Yahas Ua Vajntxwv Kav Ixayees

1 Xyoo kaum yim uas Yahsafas ua vajntxwv kav Yahdah mas Ahaj tus tub Yahlas sawv ua vajntxwv kav cov Ixayees hauv lub nroog Xamalis, nws kav tau kaum ob xyoos.

2 Nws ua tej uas (יחוח)Yahweh pom tias phem tiamsis ua tsis thooj li nws niam nws txiv, rau qhov nws muab tus ncej dab Npa‑as uas nws txiv ua rhuav tshem pov tseg.  

3 Txawm yog li ntawd los nws tseem tuav rawv Nenpas tus tub Yelaunpau‑as tej kev txhaum uas coj cov Ixayees ua txhaum, mas Yahlas kuj tsis tso tej kev txhaum ntawd tseg.

​

Ixayees Thiab Mau-as Ua Rog

4 Cov Mau‑as tus vajntxwv Mesas yog ib tug yug yaj, mas nws yuav tau pub 100,000 tus menyuam yaj thiab pub 100,000 tus txiv yaj cov plaub rau Ixayees tus vajntxwv.  

5 Tiamsis thaum uas Ahaj tuag lawd, Mau‑as tus vajntxwv txawm ntxeev siab rau Ixayees tus vajntxwv.

6 Vajntxwv Yahlas txawm tawm hauv lub nroog Xamalis mus thiab txhij cov Ixayees sawvdaws ua tub rog.

7 Nws xa xov mus hais rau Yahsafas uas ua vajntxwv kav Yahdah tias, Mau‑as tus vajntxwv tau ntxeev siab rau kuv. Koj yuav nrog kuv mus ntaus cov Mau‑as los tsis mus? Yahsafas hais tias, kuv yuav mus thiab. Kuv nrog koj koom ib lub siab, kuv cov tibneeg yog koj cov tibneeg, thiab kuv cov nees yog koj cov nees.

8 Thiab nws nug tias, peb yuav mus txojkev twg? Yahlas teb tias, peb yuav mus hauv tebchaws moj sab qhua Edoos mus.

9 Ixayees tus vajntxwv thiaj li nrog Yahdah tus vajntxwv thiab cov Edoos tus vajntxwv ua ke mus. Thaum lawv lug kev mus tau xya hnub lawm mas tsis muaj dej rau cov tub rog thiab cov tsiaj uas coj nrog lawv mus ntawd haus.

10 Mas Ixayees tus vajntxwv hais tias, txom nyem kawg li lauj! (יחוח)Yahweh hu peb peb tug vajntxwv no tuaj es yuav muab peb rau hauv cov Mau‑as txhais tes.

11 Ces Yahsafas hais tias, nyob ntawm no muaj ib tug xibhwb cev

(יחוח)Yahweh lus uas peb yuav mus thov nug tau (יחוח)Yahweh los tsis muaj? Mas Ixayees tus vajntxwv ib tug tub teg tub taws teb tias, Safas tus tub Elisas uas tu Eliyah nyob ntawm no.

12 Ces Yahsafas txawm hais tias, nws yeej muaj (יחוח)Yahweh tej lus tiag tiag li. Ces Ixayees tus vajntxwv thiab Yah-safas thiab Edoos tus vajntxwv txawm mus cuag nws.

13 Elisas hais rau Ixayees tus vaj ntxwv tias, kuv thab txog koj abtsi? Koj cia li mus nrhiav koj niam koj txiv tej xibhwb. Tiamsis Ixayees tus vajntxwv hais rau nws tias, tsis tau li, rau qhov yog (יחוח)Yahweh hu peb peb leeg vajntxwv tuaj es yuav muab peb rau hauv cov Mau‑as txhais tes.

