2 VAJNTXWV 4

Tus Poj Ntsuam Cov Roj

1 Pab xibhwb cev (יחוח)Yahweh lus ib tug tus pojniam tuaj quaj rau Elisas tias, kuv tus txiv uas yog koj tus tub qhe tuag lawm. Koj kuj paub tias nws hwm thiab paub ntshai (יחוח)Yahweh, tiamsis tus uas peb tshuav nqi tuaj yuav coj kuv ob tug tub mus ua nws qhev.

2 Elisas hais rau nws tias, koj xav kom kuv ua abtsi? Cia li hais rau kuv, koj muaj abtsi hauv koj lub tsev? Nws teb tias, kuv uas yog koj tus nkauj qhe tsis muaj abtsi hauv tsev tsuas yog muaj ib hwj roj xwb.

3 Ces Elisas hais tias, koj cia li mus qiv koj tej kwvtij zej zog sawvdaws cov hub uas khoom kom ntau ntau los.

4 Mas koj thiab koj cov tub mus rau hauv tsev thiab muab qhov rooj kaw, mas hliv cov roj rau hauv cov hub ntawd huvsi. Thaum lub hub twg puv muab txawb rau ib qho.

5 Tus pojniam ntawd thiaj rov mus thiab muab qhov rooj kaw nws thiab nws cov tub cia. Nws cov tub cev hub rau nws mas nws hliv roj rau hauv.

6 Thaum cov hub puv tag lawm, nws hais rau nws tus tub tias, cev dua ib lub hub rau kuv. Nws teb leej niam tias, tsis tshuav hub lawm. Ces roj txawm tu nrho tsis los lawm.

7 Tus pojniam ntawd mus hais rau (יחוח)Yahweh tus tibneeg paub, mas Elisas hais tias, koj mus muab cov roj ntawd muag thiab muab cov nyiaj ntawd them koj tej nuj nqis, es tshuav li cas ces koj thiab koj cov tub kuj siv tau yug nej lub neej.

​

Elisas Thiab Tus Pojniam Hauv Sunees

8 Muaj ib hnub Elisas mus txog lub moos Sunees. Muaj ib tug pojniam nplua nuj nyob hauv txawm hu nws los noj mov.  Yog li ntawd thaum nws taug txojkev ntawd thaum twg, nws thiaj pheej mus noj mov qhov ntawd.

9 Tus pojniam ntawd thiaj hais rau nws tus txiv tias, kuv pom tias tus yawg ntawd yog (יחוח)Yahweh ib tug tibneeg dawb huv, nws pheej taug txojkev ntawm peb no.

10 Cia wb ua ib chav tsev me me rau txheej tsev las tshav saud thiab muab txaj thiab rooj noj mov thiab rooj zaum thiab ib lub teeb txawb rau hauv mas nws tuaj rau ntawm wb thaum twg nws thiaj tau mus so rau hauv chav ntawd.

11 Muaj ib hnub Elisas kuj tuaj rau qhov ntawd thiab nws mus so hauv chav tsev ntawd.

12 Nws hais rau nws tus tub qhe Kehaxis tias, hu tus pojniam uas yog tibneeg Sunees los.  Thaum mus hu nws, nws txawm los sawv rau ntawm Elisas xub ntiag.

13 Elisas hais rau Kehaxis tias, cia li hais rau tus pojniam ntawd tias, koj tau ua haujlwm khwv heev rau wb, mas wb yuav ua abtsi pab koj? Koj xav kom wb hais ib lo lus rau vajntxwv lossis tus thawj tub rog pab koj lov? Nws teb tias, kuv twb nrog kuv cov kwvtij nyob ua ke lawm.

14 Elisas thiaj hais tias, yog li ntawd yuav ua abtsi pab nws? Kehaxis teb tias, nws tsis muaj menyuam thiab nws tus txiv twb laus heev lawm.

