Kho Na‑amas Li Mob Ruas

1 Na‑amas uas yog vajntxwv Alas tus thawj rog, yog ib tug tseem ceeb rau vaj ntxwv thiab tus uas vajntxwv txaus siab heev, rau qhov (יחוח)Yahweh siv nws pab cov Alas kov yeej. Nws yog ib tug siab loj siab tuab, tiamsis nws mob lig mob ruas.   

2 Muaj ib zaug thaum cov Alas mus ntaus rog, lawv ntes tau ib tug mentxhais hauv Ixayees tebchaws los, mas nws los ua Na‑amas tus pojniam tus nkauj qhe.

3 Tus nkauj qhe hais rau nws tus poj lospav tias, kuv xav kom kuv tus tswv mus nrog tus xibhwb cev (יחוח)Yahweh lus nyob hauv lub nroog Xamalis. Tus xibhwb yuav kho tau kuv tus tswv li mob ruas zoo.

4 Na‑amas txawm mus hais rau vajntxwv uas yog nws tus tswv tias, tus mentxhais uas coj hauv Ixayees tebchaws los hais li ntawd.

5 Alas tus vajntxwv hais tias, cia li mus, kuv yuav ua ib tsab ntawv mus rau Ixayees tus vajntxwv. Ces Na‑amas txawm mus, nws thauj kaum talas nyiaj thiab rau txhiab sekhees kub thiab kaum cev tsoos tsho ua zam mus.

6 Thiab nws coj tsab ntawv mus rau Ixayees tus vajntxwv uas muaj ntsiab lus hais tias, thaum tsab ntawv no tuaj txog koj, thov koj paub tias kuv xa Na‑amas uas yog kuv tus tub teg tub taws tuaj thov koj kho nws tus mob ruas kom zoo.

7 Thaum Ixayees tus vajntxwv nyeem tsab ntawv ntawd tag, nws txawm dua rhe nws lub tsho thiab hais tias, kuv yog (יחוח)Yahweh uas yuav ua kom tuag thiab ua kom ciaj tau lov, es tus yawg no yuav xa xov tuaj kom kuv kho tus uas mob ruas no? Sim xav saib, nws nrhiav kev zes plaub xwb los sav.

8 Thaum Elisas uas yog (יחוח)Yahweh tus tibneeg hnov tias Ixayees tus vajntxwv dua rhe nws lub tsho, ces nws txawm tso ib tug mus hais rau vajntxwv tias, ua cas koj yuav dua koj lub tsho? Thov cia tus yawg ntawd los cuag kuv, xwv nws thiaj paub tias muaj ib tug xibhwb cev (יחוח)Yahweh lus nyob hauv Ixayees.

9 Ces Na‑amas thiab nws tej tsheb ua rog thiab tej nees thiaj los nres rau ntawm Elisas lub qhov rooj.

10 Elisas txawm tso ib tug mus hais rau Na‑amas tias, cia li mus da tus dej Yaladees xya zaus sib law, ces koj lub cev yuav rov zoo li qub thiab koj lub cev yuav huv.

11 Tiamsis Na‑amas chim heev, nws tawm plaws mus hais tias, kuv xav tias nws yuav tawm tuaj cuag kuv thiab sawv ntsug tuav nws Tus Tswv lub npe yoj tes rau saum qhov mob thiab kho tej mob ruas kom zoo.

12 Tus dej Anpanas thiab tus dej Fapas uas nyob ntawm lub nroog Damaxakas tsis zoo dua tej dej hauv Ixayees tebchaws huvsi lov? Kuv da tej dej ntawd kuv lub cev tseem huv tsis tau lov? Ces nws txawm tig kiag mus ua npau taws vog.

13 Tiamsis nws cov tub teg tub taws txav los ze thiab hais rau nws tias, yawg hlob, yog tus xibhwb cev lus ntawd hais kom koj ua ib yam uas loj heev, koj yuav tsis ua lov? Yog li ntawd thaum tus xibhwb ntawd hais rau koj tias, cia li mus da dej ces koj yuav huv, tseem tsis tsim nyog koj yim huab ua lov?

14 Nws thiaj nqis mus raus rau hauv tus dej Yaladees xya zaus raws li (יחוח)Yahweh tus tibneeg tej lus, mas nws cev nqaij rov zoo huv yam li qub, zoo li ib tug menyuam mos tej nqaij.

