Axaliyah Ua Vajntxwv Kav Yahdah

(2 Vaj Keeb Kwm 26:1-23)

1 Xyoo nees nkaum xya uas Yelau-npau‑as ua vajntxwv kav Ixayees mas Amaxiyah tus tub Axaliyah pib ua vaj ntxwv kav cov Yahdah.

2 Thaum nws pib kav nws hnub nyoog muaj kaum rau xyoo thiab nws nyob hauv Yeluxalees kav tau tsib caug ob xyoos.  Nws niam npe hu ua Yekhauliyah yog tibneeg hauv Yeluxalees.

3 Axaliyah ua tej uas (יחוח)Yahweh pom tias zoo, ib yam li txhua yam uas nws txiv Amaxiyah tau ua lawd.

4 Txawm li cas los tej chaw siab teev dab tseem tsis tau muab rhuav pov tseg. Cov pejxeem tseem xyeem tsiaj thiab hlawv hmoov xyab rau saum tej chaw siab ntawd.

5 Mas (יחוח)Yahweh thiaj nplawm nws, nws thiaj mob lig mob ruas mus txog hnub uas nws tuag. Nws nyob nws dua ib lub tsev. Mas nws tus tub Yahthas kav kiag vajntxwv lub vaj tse thiab tswjhwm cov pejxeem hauv lub teb chaws.

6 Lwm yam haujlwm uas Axaliyah ua thiab txhua yam uas nws ua mas twb muab sau cia rau hauv phau ntawv uas hais txog Yahdah tej vajntxwv li keeb kwm lawm.

7 Mas Axaliyah txawm tuag mus nrog nws tej poj koob yawm txwv nyob. Lawv muab nws faus nrog nws tej poj koob yawm txwv ua ke rau hauv Daviv lub nroog, mas nws tus tub Yahthas sawv nws chaw ua vajntxwv kav.

​

Xekhaliyah Ua Vajntxwv Kav Ixayees

8 Xyoo peb caug yim uas Axaliyah ua vaj ntxwv kav Yahdah mas Yelaunpau‑as tus tub Xekhaliyah sawv ua vajntxwv kav cov Ixa-yees hauv Xamalis tau rau lub hli.

9 Nws ua tej uas (יחוח)Yahweh pom tias phem kawg li ib yam li nws tej poj koob yawm txwv tau ua. Nws tsis tseg tej kev txhaum uas Nenpas tus tub Yelaunpau‑as ua thiab coj cov Ixayees ua txhaum.

10 Yanpes tus tub Salus ntaus tswv yim ntxeev siab rau Xekhaliyah mas muab nws tua tab meeg cov pejxeem mas Salus sawv nws chaw ua vajntxwv kav.

11 Lwm yam haujlwm uas Xekhaliyah ua mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

12 Tej xwm txheej no yog raws li tej lus uas (יחוח)Yahweh twb cog rau Yahus tias, koj cov tub ki yuav tau nyob saum Ixayees lub zwm txwv txog plaub tiam, mas thiaj tiav yam nkaus li ntawd ntag.

​

Salus Ua Vajntxwv Kav Ixayees 

13 Xyoo peb caug cuaj uas Axaliyah ua vajntxwv kav Yahdah mas Yanpes tus tub Salus pib ua vajntxwv kav cov Ixayees, nws nyob hauv Xamalis kav tau ib hlis.

14 Mas Kadis tus tub Menahees tawm hauv lub moos Thilaxas tuaj rau lub nroog Xamalis. Nws ntaus Yanpes tus tub Salus hauv Xamalis thiab muab tua tuag ces nws txawm sawv chaw ua vajntxwv kav.

15 Lwm yam haujlwm uas Salus ua thiab qhov uas nws ntaus tswvyim ntxeev siab mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

16 Thaum ntawd Menahees kuj mus ntaus lwg lub moos Thixas thiab ib cheeb tsam txij ntua ntawm lub moos Theexas mas ua rau puam tsuaj tag, vim yog lawv tsis yeem zwm rau nws, thiab nws muab tej pojniam suab menyuam phua plab huvsi pov tseg.

​

Menahees Ua Vajntxwv Kav Ixayees

17 Xyoo peb caug cuaj uas Axaliyah ua vajntxwv kav Yahdah mas Kadis tus tub Menahees pib ua vajntxwv kav Ixayees, nws nyob hauv Xamalis kav tau kaum xyoo.  

18 Nws ua tej uas (יחוח)Yahweh pom tias phem kawg li. Mus tag lub sijhawm uas nws ua vajntxwv, nws tsis tseg txhua yam kev txhaum uas Nenpas tus tub Yelaunpau‑as ua thiab coj cov Ixayees ua txhaum.

19 Cov Axilias tus vajntxwv Pus tuaj ntaus Ixayees tebchaws, mas Menahees muab ib txhiab talas nyiaj pub rau Pus kom thiaj pab tau Menahees kav tau lub tebchaws ruaj khov.  

