Hexekhiyah Ua Vajntxwv Kav Yahdah

(2 Vaj Keeb Kwm. 29:1-2,31:1)

1 Xyoo peb uas Elas tus tub Hause‑as ua vajntxwv kav Ixayees tebchaws mas Ahas tus tub Hexekhiyah pib ua vajntxwv kav Yahdah tebchaws.

2 Thaum nws pib kav ntawd nws hnub nyoog muaj nees nkaum tsib xyoos. Nws nyob hauv Yeluxalees kav tau nees nkaum cuaj xyoo. Nws niam npe hu ua Anpiyah, uas yog Xekhaliyah tus ntxhais.

3 Vajntxwv ua tej uas (יחוח)Yahweh pom tias zoo, ib yam li nws yawg koob Daviv tau ua lawd.

4 Nws rhuav tshem tej chaw siab uas teev dab pov tseg thiab tsoo tej ncej dab thiab ntov tej ncej dab Aselas pov tseg. Thiab nws tsoo tus nab tooj uas Mauxes ua ntawd tawg ua tej dwb daim, rau qhov cov Ixayees pheej hlawv hmoov tshuaj tsw qab rau tus nab ntawd los txog thaum ntawd. Lawv hu tus nab ntawd tias Nehuthas.

5 Nws tso siab plhuav rau (יחוח)Yahweh uas yog Ixayees Tus Tswv. Vim li ntawd tej vajntxwv uas kav Yahdah los rau tom qab thiab tej vajntxwv uas kav ua nws ntej, tsis muaj ib tug zoo thooj li nws.

6 Rau qhov nws tuav rawv (יחוח)Yahweh ruaj, nws tsis tso qhov uas ua raws li (יחוח)Yahweh qhia tseg li, nws tuav rawv tej lus cob qhia uas (יחוח)Yahweh muab cob rau Mauxes.

7 Thiab (יחוח)Yahweh nrog nraim nws, nws tawm mus rau qhov twg nws kuj ua tau tiav zoo. Nws ntxeev siab rau Axilias tus vajntxwv tsis yeem ua haujlwm rau lawm.

8 Nws ntaus cov Filixatees mus txog ntua lub moos Kaxas thiab tej moos ib ncig tsis hais tej uas muaj chaw tsom faj thiab tej uas muaj ntsa loog ruaj khov.

9 Xyoo plaub uas Hexekhiyah ua vaj ntxwv kav, yog xyoo xya uas Elas tus tub Hause‑as kav Ixayees tebchaws mas Samanexaws uas yog Axilias tus vajntxwv txawm tuaj ua rog rau lub nroog Xamalis thiab vij lub nroog cia.

10 Vij tau peb xyoos mas txeeb tau lub nroog lawm. Xyoo rau uas Hexekhiyah ua vajntxwv kav, yog xyoo cuaj uas Hause‑as ua vajntxwv kav Ixayees, lub nroog Xamalis raug luag txeeb tau lawm.

11 Axilias tus vajntxwv kuav cov Ixayees mus rau hauv Axilias tebchaws, coj mus nyob hauv lub moos Halas thiab ntawm ntug dej Hanpaus uas yog tus dej hauv lub moos Kauxas, thiab hauv cov Midias tej moos,

12 vim yog lawv tsis mloog (יחוח)Yahweh uas yog lawv Tus Tswv tej lus.  Lawv ntxeev siab rau nws tej lus cog tseg, yog txhua yam uas (יחוח)Yahweh tus tub qhe Mauxes tau hais cia lawd, lawv tsis mloog thiab lawv tsis ua raws li ntawd.

​

Xenakhawlis Ua Rog Rau Yahdah Tebchaws

(2 Vaj Keeb Kwm 32:1-19; Isayah 36:1-22)

13 Xyoo kaum plaub uas Hexekhiyah ua vaj ntxwv kav mas Axilias tus vajntxwv Xenakhawlis tuaj ntaus Yahdah txhua lub moos uas muaj ntsa loog ruaj khov mas txeeb tau huvsi.

