Cov Tebchaws Uas Daviv Kov Yeej

(1 Vaj Keeb Kwm 18:1-13)

1 Dhau ntawd, Daviv ntaus yeej cov Filixatees thiab tswj hwm lawv.  Daviv txeeb tau lub moos Methehamas ntawm cov Filixatees txhais tes.

2 Nws ntaus yeej cov Mau‑as thiab.  Nws yuam lawv pw ua ib kab sab rau hauv pem teb mas xuas hlua ntsuas lawv, ntsuas ob hluas muab tua pov tseg, ntsuas ib hluas tseg cia. Cov Mau‑as kuj zwm rau Daviv thiab coj qhov txhia chaw tuaj them se rau nws.

3 Daviv kuj ntaus yeej Lehaus tus tub Hadadexaws uas ua vajntxwv hauv lub moos Xaunpas, yog thaum Hadadexaws mus txeeb cov tebchaws ntawm dej Yufetis rov qab.

4 Daviv txeeb tau cov tub rog caij nees ib txhiab xya pua leej thiab cov tub rog mus kotaw nees nkaum txhiab leej, thiab Daviv txiav cov nees uas cab tsheb ua rog leeg raws huvsi, tseg kom txaus cab ib puas lub tsheb ua rog xwb.

5 Thaum cov tibneeg Alas uas nyob hauv lub nroog Damaxakas tuaj pab Xaunpas tus vajntxwv Hadadexaws, mas Daviv tua cov Alas nees nkaum ob txhiab leej.

6 Daviv tsa ib co tub rog zov kav cov Alas hauv lub nroog Damaxakas.  Cov Alas zwm rau Daviv thiab coj qhov txhia chaw tuaj them se rau nws. (יחוח)Yahweh pub Daviv kov yeej rau txhua qhov uas nws mus.

7 Thiab Daviv txeeb tau daim phiaj kub uas thaiv hauv siab uas Hadadexaws cov tub teg tub taws coj, thiab coj mus rau lub nroog Yeluxalees.

8 Thiab vajntxwv Daviv txeeb tau tooj liab ntau heev ntawm lub moos Npethas thiab lub moos Npelauthais uas yog Hadadexaws tej moos.

9 Thaum vajntxwv Thau‑is hauv lub moos Hamas hnov tias Daviv tau ntaus yeej Hadadexaws cov tub rog huvsi lawm.  

10 Thau‑is txawm txib nws tus tub Hadaulas mus cuag vajntxwv Daviv, mus hais ib lo lus tshav ntuj zoo siab rau nws, rau qhov uas Daviv tau ua rog thiab ntaus yeej Hadadexaws lawm, rau qhov Hadadexaws pheej ua rog rau Thau‑is. Hadaulas kuj coj tej qhov txhia chaw uas xuas nyiaj xuas kub xuas tooj liab ua, tuaj pub rau Daviv.

11 Vajntxwv Daviv muab txhua yam no xyeem pub rau (יחוח)Yahweh, thiab muab tej nyiaj kub uas nws muab tau ntawm txhua haiv neeg uas nws kov yeej xyeem pub rau (יחוח)Yahweh,

12 yog tej uas nws txeeb tau ntawm cov Edoos, cov Mau‑as, cov Asmoos, cov Filixatees, cov Amalej thiab tej uas nws txeeb tau ntawm Lehaus tus tub Hadadexaws uas ua vajntxwv hauv Xaunpas.

13 Thaum Daviv mus tua cov Edoos tuag kaum yim txhiab leej rau hauv lub Hav Ntsev rov los, ces nws lub moo txawm nrov nto moo lug.

14 Nws tso tub rog zov kav thoob tebchaws Edoos, mas cov tibneeg Edoos sawvdaws zwm rau Daviv. (יחוח)Yahweh pub Daviv kov yeej rau txhua qhov uas nws mus.

​

Cov Uas Ua Daviv Li Haujlwm

(1 Vaj Keeb Kwm 18:14-17)

15 Mas Daviv kav tag nrho cov Ixayees huv si.  Daviv ua ncaj ua ncees thiab ua zoo rau nws cov pejxeem sawvdaws.

16 Xeluyah tus tub Yahas ua thawj kav tub rog. Ahilus tus tub Yahsafas ua tus uas sau ntawv keeb kwm.  

17 Ahithus tus tub Xadaus thiab Anpiyathas tus tub Ahimelej ua pov thawj. Xelayah ua tus tub sau ntawv.

18 Yahyadas tus tub Npenayah kav cov Khelethis thiab cov Pelethis. Thiab Daviv cov tub ua pov thawj.