Tsa Yahus Ua Vajntxwv Kav Ixayees

1 Elisas uas cev (יחוח)Yahweh lus hu pab xibhwb uas cev (יחוח)Yahweh lus ib tug los thiab hais rau nws tias, cia li qaws lub tsho rau ntawm duav thiab muab ib hwj roj coj mus rau ntawm lub moos Lamaus Kile‑as.  

2 Thaum koj mus txog lawd, mas nrhiav Yahus uas yog Yahsafas tus tub thiab yog Nisis tus xeeb ntxwv. Cia li mus cuag nws thiab coj nws tawm ntawm nws cov phoojywg mus thiab coj nws mus rau chav tsev hauv nruab nrab.

3 Mas muab hwj roj hliv ywg nws taubhau thiab hais tias, (יחוח)Yahweh hais li no tias, kuv tsa koj ua vajntxwv kav Ixayees. Ces cia li qhib kiag qhov rooj tawm khiav mus tsis txhob tos.

4 Tus hluas uas cev (יחוח)Yahweh lus ntawd mus rau ntawm lub moos Lamaus Kile‑as.

5 Thaum nws mus txog ua ciav cov thawj uas kav tub rog tab tom sablaj, mas nws txawm hais tias, yawg hlob, kuv muaj xov yuav hais rau koj.  Yahus hais tias, hais rau peb cov leejtwg? Nws teb tias, yawg hlob, hais rau koj ntag.

6 Ces Yahus txawm sawv tsees mus rau hauv tsev. Tus hluas ntawd txawm hliv roj rau saum Yahus taubhau thiab hais rau nws tias, (יחוח)Yahweh uas yog cov Ixayees Tus Tswv hais li no tias, kuv tsa koj ua vajntxwv kav (יחוח)Yahweh haiv neeg Ixayees.

7 Koj yuav tau muab koj tus tswv Ahaj caj ces ntxuav pov tseg, xwv kuv thiaj li pauj tau qhov uas Yexenpees muab kuv cov tub qhe uas cev kuv li lus thiab (יחוח)Yahweh cov tub qhe sawvdaws tej ntshav nchuav pov tseg.

8 Ahaj caj ces huvsi yuav puam tsuaj tag. Kuv yuav txiav txhua tus txivneej tsis hais cov uas ua qhev thiab cov uas tsis ua qhev hauv cov Ixayees kom tu noob nrho ntawm Ahaj.

9 Kuv yuav ua rau Ahaj caj ces ib yam li ua rau Nenpas tus tub Yelaunpau‑as caj ces thiab ib yam li ua rau Ahiyah tus tub Npa‑asas caj ces.

10 Thiab dev yuav noj Yexenpees rau hauv nws lub vaj ntawm lub moos Yile‑ees, thiab yuav tsis muaj leejtwg muab nws faus. Ces tus hluas ntawd txawm qhib kiag qhov rooj tawm khiav mus lawm.

11 Thaum Yahus tawm los rau ntawm nws tus tswv cov thawj rog, lawv txawm hais rau nws tias, txhua yam puav leej zoo lov? Tus tibneeg vwm ntawd tuaj cuag koj ua abtsi? Yahus hais tias, nej yeej paub tus yawg ntawd thiab paub tias nws hais lus zoo li cas.

12 Lawv teb tias, koj dag xwb, cia li qhia rau peb nimno.  Nws thiaj hais tias, tus ntawd hais li no rau kuv tias, (יחוח)Yahweh hais li no tias, kuv tsa koj ua vajntxwv kav cov Ixayees.

13 Ces lawv txhua tus txawm hle pes hlo cov tsho ntev los pua cov qeb ntaiv uas do cuas rau Yahus nyob, thiab lawv tshuab raj kub yaj tshaj tawm tias, Yahus ua vajntxwv lawm lauj!

​

Yahus Tua Yahlas

14 Yog li no Yahus uas yog Yahsafas tus tub, uas yog Nisis li xeeb ntxwv, thiaj ntaus tswvyim tawm tsam Yahlas. (Lub sijhawm ntawd Yahlas thiab cov Ixayees sawvdaws twb tawm mus tiv thaiv Alas tus vajntxwv Haxa‑ees rau ntawm lub moos Lamaus Kile‑as lawm,

15 tiamsis vajntxwv Yahlas rov los kho mob rau hauv lub moos Yile‑ees lawm vim yog cov Alas tua raug nws mob rau thaum nws ua rog rau cov Alas tus vajntxwv Haxa‑ees.) Yahus thiaj hais tias, yog nej xav li no, tsis txhob cia leejtwg nyiag kev tawm hauv lub moos no mus hais xov rau hauv lub moos Yile‑ees.

16 Ces Yahus txawm nce nws lub tsheb ua rog caij mus rau lub moos Yile‑ees, rau qhov Yahlas pw qhov ntawd. Thiab Yahdah tus vajntxwv Ahaxiyah tuaj saib Yahlas rau qhov ntawd.

17 Tus faj xwm sawv saum lub moos Yile‑ees lub chaw tsom faj, pom Yahus pab tibneeg tuaj ces txawm hais tias, kuv pom ib pab tibneeg tuaj. Yahlas hais tias, cia li txib ib tug tub rog caij nees mus cuag lawv nug lawv tias, nej tuaj txojkev thaj yeeb lov?

18 Ib tug tub rog caij nees txawm mus ntsib Yahus thiab hais tias, vajntxwv hais li no tias, koj tuaj txojkev thaj yeeb lov? Yahus teb tias, koj ntsig txog kev thaj yeeb ua abtsi? Koj cia li tig kiag caij nees raws kuv qab xwb.  Tus faj xwm ceeb toom tias, tus uas xa xov mus txog lawv lawm, tiamsis nws tsis rov los.

