Yahus Ua Ahaj Caj Ces Puam Tsuaj Tag

1 Ahaj muaj xya caum tus tub nyob hauv Xamalis.  Yahus txawm sau ib tsab ntawv xa mus rau Xamalis, yog xa mus rau cov nom tswv uas kav lub nroog thiab rau cov kev txwj laug thiab xa mus rau cov uas zov thiab tu Ahaj cov tub hais tias,

2 vim yog vajntxwv cov tub nrog nej nyob thiab vim nej muaj tsheb ua rog muaj nees thiab nej nyob hauv lub nroog uas muaj ntsa loog thiab nej muaj cuab yeej ua rog mas thaum tsab ntawv no tuaj txog nej,

3 nej cia li xaiv vajntxwv ib tug tub uas zoo kawg nkaus thiab tsim txiaj kawg nkaus tsa los ua vajntxwv sawv nws txiv chaw es tuaj ua rog pab nej tus vajntxwv caj ces.

4 Tiamsis lawv sawvdaws ntshai kawg li, lawv hais tias, sim saib, ob tug vajntxwv ntawd twb tiv tsis tau nws es peb yuav ua li cas tiv tau nws?

5 Tus uas tswjhwm vajntxwv lub vaj tse thiab tus uas kav lub nroog thiab cov kev txwj laug thiab cov uas zov thiab tu vajntxwv cov tub thiaj xa xov tuaj hais rau Yahus tias, peb yog koj li qhev thiab peb yuav ua txhua yam raws li uas koj hais. Peb yuav tsis tsa ib tug twg ua vajntxwv li. Koj cia li ua raws li koj pom zoo.

6 Mas Yahus sau dua ib tsab ntawv mus rau lawv hais tias, yog nej tuaj kuv tog thiab yog nej yuav mloog kuv hais, mas tagkis lub sijhawm no nej cia li coj nej tus vajntxwv cov tub li taubhau tuaj cuag kuv ntawm Yile‑ees. Vajntxwv xya caum leej tub tseem nrog cov uas ua hlob hauv lub nroog nyob ua ke, yog cov uas tu cov tub ntawd hlob. Mas thaum Yahus tsab ntawv tuaj txog lawv, lawv cia li ntes vajntxwv xya caum leej tub muab tua ua ke huvsi, muab cov taubhau tso hauv tawb xa mus rau Yahus ntawm lub moos Yile‑ees.

8 Thaum tus uas xa xov los hais rau Yahus tias, lawv coj vajntxwv xya caum leej tub cov taubhau los lawm lauj. Yahus hais tias, cia li muab cov taubhau tib ua ob pawg rau ntawm txojkev uas nkag rau hauv rooj loog kom txog tagkis sawv ntxov.

9 Tagkis sawv ntxov Yahus txawm tawm mus sawv ntawd hais rau cov pejxeem sawvdaws tias, nej tsis txhaum, yog kuv ntxeev siab rau kuv tus vajntxwv thiab muab nws tua pov tseg.  Tiamsis leejtwg tua cov tibneeg no?

10 Cia li paub tias tej lus uas (יחוח)Yahweh hais txog Ahaj caj ces yuav tsis poob ib los rau hauv av li. Rau qhov (יחוח)Yahweh ua raws li uas nws kom nws tus tub qhe Eliyah hais.

11 Yahus thiaj li tua Ahaj caj ces uas tshuav nyob hauv Yile‑ees txhua tus, thiab tua nws cov uas ua hlob txhua tus thiab nws cov kwvluag thiab nws cov pov thawj, mas tsis tshuav ib tug dim li.

12 Yahus txawm sawv kev mus rau lub nroog Xamalis.  Thaum nws nyob ntawm Npe‑ekhes uas yog cov tibneeg yug yaj lub zos,

13 Yahus ntsib Yahdah tus vaj ntxwv Ahaxiyah cov kwvtij mas nug tias, nej yog leejtwg? Lawv teb tias, peb yog Ahaxiyah cov kwvtij. Peb tuaj saib vajntxwv cov tub thiab saib vajntxwv niam cov tub.

14 Ces Yahus txawm hais tias, cia li ntes cov tibneeg ntawd. Lawv cia li ntes cov tibneeg ntawd thiab muab tua rau ntawm lub qhov Npe‑ekhes, huvsi muaj plaub caug ob leeg tsis tseg ib tug li.

15 Thaum Yahus tawm qhov ntawd mus mas nws ntsib Lekhaj tus tub Yahnadas tuaj cuag nws, mas Yahus kuj fim nws hais rau nws tias, koj lub siab xav ib yam li kuv lub siab thiab lov? Yahnadas teb tias, xav ib yam nkaus. Yahus hais tias, yog xav ib yam nkaus mas cev tes tuaj rau kuv. Nws thiaj cev tes tuaj mas Yahus thiaj coj nws nce rau saum lub tsheb ua rog.

16 Yahus hais tias, nrog kuv mus thiab saib kuv lub siab uas kub lug rau (יחוח)Yahweh. Yahus thiaj cia Lekhaj nrog nws caij lub tsheb ua rog mus.

17 Thaum Yahus mus txog ntawm Xamalis nws thiaj muab Ahaj caj ces uas tseem tshuav hauv Xamalis tua pov tseg, ua rau lawv puam tsuaj tag raws li tej lus uas (יחוח)Yahweh hais rau Eliyah.

