siab dhuam. Daviv lub siab uas nco Asnoos uas tuag lawd mas rov zoo zuj zus.