Hause‑as Ua Vajntxwv Kav Ixayees

1 Xyoo kaum ob uas Ahas ua vaj ntxwv kav Yahdah tebchaws mas Hause‑as uas yog Elas tus tub pib ua vajntxwv hauv lub nroog Xamalis kav Ixayees teb chaws, nws kav tau cuaj xyoo.

2 Nws ua tej uas (יחוח)Yahweh pom tias phem kawg li, tiamsis tsis npaum li Ixayees tej vajntxwv uas kav ua nws ntej.

3 Samanexaws uas yog Axilias tus vajntxwv tuaj ua rog rau Hause‑as, ces Hause‑as thiaj zwm rau nws thiab them se rau nws.

4 Tiamsis Axilias tus vajntxwv pom tias Hause‑as ntxeev siab, rau qhov nws tau txib tibneeg xa xov mus cuag Xaus uas yog Iziv tus vajntxwv thiab tsis them se rau Axilias tus vajntxwv raws li niaj xyoo them. Vim li no Axilias tus vajntxwv thiaj ntes Hause‑as thiab muab nws kaw hauv tsev lojfaj.

​

Lub Nroog Xamalis Poob

5 Ces Axilias tus vajntxwv txawm tso tub rog txeem tebchaws mus txog lub nroog Xamalis. Nws muab lub nroog ntawd vij cia tau peb xyoos.

6 Xyoo cuaj uas Hause‑as ua vajntxwv mas Axilias tus vajntxwv txeeb tau lub nroog Xamalis thiab kuav cov Ixayees mus rau hauv Axilias tebchaws coj mus nyob hauv lub moos Halas thiab ntawm ntug dej Hanpaus uas yog tus dej hauv lub moos Kauxas, thiab hauv cov Midias tej moos.

7 Qhov uas ua li no yog vim cov Ixayees tau ua txhaum rau (יחוח)Yahweh uas yog lawv Tus Tswv, yog tus uas coj lawv tawm hauv Iziv tebchaws los, tawm hauv Iziv tus vaj ntxwv Falaus txhais tes los, los lawv tseem pe luag tej dab,

8 thiab ua lawv lub neej raws li tej tibneeg uas (יחוח)Yahweh ntiab tawm ntawm cov Ixayees hauv ntej mus tej kevcai thiab ua raws li tej kevcai uas Ixayees tej vajntxwv coj los.

9 Cov Ixayees ua tej uas tsis raug cai zais ntshis tawm tsam (יחוח)Yahweh uas yog lawv Tus Tswv. Lawv ua tej chaw siab teev dab thoob txhua lub moos tag nrho tej moos uas muaj chaw tsom faj thiab tej moos uas muaj ntsa loog ruaj khov.

10 Lawv txhos tej ncej dab thiab tej ncej dab Aselas rau saum txhua lub pov roob thiab hauv txhua tus qab ntoo ntsuab.

11 Lawv hlawv xyab rau tej chaw siab teev dab huvsi ntawd, yam li tej tibneeg uas (יחוח)Yahweh rhuav tshem ploj tag ntawm lawv hauv ntej lawm. Lawv ua tej kev phem kev qias ua rau (יחוח)Yahweh chim.

12 Lawv ua koom tu tej dab mlom uas (יחוח)Yahweh twb hais rau lawv tias, nej tsis txhob ua tej no.  

13 (יחוח)Yahweh txib txhua tus xibhwb cev (יחוח)Yahweh lus thiab txhua tus uas hais pom tom hauv ntej qhuab ntuas Yahdah thiab Ixayees hais tias, cia li tig hlo ntawm nej tej kev phem thiab tuav rawv kuv tej lus cob qhia thiab kuv tej kab ke raws li kuv txoj kevcai huvsi uas kuv hais rau nej tej poj koob yawm txwv thiab kuv tso kuv cov tub qhe uas cev kuv li lus hais rau nej.

14 Tiamsis lawv tsis mloog, lawv tawv ncauj ib yam li lawv tej poj koob yawm txwv uas tsis ntseeg (יחוח)Yahweh uas yog lawv Tus Tswv.

