Daviv Thiab Mefinpause

1 Daviv hais tias, Sha-ul caj ces tshuav leej twg rau kuv hlub, vim yog saib rau Yahnathas los tsis tshuav?

2 Sha-ul tsev neeg muaj ib tug tub qhe hu ua Xinpas, ces lawv txawm hu nws tuaj cuag Daviv, mas vajntxwv Daviv nug nws tias, koj yog Xinpas lov? Nws teb tias, kuv uas yog koj tus tub qhe, yog kawg.

3 Vajntxwv hais rau nws tias, Sha-ul caj ces tshuav leej twg rau kuv hlub raws li (יחוח)Yahweh txojkev hlub los tsis tshuav? Xinpas teb vajntxwv tias, Yahnathas tshuav ib tug tub, tuag taw thiab.  

4 Vajntxwv nug nws tias, tus ntawd nyob qhov twg? Xinpas hais rau vajntxwv tias, tus ntawd nyob hauv Ami‑ees tus tub Makhis lub tsev hauv lub moos Laude-npas.  

5 Ces vajntxwv txawm txib tibneeg mus coj tus ntawd hauv Ami‑ees tus tub Makhis lub tsev ntawm lub moos Laudenpas los.

6 Ces Yahnathas tus tub Mefinpause uas yog Sha-ul tus xeeb ntxwv thiaj tau los cuag Daviv, nws khwb nkaus pe Daviv. Daviv hais tias, Mefinpause es.  Nws teb tias, yawg hlob, kuv yog koj tus tub qhe.

7 Daviv hais rau nws tias, tsis txhob ntshai, rau qhov kuv yuav hlub koj, vim yog saib rau koj txiv Yahnathas, thiab kuv yuav muab koj yawg Sha-ul tej liaj teb huvsi thim rau koj, thiab koj yuav nrog kuv koom noj haus ua ke ntawm kuv rooj mov mus li.

8 Mefinpause txawm pe thiab hais tias, kuv uas yog koj tus tub qhe yog leej twg es koj yuav tsa qhov muag saib tus dev tuag uas zoo li kuv no?

9 Vajntxwv hu Xinpas uas yog Sha-ul tus tub qhe tuaj thiab hais tias, txhua yam uas yog Sha-ul thiab nws tsev neeg li, kuv muab cob rau koj tus tswv tus xeeb ntxwv lawm.

10 Koj thiab koj cov tub ki thiab koj cov tub qhe yuav tau ua nws tej teb rau nws, thiab sau tej qoob uas ua tau ntawd los rau koj tus tswv tus xeeb ntxwv tau noj.  Tiamsis Mefinpause uas yog koj tus tswv tus xeeb ntxwv no, yuav nrog kuv koom rooj noj ua ke. Xinpas muaj kaum tsib tug tub thiab nees nkaum tus tub qhe.

11 Xinpas txawm hais rau vajntxwv tias, kuv yuav ua txhua yam raws li uas vajntxwv hais rau kuv uas yog koj tus tub qhe.  

Mefinpause thiaj nrog Daviv koom rooj noj haus ua ke ib yam li yog vajntxwv tub.

12 Mefinpause muaj ib tug metub yau hu ua Mikhas. Txhua tus uas nyob hauv Xinpas lub tsev puav leej ua Mefinpause cov tub qhe.  

13 Mefinpause thiaj nyob hauv lub nroog Yeluxalees. Nws nrog vajntxwv koom ib lub rooj noj mov mus li. Nws ob txhais taw tuag tag huvsi.