14 Yahdah tus vajntxwv Hexekhiyah tso tibneeg mus hais rau Axilias tus vajntxwv hauv lub moos Lakhis hais tias, kuv tau ua txhaum lawm, thov koj thim tub rog mus. Koj yuav nplua npaum cas los kuv yuav them. Axilias tus vajntxwv hu peb puas talas nyiaj thiab peb caug talas kub rau Yahdah tus vajntxwv Hexekhiyah them.

15 Mas Hexekhiyah muab tag nrho tej nyiaj uas nyob hauv (יחוח)Yahweh lub tuam tsev thiab tej uas nyob hauv tej txhab nyiaj hauv vajntxwv tsev huvsi them rau nws.

16 Zaum ntawd Hexekhiyah tev tej kub uas luam ntawm tej txhib qhov rooj thiab tej npuab rooj ntawm (יחוח)Yahweh lub tuam tsev uas Yahdah tus vajntxwv Hexekhiyah muab luam rau lawd, muab cob rau Axilias tus vajntxwv.

17 Axilias tus vajntxwv txib Thathas thiab Laxalis thiab Lasakhes coj ib pab tub rog coob tawm ntawm lub moos Lakhis tuaj mus rau ntawm vajntxwv Hexe-khiyah hauv Yeluxalees. Lawv tuaj mus rau Yeluxalees. Thaum lawv tuaj txog lawv los sawv ntawm tus ciav dej uas tso dej tawm ntawm lub pas sab ped los, yog ntawm txojkev uas mus rau daim teb Ntxhua Xov.

18 Thaum lawv hu vajntxwv, Hikhiyah tus tub Eliyakhis uas yog tus saib xyuas vajntxwv lub tsev thiab Senas uas yog tus tub sau ntawv thiab Axas tus tub Yahas uas yog tus uas sau ntaub ntawv keeb kwm tuaj cuag lawv.

19 Mas Lasakhes hais rau lawv tias, cia li hais rau Hexekhiyah tias, tus huabtais loj uas yog Axilias tus vajntxwv hais tias, koj tso siab rau abtsi li kod?

20 Koj xav tias nej tej nyuag lus sablaj xwb yog daim phiaj thiab hwjchim uas ua tau rog no lov? Nimno koj vam khom leejtwg es koj thiaj ntxeev siab rau kuv?

21 Koj sim xav saib, nimno koj vam khom Iziv uas yog tus pas nrig tauj deg uas lov lawm, yog leejtwg nrig yuav chob nws txhais tes.  Iziv tus vajntxwv Falaus zoo yam nkaus li ntawd rau txhua tus uas vam khom nws.

22 Tiamsis yog koj hais rau kuv tias, peb tso siab rau (יחוח)Yahweh uas yog peb Tus Tswv, mas Tus Tswv ntawd puas yog tus uas Hexekhiyah muab tej chaw siab uas pe hawm nws thiab nws tej thaj xyeem rhuav pov tseg, thiab hais rau Yahdah thiab Yeluxalees tias, nej yuav tau pe hawm (יחוח)Yahweh ntawm lub thaj no hauv Yeluxalees xwb?

23 Cia li tuaj nrog kuv tus tswv uas yog Axilias tus vaj ntxwv cog lus tseg.  Kuv yuav muab ob txhiab tus nees rau koj yog tias koj nrhiav tau tibneeg caij cov nees ntawd.

24 Koj yuav ua li cas raws tau kuv tus tswv li ib tug thawj rog uas me dua tej rau thaum koj tseem vam khom Iziv thiab lawv tej tsheb ua rog thiab tej tub rog caij nees?

