Tus Pojniam Hauv Sunees Rov Tau Nws Thaj Av

1 Yav thaum Elisas tau hais rau tus poj niam uas nws tsa tus tub ciaj rov los tias, koj thiab koj tsev neeg cia li tsiv mus nyob rau ib qho uas nej nyob tau, vim yog (יחוח)Yahweh yuav ua kom lub tebchaws no raug kev tshaib plab xya xyoo.

2 Tus pojniam ntawd thiaj li sawv tsees ua raws li (יחוח)Yahweh tus tibneeg hais. Nws thiab nws tsev neeg mus nyob rau hauv Filixatees tebchaws tau xya xyoo.

3 Thaum tag xya xyoo lawd tus pojniam ntawd kuj tawm hauv Filixatees tebchaws rov qab los thiab mus thov nws thaj av thiab nws lub tsev ntawm vajntxwv rov los.

4 Thaum ntawd vajntxwv tab tom nrog Kehaxis uas yog (יחוח)Yahweh tus tibneeg Elisas tus tub qhe sib tham hais tias, cia li qhia rau kuv paub txog tej haujlwm loj huvsi uas Elisas tau ua.  

5 Mas thaum Kehaxis tab tom hais txog tej uas Elisas tau tsa tus tuag ciaj rov qab los ces tus pojniam uas Elisas tau tsa tus metub ciaj rov los txawm tuaj thov nws lub tsev thiab nws thaj av ntawm vajntxwv. Ces Kehaxis txawm hais tias, vajntxwv uas yog kuv tus tswv, no yog tus pojniam ntawd ntag thiab no yog tus pojniam ntawd tus tub uas Elisas tau tsa ciaj sawv rov qab los ntag.

6 Mas thaum vajntxwv nug tus pojniam ntawd nws kuj qhia tej ntawd rau vajntxwv. Vajntxwv thiaj txib ib tug nom tswv pab tus pojniam ntawd, nws hais rau tus nom tias, cia li thim txhua yam uas yog tus pojniam no li, thiab tej qoob loo hauv thaj teb ntawd txij hnub uas nws tawm mus lawd los txog hnub no huvsi rov rau nws.

​

Haxa‑ees Ua Vajntxwv Kav Alas

7 Elisas tuaj rau ntawm Damaxakas. Cov Alas tus vajntxwv Npeehadas mob mas muaj tibneeg mus hais rau nws tias, (יחוח)Yahweh tus tibneeg tuaj rau ntawm no.

8 Vajntxwv hais rau Haxa‑ees tias, cia li coj qhov txhia chaw mus pub rau (יחוח)Yahweh tus tibneeg kom nws nug (יחוח)Yahweh saib kuv yuav zoo los tsis zoo.

9 Haxa‑ees thiaj li mus ntsib tus xibhwb ntawd thiab coj txhua yam qhov txhia chaw hauv lub nroog Damaxakas txaus plaub caug tus ntxhuav thauj mus pub rau nws. Thaum Haxa‑ees mus txog, nws mus sawv ntawm tus xibhwb xub ntiag hais tias, koj tus tub Npeehadas uas yog cov Alas tus vajntxwv txib kuv tuaj cuag koj tuaj nug koj tias nws tus mob yuav zoo los tsis zoo.

10 Mas Elisas hais rau nws tias, cia li mus hais rau nws tias, koj tus mob yuav zoo tag, tiamsis (יחוח)Yahweh twb qhia rau kuv tias nws yeej yuav tuag xwb xwb li. 11 Elisas kuj saib ntsoov Haxa‑ees ua rau Haxa‑ees txaj muag ces (יחוח)Yahweh tus tibneeg txawm quaj.

12 Mas Haxa‑ees txawm nug tias, yawg hlob, ua cas koj ho quaj? Nws teb tias, rau qhov kuv paub tej xwm txheej phem uas koj yuav ua rau cov Ixayees. Koj yuav muab hluavtaws hlawv lawv tej chaw ruaj khov thiab yuav xuas ntaj tua lawv tej tub hluas pov tseg thiab yuav muab lawv tej menyuam ntsawm tuag tag, thiab muab lawv tej pojniam uas suab menyuam tej plab phua.

13 Mas Haxa‑ees hais tias, kuv uas yog koj tus tub qhe tsuas zoo tam li ib tug dev xwb, kuv ho yog leejtwg es yuav ua tej xwm txheej uas loj li no? Elisas teb tias, (יחוח)Yahweh qhia rau kuv tias koj yuav ua vajntxwv kav cov Alas.