15 Lawv tsis yuav nws tej kab ke thiab nws tej lus cog tseg uas nws cog rau lawv tej poj koob yawm txwv thiab tej lus uas nws ntuas lawv. Lawv raws ncuj nciav tej dab mlom uas qhuav qhawv, lawv thiaj qhuav qhawv thiab lawv ua raws li tej haiv neeg uas nyob ib ncig lawv, yog tej uas (יחוח)Yahweh twb hais kom lawv tsis txhob ua raws li ntawd.

16 Thiab lawv tso lawv Tus Tswv tej lus cob qhia huvsi pov tseg thiab nchuav ob tug dab mlom thav nyuj rau lawv pe.  Lawv ua ib tug ncej dab Aselas thiab lawv pe txhua yam uas nyob saum nruab ntug, thiab ua koom tu dab Npa‑as.

17 Lawv muab tej tub tej ntxhais hlawv xyeem rau dab, thiab saib yaig saib sij thiab ua khawv koob yees siv, thiab muag lawv tus kheej mus ua tej uas (יחוח)Yahweh pom tias phem ua rau (יחוח)Yahweh chim.

18 Vim li no (יחוח)Yahweh thiaj li chim rau cov Ixayees heev kawg thiab muab lawv ntiab tawm ntawm nws lub xub ntiag mus, tsis tshuav ib tug kiag li, tsuas yog tshuav xeem Yahdah xwb.

19 Yahdah kuj tsis tuav rawv lawv Tus Tswv tej lus cob qhia, lawv ua raws li tej kevcai uas cov Ixayees coj los.

20 Mas (יחוח)Yahweh tsis yuav Ixayees caj ces huvsi thiab rau txim rau lawv thiab muab lawv cob rau hauv cov uas lwg lawv txhais tes mus txog thaum nws muab lawv laim pov tseg ntawm nws lub xub ntiag mus tag.

21 Thaum ()Yahweh muab cov Ixayees dua rhe ntawm Daviv caj ces lawd, lawv tsa Yelaunpau‑as uas yog Nenpas tus tub ua vaj ntxwv, mas Yelaunpau‑as coj lawv ncaim ntawm (יחוח)Yahweh thiab ua rau lawv ua txhaum loj kawg.

22 Cov Ixayees ua raws nraim li tej kev txhaum huvsi uas Yelaunpau‑as tau ua. Lawv tsis tso tej kev txhaum ntawd tseg li,

23 mus txog thaum (יחוח)Yahweh muab lawv ntiab tawm ntawm nws lub xubntiag mus, raws li nws tau kom nws cov tub qhe uas cev nws lus txhua tus hais rau lawv lawd.  Yog li no cov Ixayees thiaj raug kuav poob tebchaws mus rau hauv Axilias tebchaws los txog niaj hnub nimno.

​

Xa Tibneeg Mus Nyob Rau Hauv Xamalis

24 Axilias tus vajntxwv coj tibneeg hauv lub nroog Npanpiloos, lub moos Khuthas, lub moos Avas, lub moos Hamas thiab lub moos Xefava‑is mus nyob cov Ixayees chaw rau tej moos hauv Xamalis tebchaws. Lawv thiaj txeeb tau Xamalis tebchaws thiab mus nyob hauv Xamalis tej moos.

25 Txij thaum lawv pib los nyob ntawd, lawv tsis hwm thiab tsis paub ntshai (יחוח)Yahweh.  Vim li ntawd (יחוח)Yahweh thiaj tso tsov ntxhuav los rau hauv lawv nruab nrab thiab tom lawv tuag ib txhia.

26 Thiaj muaj tibneeg mus hais rau Axilias tus vajntxwv tias, tej haiv neeg uas koj coj mus nyob rau hauv Xamalis tej moos ntawd tsis paub tus timtswv hauv lub teb chaws ntawd txoj kevcai.  Vim li ntawd tus timtswv thiaj tso tsov ntxhuav los hauv lawv nruab nrab thiab tom lawv tuag, vim yog lawv tsis paub tus timtswv hauv lub tebchaws ntawd txoj kevcai.

