Yahas Ua Vajntxwv Kav Yahdah

(2 Vaj Keeb Kwm 24:1-16)

1 Xyoo xya uas Yahus ua vajntxwv kav Ixayees mas Yahas pib ua vaj ntxwv kav, nws nyob hauv Yeluxalees kav tau plaub caug xyoo. Nws niam npe hu ua Xinpi-as uas nyob hauv Npe‑awsenpas.

2 Yahas ua tej uas (יחוח)Yahweh pom tias zoo tag nws sim neej, vim yog tus pov thawj Yahnadas tau qhuab qhia nws.

3 Txawm li cas los nws kuj tsis rhuav tej chaw siab teev dab, ces cov pejxeem tseem xyeem tsiaj rau dab thiab hlawv hmoov xyab rau saum tej chaw siab ntawd.

4 Yahas hais rau cov pov thawj tias, cov nyiaj uas pub ua dawb huv uas coj tuaj rau hauv (יחוח)Yahweh lub tuam tsev huvsi, yog tej uas sau ntawm tej tibneeg, tsis hais tej nyiaj uas kom txhua tus them tuaj thiab tej nyiaj uas cov pejxeem zoo siab coj tuaj pub rau hauv (יחוח)Yahweh lub tuam tsev,

5 mas cia cov pov thawj txais tej nyiaj ntawm txhua tus uas coj tuaj, thiab cia lawv muab coj los kho lub tuam tsev raws li lawv pom tias yuav tau kho.

6 Tiamsis xyoo nees nkaum peb uas Yahas ua vajntxwv kav mas cov pov thawj tsis tau kho lub tuam tsev kiag li.

7 Vim li ntawd vajntxwv Yahas thiaj li hu pov thawj Yahnadas thiab cov pov thawj tuaj mas hais rau lawv tias, ua cas nej tsis kho lub tuam tsev? Txij hnub no mus tsis txhob txais tej nyiaj uas lawv cev rau nej, cia li xa tej nyiaj ntawd mus kho lub tuam tsev.

8 Cov pov thawj thiaj hais haum tias tsis txais nyiaj ntawm cov pejxeem dua li lawm thiab hais haum tias lawv tsis kho lub tuam tsev lawm.

9 Mas pov thawj Yahnadas txawm coj ib lub phij xab tuaj, mas muab tho ib lub qho ntawm lub hau phij xab, thiab muab txawb rau ntawm lub thaj ib sab, yog thaum yus yuav nkag hauv (יחוח)Yahweh lub tuam tsev sab xis. Mas cov pov thawj uas zov ntawm lub qhov rooj muab tej nyiaj uas coj tuaj rau hauv (יחוח)Yahweh

lub tuam tsev tso rau hauv lub phij xab ntawd.

10 Thaum lawv pom tias muaj nyiaj ntau hauv lub phij xab lawm mas tus uas sau ntawv rau vajntxwv thiab tus tuam pov thawj hlob mam li tuaj suav tej nyiaj ntawd thiab muab cov nyiaj uas muaj hauv (יחוח)Yahweh lub tuam tsev ntim hnab pav ncauj cia.

11 Lawv muab cov nyiaj uas luj tag ntawd rau cov tub zog uas tu (יחוח)Yahweh lub tuam tsev txhais tes, lawv muab them rau cov Kws ntoo thiab cov tub zog uas ua haujlwm kho (יחוח)Yahweh lub tuam tsev,

12 thiab muab rau cov Kws txua pob zeb thiab cov Kws txaug pob zeb, thiab siv yuav ntoo thiab tej pob zeb uas txua tau lawd los kho (יחוח)Yahweh lub tuam tsev thiab siv rau txhua yam haujlwm uas kho lub tuam tsev.

13 Tiamsis tej nyiaj uas coj tuaj rau hauv (יחוח)Yahweh lub tuam tsev ntawd tsis tau muab siv ua tej tais nyiaj thiab tej tais khwb teeb xeeb thiab ua phaj ua raj xyu thiab tsis muab ua tej twj kub lossis tej twj nyiaj.

14 Rau qhov cov nyiaj ntawd lawv muab rau cov tub zog uas kho (יחוח)Yahweh lub tuam tsev xwb.

15 Lawv tsis thov cov uas lawv muab nyiaj rau hauv txhais tes lawm sau cia saib siv nyiaj li cas rau cov tub zog, vim yog cov tibneeg ntawd ua ncaj ua ncees.

16 Tiamsis cov nyiaj uas luag coj tuaj ua kevcai ntxuav kev txaug kev txhaum thiab cov nyiaj uas coj tuaj ua kevcai daws txim mas tsis muab rau hauv (יחוח)Yahweh lub tuam tsev. Cov nyiaj ntawd yog cov pov thawj li feem xwb.  

17 Lub sijhawm ntawd cov Alas tus vajntxwv Haxa‑ees nce mus ua rog rau lub moos Nkas mas txeeb tau.  Tiamsis thaum nws tig yuav mus ua rog rau Yeluxalees,

18 Yahdah tus vajntxwv Yahas txawm coj tej qhov txhia chaw uas Yahdah tej vajntxwv, yog Yahsafas thiab Yahlas thiab Ahaxiyah uas yog nws tej poj koob yawm txwv, tau muab xyeem pub rau (יחוח)Yahweh lawm, thiab tej uas Yahas muab xyeem pub kiag thiab tej kub huvsi uas nyob hauv lub txhab hauv lub tuam tsev thiab hauv vajntxwv lub tsev huvsi xa kiag mus pub rau Alas tus vajntxwv Haxa‑ees. Ces Haxa‑ees thiaj thim tub rog ntawm Yeluxalees rov mus lawm.

19 Lwm yam haujlwm uas Yahas ua thiab txhua yam uas nws ua mas twb muab sau cia rau hauv phau ntawv uas hais txog cov Yahdah tej vajntxwv li keeb kwm lawm.  

20 Yahas cov tub teg tub taws ntaus tswvyim ntxeev siab rau Yahas mas muab nws tua rau ntawm lub loog Milaus uas nyob ntawm txojkev uas mus Xeelas.

21 Yog Sime‑as tus tub Yahxakhas thiab Saumaws tus tub Yahxanpas uas ua vajntxwv cov tub teg tub taws tua nws, nws thiaj tuag. Lawv muab nws faus nrog nws tej poj koob yawm txwv ua ke hauv Daviv lub nroog mas nws tus tub Amaxiyah sawv nws chaw ua vajntxwv kav.