15 Elisas hais tias, hu nws los.  Thaum mus hu nws, nws kuj los sawv ntawm qhov rooj.

16 Elisas txawm hais tias, lwm xyoo lub caij no koj yuav tau puag ib tug metub. Tus pojniam ntawd hais tias, (יחוח)Yahweh tus tibneeg, uas yog kuv Tus Tswv, tsis muaj li ntawd, tsis txhob dag koj tus nkauj qhe maj.

17 Ces tus pojniam ntawd txawm xeeb me nyuam thiab xyoo tom qab lub caij ntawd nws txawm yug tau ib tug tub raws li Elisas tau hais rau nws lawd. 18 Thaum tus metub hlob lawd, muaj ib hnub nws txawm tawm mus rau nws txiv ntawm cov tub zog uas hlais qeb.

19 Nws hais rau nws txiv tias, Au, kuv taub hau, kuv taubhau! Leejtxiv hais rau nws tus tub qhe tias, cia li puag nws mus rau leej niam.  

20 Thaum tus tub qhe puag tus metub ntawd mus rau leej niam lawm, tus metub txawm nyob hauv leej niam lub xub ntiag mus txog tav su ces txawm tuag lawm. 21 Leej niam txawm nce mus muab tus metub pw rau saum (יחוח)Yahweh tus tibneeg lub txaj, thiab muab qhov rooj kaw cia mas tawm mus.  

22 Nws hu nws tus txiv hais tias, cia li xa ib tug tub qhe thiab ib tug nees luav los rau kuv, kuv yuav maj mus cuag (יחוח)Yahweh tus tibneeg mam rov los.

23 Nws tus txiv hais tias, hnub no koj yuav mus cuag nws ua abtsi? Twb tsis yog lub hli xiab thiab tsis yog hnub Sabbath.  Nws tus pojniam teb tias, tsis ua li cas.

24 Ces nws txawm nog eeb rau tus nees luav thiab hais rau nws tus tub qhe tias, cia li txhib kom tus nees luav khiav nrawm nroos, tsis txhob maj mam kiag li, tsuas yog kuv hais rau koj xwb.

25 Nws txawm sawv kev mus thiab mus txog (יחוח)Yahweh tus tibneeg saum lub roob Khamees. Thaum (יחוח)Yahweh tus tibneeg pom tus pojniam ntawd tuaj, nws txawm hais rau nws tus tub qhe Kehaxis tias, saib maj, tus pojniam hauv Sunees tuaj txog tim ub.

26 Koj cia li khiav mus tos nws tamsim no thiab hais

rau nws tias, koj nyob zoo lov? Koj tus txiv nyob zoo lov? Koj tus tub nyob zoo lov? Tus pojniam ntawd teb tias, nyob zoo thiab.   

27 Thaum nws tuaj txog ntua (יחוח)Yahweh tus tibneeg saum lub roob, nws txawm qawm nkaus (יחוח)Yahweh tus tibneeg kotaw. Mas Kehaxis mus thawb tus pojniam ntawd tawm mus. Tiamsis (יחוח)Yahweh tus tibneeg hais tias, cia nws nyob nws vim nws mob siab heev, thiab (יחוח)Yahweh muab tej no zais lawm tsis qhia rau kuv paub.

28 Ces tus pojniam ntawd txawm hais tias, kuv tau thov ib tug metub ntawm koj uas yog kuv Tus Tswv lov? Kuv twb hais tias, tsis txhob dag kuv, no nev?

29 Elisas thiaj hais rau Kehaxis tias, cia li qaws koj lub tsho rau ntawm duav, thiab coj kuv tus pas nrig hauv koj txhais tes mus. Yog koj ntsib leejtwg, tsis txhob hais lus rau nws, yog leejtwg hais lus rau koj los tsis txhob teb. Cia li muab kuv tus pas nrig tso rau saum tus menyuam ntawd lub plhu.

30 Tus menyuam ntawd leej niam hais tias, (יחוח)Yahweh muaj txojsia nyob pom thiab koj muaj txojsia nyob pom, kuv yuav tsis tso koj nyob ntawm no. Elisas thiaj sawv tsees raws nws qab mus.

