Rab Taus Ntab Saum Dej

1 Pab xibhwb uas cev (יחוח)Yahweh lus hais rau Elisas tias, saib maj, lub chaw uas peb nyob es koj saib xyuas peb ntawd nqaim dhau tsis txaus peb nyob.

2 Cia peb mus rau tom ntug dej Yaladees, ib leeg txiav ib tog ntoo los ua chaw rau peb nyob.  Elisas hais tias, mus maj.

3 Muaj ib tug txawm hais tias, thov koj nrog peb uas yog koj cov tub qhe mus thiab.  Nws teb tias, kuv yuav mus.
4 Nws thiaj nrog lawv mus.  Thaum lawv tuaj txog ntawm tus dej Yaladees, lawv txawm ntov ntoo.  

5 Thaum ib tug tab tom ntov ntoo, nws rab taus txawm hle poob rau hauv dej lawm, nws thiaj qw tias, Au ceeblaj xwb lauj, yawg hlob.  Rab taus ntawd kuv qiv lawv li tuaj xwb.  

6 (יחוח)Yahweh tus tibneeg hais tias, rab taus poob ncaj qhov twg? Thaum tus ntawd taw qhia lub chaw rau nws lawd, nws thiaj txiav ib yav ntoo pov rau hauv lub chaw ntawd, ua rau rab taus hlau ntawd ntab plaws tuaj.  

7 Elisas hais tias, cia li ntsiab nkaus los. Ces tus ntawd txawm cev tes mus ntsiab nkaus los.

​

Alas Cov Tub Rog Swb

8 Thaum Alas tus vajntxwv ua rog rau cov Ixayees, nws nrog nws cov tub teg tub taws sablaj tias nws yuav ua yeej rau qhov twg.

9 Tiamsis (יחוח)Yahweh tus tibneeg xa xov rau Ixayees tus vajntxwv tias, ceev faj tsis txhob hla mus ze lub chaw ntawd, vim cov Alas tab tom tuaj rau qhov ntawd.

10 Ces Ixayees tus vajntxwv thiaj xa xov mus ceeb toom rau cov tibneeg uas nyob thaj chaw uas (יחוח)Yahweh tus tibneeg hais ntawd. Elisas pheej qhia vajntxwv paub li no, vajntxwv thiaj ceev faj tau tsis yog ib ob zaug xwb.

11 Alas tus vajntxwv ntxhov siab rau qhov no heev, nws thiaj hu nws cov tub teg tub taw tuaj thiab hais tias, nej yuav tsis qhia rau kuv tias peb tog leejtwg tuaj Ixayees tus vajntxwv tog lov?

12 Nws cov tub teg tub taws ib tug hais tias, Au vajntxwv uas yog kuv tus tswv, tsis muaj leejtwg kiag li. Yeej yog Elisas uas yog xibhwb cev (יחוח)Yahweh lus nyob hauv Ixayees tebchaws qhia tej lus uas koj hais hauv koj lub txaj pw rau Ixayees tus vajntxwv paub.

13 Vajntxwv thiaj hais tias, cia li mus nrhiav saib Elisas nyob qhov twg xwv kuv thiaj txib tibneeg mus ntes tau nws los. Muaj tibneeg hais rau nws tias, Elisas nyob hauv lub moos Dauthas.

14 Vajntxwv thiaj xa ib pab tub rog coob coob muaj nees thiab tsheb nees ua rog mus.  Lawv mus hmo ntuj thiab vij lub moos ntawd cia.

15 Tagkis tom qab thaum (יחוח)Yahweh tus tibneeg tus tub qhe sawv ntxov tsees thiab tawm mus, ua ciav pom ib pab tub rog muaj nees thiab tsheb nees ua rog vij nkaus lub moos lawm.  Tus tub qhe hais tias, ceeblaj lauj, kuv tus tswv, peb yuav ua li cas?

16 Elisas teb tias, tsis txhob ntshai rau qhov cov uas tuaj peb tog coob dua cov uas tuaj lawv tog.

17 Ces Elisas txawm thov (יחוח)Yahweh tias, Au (יחוח)Yahweh, thov koj qhib nws qhov muag nws thiaj li pom. (יחוח)Yahweh thiaj qhib tus hluas ntawd qhov muag, nws thiaj pom, ua ciav pem roob muaj nees muaj tsheb ua rog hluavtaws puv nkaus nyob vij puag ncig Elisas.

18 Thaum cov Alas tuaj tawm tsam Elisas, nws thov (יחוח)Yahweh hais tias, thov koj ua rau cov tibneeg no qhov muag fam. (יחוח)Yahweh thiaj ua rau lawv qhov muag fam raws li Elisas tej lus thov.

