Yahahas Ua Vajntxwv Kav Ixayees

1 Xyoo nees nkaum peb uas Ahaxiyah tus tub Yahas ua vajntxwv kav Yahdah mas Yahus tus tub Yahahas pib ua vajntxwv kav Ixayees hauv lub nroog Xamalis, nws kav tau kaum xya xyoo.  

2 Nws ua tej uas (יחוח)Yahweh pom tias phem thiab ua txhaum yam nkaus li Nenpas tus tub Yelaunpau‑as tej kev txhaum uas coj cov Ixayees ua txhaum. Yahahas tsis tso tej kev txhaum ntawd tseg li.

3 Mas (יחוח)Yahweh thiaj li npau taws rau cov Ixayees mas nws thiaj muab lawv rau hauv Alas tus vajntxwv Haxa‑ees txhais tes thiab rau hauv Haxa‑ees tus tub Npeehadas txhais tes tsis tu li.

4 Mas Yahahas taij thov (יחוח)Yahweh ces (יחוח)Yahweh kuj mloog nws rau qhov (יחוח)Yahweh pom tej kev tsim txom uas Alas tus vajntxwv quab yuam lawv li cas.

5 Vim li ntawd (יחוח)Yahweh thiaj tsa ib tug cawm cov Ixayees, lawv thiaj dim hauv cov Alas txhais tes, cov Ixayees thiaj tau nyob hauv lawv tej vaj tse ib yam li qub.

6 Txawm li ntawd los lawv kuj tsis tseg tej kev txhaum uas Yelaunpau‑as caj ces ua uas nws coj cov Ixayees ua txhaum thiab, lawv ua raws nraim tej kev txhaum no. Tej ncej teev dab Aselas kuj tseem nyob hauv Xamalis.

7 Yahahas tsis tshuav tub rog li lawm, tsuas yog muaj tsib caug tus tub rog uas caij nees thiab kaum lub tsheb ua rog thiab kaum txhiab tus tub rog mus kotaw, rau qhov Alas tus vajntxwv twb muab lawv ua puam tsuaj tag, ua rau lawv zoo yam nkaus li tej nyuag pluas plav uas ya thaum ntaus qoob loo.

8 Lwm yam haujlwm uas Yahahas ua thiab txhua yam uas nws ua thiab nws tus peevxwm mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

9 Yahahas txawm tuag mus nrog nws tej poj koob yawm txwv nyob, lawv muab nws faus rau hauv Xamalis. Mas nws tus tub Yahas sawv nws chaw ua vajntxwv kav.

​

Yahas Ua Vajntxwv Kav Ixayees

10 Xyoo peb caug xya uas Yahas ua vajntxwv kav Yahdah mas Yahahas tus tub Yahas pib ua vajntxwv kav Ixayees hauv Xamalis, nws kav tau kaum rau xyoo.

11 Nws ua tej uas (יחוח)Yahweh pom tias phem kawg li, nws tsis tseg Nenpas tus tub Yelaunpau‑as tej kev txhaum uas coj cov Ixayees ua txhaum, nws ua raws nraim tej kev txhaum ntawd.

12 Lwm yam haujlwm uas Yahas ua thiab txhua yam uas nws ua thiab nws lub zog uas nws ua rog rau Yahdah tus vajntxwv Amaxiyah mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

13 Yahas txawm tuag mus nrog nws tej poj koob yawm txwv nyob mas Yelaunpau‑as nyob saum nws lub zwm txwv. Lawv muab Yahas faus rau hauv Xamalis nrog Ixayees tej vajntxwv ua ke.

​

Elisas Tuag Thiab Cov Alas Ua Rog Rau Cov Ixayees

14 Thaum Elisas mob uas nws yuav tuag, Ixayees tus vajntxwv Yahas mus cuag nws thiab quaj quaj rau nws tias, kuv txiv, kuv txiv, koj yog Ixayees tej tsheb ua rog thiab yog cov tub rog caij nees.

15 Mas Elisas hais rau vajntxwv tias, cia li muab ib rab hneev nti thiab xub los.  Vajntxwv thiaj muab rab hneev nti thiab xub los.

16 Mas Elisas hais rau Ixa-yees tus vajntxwv tias, cia li rub rab hneev nti. Ces vajntxwv thiaj rub rab hneev nti mas Elisas muab tes tso rau saum vajntxwv txhais tes.

17 Elisas hais tias, qhib qhov rais sab hnub tuaj. Vajntxwv thiaj qhib kiag.  Elisas txawm hais tias, cia li tua.  Vajntxwv kuj tua. Elisas hais tias, koj yog (יחוח)Yahweh rab xub uas kov yeej, yog rab xub uas kov yeej cov Alas, rau qhov koj yuav ua rog rau cov Alas ntawm Afes mus txog thaum koj ua rau lawv puam tsuaj tag.

18 Thiab Elisas hais tias, cia li muab cov xub los. Nws kuj muab cov xub los. Elisas hais rau cov Ixayees tus vajntxwv tias, muab cov xub nplawm hauv av. Vajntxwv txawm nplawm peb teg ces cia li lawm.  

19 Mas (יחוח)Yahweh tus tibneeg chim rau vajntxwv thiab hais tias, tsim nyog koj ntaus tsib rau teg koj thiaj yuav ntaus yeej cov Alas ua kom lawv puam tsuaj tag. Tiamsis nimno koj tsuas ntaus yeej cov Alas peb zaug xwb.  

20 Ces Elisas txawm tuag lawm mas lawv muab nws faus.  Mau‑as tej pab tub rog pheej tuaj lwg lub tebchaws ntawd thaum lub caij ntuj nag.

21 Muaj ib zaug thaum lawv tab tom kwv ib yawg tuag mus faus ces lawv pom dheev ib pab tub sab ces lawv txawm muab yawg tuag ntawd pov kiag rau hauv lub qhov uas faus Elisas. Thaum tus tuag ntawd mus nphav raug Elisas cov pob txha nws cia li ciaj sawv los nres nroos.

22 Mas Alas tus vajntxwv Haxa‑ees tau tsim txom cov Ixayees tag Yahahas sim neej.

23 Tiamsis (יחוח)Yahweh ua zoo rau lawv, hlub lawv thiab nws tig los saib lawv vim yog tej lus uas nws cog tseg rau Anplaham, Ixaj thiab Yakhauj, thiab nws tsis ua rau lawv puam tsuaj thiab tsis tso lawv tseg ntawm nws xub ntiag txog niaj hnub nimno.  

24 Thaum Alas tus vajntxwv Haxa‑ees tuag lawd nws tus tub Npeehadas sawv nws chaw ua vajntxwv kav.

25 Mas Yahahas tus tub Yahas txeeb tau tej moos ntawm Haxa‑ees tus tub Npeehadas rov los, yog tej moos uas Haxa‑ees txeeb tau ntawm Yahahas uas yog Yahas txiv mus lawm. Yahas ntaus yeej Npeehadas peb zaug mas txeeb tau Ixayees tej moos rov qab los