31 Kehaxis mus ua ntej thiab muab tus pas nrig tso rau saum tus menyuam ntawd lub plhu, tiamsis tsis hnov muaj suab thiab tsis pom muaj sia li.  Yog li ntawd nws thiaj rov mus ntsib Elisas thiab hais rau nws tias, tus menyuam tsis tau tsim los.

32 Thaum Elisas tuaj rau hauv lub tsev ntawd, nws kuj pom tus menyuam tuag pw saum nws lub txaj.

33 Nws txawm nkag mus rau hauv muab lub qhov rooj kaw tseg nkawv nyob hauv xwb, thiab nws thov (יחוח)Yahweh.

34 Ces nws txawm mus pw tsuam saum tus menyuam, qhov ncauj npuab qhov ncauj, qhov muag npuab qhov muag, tes npuab tes. Thaum nws pw xyab hlo tsuam rau saum tus menyuam ntawd, tus menyuam lub cev txawm sov tuaj. 35 Elisas sawv ncig mus ncig los hauv lub tsev, thiab rov qab mus pw tsuam saum tus menyuam. Tus menyuam txawm txham xya zaus, thiab qhib lub qhov muag.

36 Ces Elisas thiaj hu Kehaxis los thiab hais tias, cia li mus hu tus pojniam hauv Sunees no los. Kehaxis txawm mus hu nws los. Thaum nws los txog rau ntawm Elisas lawm, Elisas hais tias, cia li puag koj tus tub mus.

37 Tus pojniam ntawd txawm los khwb nkaus rau ntawm Elisas kotaw pe ti nkaus av. Ces nws thiaj puag nws tus tub tawm mus lawm.

​

Elisas Ua Ob Zaug Txujci Tseem Ceeb

38 Thaum Elisas rov los txog ntawm lub moos Kilakas mas lub tebchaws raug kev tshaib plab. Thaum pab xibhwb cev (יחוח)Yahweh lus nrog nws nyob ua ke, nws hais rau nws tus tub qhe tias, koj muab lub lauj kaub loj los hau zaub rau cov xibhwb noj.

39 Ib tug hauv pab xibhwb ntawd mus de txuj lom tom teb mas pom ib tsob hmab taub qus nws txawm de tau ib tsuag txiv hmab taub qus coj los tsuav hau rau hauv lauj kaub zaub, tsis paub xyov yog zaub abtsi.

40 Lawv daus zaub los rau cov tibneeg ntawd noj. Thaum lawv noj cov zaub ntawd, lawv qw nrov hais tias, Au (יחוח)Yahweh tus tibneeg, muaj kev tuag nyob hauv lub lauj kaub no. Lawv txawm noj tsis tau.

41 Elisas hais tias, muab ib co hmoov mog los.  Nws txawm muab cov hmoov mog rau rau hauv lub lauj kaub thiab hais tias, cia li daus rau cov tibneeg noj. Tsis muaj mob nkeeg hauv lub lauj kaub no lawm.

42 Muaj ib tug yawg tuaj hauv lub moos Npa‑as Salisas tuaj, coj tej ncuav uas muab thawj phaum qoob ua tuaj pub rau (יחוח)Yahweh tus tib neeg, yog nees nkaum lub ncuav qeb thiab tej hnab mog tshiab ntim hnab seev tsaj. Ces Elisas hais tias, cia li muab rau cov tibneeg no noj.

43 Tiamsis Elisas tus tub qhe hais tias, kuv yuav muab tej no rau rau ib puas leej noj tau li cas? Elisas rov hais tias, cia li muab rau cov tibneeg no noj los maj, rau qhov (יחוח)Yahweh hais li no tias, lawv yuav noj tsis tag tseem tshuav.

44 Ces nws thiaj muab rau rau lawv noj.  Lawv noj tsis tag tseem tshuav raws li (יחוח)Yahweh tej lus.