(יחוח)Yahweh Cog Lus Rau Daviv

(1 Vaj Keeb Kwm 17:1-15)

1 Thaum vajntxwv nyob ruaj hauv nws lub vaj tse, thiab (יחוח)Yahweh ua rau nws cov yeeb ncuab uas nyob ib ncig tsis tuaj ua rog rau nws lawm,

2 vajntxwv hais rau Nathas uas ua xibhwb cev (יחוח)Yahweh lus tias, saib maj, kuv nyob hauv lub tsev uas xuas ntoo ciab ua hos (יחוח)Yahweh lub phij xab nyob hauv lub tsev ntaub xwb.

3 Mas Nathas hais rau vajntxwv tias, koj cia li mus ua txhua yam uas koj lub siab xav ua, rau qhov (יחוח)Yahweh nrog nraim koj.

4 Tiamsis hmo ntawd (יחוח)Yahweh hais lus tuaj rau Nathas tias,

5 cia li mus hais rau kuv tus tub qhe Daviv tias, (יחוח)Yahweh hais li no tias, koj yuav ua ib lub tsev rau kuv nyob lov?

6 Txij thaum kuv coj nej tawm hauv Iziv tebchaws los txog hnub no, kuv tsis tau nyob hauv lub tsev, tiamsis kuv mus mus los los nyob hauv lub tsev ntaub xwb.

7 Txhua qhov uas kuv nrog cov Ixayees sawvdaws mus mus los los, kuv puas tau hais ib lo lus rau cov Ixayees ib tug thawj twg uas kuv txib kom saib xyuas kuv haiv neeg Ixayees hais tias, ua cas nej tsis ua ib lub tsev ntoo ciab rau kuv?

8 Vim li no, nimno koj cia li hais rau kuv tus tub qhe Daviv tias, (יחוח)Yahweh uas muaj hwjchim loj kawg nkaus hais li no tias, kuv coj koj tawm hauv lub tshav zaub uas koj yug yaj los ua tus thawj kav kuv haiv neeg Ixayees.

9 Koj mus qhov twg los kuv nrog nraim koj qhov ntawd, thiab kuv rhuav tshem koj cov yeeb ncuab huvsi ntawm koj lub xubntiag mus. Kuv yuav pub kom koj muaj koob meej ib yam li tej uas muaj koob meej loj hauv ntiajteb no.

10 Kuv yuav tu ib lub chaw cia rau kuv haiv neeg Ixayees nyob, thiab kuv yuav muab lawv cog cia nyob ruaj khov rau hauv lub chaw uas yog lawv tug, tsis muaj leejtwg yuav tuaj zes lawv. Tej tibneeg lim hiam ntais ntuj yuav tsis tuaj tsim txom lawv dua li lawm yam li yav tag los, 

11 txij thaum kuv tsa cov thawj kav kuv haiv neeg Ixayees. Kuv yuav ua rau koj tej yeeb ncuab sawvdaws tsis ua rog rau koj lawm. Dua li ntawd, (יחוח)Yahweh hais rau koj tias, (יחוח)Yahweh yuav pub kom koj muaj caj ces ua vajntxwv mus li.

12 Thaum koj hnub nyoog tag mus nrog koj tej poj koob yawm txwv nyob lawd, kuv yuav tsa ib tug tub uas koj yug los nyob koj chaw thiab kuv yuav tsa nws ua vajntxwv kav ruaj khov.

13 Nws yog tus uas yuav ua lub tuam tsev rau kuv lub npe, thiab kuv yuav tsa nws lub zwm txwv nyob mus ib txhis.

14 Kuv yuav ua nws leej txiv thiab nws yuav ua kuv tus tub.  Thaum nws ua txhaum, kuv yuav siv tibneeg rab nplawm qhuab qhia nws, thiab kuv yuav siv tibneeg nplawm nws.  

15 Tiamsis kuv yuav tsis muab kuv txojkev hlub uas ruaj khov rho ntawm nws mus yam li uas kuv tau rho ntawm Sha-ul uas kuv muab rhuav tshem ploj ntawm koj mus.  

