Yeluxalees Yuav Dim Ntawm Xenakhawlis

(Isayah. 37:1-20)

1 Thaum vajntxwv Hexekhiyah hnov tej lus ntawd, nws txawm dua rhe nws lub tsho thiab muab khaub seev tsaj los hnav thiab mus rau hauv (יחוח)Yahweh lub tuam tsev.

2 Mas nws txib Eliyakhis uas yog tus saib xyuas vajntxwv lub tsev thiab Senas uas yog tus tub sau ntawv thiab cov pov thawj laus hnav khaub seev tsaj mus cuag Amoj tus tub Isayah uas ua xibhwb cev (יחוח)Yahweh lus.

3 Lawv txawm hais rau nws tias, Hexekhiyah hais li no tias, hnub no yog hnub uas ntxhov siab thiab raug luag thuam poob ntsej muag.  Tej menyuam tub txog caij yug lawm tiamsis tsis muaj zog ntsub.

4 Tej zaum (יחוח)Yahweh uas yog koj Tus Tswv twb hnov tej lus huvsi uas Axilias tus vajntxwv kom Lasakhes tuaj hais saib tsis taus (יחוח)Yahweh uas muaj txojsia nyob lawm, thiab (יחוח)Yahweh yuav rhuav tshem tej lus uas ()Yahweh uas yog koj Tus Tswv tau hnov. Yog li ntawd thov koj thov (יחוח)Yahweh pab cov tibneeg uas tseem tshuav nyob no.

5 Thaum vajntxwv Hexekhiyah cov tub txib tuaj cuag Isayah.  

6 Isayah hais rau lawv tias, cia li hais rau nej tus vajntxwv tias, (יחוח)Yahweh hais li no tias, tsis txhob ntshai tej lus uas nej tau hnov ntawd, yog tej lus uas Axilias tus vajntxwv tej nom tswv thuam kuv.

7 Saib maj, kuv yuav tshoov nws lub siab ua kom nws hnov lus huab lus cua mas nws yuav rov qab mus rau nws lub tebchaws. Thiab kuv yuav ua kom nws tuag hniav ntaj rau hauv nws lub tebchaws.

8 Lasakhes thiaj rov qab mus mas ntsib Axilias tus vajntxwv ua rog rau lub moos Linas, rau qhov nws hnov tias vajntxwv twb tawm hauv Lakhis mus lawm.

9 Thaum Axilias tus vajntxwv hnov xov hais tias Khuj tus vajntxwv Thihakhas twb sawv kev tuaj ntaus nws lawm, nws txawm txib tibneeg xa xov rov mus hais rau Hexekhiyah hais tias,

10 nej yuav tau hais li no rau Yahdah tus vajntxwv Hexekhiyah hais tias, tsis txhob cia koj Tus Tswv uas koj vam khom ntawd dag hais tias Yeluxalees yuav tsis raug muab rau hauv Axilias tus vajntxwv txhais tes.

11 Saib maj, nej twb hnov lawm tias Axilias tej vajntxwv twb ua li cas rau ib tsoom tebchaws huvsi lawm, twb ua rau tej tebchaws puam tsuaj tag huvsi.  Koj nev, koj yuav tau kev dim lov?

12 Ib tsoom tebchaws tej dab pab tau lawv dim lov?  Twb yog tej tebchaws uas kuv tej poj koob yawm txwv muab ua puam tsuaj tag, yog lub moos Kauxas, lub moos Halas, lub moos Lexes thiab cov tibneeg Edees uas nyob hauv lub moos Thee‑axas.

13 Tus vajntxwv hauv lub moos Hamas thiab tus vajntxwv hauv Apas thiab tus vajntxwv hauv Xefava‑is, thiab tus vajntxwv hauv Henas thiab tus vajntxwv hauv Ivas dua twg lawm?

14 Hexekhiyah txais tsab ntawv ntawm tus xa xov txhais tes thiab nyeem.  Mas Hexekhiyah thiaj mus rau hauv (יחוח)Yahweh lub tuam tsev, thiab muab tsab ntawv nthuav rau ntawm (יחוח)Yahweh lub xub ntiag.

15 Thiab Hexekhiyas thov ntawm (יחוח)Yahweh xub ntiag hais tias, Au (יחוח)Yahweh uas yog Ixayees Tus Tswv, uas nyob lub zwm txwv saum cov Khelunpees, koj tib leeg xwb thiaj yog ib tsoom tebchaws hauv qab ntuj Tus Tswv, koj tau tsim lub ntuj thiab lub ntiajteb.  

16 Au (יחוח)Yahweh, thov tig pob ntseg mloog. Au (יחוח)Yahweh, thov tsa qhov muag saib thiab thov koj mloog Xenakhawlis tej lus huvsi uas nws xa tuaj thuam luag Tus Tswv uas muaj txojsia nyob.

17 Au (יחוח)Yahweh, yeej muaj tseeb li ntawd tiag, Axilias tej vajntxwv tau ua rau txhua haiv neeg thiab lawv lub tebchaws puam tsuaj tag,

18 thiab muab lawv tej dab mlom pov rau hauv hluavtaws, vim tej ntawd yeej tsis yog timtswv, tsuas yog tej uas tibneeg txhais tes ua xwb, yog ntoo thiab pob zeb xwb. Vim li ntawd tej ntawd thiaj raug muab ua puam tsuaj tag.

