Sha-ul Ntaus Yeej Cov Asmoos

1 Nahas uas yog tibneeg Asmoos txhij rog tuaj vij ntaus lub moos Yanpes Kile‑as. Cov tibneeg hauv lub moos Yanpes sawvdaws hais rau Nahas tias, thov koj nrog peb sib cog lus mas peb yuav zwm rau koj.

2 Tiamsis Nahas uas yog tibneeg Asmoos hais rau lawv tias, tsuav yog ua li no kuv thiaj kam nrog nej sib cog lus xwb. Kuv yuav kaus nej txhua tus sab qhov muag xis pov tseg thiaj ua rau cov Ixayees poob ntsej muag.

 3Cov kev txwj laug hauv lub moos Yanpes hais rau nws tias, thov zam sijhawm rau peb xya hnub xwv peb thiaj tso tub xa xov mus hais thoob plaws Ixayees tebchaws. Yog tsis muaj leejtwg cawm tau peb, peb yuav muab peb cob rau hauv koj txhais tes.  

4 Thaum cov tub xa xov tuaj txog Kinpe‑as uas yog Sha-ul lub moos, lawv piav tej xwm ntawd rau cov pejxeem hnov, mas cov pej xeem sawvdaws kuj quaj nrov nrov.

5 Thaum Sha-ul raws nyuj tom tshav zaub los, Sha-ul hais tias, cov pejxeem raug abtsi es lawv quaj? Lawv thiaj piav rau nws paub txog tej xov uas cov tibneeg hauv Yanpes tuaj hais.

6 Thaum Sha-ul hnov tej lus ntawd lawd, (יחוח)Yahweh Tus Ntsuj Plig Dawb Huv los kav tag nrho Sha-ul, nws thiaj npau taws ceev.

7 Nws muab kiag ib nkawg nyuj los txiav ua tej ywb yav muab rau cov tub xa xov xa mus thoob plaws Ixayees tebchaws hais tias, yog leejtwg tsis tuaj nrog Sha-ul thiab Xamuyees mus mas nws tej nyuj yuav raug li no. Mas cov pejxeem sawvdaws kuj ntshai (יחוח)Yahweh heev, lawv thiaj tuaj ua kiag ib nqag.

8 Thaum Sha-ul txhij lawv tuaj ua ke ntawm Npexes, suav Ixayees cov txivneej muaj 300,000 leej thiab suav Yahdah cov txivneej muaj 30,000 leej.

9 Lawv thiaj hais rau cov tub xa xov uas tuaj ntawd tias, nej cia li hais li no rau cov tibneeg hauv Yanpes Kile‑as tias, tagkis thaum tshav ntuj kub nej yuav txais kev cawm dim. Thaum cov tub xa xov rov los hais rau cov hauv Yanpes, lawv kuj zoo siab kawg.  

10 Yog li no cov hauv Yanpes hais rau Nahas tias, tagkis peb yuav muab peb cob rau koj, koj cia li ua rau peb raws li koj pom zoo.

11 Tagkis tom qab, Sha-ul muab nws cov tib neeg faib ua peb pab. Thaum kaj ntug txoog, lawv txeem rau hauv cov Asmoos lub yeej tua cov Asmoos mus txog tav su. Cov uas dim tsis tuag kuj khiav ua sab ua sua tsis tshuav ob leeg nyob ua ke li.

12 Ces cov pej xeem txawm hais rau Xamuyees tias, cov uas hais tias, Sha-ul yuav kav peb lov? Yog leej twg? Cia li coj cov tibneeg ntawd tawm los, peb yuav muab tua pov tseg.

13 Tiamsis Sha-ul hais tias, hnub no tsis txhob cia leejtwg raug tua kiag li, rau qhov hnub no (יחוח)Yahweh tau cawm cov Ixayees dim.

14 Xamuyees thiaj hais rau cov pejxeem tias, peb cia li mus rau Kilakas thiab tsa kom muaj vajntxwv kav tebchaws dua ib zaug.

15 Cov pejxeem sawvdaws thiaj li mus rau lub moos Kilakas thiab lawv tsa Sha-ul ua vajntxwv rau ntawm (יחוח)Yahweh xub ntiag hauv lub moos Kilakas. Lawv tua tsiaj xyeem rau (יחוח)Yahweh ua kevcai sib raug zoo, mas Sha-ul thiab cov Ixayees sawvdaws kuj zoo siab xyiv fab kawg rau qhov ntawd.