Amaxiyah Ua Vajntxwv Kav Yahdah

(2 Vaj Keeb Kwm 25:1-24)

1 Xyoo ob uas Yahahas tus tub Yahas ua vajntxwv kav Ixayees mas Yahas tus tub Amaxiyah pib ua vajntxwv kav Yahdah.

2 Thaum nws pib ua vajntxwv kav nws hnub nyoog muaj nees nkaum tsib xyoos, nws nyob hauv Yeluxalees kav tau nees nkaum cuaj xyoo. Nws niam npe hu ua Yahadees, yog tibneeg hauv Yeluxalees.

3 Nws ua tej uas (יחוח)Yahweh pom tias zoo tiamsis zoo tsis thooj li nws yawg koob Daviv.  Nws ua txhua yam raws li uas nws txiv Yahas tau ua lawd.

4 Tiamsis tej chaw siab teev dab ntawd nws tseem tsis tau muab rhuav pov tseg. Cov pejxeem tseem xyeem tsiaj thiab hlawv hmoov xyab rau saum tej chaw siab ntawd.

5 Thaum nws muaj hwjchim kav lub tebchaws hauv nws txhais tes ruaj khov lawm, nws txawm muab cov tub teg tub taws uas tua nws txiv tua pov tseg.

6 Tiamsis nws tsis tau tua cov uas tua nws txiv cov menyuam, raws li uas muab sau cia rau hauv Mauxes phau ntawv kevcai uas (יחוח)Yahweh hais tias, leejtxiv yuav tsis ris nws tej menyuam lub txim tuag, thiab tej menyuam yuav tsis ris leejtxiv lub txim tuag. Cia txhua tus nyias ris nyias lub txim tuag.

7 Ahaxiyah muab cov Edoos tua kaum txhiab leej rau hauv lub Hav Ntsev thiab mus ntaus thiab txeeb tau lub moos Xelaj, thiaj hu lub moos ntawd ua Yauthe‑ees, yog lub npe uas hu los txog niaj hnub nimno. 

8 Thiab Amaxiyah txib tub xa xov mus cuag Yahas uas ua vajntxwv kav cov Ixayees, Yahas txiv yog Yahahas, nws yawg yog Yahus, mas hais tias, cia li tuaj, es wb yuav ua rog tim ntsej tim muag.

9 Mas Ixayees tus vajntxwv Yahas xa xov mus rau Yahdah tus vajntxwv Amaxiyah hais tias, ib tsob pos pem lub roob Lenpanoos xa xov mus rau ib tsob ntoo ciab saum roob Lenpanoos hais tias, cia li muab koj tus ntxhais qua rau kuv tus tub. Ces muaj ib tug tsiaj qus nyob pem Lenpa-noos txawm hla mus muab tsob pos ntawd tsuj pes ntiag.

10 Qhov tseeb yeej yog koj ntaus yeej cov Edoos, koj lub siab thiaj khav theeb. Cia li txaus siab rau koj lub koob meej thiab nyob twjywm hauv tsev. Ua cas koj yuav tshum kom muaj kev kub ntxhov ua rau koj thiab cov Yahdah raug kev puam tsuaj ua ke?

11 Tiamsis Amaxiyah tsis mloog. Cov Ixayees tus vajntxwv Yahas thiaj li mus mas nws thiab cov Yahdah tus vajntxwv Amaxiyah thiaj sib ntsib ua rog rau ntawm lub moos Npesemes hauv Yahdah tebchaws.

12 Cov Yahdah txawm swb cov Ixayees, txhua tus thiaj khiav rov mus nyias vaj nyias tsev lawm.

13 Cov Ixayees tus vajntxwv Yahas kuj ntes cov Yahdah tus vajntxwv Amaxiyah uas yog Yahas tus tub thiab yog Ahaxiyah tus xeeb ntxwv ntawm Npesemes. Nws tuaj rau ntawm Yeluxalees muab lub ntsa loog tsoo pob tag plaub puas tshim, txij ntawm lub Rooj Loog Efa‑is mus txog ntua lub rooj loog ntawm lub kaum loog.