19 Au (יחוח)Yahweh uas yog peb Tus Tswv, nimno kuv thov koj cawm peb dim hauv nws txhais tes, xwv ib tsoom tebchaws hauv ntiajteb thiaj paub tias koj yog (יחוח)Yahweh, koj tib leeg thiaj yog Tus Tswv uas muaj hwjchim loj dua ntais.

​

Isayah Xa Xov Rau Hexekhiyah

(Isayah 37:21-38)

20 Mas Amoj tus tub Isayah hais mus rau Hexekhiyah hais tias, (יחוח)Yahweh uas yog Ixayees Tus Tswv hais li no tias, kuv twb hnov koj tej lus thov hais txog Xenakhawlis uas yog Axilias tus vajntxwv lawm.

21 Ntawm no mus yog tej lus uas (יחוח)Yahweh hais txog Xenakhawlis. Xi‑oo tus ntxhais dawb huv saib tsis taus koj, luag koj, Yeluxalees tus ntxhais co hau nto luag raws koj qab.

22 Koj thuam thiab hais phem rau leejtwg? Koj tsa koj lub suab tawm tsam leejtwg thiab koj khav theeb zij ncaug ntxi muag rau leejtwg? Yog ua rau cov Ixayees Tus Tswv uas dawb huv ntag.

23 Koj muab lus rau koj cov tibneeg xa xov thuam luag (יחוח)Yahweh, thiab koj tau khav tias, kuv muaj tsheb ua rog ntau heev, kuv nce mus saum tej roob siab, mus txog tej qhov uas deb kawg hauv Lenpanoos. Kuv twb muab nws tej ntoo ciab uas siab kawg ntov vau thiab ntov nws tej ntoo ciab nplooj suab uas zoo nkauj kawg lawm.  Kuv nkag mus rau hauv qhov uas deb kawg nkaus thiab mus txog lub hav zoov uas tsaus kawg nkaus.

24 Kuv khawb qhov dej thiab haus lwm tebchaws li dej, kuv txhais xib taws tsuj Iziv tej hav dej qhuav tag huvsi.

25 Koj tsis tau hnov lov? Kuv twb npaj cia li ntawd ntev los lawm. Tej hauj lwm uas kuv ua nimno, kuv twb hom cia thaum ub los lawm, hais tias koj yuav ua rau tej moos uas muaj ntsa loog ruaj khov pob tag ua tej niag pawg.

26 Tej tibneeg hauv tej moos ntawd qaug zog ntshaus ntsho poob siab tag thiab txaj muag heev, lawv zoo li tej zaub hauv teb thiab zoo li tej nroj mos mos, zoo li tej nroj uas tuaj saum ruv tsev uas cia li qhuav tag tsis hlob.

27 Kuv yeej paub qhov uas koj zaum thiab qhov uas koj tawm mus thiab nkag los, thiab qhov uas koj npau taws rau kuv.

28 Vim koj tau npau taws rau kuv thiab kuv twb hnov qhov uas koj khav theeb, mas kuv yuav muab kuv tus nqe lauj chob koj lub qhov ntswg thiab muab kuv txoj xauv sam koj lub qhov ncauj, mas kuv yuav cab koj tig hlo rov qab taug txojkev uas koj tuaj mus. 

29 No yog tej txujci uas qhia rau koj paub.  Xyoo no koj yuav noj tej qoob loo uas nws tuaj nws.  Xyoo ob koj yuav noj tej uas tuaj ntawm lub qub chaw.  Mas xyoo peb cia li tseb thiab hlais thiab ua vaj txiv hmab thiab noj tej txiv ntawd.

30 Yahdah caj ces cov uas dim thiab tseem tshuav nyob yuav nrhau cag rau hauv thiab txi txiv rau saud.

31 Vim tias muaj ib co uas tseem tshuav nyob yuav tawm hauv Yeluxalees mus, thiab muaj ib co uas dim yuav tawm hauv lub roob Xi‑oo mus. (יחוח)Yahweh uas muaj hwjchim loj kawg nkaus yuav kub siab lug ua tej no.

32 Vim li no (יחוח)Yahweh thiaj hais txog Axilias tus vajntxwv li no tias, nws yuav tsis nkag los rau hauv lub nroog no thiab tsis tua xub hneev tuaj rau hauv, thiab tsis tuav daim hlau thaiv tuaj ze lub nroog thiab tsis tsub av ua chaw nce ntsa loog.

33 Nws tuaj txojkev twg nws yuav rov txojkev ntawd mus, nws yuav tsis nkag rau hauv lub nroog no. (יחוח)Yahweh hais li no ntag.

34 Kuv yuav tsom kwm lub nroog no cia kom dim, vim saib rau kuv thiab saib rau kuv tus tub qhe Daviv.

35 Hmo ntawd (יחוח)Yahweh cov tubtxib saum ntuj tawm mus tua Axilias cov tub rog hauv lawv lub yeej tuag 185,000 leej. Mas thaum sawv ntxov lawv sawv saib ua ciav cov ntawd twb tuag tag lawm.

36 Ces Axilias tus vajntxwv Xenakhawlis txawm cia li sawv tsees rov qab mus tsev, mus nyob hauv Ninaves.

37 Thaum nws tab tom pe hawm hauv lub tsev teev dab Nilaus uas yog nws tus dab, nws ob tug tub Alamelej thiab Salexaws txawm xuas ntaj tua nws tuag. Ces nkawv khiav mus rau Alalab tebchaws lawm. Mas nws tus tub Exahadoos sawv kav nyob nws chaw.