15 Ces nws thiab nws cov tibneeg sawvdaws txawm rov qab mus rau ntawm

(יחוח)Yahweh tus tibneeg. Nws los sawv ntawm Elisas xub ntiag thiab hais tias, saib maj, kuv paub tseeb tias thoob ntiajteb yeej tsis muaj tim tswv, tsuas yog muaj tus uas nyob hauv Ixayees tebchaws xwb. Yog li no thov koj txais ib qhov tshav ntuj ntawm kuv uas yog koj tus tub qhe txhais tes.

16 Mas Elisas hais tias, (יחוח)Yahweh uas kuv ua koom tu muaj txojsia nyob pom, kuv yuav tsis txais ib yam abtsi yuav kiag li. Na‑amas tseem cheem cheem los Elisas tsis yuav.

17 Ces Na‑amas thiaj hais tias, yog koj tsis yuav li, thov koj muab av kom txaus ob tug luj txwv thauj pub rau kuv uas yog koj tus tub qhe, rau qhov txij no mus, kuv yuav tsis muab qhov txhia chaw xyeem lossis tua tsiaj xyeem rau tej dab ib tug twg li lawm, tsuas yog xyeem rau (יחוח)Yahweh xwb.

18 Qhov no thov (יחוח)Yahweh zam txim rau kuv uas yog koj tus tub qhe.  Thaum kuv coj tus vajntxwv mus rau hauv lub tsev teev dab Limoos yuav pe tus dab ntawd es kuv tuav nws tes mus rau hauv thiab, thaum kuv pe rau hauv lub tsev teev dab Limoos, thaum kuv pe ntawd thov (יחוח)Yahweh zam txim rau kuv uas yog koj tus tub qhe.  

19 Elisas teb nws tias, cia li mus zoo.  Thaum Na‑amas tawm mus tsis tau deb pes tsawg,

20 Elisas uas yog (יחוח)Yahweh tus tibneeg tus tub qhe Kehaxis txawm xav tias, kuv Tus Tswv tso Na‑amas uas yog tibneeg Alas mus dawb mus do tsis kam yuav tej uas nws coj tuaj. Muaj (יחוח)Yahweh muaj txojsia nyob pom, kuv yuav khiav mus caum nws yuav ib txhia ntawm nws.  

21 Ces Kehaxis txawm caum Na‑amas qab mus. Thaum Na‑amas pom tias muaj ib tug khiav caum nws qab tuaj, nws txawm nqis saum lub tsheb ua rog los tos thiab hais tias, txhua yam nyob zoo lov?  

22 Nws teb tias, txhua yam nyob zoo thiab. Kuv Tus Tswv txib kuv tuaj hais tias, muaj ob tug hluas hauv pab xibhwb cev (יחוח)Yahweh lus pem toj siab Efa‑is tebchaws nyuam qhuav tuaj txog. Thov koj muab ib talas nyiaj thiab ob cev tsoos ua zam rau nkawv.

23 Mas Na‑amas hais tias, thov yuav ob talas nyiaj.  Na‑amas cheem rau nws, thiaj muab ob talas nyiaj ntim rau hauv ob lub hnab thiab muab ob cev tsoos tsho ua zam mas kom nws ob tug tub qhe kwv ua Kehaxis ntej mus.  

24 Thaum lawv los txog ntawm lub roob, Kehaxis txawm txais ntawm nkawv txhais tes coj mus cia rau hauv tsev, thiab tso nkawv rov mus, nkawv thiaj ncaim mus lawm.  

25 Nws txawm nkag mus rau hauv tsev thiab mus sawv ntawm nws tus tswv xub ntiag, mas Elisas nug nws hais tias, Kehaxis, koj mus qhov twg los? Kehaxis teb tias, kuv uas yog koj tus tub qhe tsis tau mus qhov twg.  

26 Tiamsis Elisas hais rau nws tias, thaum tus yawg ntawd nqis saum nws lub tsheb ua rog los tos koj, kuv Tus Ntsuj Plig Dawb Huv tsis tau nrog koj mus thiab lov? Tamsim no yog lub sijhawm uas tsim nyog txais nyiaj, txais tsoos tsho, txais vaj txiv aulib, vaj txiv hmab, txais yaj thiab nyuj, txais tub qhe thiab nkauj qhe lov?  

27 Yog li no Na‑amas tej mob ruas yuav kis rau koj thiab koj caj ces mus ib txhis. Kehaxis txawm tawm ntawm Elisas mus mob ruas ib ce dawb paug li tej daus.