Daviv Thiab Npasenpas

1 Thaum txog lub caij ntuj qhua yog lub caij uas tej vajntxwv pheej tawm mus ua rog, Daviv txib Yahas thiab cov tub teg tub taws thiab Ixayees cov tub rog huvsi mus ntaus yeej cov Asmoos thiab vij lub nroog Lanpas cia.  Tiamsis Daviv nyob hauv lub nroog Yeluxalees xwb.

2 Muaj ib hnub thaum yuav tsaus ntuj, Daviv sawv ntawm nws lub chaw pw nce mus rau saum vajntxwv lub tsev txheej tsev las tshav ncig ua si.  Nws tsa muag saib pom ib tug pojniam da dej, tus pojniam ntawd zoo nkauj heev.

3 Daviv txib tibneeg mus nug txog tus pojniam ntawd. Muaj ib tug los hais tias, tus pojniam ntawd sub tsis yog Npasenpas uas yog Elias tus ntxhais uas yog Uliyah uas yog tibneeg Hithais tus pojniam lov?  

4 Ces Daviv txawm txib tub xa xov mus coj tus pojniam ntawd tuaj. Tus pojniam txawm tuaj cuag Daviv, Daviv txawm nrog nws pw. Tus pojniam ntawd nyuam qhuav ua kevcai ntxuav nws lub cev uas ua pojniam tag. Ces tus pojniam ntawd txawm rov qab mus tsev.  

5 Tus pojniam ntawd txawm xeeb menyuam, nws thiaj txib tibneeg mus hais rau Daviv paub hais tias, kuv xeeb menyuam lawm.  

6 Daviv thiaj xa xov mus hais rau Yahas tias, cia li tso Uliyah uas yog tibneeg Hithais los cuag kuv. Yahas thiaj tso Uliyah los cuag Daviv.

7 Thaum Uliyah los txog, Daviv nug tias Yahas nyob li cas, cov tub rog nyob li cas thiab kev ua rog kov yeej mus li cas lawm.  

8 Daviv txawm hais rau Uliyah tias, cia li mus rau hauv koj lub tsev thiab ntxuav koj kotaw.  Uliyah txawm tawm hauv vajntxwv tsev mus thiab muaj tibneeg coj tej qhov txhia chaw uas vajntxwv pub raws qab mus rau nws.

9 Tiamsis Uliyah cia li nrog vajntxwv cov tub teg tub taws pw ntawm vajntxwv tsev lub rooj vag, twb tsis mus rau hauv nws lub tsev li.

10 Muaj tibneeg hais rau Daviv tias, Uliyah tsis mus rau hauv nws tsev li. Daviv txawm hais rau Uliyah tias, koj twb mus kev deb deb los es ua cas koj tsis mus rau hauv koj tsev?

11 Uliyah hais rau Daviv tias, lub phij xab thiab cov Ixayees thiab cov Yahdah nyob hauv lub tsev ntaub ua rog.  Kuv tus tswv Yahas thiab koj cov tub teg tub taws kuj ua yeej nyob tom tshav rog es kuv yuav cia li mus tsev mus noj haus thiab nrog kuv tus pojniam pw tau lov? Koj muaj txojsia nyob thiab koj lub siab tseem ciaj sia pom, kuv yuav tsis ua li ntawd kiag li.

12 Daviv txawm hais rau Uliyah tias, hnub no cia li so ntawm no, tagkis kuv mam kheev koj mus.  Uliyah thiaj nyob hauv Yeluxalees hnub ntawd thiab hnub tom qab.

13 Daviv hu nws los, nws thiaj los noj los haus ntawm vajntxwv xub ntiag, thiab vajntxwv muab nws txhaus kom qaug cawv.  Hnub ntawd tsaus ntuj nws kuj mus nrog vajntxwv cov tub teg tub taws pw ntawm daim lev, tsis mus rau hauv nws tsev li.  

14 Tagkis tom qab, Daviv thiaj sau ib tsab ntawv muab rau Uliyah coj mus rau Yahas.  

15 Tsab ntawv ntawd hais tias, cia li tu kom Uliyah ua pab uas ntaus ua ntej rau ntawm lub chaw uas lawv sib tua heev, thiab thim tub rog cia nws raug tua tuag. 16 Thaum Yahas tseem vij lub nroog, nws tu kom Uliyah mus ntaus ncaj qhov chaw uas nws paub tias muaj cov tub rog siab loj siab tuab.

17 Ces cov tibneeg hauv lub nroog txawm tawm tuaj tiv Yahas, mas Daviv cov tub teg tub taws muaj qee leej raug tua tuag. Uliyah uas yog tibneeg Hithais kuj tuag thiab.

18 Yahas txawm tso ib tug mus hais rau Daviv paub txog kev sib tua zaum ntawd.

19 Nws qhia tus xa xov tias, thaum koj piav qhov uas sib tua rau vajntxwv mloog tag lawm,

20 yog vajntxwv npau taws thiab nws hais rau koj tias, ua cas nej yuav mus ntaus ze lub nroog ntawd ua luaj? Nej tsis paub tias luag yuav tua ntawm ntsa loog tuaj no lov?

21 Leejtwg tua Anpimelej uas yog Yelunpese tus tub? Tsis yog ib tug pojniam muab txhib txiv zeb pov saum ntsa loog los raug nws tuag ntawm lub moos Thenpes lov? Ua cas nej yuav mus ze lub ntsa loog? Ces koj cia li hais tias, vajntxwv tus tub qhe Uliyah uas yog tibneeg Hithais kuj tuag lawm thiab.  

22 Tus uas xa xov txawm mus, nws hais rau Daviv paub txog txhua yam uas Yahas txib nws los hais.

23 Tus uas xa xov ntawd hais rau Daviv tias, yeeb ncuab ua tau dua peb, lawv tawm tuaj tua peb sab nraud. Ces peb caum lawv mus txog ntua ntawm rooj loog.

24 Ces cov tub rog kuj tua hneev saum ntsa loog tuaj rau koj cov tub rog.  Mas koj cov tub teg tub taws qee leej tuag thiab koj tus tub qhe Uliyah uas yog tibneeg Hithais kuj tuag thiab.  

25 Daviv txawm hais rau tus xa xov ntawd tias, koj cia li hais rau Yahas li no tias, tsis txhob nyuaj siab rau tej no, rau qhov hniav ntaj yeej tua ib zaug tus ub ib zaug tus no. Cia li ua rog heev dua qub ntaus kom tau lub nroog ntawd.  Koj txhawb nws lub zog thiab.  

26 Thaum Uliyah tus pojniam hnov tias nws tus txiv Uliyah tuag lawm, nws kuj quaj ntsuag nws tus txiv.

27 Thaum dhau lub sij hawm quaj ntsuag lawm, Daviv txawm txib tibneeg mus coj nws los rau hauv Daviv lub tsev thiab ua Daviv pojniam thiab yug ib tug tub rau Daviv. Tiamsis (יחוח)Yahweh tsis txaus siab rau tej uas Daviv ua ntawd.