2 XAMUYEES 12

Nathas Cem Daviv

1(יחוח)Yahweh txib Nathas mus cuag Daviv. Nathas txawm mus txog Daviv thiab hais tias, muaj ob tug txivneej nyob hauv ib lub moos, ib tug nplua nuj, ib tug pluag.

2 Tus nplua nuj muaj tshis muaj yaj muaj nyuj coob heev.

3 Tus pluag tsis muaj abtsi li, tsuas muaj tib tug xyuas yaj uas nws yuav los xwb. Nws tu hlob thiab cia nrog nws thiab nws cov menyuam nyob ua ke, noj ua ke, koom haus ib lub khob dej, pw hauv nws lub xub ntiag, zoo yam nkaus li ib tug me ntxhais rau nws.

4 Tus nplua nuj ntawd muaj ib tug qhua tuaj saib nws.  Nws tsis kam muab nws tej yaj tej tshis tej nyuj los tua tiam tus qhua uas tuaj saib ntawd, ces nws txawm muab tus pluag ntawd tus menyuam yaj los tua rau tus qhua uas tuaj saib nws noj.

5 Ces Daviv txawm npau taws rau tus nplua nuj ntawd heev thiab hais rau Nathas tias, (יחוח)Yahweh muaj txojsia nyob pom, yuav tau muab tus yawg uas ua li ntawd tua pov tseg.

6 Thiab nws yuav thim tus menyuam yaj rov qab plaub npaug, vim yog nws ua li no nws tsis muaj lub siab hlub li.

7 Nathas hais rau Daviv tias, koj yog tus yawg ntawd ntag. (יחוח)Yahweh uas yog cov Ixayees Tus Tswv hais li no tias, kuv twb tsa koj ua vajntxwv kav cov Ixayees thiab cawm koj dim hauv Sha-ul txhais tes.  

8 Kuv tau muab Sha-ul uas yog koj tus tswv tsev neeg rau koj thiab muab nws tej pojniam rau hauv koj lub xub ntiag, thiab kuv muab cov Ixayees thiab cov Yahdah huvsi rau koj. Yog npaum li no tseem tsawg lawm, kuv yuav tsav ntxiv dua ib npaug thiab.

9 Ua cas koj yuav saib tsis taus (יחוח)Yahweh tej lus es ua tej uas nws pom tias phem kawg? Koj xuas ntaj tua Uliyah uas yog tibneeg Hithais thiab yuav nws tus pojniam los ua koj pojniam. Koj xuas cov Asmoos rab ntaj tua nws ntag.  

10 Vim li ntawd, nimno hniav ntaj yuav tsis plam hauv koj caj ces kiag li, vim yog koj saib tsis taus kuv thiab yuav Uliyah uas yog tib neeg Hithais tus pojniam los ua koj pojniam.  

11 (יחוח)Yahweh hais li no tias, saib nawj, kuv yuav ua kom xwm txheej phem tshwm los hauv koj tsev neeg tawm tsam koj, thiab kuv yuav muab koj tej pojniam coj mus tab meeg koj thiab muab pub rau koj kwvtij zej zog, mas tus ntawd yuav nrog koj tej pojniam pw tab meeg nruab hnub.  

12 Koj ua tej kev txhaum ntawd zais ntshis tsis pub leej twg pom, tiamsis kuv yuav ua tej no nruab hnub nrig tab meeg rau cov Ixayees sawvdaws pom.

13 Daviv thiaj hais rau Nathas tias, kuv tau ua txhaum muaj txim rau (יחוח)Yahweh lawm. Mas Nathas hais rau Daviv tias, (יחוח)Yahweh zam koj lub txim lawm, koj yuav tsis tuag.

14 Txawm li cas kuj xij, vim koj ua tej no saib tsis taus (יחוח)Yahweh heev kawg, mas tus menyuam uas yuav yug los ntawd yuav tuag.

15 Nathas txawm rov qab mus tsev lawm. Mas (יחוח)Yahweh ua rau tus menyuam uas Uliyah tus pojniam yug rau Daviv ntawd mob heev.

16 Daviv txawm taij thov (יחוח)Yahweh pab tus menyuam ntawd. Daviv yoo mov thiab pw ib hmos hauv av.  

17 Cov tub teg tub taws hauv vajntxwv tsev los rau ntawm nws, yuav tsa nws sawv hauv av los. Tiamsis nws tsis kam thiab tsis nrog lawv noj mov li.