27 Ces Axilias tus vajntxwv thiaj hais tias, cia li tso ib tug pov thawj hauv cov pov thawj uas nej ntes coj los ntawd rov qab mus. Cia nws mus nyob qhov ntawd thiab qhia tus timtswv hauv lub tebchaws ntawd txoj kevcai rau lawv.

28 Yog li ntawd ib tug pov thawj hauv cov uas raug kuav hauv Xamalis los thiaj li tau rov los nyob hauv lub moos Npe‑ees thiab qhuab qhia lawv paub tias lawv yuav tau pe hawm (יחוח)Yahweh li cas.

29 Tiamsis txhua haiv neeg ntawd tseem ua lawv tej dab mlom thiab muab txawb rau hauv lub tsev teev dab ntawm tej chaw siab uas cov Xamalis twb ua cia lawd, txhua haiv neeg nyias ua rau hauv lub moos uas nyias nyob.

30 Cov Npanpiloos ua tus dab mlom Xukhaus Npenaus, cov tibneeg Khuthas ua tus dab mlom Nawkas, cov tibneeg Hamas ua tus dab mlom Asimas,

31 cov tibneeg Avas ua tus dab mlom Nihas thiab Thathas. Cov tib neeg Xefava‑is hlawv menyuam xyeem rau dab Alamelej thiab dab Anamelej, uas yog cov tibneeg Xefava‑is tej dab.

32 Lawv kuj hwm thiab paub ntshai (יחוח)Yahweh thiab tsa lawv cov tibneeg leejtwg kuj xij ua pov thawj ua haujlwm ntawm tej chaw siab thiab tua tsiaj xyeem rau hauv tej tsev teev dab ntawm tej chaw siab ntawd.

33 Lawv kuj hwm thiab paub ntshai (יחוח)Yahweh thiab tseem ua koom tu lawv tej dab, raws li lawv ib txwm ua hauv lawv qub teb qub chaw uas lawv raug coj los ntawd.

34 Niaj hnub nimno lawv kuj tseem ua ib yam li qub.  Lawv tsis hwm tsis paub ntshai (יחוח)Yahweh thiab tsis ua raws li tej kab ke thiab coj raws li nws tej lus sam hwm thiab txoj kevcai thiab tej lus cob qhia uas (יחוח)Yahweh muab cob rau Yakhauj caj ces uas (יחוח)Yahweh tis npe hu ua Ixayees.  

35 (יחוח)Yahweh nrog lawv sib cog lus thiab hias rau lawv tias, nej tsis txhob hwm luag tej dab, thiab tsis txhob pe thiab tsis txhob ua koom tu thiab tsis txhob muab qhov txhia chaw xyeem rau tej dab ntawd.

36 Nej yuav tau hwm thiab paub ntshai (יחוח)Yahweh uas siv nws lub hwjchim loj thiab nws txhais tes uas tsa hlo coj nej tawm hauv Iziv tebchaws los.  Nej yuav tau pe nws thiab tua tsiaj xyeem rau nws xwb.

37 Tej kab ke thiab tej lus sam hwm thiab txoj kevcai thiab tej lus cob qhia uas nws sau cia rau nej, mas nej yuav tau ceev faj ua raws nraim mus li. Nej tsis txhob hwm luag tej dab,

38 thiab nej tsis txhob hnov qab tej lus uas kuv cog tseg rau nej. Nej tsis txhob hwm luag tej dab.

39 Nej yuav tau hwm thiab paub ntshai (יחוח)Yahweh uas yog nej Tus Tswv, nws thiaj cawm nej dim hauv nej tej yeeb ncuab txhais tes huvsi.

40 Txawm li ntawd los lawv tseem tsis mloog, lawv tseem ua raws li lawv qhov qub.

41 Tej haiv neeg no thiaj li pe hawm (יחוח)Yahweh thiab tseem ua koom tu tej dab mlom uas lawv txaug. Lawv tej menyuam thiab lawv tej xeeb ntxwv kuj ua ib yam li ntawd, raws li lawv tej poj koob yawm txwv tau ua los txog niaj hnub nimno.