14 Ces Haxa‑ees txawm rov qab ntawm Elisas los rau ntawm nws tus tswv mas vajntxwv nug tias, Elisas hais li cas rau koj? Nws teb tias, Elisas hais tias koj tus mob yeej yuav zoo.

15 Mas tagkis tom qab nws txawm muab ib daim pam raus dej coj los kauv vajntxwv lub ntsej muag mus txog thaum vajntxwv tuag. Mas Haxa‑ees thiaj sawv ua vajntxwv nyob nws chaw.

​

Yahlas Ua Vajntxwv Kav Yahdah

(2 Vaj Keeb Kwm 21:1-20)

16 Xyoo tsib uas Ahaj tus tub Yahlas ua vaj ntxwv kav Ixayees mas Yahsafas tus tub Yahlas pib ua vajntxwv kav Yahdah.

17 Thaum Yahlas pib ua vajntxwv kav ntawd nws muaj peb caug ob xyoos, nws nyob hauv Yeluxalees kav tau yim xyoo.

18 Nws taug nraim cov Ixayees tej vajntxwv tus hneev taw, yog ua raws li Ahaj caj ces, vim yog nws yuav Ahaj tus ntxhais ua pojniam.  Tej uas nws ua mas (יחוח)Yahweh pom tias phem kawg li.

19 Txawm li cas los (יחוח)Yahweh yeej tsis ua rau Yahdah puam tsuaj tag, vim yog saib rau nws tus tub qhe Daviv, rau qhov nws twb cog lus tseg rau Daviv tias nws yuav pub ib lub teeb ci rau Daviv thiab rau Daviv caj ces mus ib txhis li.

20 Ntu uas Yahlas ua vajntxwv mas Edoos ntxeev siab rau Yahdah thiab tsa dua ib tug vajntxwv kav lawv.

21 Mas Yahlas thiaj coj nws tej tsheb ua rog huvsi hla mus txog ntua Xa‑is. Thaum hmo ntuj Yahlas thiab nws cov thawj uas kav cov tsheb ua rog txawm ntaus cov Edoos uas vij nws, tiamsis nws cov tub rog cia li khiav mus tsev tag lawm.

22 Cov Edoos thiaj ntxeev siab tsis zwm rau cov Yahdah los txog niaj hnub nimno.  Thiab lub sijhawm ntawd lub moos Linas kuj ntxeev siab rau Yahdah.

23 Lwm yam hauj lwm uas Yahlas ua thiab txhua yam uas nws ua mas twb muab sau cia rau hauv phau ntawv uas hais txog Yahdah tej vajntxwv li keeb kwm lawm.

24 Yahlas kuj tuag mus nrog nws tej poj koob yawm txwv nyob. Lawv muab nws faus nrog nws tej poj koob yawm txwv rau hauv Daviv lub nroog, mas nws tus tub Ahaxiyah sawv nws chaw ua vajntxwv kav.

​

Ahaxiyah Ua Vajntxwv Kav Yahdah

(2 Vaj Keeb Kwm 22:1-6)

25 Xyoo kaum ob uas Ahaj tus tub Yahlas ua vajntxwv kav Ixayees mas Yahdah tus vajntxwv Yahlas tus tub Ahaxiyah pib ua vajntxwv kav.

26 Thaum Ahaxiyah pib kav ntawd nws muaj nees nkaum ob xyoos, nws nyob hauv Yeluxalees kav tau ib xyoos.  Nws niam npe hu ua Athaliyah, yog cov Ixayees tus vajntxwv Oolis li xeeb ntxwv.

27 Ahaxiyah taug nraim Ahaj caj ces tus hneev taw thiab ua tej uas (יחוח)Yahweh pom tias phem kawg ib yam li Ahaj caj ces ua, rau qhov nws yog Ahaj tus vauv tus tub.

28 Ahaxiyah nrog Ahaj tus tub Yahlas mus ua rog rau cov Alas tus vajntxwv Haxa‑ees ntawm Lamaus Kile‑as, mas cov Alas tua Yahlas raug mob.

29 Yahlas txawm rov qab mus kho mob rau ntawm lub moos Yile‑ees, yog mus kho qhov mob uas nws raug cov Alas tua ntawm Lamas rau thaum nws ua rog rau Alas tus vajntxwv Haxa‑ees. Mas Yahlas tus tub Ahaxiyah uas ua vajntxwv kav Yahdah thiaj mus saib Ahaj tus tub Yahlas rau hauv lub moos Yile‑ees vim yog Yahlas raug mob.