14 Elisas hais tias, muaj (יחוח)Yahweh uas muaj hwjchim loj kawg nkaus uas kuv pe hawm muaj txojsia nyob pom, yog kuv tsis hwm Yahdah tus vajntxwv Yahsafas mas kuv yeej yuav tsis tsa muag saib koj lub ntsej muag thiab tsis quav ntsej koj kiag li.

15 Cia li coj ib tug uas ntaus nkauj nog ncas tuaj. Thaum tus ntawd ntaus nkauj nog ncas, mas (יחוח)Yahweh lub hwj chim los rau saum Elisas,

16 mas Elisas hais tias, (יחוח)Yahweh hais li no tias, kuv yuav ua kom lub hav qhuav no muaj pas dej puv nkaus.

17 Rau qhov (יחוח)Yahweh hais li no tias, nej yuav tsis pom cua, tsis pom nag los, nej yuav pom lub hav qhuav no muaj dej puv nkaus, mas nej yuav tau haus thiab nej tej tsiaj txhu huvsi yuav tau haus.

18 Tej no yog tej haujlwm uas (יחוח)Yahweh pom tias me me xwb. (יחוח)Yahweh kuj yuav muab cov Mau‑as rau hauv nej txhais tes.

19 Nej yuav ntaus yeej txhua lub moos uas muaj ntsa loog thiab tej moos loj txhua lub, thiab ntov txhua tus ntoo uas zoo kom vau, thiab txhub txhua lub hauv dej pov tseg thiab muab pob zeb nchuav rau hauv txhua daim teb uas zoo kom puam tsuaj tag.

20 Mas nyob los rau tagkis tom qab kwvlam lub sijhawm uas ua kevcai hlawv xyeem, ua ciav txawm muaj dej ntws ntawm tebchaws Edoos los ua rau lub tebchaws uas lawv nyob ntawd muaj dej puv nkaus.  

21 Thaum cov Mau‑as sawvdaws hnov tias cov vajntxwv ntawd tuaj ntaus lawv mas txhua tus txivneej uas txawj tuav cuab yeej tag nrho cov laus kawg nkaus thiab cov uas hnub nyoog yau kawg nkaus raug hu tuaj mus tiv ntawm tus ciam teb.

22 Thaum sawv ntxov uas lawv sawv mas lub hnub ci tuaj rau ntawm cov dej, ces cov Mau‑as pom cov dej uas nyob ntawm lawv xub ntiag liab zoo yam li ntshav.

23 Ces lawv txawm hais tias, ntawd yog ntshav os. Cov vajntxwv ntawd sib ua rog thiab sib tua kaj.  Peb cov Mau‑as peb cia li mus lwg lawv tej qhov txhia chaw.

24 Tiamsis thaum lawv mus txog ntawm cov Ixayees lub yeej mas cov Ixayees kuj sawv ua rog rau cov Mau‑as thiab ntiab lawv mus, cov Ixayees caum tua tau cov Mau‑as ntau kawg li.  

25 Thiab lawv muab tej moos rhuav pov tseg thiab sawvdaws nyias taus nyias laim pob zeb rau hauv txhua thaj teb uas zoo kom puv nkaus txhua thaj teb, thiab lawv txhub txhua lub hauv dej thiab ntov tej ntoo uas zoo txhua tus.  Tshuav tej ntsa loog pob zeb nyob hauv Khihalexes xwb mas cov Ixayees uas txawj fiav qe zeb kuj vij ntaus lub moos ntawd.

26 Thaum Mau‑as tus vajntxwv pom tias yuav kov tsis yeej, nws txawm coj xya pua leej tub rog uas tua ntaj khiav hla Edoos tus vajntxwv cov tub rog, tiamsis hla tsis tau.

27 Mas Mau‑as tus vajntxwv txawm muab kiag nws tus tub hlob uas yuav nyob nws chaw ua vajntxwv hlawv xyeem saum lub ntsa loog. Txojkev npau taws heev thiaj poob rau saum cov Ixayees mas lawv thiaj thim rov qab mus rau hauv lawv lub tebchaws lawm.