Ahas Ua Vajntxwv Kav Yahdah

(2 Vaj Keeb Kwm 28:1-27)

1 Xyoo kaum xya uas Lemaliyah tus tub Pekhas ua vajntxwv kav mas Yahthas tus tub Ahas pib ua vajntxwv kav Yahdah.

2 Thaum Ahas pib ua vajntxwv kav nws hnub nyoog muaj nees nkaum xyoo, nws nyob hauv Yeluxalees kav tau kaum rau xyoo. Nws ua tsis haum (יחוח)Yahweh uas yog nws Tus Tswv lub siab, nws tsis ua raws li nws yawg koob Daviv tau ua, 3 tiamsis nws taug nraim Ixayees tej vajntxwv tus hneev taw.

Nws tseem muab nws tus tub hlawv xyeem rau dab ua raws li tej kevcai qias vuab tsuab uas lwm haiv neeg ua, yog cov uas (יחוח)Yahweh ntiab tawm ntawm cov Ixayees hauv ntej mus.

4 Nws xyeem tsiaj thiab hlawv hmoov xyab rau saum tej chaw siab teev dab thiab rau saum tej pov roob thiab hauv txhua tsob qab ntoo ntsuab.

5 Mas cov Alas tus vajntxwv Lexis thiab Lemaliyah tus tub Pekhas uas yog cov Ixayees tus vajntxwv nce mus ua rog rau Yeluxalees, mas lawv mus vij Ahas tiamsis kov tsis yeej.

6 Tib lub sijhawm ntawd cov Edoos tus vajntxwv ntaus tau lub moos Elab rov qab los, muab cov tibneeg Yahdah ntiab tawm mus. Cov Edoos kuj los nyob ruaj rau hauv lub moos Elab los txog niaj hnub nimno.

7 Ahas txawm txib tibneeg mus cuag Thila-pilexas uas yog cov Axilias tus vajntxwv hais tias, kuv yog koj tus tub qhe thiab yog koj tus tub.  Thov koj tuaj pab kuv dim hauv cov Alas tus vajntxwv txhais tes thiab dim hauv cov Ixayees tus vajntxwv txhais tes, lawv tab tom ua rog rau kuv.

8 Ahas txawm muab tej nyiaj thiab tej kub uas nyob hauv (יחוח)Yahweh lub tuam tsev thiab nyob hauv tej txhab nyiaj hauv vajntxwv lub tsev xa mus ua tshav ntuj rau cov Axilias tus vajntxwv.

9 Axilias tus vajntxwv kuj mloog tej lus uas Ahas hais. Axilias tus vajntxwv thiaj li txhij tub rog mus ntaus Damaxakas mas txeeb tau lub nroog thiab kuav cov pejxeem hauv lub nroog ntawd mus rau lub moos Khaws thiab muab Lexis tua pov tseg.

10 Thaum vajntxwv Ahas mus rau ntawm Damaxakas xav ntsib cov Axilias tus vajntxwv Thilapilexas, nws pom lub thaj uas xyeem hauv Damaxakas. Ces vajntxwv Ahas txawm sau ib tug qauv lub thaj ntawd thiab txhua yam uas yuav ua lub thaj ntawd xa mus rau pov thawj Uliyah hauv Yeluxalees.

11 Mas pov thawj Uliyah thiaj ua lub thaj ntawd zoo raws li tus qauv uas vajntxwv Ahas xa ntawm Damaxakas tuaj txhua yam. Pov thawj Uliyah thiaj ua lub thaj ntawd kom tiav ua ntej uas vajntxwv Ahas yuav rov ntawm Damaxakas los.

12 Thaum vajntxwv rov ntawm Damaxakas los, nws pom lub thaj ua tiav lawm, nws txawm txav mus ze thiab nce rau saud,

13 thiab nws ua kevcai hlawv huvsi xyeem thiab ua kevcai xyeem qoob loo thiab muab cawv txiv hmab hliv xyeem thiab muab tus tsiaj uas xyeem ua kevcai sib raug zoo cov ntshav nchos rau saum lub thaj ntawd.  

14 Nws txawm muab lub thaj tooj liab uas nyob ntawm (יחוח)Yahweh xub ntiag ntawm lub thaj tshiab thiab (יחוח)Yahweh lub tuam tsev ntu nruab nrab tshais ntawm lub chaw uas ncaj lub qhov rooj tuam tsev mus txawb rau ntawm lub thaj tshiab sab ped.

15 Mas vajntxwv Ahas hais rau pov thawj Uliyah tias, saum lub thaj loj no mas koj ua kevcai hlawv xyeem rau thaum sawv ntxov thiab ua kevcai xyeem qoob loo rau thaum yuav tsaus ntuj thiab hlawv tej uas vajntxwv muab xyeem thiab ua kevcai hlawv tej qoob loo uas vajntxwv muab xyeem nrog tej uas ib tsoom pejxeem muab ua kevcai hlawv huvsi xyeem thiab tej qoob loo uas lawv xyeem thiab tej cawv txiv hmab uas lawv hliv xyeem ua ke, thiab muab tej tsiaj uas hlawv huvsi xyeem ntawd thiab tej tsiaj uas tua xyeem cov ntshav huvsi nchos rau saum lub thaj.  Tiamsis lub thaj tooj liab mas cia ua lub chaw rau kuv ua nug. 16 Uliyah ua txhua yam no raws li vajntxwv Ahas hais.

17 Vajntxwv Ahas muab tej ntoo uas xov cov tsheb uas thawb dej rhuav huvsi tseg, thiab muab cov phaj dej rho mus. Thiab nws muab lub rhawv dej loj tshem saum cov nyuj tooj liab uas tiag lawm coj mus txawb rau hauv av mas muab pob zeb tiag hauv qab.

18 Txojkev vov uas ua rau vajntxwv taug mus rau hauv lub tuam tsev rau hnub Sabbath thiab lub rooj loog uas vajntxwv nkag mus rau hauv (יחוח)Yahweh lub tuam tsev mas Ahas muab rhuav huvsi pov tseg, vim yog nws saib rau cov Axilias tus vaj ntxwv.

19 Lwm yam haujlwm uas Ahas ua mas twb muab sau cia rau hauv phau ntawv uas hais txog Yahdah tej vajntxwv li keeb kwm lawm.

20 Mas Ahas tuag mus nrog nws tej poj koob yawm txwv nyob. Lawv muab nws faus nrog nws tej poj koob yawm txwv ua ke rau hauv Daviv lub nroog, mas nws tus tub Hexekhiyah sawv nws chaw ua vajntxwv kav.