20 Menahees muab cov nyiaj ntawm cov Ixayees los, yog yuam cov uas nplua nuj txhua tus ib leeg them tsib caug sekhees thiaj tau coj mus pub rau cov Axilias tus vajntxwv. Cov Axilias tus vaj ntxwv thiaj li thim tub rog rov qab thiaj tsis nyob ntev hauv lub tebchaws ntawd.

21 Lwm yam haujlwm uas Menahees ua thiab txhua yam uas nws ua mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

22 Menahees tuag mus nrog nws tej poj koob yawm txwv nyob mas nws tus tub Pekhahiyah sawv nws chaw ua vajntxwv kav.

​

Pekhahiyah Ua Vajntxwv Kav Ixayees

23 Xyoo tsib caug uas Axaliyah ua vajntxwv kav Yahdah mas Menahees tus tub Pekhahiyah pib ua vajntxwv kav Ixayees hauv Xamalis mas nws kav tau ob xyoos.  

24 Nws ua tej uas (יחוח)Yahweh pom tias phem kawg li, nws tsis tseg tej kev txhaum uas Nenpas tus tub Yelaunpau‑as ua thiab coj cov Ixayees ua txhaum.

25 Lemaliyah tus tub Pekhas uas yog vajntxwv ib tug thawj rog nrog cov tibneeg Kile‑as tsib caug leej ntaus tswvyim ntxeev siab rau vajntxwv thiab muab nws thiab Akaus thiab Ali‑es tua rau hauv Xamalis rau ntawm lub chaw ruaj khov hauv vajntxwv lub tsev. Pekhas thiaj tua Pekhahiyah thiab sawv chaw ua vajntxwv kav.

26 Lwm yam haujlwm uas Pekhahiyah ua thiab txhua yam uas nws ua mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

​

Pekhas Ua Vajntxwv Kav Ixayees

27 Xyoo tsib caug ob uas Axaliyah ua vaj ntxwv kav Yahdah mas Lemaliyah tus tub Pekhas pib ua vajntxwv kav Ixayees hauv Xamalis mas nws kav tau nees nkaum xyoo.

28 Nws ua tej uas (יחוח)Yahweh pom tias

phem kawg li, nws tsis tseg tej kev txhaum uas Nenpas tus tub Yelaunpau‑as ua thiab coj cov Ixayees ua txhaum.

29 Ncua sijhawm uas Pekhas ua vajntxwv kav Ixayees mas cov Axilias tus vajntxwv Thilapilexas tuaj txeeb lub moos Iyoos thiab Anpees Npema‑akhas thiab Yanau‑as thiab Khedes thiab Haxaus, thiab Kile‑as tebchaws thiab Kalilais teb chaws thiab tag nrho Nathalis tebchaws. Nws ntes thiab kuav kiag cov tibneeg no mus rau Axilias tebchaws.

30 Mas Elas tus tub Hause‑as kuj nrog luag ntaus tswvyim ntxeev siab rau Lemaliyah tus tub Pekhas thiab muab nws ntaus tuag thiab sawv nws chaw ua vajntxwv kav rau xyoo nees nkaum uas Axaliyah tus tub Yahthas ua vajntxwv kav Yahdah.

31 Lwm yam haujlwm uas Pekhas ua thiab txhua yam uas nws ua mas twb muab sau cia rau hauv phau ntawv uas hais txog Ixayees tej vajntxwv li keeb kwm lawm.

​

Yahthas Ua Vajntxwv Kav Yahdah

(2 Vaj Keeb Kwm. 27:1-9)

32 Xyoo ob uas Lemaliyah tus tub Pekhas ua vajntxwv kav Ixayees mas Axaliyah tus tub Yahthas pib ua vajntxwv kav cov Yahdah.

33 Thaum nws pib ua vajntxwv kav nws hnub nyoog muaj nees nkaum tsib xyoos, mas nws nyob hauv Yeluxalees kav tau kaum rau xyoo. Nws niam npe hu ua Yelusas, yog Xadaus tus ntxhais.

34 Yahthas ua tej uas (יחוח)Yahweh pom tias zoo ib yam li txhua yam uas nws txiv Axaliyah tau ua.

35 Txawm li cas los tej chaw siab teev dab kuj tseem tsis tau muab rhuav pov tseg. Cov pejxeem tseem xyeem tsiaj thiab hlawv hmoov xyab rau saum tej chaw siab ntawd.  Nws tsim kho (יחוח)Yahweh lub rooj loog tuam tsev sab ped.

36 Lwm yam haujlwm uas Yahthas ua thiab txhua yam uas nws ua mas twb muab sau cia rau hauv phau ntawv uas hais txog Yahdah tej vajntxwv li keeb kwm lawm.

37 Lub sijhawm ntawd (יחוח)Yahweh pib txib Alas tus vaj ntxwv Lexis thiab Lemaliyah tus tub Pekhas mus ntaus Yahdah.

38 Yahthas tuag mus nrog nws tej poj koob yawm txwv nyob. Lawv muab nws faus nrog nws tej poj koob yawm txwv ua ke hauv nws yawg koob Daviv lub nroog, mas nws tus tub Ahas sawv nws chaw ua vajntxwv kav.