19 Mas Elisas hais rau lawv tias, tsis yog txojkev no thiab tsis yog lub moos no. Nej raws kuv qab, kuv yuav coj nej mus txog tus uas nej nrhiav ntawd. Ces nws txawm coj lawv mus rau hauv lub nroog Xamalis.

20 Thaum lawv los txog hauv nruab nrab nroog Xamalis lawd, Elisas hais tias, Au (יחוח)Yahweh, thov koj qhib cov tibneeg no qhov muag kom lawv rov pom kev. (יחוח)Yahweh thiaj li qhib lawv qhov muag pom kev, ua ciav lawv nyob hauv nruab nrab nroog Xamalis lawm.

21 Thaum Ixayees tus vajntxwv pom lawv, nws txawm hais rau Elisas tias, kuv txiv, kuv muab lawv tua lov? Kuv muab lawv tua pov tseg lov?

22 Nws teb tias, tsis txhob tua. Koj yuav tua cov tibneeg uas koj xuas ntaj xuas hneev ntes tau los lov? Cia li muab ncuav thiab dej rau lawv noj lawv haus, thiab tso lawv rov mus rau lawv tus tswv.

23 Vajntxwv txawm npaj ib rooj noj haus loj los yug lawv. Thaum lawv noj haus tag lawd, nws txawm tso lawv rov mus rau lawv tus tswv. Ces cov Alas thiaj tsis tuaj lwg Ixayees tebchaws dua li lawm.

​

Alas Cov Tub Rog Vij Lub Nroog Xamalis

24 Los rau tom qab no Npeehadas uas yog Alas tus vajntxwv txhij nws cov tub rog huvsi tuaj vij lub nroog Xamalis.

25 Thaum lawv vij lub nroog Xamalis ntawd, lub nroog raug kev tshaib plab heev kawg, mus txog thaum ib lub taubhau nees luav lawv muag txog yim caum sekhees nyiaj, thiab ib feem plaub hauv ib khab quav nquab, lawv muag tsib sekhees.

26 Thaum Ixayees tus vajntxwv taug saum ntsa loog, muaj ib tug pojniam qw thov nws hais tias, Au vajntxwv uas yog kuv tus tswv, thov pab lauj.

27 Vajntxwv hais tias, yog (יחוח)Yahweh tsis pab koj, kuv yuav pab koj tau qhov twg los? Kuv pab los ntawm lub tshav ntaus qoob, lossis lub qhov tsuam txiv hmab lov?

28 Nws nug tus pojniam ntawd tias, koj muaj abtsi? Tus pojniam teb tias, tus pojniam no hais rau kuv tias, hnub no muab koj tus tub rau wb noj, mas tagkis wb mam li noj kuv tus tub.

29 Wb thiaj muab kuv tus tub hau noj tag. Mas hnub tom qab kuv hais rau nws tias, muab koj tus tub rau wb noj, tiamsis tus pojniam ntawd muab nws tus tub zais lawm.

30 Thaum vajntxwv hnov tus pojniam ntawd tej lus, nws txawm dua rhe nws lub tsho rau thaum nws tseem tab tom taug saum ntsa loog. Cov pejxeem saib pom ua ciav vajntxwv hnav khaub seev tsaj rau txheej sab hauv uas npuas lub cev.  

31 Mas vajntxwv hais tias, yog hnub no Safas tus tub Elisas lub taubhau tseem txuas nws lub xub pwg, kuj thov (יחוח)Yahweh rau txim rau kuv thiab nyhav dua li ntawd.  

32 Thaum ntawd Elisas zaum hauv nws lub tsev thiab cov kev txwj laug kuj nrog nws nyob ua ke. Vajntxwv txib ib tug tawm ntawm nws xub ntiag mus, tiamsis thaum tus uas xa xov ntawd tuaj tsis tau txog, Elisas hais rau cov kev txwj laug tias, nej pom los tsis pom tus uas tua tibneeg no txib tibneeg tuaj txiav kuv lub taubhau? Thaum tus xa xov tuaj txog, nej cia li kaw qhov rooj thiab tuav ruaj ruaj, txhob pub nws nkag tau los tsev. Nws tus tswv txhais kotaw lub suab nrov raws qab tuaj lawm los tsis yog?

33 Thaum Elisas tab tom hais rau lawv ntawd, vajntxwv tus tub xa xov txawm tuaj txog ntua thiab hais tias, tej kev ceeblaj no yog los ntawm (יחוח)Yahweh los. Kuv tseem yuav tos (יחוח)Yahweh ua abtsi?