1 Mas Elisas hais tias, cia li mloog (יחוח)Yahweh tej lus. (יחוח)Yahweh hais li no tias, tagkis lub sijhawm no cov hmoov mog zoo zoo ib xe‑as lawv yuav muag ib sekhees, ob xe‑as qeb yuav muag ib sekhees ntawm lub rooj loog Xamalis.  

2 Ces tus thawj rog uas nrog nraim vajntxwv txawm hais rau (יחוח)Yahweh tus tibneeg tias, txawm yog (יחוח)Yahweh qhib qhov rais saum ntuj los, tej no yuav muaj tau lov? Mas Elisas hais tias, koj lub qhov muag yuav pom ntag tiamsis koj yuav tsis tau noj.

3 Muaj plaub tug yawg mob ruas nyob sab nraum rooj loog.  Lawv sib tham tias, ua cas peb yuav zaum ntawm no mus txog thaum tuag?

4 Yog peb hais tias, cia peb nkag mus rau hauv lub nroog, hauv lub nroog kuj tshaib plab, ces peb kuj yuav tuag rau hauv thiab xwb. Yog peb nyob ntawm no, peb kuj yuav tuag ib yam nkaus. Yog li ntawd peb cia li mus rau hauv cov Alas lub yeej. Yog lawv tseg peb txojsia peb kuj dim, yog lawv tua peb, peb kuj tuag thiab xwb.

5 Thaum tsaus ntuj zuag lawv thiaj mus rau hauv cov Alas lub yeej. Thaum lawv mus txog cov Alas lub ntug yeej, ua ciav tsis muaj ib tug tibneeg nyob kiag li,

6 vim yog (יחוח)Yahweh ua rau Alas cov tub rog hnov ib lub suab tsheb ua rog suab nees yam li yog ib pab tub rog coob coob li suab nrov, lawv thiaj sib tham tias, saib maj, Ixayees tus vajntxwv tau ntiav cov Hithais tej vajntxwv thiab cov Iziv tej vajntxwv tuaj ua rog rau peb.

7 Lawv txawm khiav tag rau thaum tsaus ntuj zuag lawm, tseg lawv tej tsev ntaub, tej nees, tej nees luav thiab tseg lub yeej zoo li qub, cia li khiav kom dim txojsia xwb.

8 Thaum cov mob ruas mus txog ntawm ntug yeej, lawv nkag mus rau hauv ib lub tsev ntaub mas noj thiab haus, thiab nqa tej nyiaj tej kub, tej ris tsho coj mus zais cia. Lawv ho rov los nkag dua rau hauv ib lub tsev ntaub thiab nqa tej qhov txhia chaw coj mus zais cia.

9 Ces lawv txawm sib tham tias, peb ua tsis raug cai lawm.  Hnub no yog hnub uas muaj xov zoo. Yog peb nyob twjywm tos txog kaj ntug, lub txim yuav poob rau saum peb. Yog li no nimno peb cia li mus hais rau vajntxwv tsev neeg.

10 Lawv thiaj mus hu cov uas zov rooj loog thiab hais tej ntawd rau lawv tias, peb los ntawm Alas lub yeej los, mas peb tsis pom muaj leejtwg thiab tsis hnov ib lub suab tibneeg li, tsuas yog pom tej nees thiab tej nees luav khi cia rau ntawd xwb, thiab tej tsev ntaub nyob zoo yam li qub.

11 Ces cov uas zov rooj loog thiaj qw hu mus, ces txawm muaj tibneeg hais mus rau vajntxwv tsev neeg paub.

12 Vajntxwv txawm sawv tsees tsaus ntuj nti hais rau nws cov tub teg tub taws tias, kuv yuav hais rau nej paub tias cov Alas npaj tswvyim ua rog li cas rau peb. Lawv yeej paub tias peb tshaib heev, lawv thiaj tawm tsiv nraim rau nraum lub yeej thiab tom tej hav nroj, xav tias, thaum lawv tawm hauv lub nroog, peb yuav ntes kiag lawv thiab txeem mus rau hauv lub nroog.

13 Nws cov tub teg tub taws ib tug hais tias, cov tibneeg uas tseem tshuav nyob hauv lub nroog no yuav zoo yam li cov Ixayees coob coob uas puam tsuaj lawm xwb, mas cia qee leej muab cov nees uas tseem tshuav tsib tug los, thiab peb cia li txib tibneeg mus tshuaj saib.

14 Lawv thiaj muab ob lub tsheb ua rog thiab nees los mas vajntxwv txawm tso lawv raws Alas cov tub rog qab mus hais tias, cia li mus tshuaj saib.

15 Lawv thiaj raws mus txog tus dej Yaladees, ua ciav thoob txojkev ntawd tsuas pom muaj ris tsho thiab tej twj siv uas cov Alas muab tso pov tseg rau thaum lawv maj nroos khiav. Cov uas mus tshuaj thiaj rov los qhia rau vajntxwv paub. 16 Cov pejxeem thiaj tawm mus lwg tej qhov txhia chaw hauv cov Alas lub yeej. Yog li ntawd thiaj muab cov hmoov mog zoo ib xe‑as muag ib sekhees, thiab ob Xe‑as qeb muag ib sekhees raws li (יחוח)Yahweh tej lus.

17 Vajntxwv tau tsa tus thawj rog uas nrog nraim vajntxwv ua tus uas zov rooj loog. Mas cov pejxeem muab nws tsuj ntog rau ntawm rooj loog nws thiaj tuag, raws li (יחוח)Yahweh tus tibneeg tau hais rau thaum vajntxwv tuaj rau ntawm nws.

18 Thaum (יחוח)Yahweh tus tibneeg hais rau vajntxwv tias, ob xe‑as qeb muag ib sekhees, cov hmoov mog zoo ib xe‑as muag ib sekhees rau tagkis lub sijhawm no rau ntawm lub rooj loog Xamalis.

19 Tus thawj rog uas nrog nraim vajntxwv teb (יחוח)Yahweh tus tibneeg hais tias, txawm yog (יחוח)Yahweh qhib qhov rais saum ntuj los tej no yuav muaj tau lov? Thiab Elisas hais tias, koj lub qhov muag yuav pom ntag tiamsis koj yuav tsis tau noj.

20 Ces thiaj muaj raws li ntawd rau nws, yog cov pejxeem muab nws tsuj ntawm rooj loog nws thiaj tuag lawm.