Yauxiyah Rhuav Tej Kev Ua Dab

(2 Vaj Keeb Kwm 34:3-7,29-33,35:1-19)

1 Ces vajntxwv txawm txib tibneeg mus hu kom Yahdah thiab Yeluxa-lees cov kev txwj laug sawvdaws tuaj txoos ua ke ntawm nws.

2 Mas vajntxwv mus rau hauv (יחוח)Yahweh lub tuam tsev. Cov Yahdah huvsi thiab cov uas nyob hauv Yeluxalees sawvdaws thiab cov pov thawj thiab cov xibhwb cev (יחוח)Yahweh lus, thiab cov pej xeem, cov hlob thiab cov yau sawvdaws nrog nws mus. Ces nws txawm nyeem tag nrho phau ntawv cog lus tseg uas tshawb tau hauv (יחוח)Yahweh lub tuam tsev los rau lawv mloog.

3 Vajntxwv sawv ntsug ntawm tus ncej nrog (יחוח)Yahweh cog lus tias nws yuav ua lub neej raws nraim (יחוח)Yahweh thiab tuav rawv (יחוח)Yahweh tej lus cob qhia thiab nws tej lus qhia thiab nws tej kab ke kawg siab kawg ntsws, yuav ua raws nraim li tej lus sib cog tseg uas sau cia rau hauv phau ntawv ntawd. Mas cov pejxeem sawvdaws kuj nrog nws koom cog lus li ntawd.

4 Vajntxwv hais rau tus tuam pov thawj hlob Hikhiyah thiab cov pov thawj yau thiab cov uas zov qhov rooj kom lawv coj tej twj huvsi uas siv rau dab Npa‑as thiab dab Aselas thiab lub hnub lub hli thiab tej hnub qub saum nruab ntug huvsi tawm hauv (יחוח)Yahweh lub tuam tsev mus. Mas nws muab tej ntawd hlawv rau sab nraum lub nroog Yeluxalees rau hauv tej teb ntawm lub hav Khiloos, thiab muab tej tshauv uas hlawv ntawd coj mus rau ntawm lub moos Npe‑ees.

5 Nws hle cov pov thawj teev dab uas Yahdah tej vajntxwv tau muab tsa cia hlawv hmoov xyab xyeem rau ntawm tej chaw siab hauv Yahdah tej moos thiab ib ncig lub nroog Yeluxalees, thiab hle cov uas hlawv hmoov xyab rau dab Npa‑as thiab lub hnub lub hli thiab tej hnub qub thiab txhua yam uas nyob saum nruab ntug.

6 Nws muab tus ncej dab Aselas rho tawm hauv (יחוח)Yahweh lub tuam tsev mus rau nraum lub nroog Yeluxa-lees txog lub hav Khiloos. Nws muab hlawv rau ntawm lub hav Khiloos muab tsoo ua hmoov thiab muab w rau saum cov pejxeem tej qhov ntxa.

7 Nws rhuav tshem cov txivneej muag cev tej tsev hauv (יחוח)Yahweh lub tuam tsev uas yog lub chaw uas cov pojniam ntos ntaub rau dab Aselas.

8 Nws coj cov pov thawj huvsi tawm hauv Yahdah tej moos mus thiab ua qias puas tsuas tej chaw siab uas cov pov thawj ntawd hlawv hmoov xyab txij ntawm lub moos Kenpas mus txog lub moos Npe‑awsenpas. Nws rhuav tshem tej chaw siab teev dab ntawm txojkev uas nkag lub rooj loog Yahshua uas yog tus thawj kav lub nroog, uas nyob ntawm lub rooj loog loj sab laug.

9 Tiamsis cov pov thawj uas ua haujlwm ntawm tej chaw siab ntawd tsis muaj feem nce mus rau ntawm (יחוח)Yahweh lub thaj xyeem hauv lub nroog Yeluxalees, lawv tsuas yog muaj feem nrog lawv cov kwvtij noj ncuav tsis xyaw keeb xwb.

10 Nws ua qias puas tsuas lub chaw Thaufes uas nyob hauv lub hav Npeehinoos, kom thiaj tsis muaj leejtwg muab lawv tej tub tej ntxhais hlawv xyeem rau dab Maulej.

11 Nws rhuav tshem tej nees uas Yahdah tej vajntxwv muab xyeem rau lub hnub ntawm lub rooj loog uas nkag rau hauv (יחוח)Yahweh lub tuam tsev uas nyob ze ntawm tus nom Nathameles chav tsev uas nyob hauv lub loog tuam tsev.  Nws kuj muab tej tsheb ua rog uas xyeem rau lub hnub hlawv pov tseg.