25 Tsis yog li ntawd xwb, qhov uas kuv tuaj ntaus lub chaw no ua kom puam tsuaj tsis yog (יחוח)Yahweh nrog nraim lov? (יחוח)Yahweh hais rau kuv tias, cia li mus ntaus lub tebchaws no thiab ua kom puam tsuaj.

26 Mas Hikhiyah tus tub Eliyakhis thiab Senas thiab Yahas hais rau Lasakhes tias, thov koj hais ua lus Alas rau peb uas yog koj cov tub qhe, peb yeej paub tej lus ntawd.  Thov tsis txhob hais ua lus Yahdah rau cov tibneeg uas nyob saum tej ntsa loog tau hnov.

27 Tiamsis Lasakhes hais tias, tsis yog kuv tus vajntxwv txib kuv tuaj hais tej lus no rau nej thiab nej tus vajntxwv xwb.  Yeej yog hais rau cov uas nyob saum tej ntsa loog uas lawv twb yuav noj lawv tej quav thiab haus lawv tej zis thiab ntag.

28 Mas Lasakhes sawv ntsug qw ua lus Yahdah nrov nrov hais tias, cia li mloog tus huabtais loj uas yog Axilias tus vajntxwv tej lus.

29 Vajntxwv hais li no tias, tsis txhob cia Hexekhiyah dag ntxias nej, vim nws tsis muaj peev xwm pab tau nej dim hauv kuv txhais tes.

30 Tsis txhob cia Hexekhiyah ua rau nej vam khom (יחוח)Yahweh rau tej lus uas hais tias, (יחוח)Yahweh yuav pab peb dim tiag tiag li, lub nroog no yuav tsis poob rau hauv Axilias tus vajntxwv txhais tes.

31 Tsis txhob mloog Hexekhiyah hais. Axilias tus vajntxwv hais li no tias, cia li nrog kuv sib raug zoo thiab tawm tuaj cuag kuv, mas nej txhua tus nyias yuav tau noj nyias tej txiv hmab txiv cev thiab txhua tus nyias yuav tau haus nyias tej qhov dej,

32 mus txog thaum kuv rov tuaj coj nej mus rau lub tebchaws uas zoo ib yam li nej lub, yog lub tebchaws uas muaj qoob loo thiab cawv txiv hmab, yog lub teb chaws uas muaj mov noj thiab vaj txiv hmab, muaj txiv ntoo aulib thiab muaj zib ntab kom nej thiaj muaj txojsia nyob thiaj tsis tuag. Thiab tsis txhob mloog Hexekhiyah tej lus uas nws yuav coj nej mus yuam kev hais tias, (יחוח)Yahweh yuav cawm peb dim.

33 Puas muaj ib tug dab twg hauv ib tsoom tebchaws uas pab tau nws lub tebchaws dim hauv Axilias tus vajntxwv txhais tes?

34 Lub moos Hamas thiab lub moos Apas tej dab dua twg tag lawm? Lub moos Xefava‑is, lub moos Henas thiab lub moos Ivas tej dab dua twg lawm? Tej dab ntawd pab tau Xamalis dim hauv kuv txhais tes thiab lov?

35 Ib tsoom tebchaws tej dab huvsi tsis muaj ib tug dab twg uas pab tau nws lub tebchaws dim hauv kuv txhais tes, mas (יחוח)Yahweh yuav cawm Yeluxalees dim hauv kuv txhais tes thiab lov?

36 Tiamsis lawv ntsiag to xwb tsis teb ib los li, rau qhov vajntxwv Hexekhiyah twb qhia hais tias, tsis txhob teb ib los li.

37 Hikhiyah tus tub Eliyakhis uas yog tus saib xyuas vajntxwv lub tsev thiab Senas uas yog tus tub sau ntawv thiab Axas tus tub Yahas uas yog tus uas sau ntawv keeb kwm, rov los cuag Hexekhiyah ua ris tsho ntuag tag, thiab qhia Lasakhes tej lus rau vajntxwv.