Coj Eliyah Mus Saum Ntuj

1 Txog lub sijhawm uas (יחוח)Yahweh yuav siv khaub zeeg cua coj Eliyah mus saum ntuj, Eliyah thiab Elisas tab tom taug kev ntawm lub moos Kilakas mus.  

2 Mas Eliyah hais rau Elisas tias, koj nyob ntawm no tos, rau qhov (יחוח)Yahweh txib kuv mus rau lub moos Npe‑ees. Tiamsis Elisas hais tias, (יחוח)Yahweh muaj txojsia nyob pom, thiab koj muaj txojsia nyob pom, kuv yeej yuav tsis ncaim koj kiag li.  Mas nkawv thiaj mus rau lub moos Npe‑ees.

3 Pab xibhwb uas cev (יחוח)Yahweh lus hauv Npe‑ees tawm tuaj cuag Elisas thiab hais rau nws tias, koj puas paub tias hnub no (יחוח)Yahweh yuav coj koj tus xibhwb ncaim koj mus? Elisas teb tias, yog kawg, kuv paub lawm, ua twjywm.

4 Eliyah hais rau Elisas tias, Elisas, koj nyob ntawm no tos, rau qhov ()Yahweh txib kuv mus rau lub moos Yelikhaus. Tiamsis Elisas hais tias, (יחוח)Yahweh muaj txojsia nyob pom, thiab koj muaj txojsia nyob pom, kuv yeej yuav tsis ncaim koj kiag li. Mas nkawv thiaj mus txog lub moos Yelikhaus.

5 Pab xibhwb uas cev (יחוח)Yahweh lus hauv Yelikhaus txav los ze Elisas thiab hais rau nws tias, koj puas paub tias hnub no (יחוח)Yahweh yuav coj koj tus xibhwb ncaim koj mus? Elisas teb tias, yog kawg, kuv paub lawm, ua twjywm.

6 Ces Eliyah txawm hais rau Elisas tias, koj nyob ntawm no tos, rau qhov (יחוח)Yahweh txib kuv mus rau ntawm tus dej Yaladees. Tiamsis Elisas hais tias, (יחוח)Yahweh muaj txojsia nyob pom, thiab koj muaj txojsia nyob pom, kuv yeej yuav tsis ncaim koj kiag li. Mas nkawv thiaj ua ke mus.

7 Pab xibhwb uas cev (יחוח)Yahweh lus muaj tsib caug leej kuj mus thiab. Lawv sawv kem deb zog ntawm nkawv, nkawv sawv rau ntawm tus dej Yaladees.  

8 Eliyah muab nws lub tsho ntev los dov ua ib caj nplawm tus dej, dej txawm faib rau ob sab, nkawv thiaj hla hauv cov av qhuav mus.  

9 Thaum nkawv hla dej mus lawd, Eliyah hais rau Elisas tias, cia li thov yam uas kuv yuav ua rau koj ua ntej uas kuv yuav raug ncaim koj mus. Elisas teb tias, thov cia kuv tau koj Tus Ntsuj Plig Dawb Huv ob npaug ua qub txeeg qub teg.

10 Eliyah hais tias, koj thov tej uas nyuaj kawg. Yog koj pom ntsoov thaum kuv raug coj ncaim koj mus, yuav muaj li ntawd rau koj. Yog koj tsis pom, yuav tsis muaj li ntawd rau koj.

11 Thaum nkawv tseem sib tham taug kev mus, ua ciav muaj ib lub tsheb hluavtaws thiab nees hluavtaws los kem kiag nkawv. Mas Eliyah txawm nyob hauv lub khaub zeeg cua nce mus saum ntuj lawm.

12 Elisas pom ntsoov mas nws qw nrov hais tias, kuv txiv, kuv txiv.  Koj yog cov Ixayees tej tsheb ua rog thiab cov tub rog caij nees. Ces nws tsis pom Eliyah dua li lawm, nws txawm muab nws lub tsho dua rhe ua ob sab.  

13 Nws khaws Eliyah lub tsho ntev uas poob los ntawd thiab rov qab mus sawv ntawm ntug dej Yaladees.

14 Nws muab Eliyah lub tsho ntev uas poob los ntawd nplawm dej hais tias, (יחוח)Yahweh uas yog Eliyah Tus Tswv nyob qhov twg? Thaum nws nplawm dej, dej txawm faib rau ob sab, Elisas thiaj hla mus.

15 Thaum pab xibhwb cev (יחוח)Yahweh lus uas nyob ntawm lub moos Yelikhaus pom Elisas nyob ncaj ntawm lawv xub ntiag, lawv txawm hais tias, Eliyah Tus Ntsuj Plig Dawb Huv nrog nraim Elisas lawm. Ces lawv txawm tuaj tos nws thiab khoov ntshis pe rau hauv av ntawm nws xub ntiag.

16 Lawv hais rau nws tias, muaj tsib caug tus txivneej uas muaj zog nrog peb uas yog koj cov tub qhe nyob ua ke no. Cia lawv mus nrhiav koj tus

xibhwb, tej zaum (יחוח)Yahweh Tus Ntsuj Plig Dawb Huv nqa nws mus tso rau saum ib lub roob lossis ib lub hav twg lawm.  Mas Elisas hais tias, tsis txhob txib lawv mus li.  

17 Thaum lawv pheej taij nws heev ua rau nws txaj muag lawm, nws thiaj hais tias, txib mus maj. Yog li ntawd lawv thiaj txib tsib caug leej mus. Lawv mus nrhiav Eliyah tau peb hnub tsis pom li.

18 Lawv rov los cuag Elisas rau thaum nws tseem tos hauv lub moos Yelikhaus.  Nws thiaj hais rau lawv tias, kuv twb hais rau nej lawm tias, tsis txhob mus no nev?

​

Elisas Ua Txujci Tseem Ceeb

19 Cov tibneeg hauv lub moos ntawd hais rau Elisas tias, lub moos no xis nyob heev raws li koj uas yog peb Tus Tswv pom lawm, tiamsis cov dej tsis zoo siv, pheej ua rau tib neeg nchuav menyuam.

20 Mas Elisas hais tias, cia li muab ib lub phaj tshiab tshiab los rau kuv thiab muab ntsev tso rau hauv. Lawv txawm coj los rau nws.

21 Nws thiaj mus rau ntawm lub qhov dej txhawv thiab muab cov ntsev pov rau hauv thiab hais tias, (יחוח)Yahweh hais li no tias, kuv twb ua rau cov dej no zoo lawm.  Txij no mus cov dej yuav tsis ua rau muaj kev tuag kev nchuav menyuam dua li lawm.

22 Yog li ntawd cov dej thiaj zoo los txog niaj hnub nimno, raws li tej lus uas Elisas hais.

23 Elisas tawm qhov ntawd mus rau lub moos Npe‑ees.  Thaum nws tab tom taug kev mus, muaj ib cov menyuam tub tawm hauv lub moos tuaj thuam luag nws tias, yawg do hau, cia li khiav mus.  Yawg do hau, cia li khiav mus.

24 Nws tig los saib ntsoov rau lawv thiab tuav (יחוח)Yahweh lub npe foom lawv. Ces txawm muaj ob tug maum dais tawm tom hav zoov los muab plaub caug ob tug menyuam tub ntawd dua tag.

25 Nws txawm taug kev mus rau saum lub roob Khamees mam li rov qab mus rau lub nroog Xamalis.