12 Tej thaj uas Yahdah tej vajntxwv ua rau saum Ahaj txheej tsev las tshav thiab tej thaj uas Manaxes ua rau hauv ob lub tshav puam hauv (יחוח)Yahweh lub tuam tsev, mas vajntxwv muab rhuav thiab tsoo ua tej dwb daim, thiab muab tej hmoov ntawd pov rau hauv lub hav Khiloos.

13 Nws ua qias puas tsuas tej chaw siab teev dab uas nyob ntawm Yeluxalees sab hnub tuaj ntawm lub Roob Puam Tsuaj sab nrad, yog tej chaw uas cov Ixayees tus vajntxwv Xalaumoos ua cia rau dab Athaules uas yog cov tibneeg Xaidoos tus dab qias vuab tsuab, thiab ua rau dab Khemauj uas yog cov Mau‑as tus dab qias vuab tsuab, thiab ua rau dab Mikhoos uas yog cov Asmoos tus dab qias vuab tsuab.

14 Nws muab tej ncej teev dab tsoo ua tej dwb daim thiab muab tej ncej dab Aselas ntov pov tseg thiab muab pob txha tibneeg tuag nchuav puv nkaus tej chaw ntawd.

15 Dua li ntawd, lub thaj ntawm lub moos Npe‑ees thiab lub chaw siab teev dab uas Nenpas tus tub Yelaunpau‑as ua thiab coj cov Ixayees mus ua txhaum, mas vajntxwv muab lub thaj thiab lub chaw siab ntawd rhuav pov tseg, muab hlawv muab tsoo ua hmoov. Nws kuj hlawv tus ncej dab Aselas.

16 Thaum Yauxiyah tig xub ntiag saib nws pom tej qhov ntxa uas nyob saum lub roob ntawd. Nws hais kom rho tej pob txha hauv qhov ntxa los mas muab hlawv rau saum lub thaj ua kom qias puas tsuas raws li (יחוח)Yahweh tej lus uas (יחוח)Yahweh tus tibneeg hais txog tom hauv ntej tias yuav muaj li ntawd.

17 Thiab nws hais tias, tus ncej zeb uas kuv pom tim ub yog abtsi? Cov tibneeg hauv lub moos ntawd hais tias, yog lub qhov ntxa uas faus (יחוח)Yahweh tus tibneeg uas tuaj hauv Yahdah tuaj hais tom hauv ntej txog tej no uas koj tau ua rau lub thaj ntawm Npe‑ees.

18 Vajntxwv txawm hais tias, cia nws nyob nws. Tsis txhob kheev leejtwg muab nws tej pob txha tshais chaw. Lawv thiaj muab tso tseg nrog tus xibhwb uas tuaj Xamalis teb chaws tuaj cov pob txha nyob ua ke.

19 Yauxiyah kuj rhuav tshem tej tsev dab huvsi saum tej chaw siab uas nyob hauv Xamalis tej moos uas cov Ixayees tej vaj ntxwv tau ua cia uas ua rau (יחוח)Yahweh chim. Nws ua txhua yam rau tej chaw ntawd ib yam li nws tau ua rau ntawm Npe‑ees.

20 Nws muab cov pov thawj sawvdaws uas ua haujlwm rau tej chaw siab ntawd tua rau saum tej thaj ntawd thiab hlawv tej pob txha rau saud. Ces nws txawm rov mus rau Yeluxalees lawm.

21 Vajntxwv hais rau cov pejxeem sawvdaws tias, cia li ua kevcai Hla Dhau rau (יחוח)Yahweh uas yog nej Tus Tswv raws li uas sau cia rau hauv phau ntawv sib cog lus no.

22 Rau qhov lawv tsis tau ua txoj kevcai Hla Dhau no txij thaum cov thawj kav cov Ixayees los lossis ncua sijhawm uas muaj vajntxwv kav cov Ixayees thiab muaj vajntxwv kav cov Yahdah los lawm.  

23 Xyoo kaum yim uas Yauxiyah ua vaj ntxwv kav, lawv ua txoj kevcai Hla Dhau no rau hauv lub nroog Yeluxalees.

24 Dua li ntawd, Yauxiyah tseem rhuav tshem tej txiv neeb txiv yaig, tej uas txawj ua khawv koob yees siv, thiab tej dab qhua, tej dab mlom thiab txhua yam qias vuab tsuab uas pom hauv Yahdah tebchaws thiab hauv Yeluxalees, xwv nws thiaj li coj tau txoj kevcai txhua nqe uas sau cia rau hauv phau ntawv uas tus pov thawj Hikhiyah tshawb tau hauv (יחוח)Yahweh lub tuam tsev kom tiav.

