(יחוח)Yahweh Rau Txim Rau Ahaxiyah

1 Thaum Ahaj tuag lawd cov Mau‑as txawm ntxeev siab rau cov Ixayees.

2 Ahaxiyah poob qhov rais saum nws lub tsev txheej ob hauv lub nroog Xamalis mas nws mob. Nws thiaj txib cov tub tshaj xo mus mas hais rau lawv tias, nej cia li mus nug dab Npa‑axenpus uas yog cov tibneeg hauv lub moos Ekhoos tus dab tias, kuv tus mob yuav zoo los tsis zoo.

3 Mas (יחוח)Yahweh tus tub txib saum ntuj hais rau Eliyah uas nyob hauv Thinpis tias, cia li sawv tsees mus ntsib Xamalis tus vajntxwv cov tub tshaj xo mas hais rau lawv tias, tsis muaj (יחוח)Yahweh nyob hauv Ixayees tebchaws, nej thiaj mus nug Npa‑axenpus uas yog cov tibneeg Ekhoos tus dab lov?

4 Vim li no (יחוח)Yahweh hais tias, Ahaxiyah yuav tsis nqis saum lub txaj uas nws mus pw ntawd los li, nws yeej yuav tuag xwb. Ces Eliyah txawm mus lawm.

5 Cov tub tshaj xo thiaj rov los rau ntawm vajntxwv mas vajntxwv nug lawv tias, ua li cas nej cia li rov qab los?

6 Lawv hais rau nws tias, muaj ib tug yawg tuaj ntsib peb mas hais rau peb tias, nej cia li rov qab mus hais rau tus vajntxwv uas txib nej tuaj tias, (יחוח)Yahweh hais li no tias, tsis muaj (יחוח)Yahweh nyob hauv Ixayees tebchaws lawm koj thiaj txib tibneeg mus nug dab Npa‑axenpus uas yog cov Ekhoos tus dab lov? Vim li no koj yuav tsis nqis saum lub txaj uas koj mus pw ntawd, koj yeej yuav tuag xwb.

7 Vajntxwv hais rau lawv tias, tus uas tuaj ntsib nej thiab hais tej lus no rau nej yog tibneeg zoo li cas?

8 Lawv teb nws tias, nws hnav lub tsho ntaub plaub thiab nws sia ib txoj siv tawv ntawm duav. Mas vajntxwv hais tias, tus kod yog Eliyah uas nyob hauv Thinpis ntag.

9 Vajntxwv txawm txib ib tug thawj rog coj tsib caug leej tub rog uas nws kav mus rau ntawm Eliyah. Nws nce mus cuag Eliyah uas zaum saum lub pov roob mas hais rau Eliyah tias, (יחוח)Yahweh tus tibneeg es, vajntxwv hais tias, koj cia li nqis los.

10 Tiamsis Eliyah teb tus thawj rog ntawd tias, yog tias kuv yog (יחוח)Yahweh ib tug tibneeg tiag, thov kom hluavtaws poob saum ntuj los hlawv koj thiab koj tsib caug leej tub rog kom kub nyhiab tag. Ces hluavtaws txawm poob saum ntuj los hlawv nws thiab nws tsib caug leej ntawd kub nyhiab tag huvsi.

11 Vajntxwv rov txib dua ib tug thawj rog coj tsib caug leej tub rog uas nws kav rov mus hais rau Eliyah.  Nws nce mus hais rau Eliyah tias, (יחוח)Yahweh tus tibneeg es, vajntxwv hais tias, koj cia li nqis los tam sim no.

12 Tiamsis Eliyah teb lawv tias, yog tias kuv yog (יחוח)Yahweh ib tug tibneeg tiag, thov kom hluavtaws poob saum ntuj los hlawv koj thiab koj tsib caug leej tub rog kom kub nyhiab tag. Ces (יחוח)Yahweh li hluavtaws txawm poob saum ntuj los hlawv nws thiab nws tsib caug leej ntawd kub nyhiab tag huvsi.

13 Mas vajntxwv rov txib dua ib tug thawj rog coj tsib caug leej tub rog uas nws kav mus.  Tus thawj rog uas peb kuj nce mus mas txhos caug ntua ntawm Eliyah xub ntiag thov thov hais tias, (יחוח)Yahweh tus tibneeg es, kuv thov koj tsa qhov muag saib kuv uas yog koj tus tub qhe txojsia thiab tsib caug leej no txojsia kom muaj nqis.

14 Hluavtaws twb poob saum ntuj los kub ob tug thawj rog uas kav tsib caug leej uas tuaj ua ntej ntawd thiab nkawv cov tub rog tag lawm.  Mas nimno thov koj tsa qhov muag saib kuv txojsia kom muaj nqis.

15 Ces (יחוח)Yahweh tus tubtxib saum ntuj txawm hais rau Eliyah tias, cia li nqis nrog nws mus, tsis txhob ntshai nws.  Nws txawm sawv tsees nrog tus thawj rog mus cuag vajntxwv,

16 mas hais rau vajntxwv tias, (יחוח)Yahweh hais li no tias, koj tau txib tib neeg mus nug dab Npa‑axenpus uas yog cov Ekhoos tus dab, mas yog vim tsis muaj

(יחוח)Yahweh hauv Ixayees tebchaws uas yuav mus nug tau lov? Vim li no koj yuav tsis nqis saum lub txaj uas koj pw kod los, koj yeej yuav tuag xwb.

17 Ces nws txawm tuag raws li (יחוח)Yahweh tej lus uas Eliyah hais ntawd. Ces Yahlas uas yog Ahaxiyah tus kwv txawm sawv nws chaw ua vajntxwv kav, vim yog Ahaxiyah tsis muaj tub. Thaum ntawd yog xyoo ob uas Yahsafas tus tub Yahlas kav Yahdah.

18 Lwm yam haujlwm uas Ahaxiyah ua mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.