14 Yahas muab tej kub tej nyiaj huvsi thiab tej twj siv huvsi uas nyob hauv (יחוח)Yahweh lub tuam tsev thiab tej uas nyob hauv tej txhab nyiaj hauv vajntxwv tsev thiab yuam ib co tibneeg coj huvsi rov qab mus rau lub nroog Xamalis.

15 Lwm yam haujlwm uas Yahas ua thiab nws tus peev xwm thiab qhov uas nws ua rog rau cov Yahdah tus vajntxwv Amaxiyah mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

16 Yahas tuag mus nrog nws tej poj koob yawm txwv nyob, lawv muab nws faus nrog cov Ixayees tej vajntxwv hauv Xamalis. Nws tus tub Yelaunpau‑as sawv nws chaw ua vaj ntxwv kav.

17 Thaum Yahahas tus tub Yahas uas yog cov Ixayees tus vajntxwv tuag lawm, Yahas tus tub Amaxiyah uas ua Yahdah tus vajntxwv tseem nyob tau kaum tsib xyoos ntxiv thiab.

18 Lwm yam haujlwm uas Amaxiyah ua mas twb muab sau cia rau hauv phau ntawv uas hais txog Yahdah tej vajntxwv li keeb kwm lawm.

19 Ces cov pejxeem txawm ntaus tswvyim ntxeev siab rau Amaxiyah hauv Yeluxalees mas nws thiaj khiav mus rau lub moos Lakhis. Ces lawv tso tibneeg mus caum tau nws ntawm Lakhis mas muab nws tua qhov ntawd.

20 Lawv muab nws lub cev tuag rau nees thauj los faus rau hauv Yeluxalees nrog nws tej poj koob yawm txwv ua ke rau hauv Daviv lub nroog.

21 Cov pej xeem sawvdaws hauv Yahdah txawm muab Axaliyah uas hnub nyoog muaj kaum rau xyoo tsa ua vajntxwv nyob nws txiv Amaxiyah chaw.

22 Thaum vajntxwv Amaxiyah tuag mus nrog nws tej poj koob yawm txwv nyob lawm mas Axaliyah tsim kho lub moos Elab thiab rov muab rau Yahdah kav.

​

Yelaunpau‑as Ua Vajntxwv Kav Ixayees 

23 Xyoo kaum tsib uas Yahas tus tub Ama-xiyah ua vajntxwv kav Yahdah mas Yahas tus tub Yelaunpau‑as uas ua cov Ixayees tus vajntxwv pib kav hauv Xamalis, nws kav tau plaub caug ib xyoos.  

24 Nws ua tej uas (יחוח)Yahweh pom tias phem kawg li, nws tsis tseg tej kev txhaum uas Nenpas tus tub Yelaunpau‑as ua thiab coj cov Ixayees ua txhaum.  

25 Nws ntaus tau cov Ixayees ciam teb rov los txij ntua ntawm txojkev uas mus rau lub moos Hamas mus txog ntua dej hiavtxwv Alanpas, raws li (יחוח)Yahweh uas yog cov Ixayees Tus Tswv tej lus uas nws txib nws tus tub qhe Yahnah uas ua xibhwb cev (יחוח)Yahweh lus qhia. Yahnah yog Amithais tus tub uas nyob lub moos Kahefaws.

26 (יחוח)Yahweh pom tias cov Ixayees raug kev txom nyem kawg li, tsis hais tej uas ua qhev thiab tej uas tsis ua qhev huvsi thiab tsis muaj leejtwg pab tau cov Ixayees.

27 Tiamsis (יחוח)Yahweh yeej tsis hais tias yuav muab cov Ixayees ntxuav kom tu noob nrho hauv qab ntuj, (יחוח)Yahweh thiaj siv Yahas tus tub Yelaunpau‑as txhais tes pab lawv dim.

28 Lwm yam haujlwm uas Yelaunpau‑as ua, tej uas nws muaj lub siab tawv ua rog, tej uas nws txeeb tau lub moos Damaxakas thiab lub moos Hamas rov qab los ua cov tibneeg Ixayees tug, mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

29 Mas Yelaunpau‑as tuag mus nrog nws tej poj koob yawm txwv nyob uas yog Ixayees tej vajntxwv, mas nws tus tub Xekhaliyah sawv nws chaw ua vajntxwv kav.