18 Tau xya hnub tus menyuam ntawd txawm tuag lawm. Mas Daviv cov tub teg tub taws ntshai tsis kav qhia rau nws paub tias tus menyuam tuag lawm. Lawv sib tham hais tias, thaum tus menyuam ntawd tseem ciaj sia nyob, peb hais rau Daviv, Daviv twb tsis mloog. Mas peb yuav ua li cas hais tau rau nws tias tus menyuam tuag lawm? Tsam ces nws ho ua li cas rau nws tus kheej.  

19 Tiamsis thaum Daviv pom cov tub teg tub taws sib ntxhi li ntawd, nws nkag siab tias tus menyuam tuag lawm. Daviv thiaj hais rau nws cov tub teg tub taws tias, tus menyuam tuag lawm lov? Lawv teb tias, tuag lawm lauj.  

20 Ces Daviv txawm sawv tsees hauv av los, da dej pleev roj hloov ris tsho thiab mus rau hauv (יחוח)Yahweh lub tsev pe hawm (יחוח)Yahweh. Nws mus rau hauv nws lub tsev thiab thaum nws hais kom lawv rau mov los, lawv kuj coj mov los rau rau ntawm nws xub ntiag rau nws noj.

21 Nws cov tub teg tub taws thiaj nug nws tias, ua cas koj ua li no? Koj yoo mov thiab quaj txog tus menyuam ntawd rau thaum nws tseem muaj txojsia nyob.  Tiamsis thaum tus menyuam tuag lawd, koj cia li sawv tsees los noj mov.

22 Daviv hais tias, thaum tus menyuam tseem ciaj sia nyob, kuv yoo mov thiab quaj, vim kuv xav tias leej twg yuav paub xyov (יחוח)Yahweh yuav hlub kuv es pub tus menyuam ntawd muaj txojsia nyob.

23 Tiamsis nimno nws twb tuag lawm es kuv yuav yoo mov ua abtsi? Kuv yuav ua tau kom tus menyuam ciaj rov los lov? Kuv tsuas muaj uas yuav mus rau ntawm nws, nws yuav tsis rov los rau ntawm kuv.  

24 Ces Daviv txawm nplij nws tus pojniam Npasenpas lub siab, thiab nrog nws pw, ces nws txawm yug tau ib tug tub, mas Daviv tis lub npe hu ua Xalaumoos. (יחוח)Yahweh hlub tus metub ntawd.  

25 Mas (יחוח)Yahweh hais lus tuaj rau Nathas uas ua xibhwb cev (יחוח)Yahweh lus kom tis tus metub ntawd npe hu ua Yedidiyah, vim yog (יחוח)Yahweh hlub.

​

Daviv Txeeb Lub Nroog Lanpas

(1 Vaj Keeb Kwm 20:1-3)

26 Yahas ntaus cov Asmoos lub nroog Lanpas thiab txeeb tau lub chaw ruaj khov uas vajntxwv nyob.

27 Yahas txawm tso tibneeg mus hais rau Daviv tias, kuv tab tom ntaus lub nroog Lanpas thiab kuv txeeb tau lub qhov dej hauv lub nroog lawm.

28 Nimno thov koj sau cov tub rog uas tseem tshuav es tuaj ua yeej vij ntaus lub nroog thiab txeeb kom tau, ntshai tsam kuv txeeb tau ces luag yuav hu lub nroog ntawd raws li kuv lub npe.

29 Daviv thiaj li sau cov tub rog huvsi thiab mus rau ntawm Lanpas, nws ntaus thiab txeeb tau lub nroog ntawd.

30 Nws hle lub mom kub ntawm lawv tus vajntxwv lub taubhau los, yog tseem kub nyhav ib talas thiab muaj ib lub qe zeb hlaws muaj nqis nyob rau hauv. Lawv muab lub mom kub ntawd rau Daviv ntoo.  Daviv sau tau tej qhov txhia chaw uas txeeb tau hauv lub nroog ntawd ntau kawg li coj mus.

31 Daviv kuav cov tibneeg hauv lub nroog ntawd tawm los thiab yuam kom lawv xuas kaw, xuas hlau, xuas taus, ua haujlwm thiab ua haujlwm ntawm lub chaw hlawv thwv cib. Nws ua ib yam li no rau cov Asmoos txhua lub moos huvsi. Ces Daviv thiab cov tub rog sawvdaws rov mus rau hauv Yeluxalees lawm.