Yauxiyah Thiab Phau Ntawv Kevcai

(2 Vaj Keeb Kwm 34:1-2,8-28)

1 Thaum Yauxiyah pib ua vajntxwv kav, nws hnub nyoog muaj yim xyoo, nws nyob hauv lub nroog Yeluxalees kav tau peb caug ib xyoos. Nws niam npe hu ua Yedidah yog Adayah uas nyob hauv lub moos Npaukhas tus ntxhais.  

2 Nws ua tej uas (יחוח)Yahweh pom tias zoo, thiab nws taug nraim nws yawg koob Daviv tus hneev taw, nws tsis tig mus rau sab xis lossis sab laug.

3 Xyoo kaum yim uas Yauxiyah ua vajntxwv

kav mas vajntxwv txib Safas uas yog tus tub sau ntawv, yog Axaliyah tus tub uas yog Mesulas li xeeb ntxwv, mus rau hauv (יחוח)Yahweh lub tuam tsev, thiab hais rau nws tias,

4 cia li mus cuag tus tuam pov thawj hlob Hikhiyah kom nws mus suav cov nyiaj uas coj tuaj rau hauv (יחוח)Yahweh lub tuam tsev, yog tej nyiaj uas cov uas zov qhov rooj tau sau ntawm cov pejxeem.

5 Mas muab rau hauv cov tub zog uas tu (יחוח)Yahweh lub tuam tsev txhais tes, es cia lawv them rau cov tub zog uas nyob ntawm (יחוח)Yahweh lub tuam tsev thiab kho lub tuam tsev,

6 yog muab rau cov Kws ntoo, cov Kws ua tsev thiab cov Kws txua pob zeb, thiab siv yuav ntoo thiab tej pob zeb uas txua tau lawd los kho lub tuam tsev.  

7 Tsis tag lawv yuav sau ntawv hais txog tej nyiaj uas lawv tau txais lawd saib siv li cas, rau qhov lawv yeej ua ncaj.

8 Tus tuam pov thawj hlob Hikhiyah hais rau Safas uas yog tus tub sau ntawv tias, kuv tshawb tau phau ntawv kevcai nyob hauv (יחוח)Yahweh lub tuam tsev. Ces Hikhiyah txawm muab phau ntawv ntawd rau Safas thiab nws muab nyeem.

9 Ces Safas uas yog tus tub sau ntawv mus cuag vajntxwv thiab qhia rau vajntxwv tias, koj cov tub qhe twb nchuav tej nyiaj uas nyob hauv lub tuam tsev thiab muab cob rau hauv cov tub zog uas tu (יחוח)Yahweh lub tuam tsev txhais tes lawm.

10 Mas Safas uas yog tus tub sau ntawv hais rau vajntxwv tias, tus pov thawj Hikhiyah muab ib phau ntawv rau kuv. Thiab Safas muab nyeem rau vajntxwv mloog.

11 Thaum vajntxwv hnov tej lus hauv phau kevcai lawd, nws txawm dua rhe nws lub tsho.  

12 Thiab vajntxwv hais rau tus pov thawj Hikhiyah thiab Ahikhas uas yog Safas tus tub thiab Anpaus uas yog Mikhayah tus tub thiab Safas uas yog tus tub sau ntawv thiab Axayah uas yog vajntxwv tus tub qhe hais tias,

13 nej cia li mus ua nug rau (יחוח)Yahweh rau kuv thiab cov pejxeem thiab tag nrho cov Yahdah huvsi, hais txog tej lus hauv phau ntawv no uas tshawb tau lawm. (יחוח)Yahweh txojkev npau taws loj heev tshwm plaws los rau peb lawm, rau qhov peb tej poj koob yawm txwv tsis mloog tej lus hauv phau ntawv no thiab tsis ua raws li txhua yam uas sau cia hais txog peb.

14 Ces tus pov thawj Hikhiyah thiab Ahikhas thiab Anpaus thiab Safas thiab Axayah txawm mus cuag tus pojniam xibhwb Hudah uas cev (יחוח)Yahweh lus uas yog Salus tus pojniam. Salus yog tus uas tu vajntxwv tej tsoos tsho thiab yog Thivas tus tub thiab yog Hoshas tus xeeb ntxwv. Tus pojniam xibhwb ntawd nyob hauv Yeluxalees ceg kaum nroog uas ua tshiab, ces lawv txawm nrog nws tham.  

15 Tus pojniam ntawd hais rau lawv tias, (יחוח)Yahweh uas yog cov Ixayees Tus Tswv hais li no tias, cia li hais rau tus uas txib nej tuaj cuag kuv tias,

16 (יחוח)Yahweh hais li no tias, saib nawj, kuv yuav tso tej xwm txheej phem los raug lub chaw no thiab raug tej tibneeg uas nyob hauv raws li txhua lo lus hauv phau ntawv uas Yahdah tus vajntxwv tau nyeem ntawd.

17 Vim lawv twb tso kuv tseg thiab hlawv xyab xyeem rau luag tej dab thiaj ua rau kuv chim rau txhua yam uas lawv txhais tes ua, vim li no kuv txojkev chim yuav npau tshwm plaws rau lub chaw no yuav tav tsis tau li.

18 Tiamsis Yahdah tus vajntxwv uas txib nej tuaj ua nug rau (יחוח)Yahweh ntawd, nej cia li hais li no rau nws tias, (יחוח)Yahweh uas yog cov Ixayees Tus Tswv hais li no tias, hais txog tej lus uas koj tau hnov ntawd,

19 vim koj ntxeev dua siab thiab koj txo koj lub hwj chim rau ntawm (יחוח)Yahweh rau thaum koj hnov kuv hais li cas tawm tsam lub chaw no thiab cov tibneeg uas nyob hauv hais tias lawv yuav nyob do cuas thiab raug foom tsis zoo, thiab vim koj dua rhe koj lub tsho quaj rau ntawm kuv xub ntiag, mas kuv kuj hnov lawm. (יחוח)Yahweh hais li no ntag.  

20 Vim li no, saib nawj, kuv yuav coj koj mus nrog koj tej poj koob yawm txwv nyob thiab mus rau hauv koj lub qhov ntxa ua siab tus yees, thiab koj lub qhov muag yuav tsis pom tej xwm txheej phem huvsi uas kuv yuav coj los raug lub chaw no. Lawv kuj coj tej lus ntawd los hais rau vajntxwv mloog.