19 Vajntxwv thiaj txib dua ib tug tub rog caij nees mus.  Tus ntawd mus txog lawv thiab hais tias, vajntxwv hais li no tias, nej tuaj txojkev thaj yeeb lov? Yahus teb tias, koj ntsig txog kev thaj yeeb ua abtsi? Koj cia li tig kiag caij nees raws kuv qab.

20 Tus faj xwm ceeb toom dua ib zaug tias, tus ntawd mus txog lawv lawm, tiamsis nws tsis rov los. Thiab tus cwjpwm tsav tsheb ntawd saib zoo yam li yog Nisis tus tub Yahus tus cwjpwm, rau qhov tsav nrawm heev.

21 Yahlas hais tias, cia li npaj kom txhij. Lawv txawm npaj Yahlas lub tsheb ua rog. Mas Ixayees tus vajntxwv Yahlas thiab Yahdah tus vajntxwv Ahaxiyah nyias caij nyias lub tsheb ua rog tawm mus ntsib Yahus ntawm Nanpaus uas yog tibneeg Yile‑ees thaj teb.

22 Mas thaum Yahlas pom Yahus, nws hais tias, Yahus, muaj kev thaj yeeb lov? Yahus teb tias, yuav muaj kev thaj yeeb tau li cas rau thaum koj niam Yexenpees tseem deev dab ua khawv koob yees siv ntau npaum li no?  

23 Ces Yahlas txawm rub xauv nees tig kiag khiav thiab hais rau Ahaxiyah tias, Au Ahaxiyah, lawv ntxeev siab lawm lauj!

24 Ces Yahus txawm rub hneev nti kawg zog nkaus tua mus raug Yahlas ntawm ob lub xub pwg kem nruab nrab. Rab xub chob nplho nws lub plawv nws thiaj ntog vau hlo rau hauv nws lub tsheb ua rog.

25 Yahus hais rau Npikhas uas nqa nws tej cuab yeej tias, cia li nqa Yahlas lub cev mus pov rau hauv Nanpaus uas yog tibneeg Yile‑ees thaj teb. Cia li nco ntsoov txog thaum wb caij nees raws nws txiv Ahaj qab mus, (יחוח)Yahweh hais tej lus no txog nws hais tias,

26 kuv twb pom Nanpaus thiab nws tej tub ki tej ntshav nag hmo lawm. Kuv yuav ua pauj rau koj rau hauv thaj teb no ntag. (יחוח)Yahweh hais li no ntag. Yog li no cia li muab nws nqa pov rau hauv thaj teb no raws li (יחוח)Yahweh tej lus.

​

Yahus Tua Ahaxiyah

(2 Vaj Keeb Kwm 22:7-9)

27 Thaum Yahdah tus vajntxwv Ahaxiyah pom li ntawd, nws txawm khiav mus rau lub moos Npehakas. Ces Yahus txawm caum qab mus thiab hais tias, cia li tua nws thiab, mas lawv txawm tua nws hauv lub tsheb ua rog rau ntawm ntu kev uas hla lub roob Kus uas ze ntawm Ile‑as. Mas nws txawm khiav mus txog lub moos Mekidaus thiab tuag rau qhov ntawd lawm.

28 Nws cov tub teg tub taws thiaj muab nws lub cev tuag rau tsheb ua rog thauj mus rau Yeluxalees thiab muab faus rau hauv nws lub qhov ntxa nrog nws tej poj koob yawm txwv ua ke hauv Daviv lub nroog.

29 Xyoo kaum ib uas Ahaj tus tub Yahlas ua vajntxwv kav mas Ahaxiyah pib ua vajntxwv kav Yahdah.

​

Yexenpees Tuag

30 Thaum Yahus tuaj txog lub moos Yile‑ ees, Yexenpees kuj hnov lawm. Nws thiaj pleev qhov muag zoj zeeg thiab qaws plaub hau kom zoo nkauj xauj ntawm qhov rais mus.

31 Thaum Yahus nkag rooj loog los Yexenpees txawm hais tias, koj uas tua koj tus tswv, koj uas zoo li Xilis, koj tuaj ua kev thaj yeeb lov?

32 Yahus tsa muag saib rau saum qhov rais thiab hais tias, leejtwg tuaj kuv tog? Leejtwg ne? Muaj ob peb tug nraug sam xauj saum qhov rais tuaj rau nws.

33 Nws hais tias, cia li muab tus pojniam kod pov los. Lawv txawm muab tus pojniam ntawd pov los.  Nws tej ntshav ib txhia txaws lo ntsa loog thiab lo tej nees, mas tej nees tsuj kiag saum nws.

34 Ces Yahus txawm nkag mus noj haus thiab hais tias, mus saib tus pojniam uas raug foom tsis zoo ntawd thiab coj mus faus, rau qhov nws yog vajntxwv tus ntxhais.  

35 Tiamsis thaum lawv mus muab nws faus, lawv pom tias tshuav lub taubhau thiab tej tes taw xwb.

36 Thaum lawv rov los hais rau Yahus, nws hais tias, tej no yog (יחוח)Yahweh tej lus uas nws kom nws tus tub qhe Eliyah uas yog tibneeg hauv Thinpis hais tias, dev yuav noj Yexenpees cev nqaij rau hauv Yile‑ees thaj av,

37 thiab Yexenpees lub cev tuag yuav zoo li tej quav tsiaj rau saum npoo av tom tej teb ntawm Yile‑ees thaj av, yuav tsis muaj leej twg paub tau tias, no yog Yexenpees.