16 Koj caj ces thiab qhov uas lawv ua vajntxwv yuav nyob ruaj khov rau ntawm kuv xub ntiag mus ib txhis li. Koj lub zwm txwv yuav raug muab tsa nyob ruaj khov mus ib txhis.

17 Nathas hais tej lus no huvsi rau Daviv raws li tej uas nws ua yog toog.

​

Daviv Tej Lus Thov

(1 Vaj Keeb Kwm 17:16-27)

18 Ces vajntxwv Daviv txawm nkag rau hauv lub tsev ntaub zaum ntawm (יחוח)Yahweh xub ntiag mas hais tias, Au Txiv (יחוח)Yahweh, kuv yog leejtwg, kuv caj ces yog leejtwg es koj coj kuv los txog txij no?

19 Au Txiv (יחוח)Yahweh, tej no yog tej yam me me ntawm koj lub qhov muag xwb. Koj tseem hais tseg txog kuv uas yog koj tus tub qhe caj ces rau ntau xyoo tom hauv ntej.  Au Txiv (יחוח)Yahweh, koj tau qhia tej no rau tibneeg.  

20 Kuv Daviv yuav hais abtsi ntxiv rau koj thiab? Au Txiv (יחוח)Yahweh, koj yeej paub kuv uas yog koj tus tub qhe.

21 Twb yog vim koj saib rau koj tej lus cog tseg thiab vim yog raws li koj lub siab nyiam, koj thiaj ua tej hauj lwm loj no huvsi thiab qhia rau koj tus tub qhe paub.

22 Au Txiv (יחוח)Yahweh, koj loj kawg, tsis muaj leej twg zoo cuag li koj. Dhau koj lawm yeej tsis muaj dua lwm Tus Tswv. Tsuas muaj koj ib leeg xwb, txij li thaum peb lub qhov ntsej tau hnov los.

23 Haiv neeg twg hauv lub ntiajteb no yuav zoo thooj li koj haiv neeg Ixayees, uas (יחוח)Yahweh mus txhiv los ua nws haiv neeg thiab ua rau nws lub npe nto moo lug?  Nws ua tej yam uas loj kawg thiab txaus ntshai rau lub tebchaws tab meeg lawv, yog nws haiv neeg uas nws txhiv tawm hauv Iziv tebchaws thiab hauv tej tibneeg tej dab los.

24 Au Txiv (יחוח)Yahweh, koj tsim tsa koj haiv neeg Ixayees los ua koj li teej tug mus ib txhis li, thiab koj ua lawv Tus Tswv.

25 Au Txiv (יחוח)Yahweh, thov koj tuav tej lus uas koj hais txog kuv uas yog koj tus tub qhe thiab hais txog kuv caj ces nyob ruaj mus ib txhis, thiab thov koj ua raws li koj tau hais cia lawd.

26 Koj lub npe yuav raug qhuas mus ib txhis hais tias, (יחוח)Yahweh uas muaj hwjchim loj kawg nkaus yog Tus Tswv uas kav cov Ixayees, thiab Daviv uas yog koj tus tub qhe caj ces yuav nyob ruaj khov ntawm koj lub xub ntiag mus li.

27 Au (יחוח)Yahweh uas muaj hwjchim loj kawg nkaus, uas yog cov Ixayees Tus Tswv, koj twb qhia rau kuv uas yog koj tus tub qhe paub tias, koj yuav tsim kuv kom muaj caj ces ua vajntxwv mus li. Vim li no, kuv uas yog koj tus tub qhe thiaj muaj cuab kav tsa ncauj thov koj.

28 Au Txiv (יחוח)Yahweh, koj yeej yog Tus Tswv, koj tej lus yeej yog lus tseeb, thiab koj tau cog tej lus zoo no rau koj tus tub qhe.

29 Yog li no, nimno thov koj txaus siab foom koob hmoov rau koj tus tub qhe caj ces kom nyob ruaj rau ntawm koj lub xub ntiag mus ib txhis. Au Txiv (יחוח)Yahweh, koj twb hais cia li ntawd lawm, thiab koj tej koob hmoov yeej yuav muaj rau kuv uas yog koj tus tub qhe caj ces mus ib txhis.