​

Yahus Ua Rau Cov Uas Teev Dab Npa‑as Puam Tsuaj

18 Yahus txawm hu cov pejxeem sawvdaws tuaj txoos ua ke thiab hais rau lawv tias, Ahaj pe hawm Npa‑as me me xwb tiamsis Yahus yuav pe hawm Npa‑as loj heev.

19 Cia li hu cov txiv neeb uas cev dab Npa‑as li lus thiab cov uas pe dab Npa‑as thiab cov txiv neeb txiv yaig sawvdaws tuaj cuag kuv tsis txhob tseg ib tug li, rau qhov kuv yuav ua kevcai xyeem qhov txhia chaw loj kawg li rau dab Npa‑as. Yog leejtwg tsis tuaj mas yuav tsis muaj txoj sia nyob. Qhov tseeb twb yog Yahus ntxias kom tuaj xwv thiaj ua tau rau cov uas pe dab Npa‑as puam tsuaj.

20 Thiab Yahus hais kom npaj tuaj txoos ua ke ua kevcai pe hawm Npa‑as. Lawv thiaj tshaj tawm hu kom tuaj txoos ua ke.

21 Yahus thiaj txib tibneeg mus hu thoob plaws hauv cov Ixayees mas cov uas pe dab Npa‑as kuj tuaj tag nrho huvsi tsis tshuav ib tug li. Lawv kuj tuaj nkag mus rau hauv lub tsev teev dab Npa‑as, lub tsev teev dab Npa‑as puv nkaus sib txiv qev.

22 Yahus hais rau tus uas saib tej tsoos tsho tias, cia li muab cov tsho rau txhua tus uas pe dab Npa‑as hnav.  Ces nws txawm coj tsho los pub rau sawv daws hnav.

23 Ces Yahus thiab Lekhaj tus tub Yahnadas txawm nkag rau hauv lub tsev teev dab Npa‑as mas hais rau cov uas pe dab Npa‑as tias, cia li txheeb saib puas muaj cov uas pe hawm (יחוח)Yahweh nyob hauv nej cov kod, tsuas yuav cov uas pe dab Npa‑as xwb.

24 Nkawv kuj nkag mus ua kevcai tua tsiaj xyeem thiab ua kevcai hlawv xyeem.  Yahus twb tso yim caum leej nyob sab nraud lawm mas hais tias, yog leejtwg tso ib tug twg uas kuv muab rau hauv nej txhais tes lawd khiav dim mas tus ntawd yuav tuag theej tus uas khiav dim ntawd.

25 Thaum Yahus ua kevcai hlawv xyeem tag Yahus hais rau cov tub rog uas zov Yahus thiab cov thawj rog tias, cia li nkag mus, muab lawv tua tsis txhob cia dim ib tug li. Lawv txawm xuas ntaj tua cov tibneeg ntawd huvsi tag. Cov tub rog uas zov vajntxwv thiab cov thawj rog ntawd kuj muab cov cev tuag pov rau sab nraud, thiab lawv nkag mus rau chav tsev hauv nruab nrab.

26 Lawv muab tus ncej teev dab hauv lub tsev dab Npa‑as rho los hlawv pov tseg.

27 Thiab lawv muab tus ncej teev dab Npa‑as thiab lub tsev dab Npa‑as ua puam tsuaj tag huvsi mas muab ua lub tsev tso quav tso zis los txog niaj hnub nimno. 28 Yahus muab dab Npa‑as ntxuav tawm tag hauv cov Ixayees li uas hais no.

29 Tiamsis Yahus tsis tseg Nenpas tus tub Yelaunpau‑as tej kev txhaum uas coj cov Ixayees ua txhaum, yog ua tej dab mlom thav nyuj kub uas nyob hauv lub moos Npe‑ees thiab nyob hauv lub moos Daj.  

30 Mas (יחוח)Yahweh hais rau Yahus tias, vim yog koj tau ua zoo raws li kuv nyiam thiab raws li kuv pom zoo thiab tau ua rau Ahaj caj ces txhua yam raws li kuv lub siab xav, mas koj thiab koj caj ces yuav tau nyob saum cov Ixayees lub zwm txwv mus txog plaub tiam.

31 Tiamsis Yahus tsis ceev faj ua raws li (יחוח)Yahweh uas yog cov Ixayees Tus Tswv txoj kevcai kom kawg siab kawg ntsws, nws tsis tseg Yelaunpau‑as tej kev txhaum uas coj cov Ixayees ua txhaum.   

32 Ncua sijhawm ntawd (יחוח)Yahweh txawm pib rho cov Ixayees tebchaws qee thaj zuj zus lawm. Haxa‑ees thiaj ntaus yeej Ixayees tebchaws rau txhua qhov,

33 txij ntawm tus dej Yaladees sab hnub tuaj thoob plaws Kile‑as tebchaws, yog Kas thiab Lunpees thiab Manaxes tebchaws, yog txij ntua lub moos Alau‑aws uas nyob ntawm ntug dej Anoos uas yog Kile‑as thiab Npasas tebchaws.

34 Lwm yam haujlwm uas Yahus ua thiab txhua yam uas nws ua thiab nws tus peev xwm huvsi mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

35 Yahus txawm tuag mus nrog nws tej poj koob yawm txwv nyob, mas lawv muab nws faus rau hauv lub nroog Xamalis. Mas nws tus tub Yahahas sawv nws chaw ua vajntxwv kav.

36Yahus nyob hauv Xamalis kav Ixayees tau nees nkaum yim xyoo.