Daviv Kov Yeej Cov Asmoos Thiab Cov Alas

(1 Vaj Keeb Kwm 19:1-19)

1 Dhau ntawd los, cov Asmoos tus vajntxwv txawm tuag mas nws tus tub Hanus ua vajntxwv sawv nws txiv chaw.

2 Daviv txawm hais tias, kuv yuav ua ncaj ua zoo rau Nahas tus tub Hanus ib yam li nws txiv tau ua ncaj ua zoo rau kuv. Daviv thiaj tso nws cov tub teg tub taws mus nplij Hanus siab, vim nws txiv tuag lawm. Mas Daviv cov tub teg tub taws thiaj mus rau hauv cov Asmoos tebchaws.

3 Tiamsis cov Asmoos cov thawj hais rau Hanus uas ua lawv tus tswv tias, koj xav hais tias Daviv xa tibneeg tuaj nplij koj ces yog nws hwm koj txiv no lov? Sub tsis yog Daviv txib nws cov tub teg tub taws tuaj cuag koj es yuav saib thiab tshuaj saib thiab rhuav lub nroog?

4 Hanus txawm ntes Daviv cov tub teg tub taws thiab muab hwj txwv chais ib nrab tseg ib nrab thiab muab lawv lub tsho txiav txij ntawm lub ntsag rau yav hauv pov tseg, thiab muab lawv tso mus.

5 Thaum muaj tibneeg mus hais rau Daviv paub mas nws txib tibneeg mus tos lawv, rau qhov lawv raug kev txaj muag heev. Vajntxwv thiaj hais tias, nej cia li so ntawm lub moos Yelikhaus mus txog thaum nej cov hwj txwv tuaj tso mam li los.

6 Thaum cov Asmoos pom tias lawv ua rau Daviv ntxub lawv lawm, cov Asmoos txawm txib tibneeg mus ntiav cov tibneeg Alas hauv lub moos Npelehaus thiab cov Alas hauv lub moos Xaunpas, yog tub rog mus kotaw huvsi nees nkaum txhiab leej, thiab ntiav tus vajntxwv hauv Ma‑akhas uas muaj ib txhiab leej, thiab cov tibneeg hauv lub moos Thauj, yog kaum ob txhiab leej.

7 Thaum Daviv hnov tej no lawd nws txawm txib Yahas thiab cov tub rog siab tuab huvsi mus.

8 Cov Asmoos kuj tawm tuaj npaj tub rog rau ntawm rooj loog. Cov Alas uas tuaj hauv lub moos Xaunpas thiab tuaj hauv lub moos Lehaus, thiab cov tibneeg Thauj thiab cov tibneeg Ma‑akhas, lawv nyob dua ib cag tom hav nroj.

9 Thaum Yahas pom tias luag npaj tub rog rau tom nws hauv ntej thiab npaj tub rog rau tom nws qub qab, nws txawm xaiv pab tub rog Ixayees uas txawj tshaj plaws qee leej thiab tso lawv mus tiv cov Alas.

10 Dua li cov, nws muab cob rau nws tus kwv Anpisais kav thiab kom lawv npaj mus tiv cov Asmoos.

11 Yahas hais tias, yog cov Alas muaj zog heev dua kuv, koj cia li tuaj pab kuv, hos yog cov Asmoos muaj zog heev dua koj mas kuv yuav tuaj pab koj.

12 Cia li ua siab tuab, peb cia li ua siab loj yam li txivneej yawg pab peb haiv neeg thiab pab peb tus tswv tej moos.  Thov (יחוח)Yahweh ua raws li nws pom zoo.

13 Ua li ntawd mas Yahas thiab cov tub rog uas nrog nws thiaj li txeem mus ze ua rog rau cov Alas, mas cov Alas thiaj khiav thim zuj zus tom nws hauv ntej.

14 Thaum cov Asmoos pom cov Alas khiav lawm ces lawv txawm khiav ntawm Anpisais hauv ntej ib yam nkaus nkag mus rau hauv lub nroog. Ces Yahas txawm tseg tsis ua rog rau cov Asmoos, cia li rov los rau Yeluxalees lawm.

15 Thaum cov Alas pom tias lawv swb cov Ixayees lawm, lawv txawm mus sau zog los ua ke.

16 Mas Hadadexaws txib tibneeg mus coj cov tibneeg Alas uas nyob sab dej Yufetis hnub tuaj tawm tuaj. Lawv tuaj rau ntawm Helas. Hadadexaws tus thawj rog Saunpas coj lawv kev.

17 Thaum muaj tibneeg hais rau Daviv paub mas nws sau zog cov Ixayees sawvdaws tuaj ua ke hla tus dej Yaladees tuaj txog ntawm Helas.  Mas cov Alas npaj tub rog tiv Daviv thiab ua rog rau nws.

18 Cov Alas kuj thim khiav cov Ixayees mas Daviv tua tau Alas cov tub rog hauv tsheb ua rog tuag xya pua leej thiab tua tau cov tub rog caij nees tuag plaub caug txhiab leej thiab tua tau lawv tus thawj rog Saunpas tuag rau qhov ntawd.

19 Thaum cov vajntxwv uas zwm rau Hadadexaws pom tias lawv swb cov Ixayees lawm, lawv kuj nrog cov Ixayees sib raug zoo thiab zwm rau cov Ixayees. Vim li no cov Alas thiaj ntshai tsis kam pab cov Asmoos dua li lawm.