2 VAJNTXWV 21

Manaxes Ua Vajntxwv Kav Yahdah

(2 Vaj Keeb Kwm 33:1-20)

1 Thaum Manaxes pib ua vajntxwv nws hnub nyoog muaj kaum ob xyoos, nws nyob hauv Yeluxalees kav tau tsib caug tsib xyoos. Nws niam npe hu ua Hexinpas.

2 Nws ua tej uas (יחוח)Yahweh pom tias phem kawg li, nws ua raws li tej kevcai qias vuab tsuab uas lwm haiv neeg ua, yog cov uas (יחוח)Yahweh ntiab tawm ntawm cov Ixayees hauv ntej mus.

3 Nws rov ua tej chaw siab teev dab uas nws txiv Hexekhiyah twb muab rhuav tag lawd, thiab nws ua tej thaj teev dab Npa‑as thiab ua ncej dab Aselas, ib yam li cov Ixayees tus vajntxwv Ahaj tau ua. Nws pe hnub pe hli thiab tej hnub qub saum nruab ntug huvsi thiab ua koom tu tej ntawd.

4 Nws ua tej thaj teev dab rau hauv (יחוח)Yahweh lub tuam tsev, uas yog lub chaw uas (יחוח)Yahweh twb hais tias, kuv yuav muab kuv lub npe cia rau hauv Yeluxalees.

5 Nws ua tej thaj xyeem rau lub hnub lub hli thiab tej hnub qub saum nruab ntug huvsi rau hauv ob lub tshav puam hauv (יחוח)Yahweh lub tuam tsev.

6 Nws muab nws tus tub tua hlawv xyeem rau dab, thiab nws saib caij saib sij saib yaig thiab nws mus nug tej txiv neeb txiv yaig thiab tej uas muaj dab leej nkaub. Nws ua tej uas (יחוח)Yahweh pom tias phem kawg nkaus li zes ua rau (יחוח)Yahweh npau taws.

7 Nws muab tus dab mlom Aselas uas nws txaug txawb rau hauv lub tuam tsev uas (יחוח)Yahweh twb hais rau Daviv thiab nws tus tub Xalaumoos lawm hais tias, lub tuam tsev no thiab lub nroog Yeluxalees uas kuv twb xaiv hauv txhua xeem Ixayees los mas kuv yuav cia kuv lub npe nyob hauv mus ib txhis.

8 Kuv yuav tsis ua rau cov Ixayees txhais kotaw khiav tawm hauv lub tebchaws uas kuv twb muab rau lawv tej poj koob yawm txwv lawd dua li lawm, yog tias lawv ceev faj ua raws li txhua yam uas kuv hais kom lawv ua thiab ua raws li txoj kevcai huvsi uas kuv tus tub qhe Mauxes hais rau lawv.

9 Tiamsis lawv tsis mloog thiab Manaxes ntxias lawv mus ua phem heev dua tej haiv neeg uas (יחוח)Yahweh twb muab ua puam tsuaj tag rau ntawm lawv hauv ntej lawm.

10 (יחוח)Yahweh kom cov xibhwb cev (יחוח)Yahweh lus uas yog nws cov tub qhe mus hais tias,

11 vim yog Yahdah tus vajntxwv Manaxes tau ua tej kev qias vuab tsuab thiab ua phem heev dua li cov Amaulais uas nyob ua nws ntej tau ua, thiab nws tej dab mlom ntawd tau ua rau cov Yahdah ua txhaum.

12 Vim li no (יחוח)Yahweh uas yog cov Ixayees Tus Tswv hais li no tias, kuv tab tom yuav coj kev puam tsuaj loj kawg li los rau Yeluxalees thiab Yahdah mas txhua tus uas hnov yuav rhiab pob ntseg.

13 Kuv yuav muab txoj hlua uas ntsuas lub nroog Xamalis lawm los thiab siv lub qe hlau uas ntsuas Ahaj caj ces qhov uas ntseg los dai ntsuas lub nroog Yeluxalees. Thiab kuv yuav ntxuav Yeluxalees yam nkaus li ntxuav lub phaj thiab muab khwb.

14 Kuv yuav muab kuv qub txeeg qub teg uas tseem tshuav laim pov tseg thiab muab lawv rau hauv lawv cov yeeb ncuab txhais tes. Lawv yuav raug luag txeeb thiab lwg tag nrho huvsi,

15 vim lawv tau ua tej uas kuv pom tias phem kawg li thiab ua rau kuv npau taws txij hnub uas lawv tej poj koob yawm txwv tawm hauv Iziv tebchaws los txog niaj hnub nimno.

16 Ntau dua li ntawd Manaxes tseem muab tej tibneeg uas tsis txhaum tua pov tseg coob kawg li rau hauv Yeluxalees ntshav liab vog puv nkaus rau txhua qhov. No yog tej kev txhaum uas loj tshaj qhov uas nws coj cov Yahdah ua txhaum lawv thiaj ua tej uas (יחוח)Yahweh pom tias phem kawg li.

17 Lwm yam haujlwm uas Manaxes ua thiab txhua yam uas nws ua thiab tej kev txhaum uas nws ua mas twb muab sau cia rau hauv phau ntawv uas hais txog Yahdah tej vajntxwv li keeb kwm lawm.

18 Manaxes txawm tuag mus nrog nws tej poj koob yawm txwv nyob.  Lawv muab nws faus rau hauv lub vaj uas nyob ntawm nws lub tsev, yog lub vaj Usxas, mas nws tus tub Asmoos sawv nws chaw ua vajntxwv kav.

​

Asmoos Ua Vajntxwv Kav Yahdah

(2 Vaj Keeb Kwm 33:21-25)

19 Thaum Asmoos sawv ua vajntxwv kav, nws hnub nyoog muaj nees nkaum ob xyoos, nws nyob hauv Yeluxalees kav tau ob xyoos. Nws niam npe hu ua Mesulemes, yog Haluj uas yog tibneeg hauv Yaunpas tus ntxhais.

20 Nws ua tej uas (יחוח)Yahweh pom tias phem kawg li, ib yam nkaus li nws txiv Manaxes tau ua lawd.

21 Nws taug nraim nws txiv tus hneev taw. Nws ua koom tu tej dab mlom uas nws txiv teev thiab pe hawm tej mlom ntawd.

22 Nws muab (יחוח)Yahweh uas yog nws tej poj koob yawm txwv Tus Tswv tso tseg tsis taug (יחוח)Yahweh txojkev.

23 Mas Asmoos cov tub teg tub taws ntaus tswvyim ntxeev siab rau nws thiab muab nws tua rau hauv nws lub tsev.

24 Tiamsis cov pej xeem muab txhua tus uas ntaus tswvyim ntxeev siab rau vajntxwv Asmoos tua huvsi lawm, thiab cov pejxeem tsa nws tus tub Yauxiyah ua vajntxwv nyob nws chaw.  

25 Lwm yam haujlwm uas Asmoos ua mas twb muab sau cia rau hauv phau ntawv uas hais txog Yahdah tej vajntxwv li keeb kwm lawm.

26 Lawv muab nws faus rau hauv nws lub qhov ntxa uas nyob hauv lub vaj Usxas. Mas nws tus tub Yauxiyah sawv nws chaw ua vajntxwv kav.