Hexekhiyah Mob

(2 Vaj Keeb Kwm 32:24-26; Isayah. 38:1-8,21-22)

1 Lub sijhawm ntawd Hexekhiyah mob nyhav heev twb yuav tuag.  Mas Amoj tus tub Isayah uas yog xibhwb cev (יחוח)Yahweh lus tuaj cuag nws thiab hais rau nws tias, (יחוח)Yahweh hais li no tias, koj cia li tu tej kev teb kev chaw kom zoo, koj yuav tuag koj yuav tsis nquag.

2 Mas Hexekhiyah tig xub ntiag rau tim phab ntsa thiab thov (יחוח)Yahweh hais tias,

3 Au (יחוח)Yahweh, kuv taij thov koj nco txog tias kuv ua lub neej xib rau koj rau ntawm koj lub xub ntiag kawg siab kawg ntsws thiab tau ua tej uas koj pom tias zoo. Ces Hexekhiyah txawm quaj heev kawg.

4 Thaum Isayah tsis tau tawm hauv lub tshav puam ntawm vajntxwv tsev, (יחוח)Yahweh hais lus tuaj rau nws tias,

5 cia li rov qab mus hais rau Hexekhiyah uas yog kuv haiv neeg tus thawj tias, koj yawg koob Daviv Tus Tswv hais li no tias, kuv twb hnov koj tej lus thov lawm, kuv twb pom koj tej kua muag lawm. Kuv yuav kho kom koj zoo mas hnub peb koj yuav tau mus rau hauv (יחוח)Yahweh lub tuam tsev.

6 Kuv yuav txuas koj txojsia ntev kaum tsib xyoo ntxiv thiab.  Kuv yuav cawm koj thiab lub nroog no dim ntawm Axilias tus vajntxwv txhais tes, thiab kuv yuav tsom kwm lub nroog no vim yog saib rau kuv thiab saib rau kuv tus tub qhe Daviv.

7 Mas Isayah hais tias, cia li coj ib lub ncuav txiv cev los, kom lawv muab lub ncuav ntawd npuab rau ntawm lub rwj kom nws thiaj li rov qab zoo.

8 Hexekhiyah hais rau Isayah tias, yuav muaj ib yam abtsi qhia kom paub tias (יחוח)Yahweh yuav kho kuv thiab peb hnub kuv yuav tau mus rau hauv (יחוח)Yahweh lub tuam tsev?

9 Isayah hais tias, no yog yam txujci uas (יחוח)Yahweh ua rau koj paub tias nws yuav ua raws li nws twb cog lus lawm. Yuav cia tus duab hnub mus tom ntej kaum qeb los rov tom qab kaum qeb?

10 Hexekhiyas teb tias, yoojyim ua rau tus duab hnub mus tom ntej kaum qeb.  Yog li no thov cia tus duab thim rov qab kaum qeb.

11 Ces Isayah uas yog xibhwb cev (יחוח)Yahweh lus taij thov (יחוח)Yahweh, mas (יחוח)Yahweh ua rau tus duab hnub thim rov qab kaum qeb uas tus duab twb mus dhau lawd ntawm lub chaw ntsuas uas Ahas ua.

​

Hexekhiyah Txais Tos Npanpiloos Cov Tub Xa Xov

(Isayah 39:1-8)

12 Thaum ntawd Npaladas tus tub Melauda-npaladas uas ua vajntxwv hauv Npanpiloos txib cov tub xa xov coj tsab ntawv thiab tshav ntuj mus pub rau Hexekhiyah vim yog nws hnov xov tias Hexekhiyah mob.

13 Mas Hexekhiyah zoo siab txais tos lawv thiab coj lawv mus saib nws tej txhab nyiaj huvsi, saib tej nyiaj, tej kub, tej txuj lom, tej roj tsim txiaj, thiab saib lub txhab uas rau cuab yeej ua rog, yog txhua yam uas nyob hauv nws tej txhab. Tsis tshuav ib yam hauv nws lub tsev thiab thoob plaws hauv nws lub tebchaws uas nws tsis tau muab qhia rau lawv saib li.

14 Mas Isayah uas yog xibhwb cev (יחוח)Yahweh lus tuaj cuag vajntxwv Hexekhiyah, thiab hais rau nws tias, cov tibneeg no tuaj hais abtsi?  Thiab lawv tuaj qhov twg tuaj cuag koj? Hexekhiyah teb tias, lawv tuaj deb deb li tuaj, yog tuaj Npanpiloos tebchaws tuaj.

15 Isayah nug tias, lawv pom abtsi hauv koj lub vaj lub tsev? Hexekhiyah teb tias, lawv pom txhua yam hauv kuv lub vaj lub tsev, tsis tshuav ib yam abtsi hauv kuv tej txhab uas kuv tsis tau muab qhia rau lawv saib li.

16 Ces Isayah txawm hais rau Hexekhiyah tias, cia li mloog (יחוח)Yahweh tej lus.

17 Saib maj, lub sijhawm tab tom los txog lawm uas txhua tsav txhua yam hauv koj lub vaj lub tsev thiab tej uas koj tej poj koob yawm txwv khaws tau cia los txog hnub no yuav raug muab coj mus rau Npanpiloos, tsis tshuav ib yam abtsi kiag li. (יחוח)Yahweh hais li no ntag.   

18 Thiab koj tej tub uas koj yug muaj qee leej yuav raug muab coj mus thiab lawv yuav ua nraug sam rau hauv vajntxwv Npanpiloos lub tsev.

19 Mas Hexekhiyah hais rau Isayah tias, (יחוח)Yahweh tej lus uas koj hais no kuj zoo. Rau qhov nws xav hauv lub siab tias, yog muaj kev thaj yeeb thiab nyob kaj siab lug mus tag kuv sim neej, kuj yog zoo lawm los tsis yog?

​

Hexekhiyah Tuag

(2 Vaj Keeb Kwm 32:32-33)

20 Lwm yam haujlwm uas Hexekhiyah ua, thiab nws tus peev xwm huvsi thiab qhov uas nws ua lub pas dej thiab tus ciav dej tso dej los rau hauv lub nroog mas twb muab sau cia rau hauv phau ntawv uas hais txog cov Yahdah tej vajntxwv li keeb kwm lawm.

21 Ces Hexekhiyah txawm tuag mus nrog nws tej poj koob yawm txwv nyob, mas nws tus tub Manaxes sawv nyob nws chaw kav.