25 Tej vajntxwv uas nyob ua ntej nws tsis muaj ib tug zoo li nws uas tig kiag los cuag (יחוח)Yahweh kawg siab kawg ntsws kawg plab kawg plawv thiab ua raws li Mauxes txoj kevcai huvsi.  Thiab tsis muaj ib tug uas sawv kav ua nws qab yuav zoo thooj li nws.  

26 Tiamsis (יחוח)Yahweh tseem tsis tso nws txojkev npau taws loj heev tseg.  Nws txojkev chim tseem npau tshwm rau Yahdah yog tim txhua yam uas Manaxes tau ua cia ua rau (יחוח)Yahweh chim.

27 Thiab (יחוח)Yahweh hais tias, kuv yuav muab cov Yahdah rhuav tshem kom ploj ntawm kuv lub qhov muag, ib yam li kuv rhuav tshem cov Ixayees. Thiab kuv yuav muab lub nroog no uas kuv xaiv cia lawm laim pov tseg, yog lub nroog Yeluxalees thiab lub tuam tsev uas kuv tau hais tias, kuv lub npe yuav nyob qhov ntawd mus ib txhis.

​

Yauxiyah Tuag

(2 Vaj Keeb Kwm 35:20-36:1)

28 Lwm yam haujlwm uas Yauxiyah ua, thiab txhua yam uas nws ua twb muab sau cia rau hauv phau ntawv uas hais txog cov Yahdah tej vajntxwv li keeb kwm lawm.

29 Lub sijhawm uas nws ua vajntxwv, Iziv tus vajntxwv Nekhaus mus txog tus dej Yufetis mus pab Axilias tus vajntxwv.  Ces Yauxiyah txawm tawm mus ua rog rau nws. Thaum Falaus Nekhaus pom Yauxiyah, txawm muab nws tua rau lub tiaj Mekidaus lawm.

30 Mas nws cov tub teg tub taws muab tsheb ua rog thauj nws lub cev tuag ntawm Mekidaus los rau hauv lub nroog Yeluxalees, thiab muab faus rau hauv nws lub qhov ntxa. Mas cov pejxeem muab roj hliv ywg Yauxiyah tus tub Yahahas thiab tsa nws ua vajntxwv nyob nws txiv chaw.

​

Yahahas Ua Vajntxwv Kav Yahdah

(2 Vaj Keeb Kwm 36:2-4)

31 Thaum Yahahas pib ua vajntxwv kav, nws hnub nyoog muaj nees nkaum peb xyoos, nws nyob hauv Yeluxalees kav tau peb lub hlis. Nws niam npe hu ua Hamuthas, yog Yeremyah uas yog tibneeg hauv Linas tus ntxhais.  

32 Nws ua tej uas (יחוח)Yahweh pom tias phem kawg li, ib yam li txhua yam uas nws tej poj koob yawm txwv tau ua lawd.

33 Mas Falaus Nekhaus muab nws ntes khi cia rau ntawm Linplas hauv Hamas tebchaws tsis kheev Yahahas ua vajntxwv kav Yeluxalees, thiab yuam Yahdah them se ib puas talas nyiaj thiab ib talas kub.

34 Mas Falaus Nekhaus tsa Yauxiyah tus tub Eliyakhis ua vajntxwv nyob nws txiv Yauxiyah chaw, mas muab nws tis dua npe hu ua Yahyakhis. Falaus coj Yahahas mus rau Iziv tebchaws ces Yahahas tuag qhov ntawd lawm.

35 Mas Yahyakhis muab nyiaj thiab kub rau Falaus raws li Falaus hais. Nws sau se hauv lub tebchaws thiab yuam cov pejxeem muab nyiaj muab kub raws li txhua tus uas xam tau saib muaj los pluag xa mus rau Falaus Nekhaus.

​

Yahyakhis Ua Vajntxwv Kav Yahdah

(2 Vaj Keeb Kwm 36:5-8)

36 Thaum Yahyakhis pib ua vajntxwv kav, nws hnub nyoog muaj nees nkaum tsib xyoos, nws nyob hauv Yeluxalees kav tau kaum ib xyoos.  Nws niam npe hu ua Xenpudah, yog Pedayah uas yog tibneeg hauv Lumas tus ntxhais.

37 Nws ua tej uas (יחוח)Yahweh pom tias phem ib yam li txhua yam uas nws tej poj koob yawm txwv tau ua lawd.