Athaliyah Txeeb Kav Tebchaws

(2 Vaj Keeb Kwm 22:10-23:15)

1 Thaum Athaliyah uas yog Ahaxiyah niam pom tias nws tus tub tuag lawm ces nws txawm sawv tsees tua vajntxwv caj ces huvsi pov tseg.

2 Tiamsis vajntxwv Yahlas tus ntxhais Yahsenpas uas yog Ahaxiyah tus muam tau coj Ahaxiyah tus tub Yahas nyiag khiav tawm hauv vajntxwv cov tub uas yuav raug tua mus lawm. Nws muab Yahas thiab tus uas tu nws zais rau hauv ib lub txaj pw. Nws muab Yahas zais ntawm Athaliyah li no, mas thiaj tsis raug tua. 3 Yahas nrog nws nyob tau rau xyoo, khiav nkaum rau hauv (יחוח)Yahweh lub tuam tsev rau ncua sij hawm uas Athaliyah kav lub tebchaws.  

4 Xyoo uas xya Yahnadas txib cov thawj rog uas kav cov Khalis thiab cov tub rog uas zov vajntxwv, kom lawv tuaj cuag nws rau hauv (יחוח)Yahweh lub tuam tsev. Mas nws nrog lawv sib cog lus thiab kom lawv twv rau hauv vajntxwv lub tsev, mas nws thiaj coj vajntxwv tus tub los rau lawv pom.

5 Mas nws hais rau lawv tias, nej yuav tau ua li no. Thaum nej tuaj ua haujlwm rau hnub Sabbath mas pab ib mus zov vajntxwv tsev,

6 pab ob zov ntawm lub Rooj Loog Xuj thiab pab peb zov lub qhov rooj ntawm vajntxwv qaum tsev.  

7 Ob pab uas tau so rau hnub Sabbath cia li tuaj zov (יחוח)Yahweh lub tuam tsev thiaj zov tau vajntxwv.

8 Nej sawvdaws yuav vij vaj ntxwv thiab txhua tus nyias tuav rawv nyias cuab yeej.  Yog leejtwg txav los ze nej, cia li muab tua kiag. Yuav tau nrog nraim vajntxwv rau thaum nws tawm mus thiab nws nkag los.  

9 Cov thawj rog kuj ua raws li tus pov thawj Yahnadas hais txhua yam. Nyias coj nyias cov tub rog tsis hais cov uas yuav nkag ua hauj lwm rau hnub Sabbath thiab cov uas yuav tawm ua haujlwm rau hnub Sabbath tuaj cuag tus pov thawj Yahnadas.

10 Mas tus pov thawj muab vajntxwv Daviv cov hmuv thiab cov phiaj hlau thaiv uas nyob hauv (יחוח)Yahweh lub tuam tsev rau cov thawj rog.

11 Mas cov tub rog uas zov vajntxwv kuj tuav cuab yeej, txhua tus sawv nres nroos vij nkaus lub thaj uas xyeem thiab vij tus vajntxwv rau ntawm lub tuam tsev sab ped sab nrad huvsi.

12 Ces Yahnadas coj vajntxwv tus tub tawm los thiab muab lub mom vajntxwv rau ntoo thiab muab daim ntawv ua vajntxwv rau nws thiab tshaj tawm tias nws ua vajntxwv thiab muab roj hliv ywg tsa nws. Lawv npuaj teg hais tias, thov kom vajntxwv muaj txojsia loj siav ntev.  

13 Thaum Athaliyah hnov tej suab uas cov tub rog uas zov vajntxwv thiab tej pejxeem qw, nws txawm mus rau ntawm cov pejxeem hauv (יחוח)Yahweh lub tuam tsev.

14 Thaum nws tsa muag saib nws pom tus vajntxwv sawv ntawm tus ncej raws li kevcai. Muaj cov thawj rog thiab cov uas tshuab raj xyu nyob ib sab ntawm vajntxwv, thiab cov pejxeem thoob tebchaws sawvdaws zoo siab xyiv fab thiab tshuab raj xyu. Mas Athaliyah kuj dua rhe nws lub tsho qw hais tias, ntxeev siab lauj, ntxeev siab lauj!

15 Pov thawj Yahnadas txawm hais rau cov thawj rog uas kav cov tub rog hais tias, cia li coj Athaliyah tawm hauv cov tub rog mus.  Yog leejtwg raws nws qab mas xuas ntaj tua pov tseg.  Rau qhov tus pov thawj hais tias, tsis txhob tua nws rau hauv (יחוח)Yahweh lub tuam tsev.

16 Lawv thiaj ntes nws, mas nws taug txojkev uas nees nkag rau hauv vajntxwv lub tsev ces nws raug tua rau qhov ntawd lawm.

17 Mas Yahnadas kom vajntxwv thiab cov pejxeem cog lus rau (יחוח)Yahweh tias lawv yuav ua (יחוח)Yahweh haiv neeg, thiab nws kom vajntxwv thiab cov pejxeem sib cog lus ua ke.

18 Mas cov pejxeem thoob tebchaws sawvdaws mus rau ntawm lub tsev dab Npa‑as thiab muab lub tsev ntawd rhuav pov tseg.  Lawv muab lub thaj thiab tej dab mlom Npa‑as tsoo ua tej dwb daim tag, thiab tua tus pov thawj Mathas uas teev dab Npa‑as rau ntawm tej thaj ib sab. Thiab tus pov thawj Yahnadas tso tub rog zov (יחוח)Yahweh lub tuam tsev.

19 Nws coj cov thawj rog thiab cov Khalis thiab cov tub rog uas zov vajntxwv thiab cov pejxeem sawvdaws, mas lawv coj vajntxwv nqis ntawm (יחוח)Yahweh lub tuam tsev taug txojkev nkag lub Rooj Loog Tub Rog Zov Vajntxwv mus txog vajntxwv lub tsev. Mas Yahas kuj mus nyob saum vajntxwv lub zwm txwv.

20 Cov pejxeem thoob teb chaws sawvdaws zoo siab xyiv fab thiab lub nroog kuj nyob tus yees rau thaum Athaliyah raug xuas ntaj tua rau ntawm vajntxwv lub tsev lawm. 

21 Thaum Yahas pib ua vajntxwv kav Yahdah, nws hnub nyoog muaj xya xyoo.